Luke 9

Jesus ehaunalia nakama kaukali aia

(Mat 10.5-15; Mrk 6.7-13)

1Jesus eanaa aꞌe sehui ma lua nakama kaukali aia la noꞌuku hakoa, kena iau aꞌe nakama la namahi kehaise nakipua saꞌino hakoa ikaha, ia namahi kekonaꞌi nakama lavea nokaualeꞌa. 2Kena Jesus ehaunalia nakama la nokaukaꞌu nakipukipu kenoholana Keakua, ia nokonaꞌi nakama lavea ikaualeꞌa. 3Jesus eme aꞌe nakama la, “Keualoko okou ekaꞌa, okou iseko nilaꞌau hahaele ma okou, seko nipunaꞌeke, seko naꞌai, seko namoni, ia ko pamalo hokahi oia. 4Keualoko okou ekaꞌa iloko hale, noho inaa, ikae keualoko okou meo ikaha ma kemakaꞌina la. 5Ia poi nikama kemakaꞌina la sehihai iko okou, kena kaꞌa ikaha ma kemakaꞌina na, ia kaikahi namulivae okou, iailoa nakama la pela lakou esala.”

6Kena iko nakama kaukali la ikaꞌa i namakaꞌina la, nokaukaꞌu kelono kaualeꞌa Keakua, kena ikonaꞌi nakama lavea naꞌina la hakoa.

Herod semakino Jesus

(Mat 14.1-12; Mrk 6.14-29)

7Kekuꞌu Herod ulono namea kela Jesus epena la. Ia kena kekuꞌu la ukipuaina, maikinimea alakama ukakala ma kela o John Baptist uola muli ikaha ma kemake. 8Ia alakama emea ma kela Elijah uvaꞌai mai muli. Ia alakama emea ma kela hekama hakae nakakala Keakua imua la kela uola muli. 9Ia Herod eme aꞌe, “Anau nime aꞌe napulepule anau la io nosepe keua John. Anau elono hea kama na epena. Kena oai kama na?” Kena Herod ehamamahi ma iꞌike Jesus.

Jesus ehanai lima simaka nakama

(Mat 14.13-21; Mrk 6.30-44; Jhn 6.1-14)

10Keualoko nakama kela Jesus nihaunalia la uvaꞌai muli, nakama la ekakala aꞌe kama la namea lakou epena la. Kena Jesus uko nakama la io maia i kemakaꞌina emale ma Bethsaida. 11Ia keualoko keonohenua la umakino keꞌina Jesus ehaele la, nakama la ekaukali vamuli kama la. Ko kama la ikakala hakaualeꞌa keonohenua la, kena ime aꞌe nakama la nakipukipu kenoholana Keakua, kena ikonaꞌi nakama lavea la nokaualeꞌa.

12Keualoko kelaa la ukapili isulu, ko sehui ma lua nakama kaukali la io nome aꞌe Jesus, “Keꞌina nei sehihale. Haunalia keonohenua nei i namakaꞌina kapili mai la nosee niꞌai ma lakou, ia isee hoi nihale ma lakou imoe.”

13Ko Jesus ime aꞌe nakama la, “Okou iau aꞌe niꞌai ma nakama la iꞌai.”

Kena iko nakama kaukali la ime aꞌe, “Makou eisi kaulima nahalaoa, ia sakamaiꞌa oia. Aꞌoe hihai makou ikaꞌa nosui niꞌai ma keonohenua nei hakoa?” 14(Kela lima nasimaka nakanaka hakoa enoho ilaa.)

Kena iko Jesus ime aꞌe nakama kaukali aia la, “Me aku keonohenua la inoho kai kipulima nakama.”

15Kena iko nakama la ime aꞌe keonohenua la hakoa inoho ilalo. 16Kena Jesus uko kaulima nahalaoa la ma sakamaiꞌa la, noꞌila iluna kevaelani noloku. Kena kama la ekohi nahalaoa la, kena iau aꞌe naꞌai la i nakama kaukali la novavae aꞌe keonohenua la. 17Nakama la hakoa eꞌai nopohu. Kena nakama kaukali la uhaele hanaopo nohao sehui ma lua naꞌeke namuli halaoa.

Peter eme aꞌe Jesus, “Aꞌoe o KeMesaea”

(Mat 16.13-19; Mrk 8.27-29)

18Kela heaho Jesus eloku soia, ia nakama kaukali aia la enoho maia. Kena Jesus evasili aꞌe nakama la, “Ea? Keonohenua la emakino oai anau? Nakakala lakou eme pehe?”

19Ko nakama la ime aꞌe, “Alakama emea maꞌoe John Baptist. Alakama emea maꞌoe Elijah. Ia alakama emea maꞌoe o kekama hakae nakakala Keakua imua kela uola muli.”

20Kena iko Jesus ivasili aꞌe nakama la, “Ia okou emea ma oai anau?”

Ko Peter ime aꞌe, “Aꞌoe o keMesaea, kekama kela Keakua ehaunalia iho.”

Jesus ekakala aꞌe kemake aia

(Mat 16.20-28; Mrk 8.30–9.1)

21Ko Jesus ihamakaꞌu aꞌe nakama kaukali la isekakala aꞌe alakama, kena iko ime aꞌe, 22“Ke{kama ekipu kama} meikili komaꞌi nahalono lihu. Nakama hamakua na{Jiu}, namaakua hamakua, ia ma nakama polopolo nakuaa la mesehihai {kama ekipu kama}, kena mekaia kama la nomake. Kena keaho kanahakoukolu, kama la memasiꞌe ikaha ma kemake.”

23Kena iko Jesus ime aꞌe nakama la hakoa, “Poi hekama hihai ikaukali mai anau, kama na ikiaꞌi namea aia hihai, uhapili {kolosi} aia la keaho ma keaho, kena ukaukali mai anau. 24Oai kekama ehakekele ilolosi kanaola, meilano keola hamaoni. Ia oai kekama eaunahie kekiaꞌi keola aia nokaukali mai anau, kama la meiko keola hamaoni la. 25Ame sekonu pela hekama ihakau namea hakoa i kemaalama nei, ia ulano keola hamaoni.

26“{Kama ekipu kama} meihaele iho i namahi aia, ma namahi Kamana, ia ma na{enselo} ekapu. Keualoko la, poi hekama enapa i anau, ia enapa i nakakala anau, kena anau menapa i kama na hoi. 27Anau eme aku kehamaoni. Imua okou meimake hakoa, alakama okou kela ekuu vanei meiꞌike Keakua ehamai nohamakua kenoholana aia la.”

Keakua uhuli aꞌe namahi aia i kinokama Jesus

(Mat 17.1-8; Mrk 9.2-8)

28Jesus uoki kekakala aꞌe keonohenua la. Kena kapili evalu naaho ulaꞌa, kama la uko Peter, ia ma John lakou ma James nokaꞌa iluna kemouna noloku. 29Keualoko kama la niloku, namaisu aia la emasina. Ia naauꞌahu aia umaꞌini ivaꞌiva. 30-31Kena Moses laua ma Elijah ekuu masina hoi, nokakala lakou ma Jesus, pela Jesus meimake iloko Jerusalem, kena uola muli novaꞌai i kevaelani.

32Peter ia ma kelaa koꞌolua uhimoe haeꞌo. Ia keualoko nakama la niila aꞌe, nakama la uꞌike kemasina Jesus ia ma kemasina koꞌolua kela ekuu maia la. 33Keualoko Moses laua ma Elijah nikapili ikaꞌa ikaha, ko Peter ime aꞌe, “Kealiꞌi, kaualeꞌa pela makou inei, ihakuu koukolu nakamahale ma okou; kamahale aꞌoe, kamahale Moses ia ma kamahale Elijah.” Ia Peter semakino hea aia ekakala aꞌe la.

34Keualoko Peter oikakala, puleulehu la uhaele iho ilalo, noꞌuhi nakama la hakoa. Kena koꞌokolu la umakaꞌu. 35Kena iko Keakua ikakala iho iloko puleulehu la ma, “Kenei o kaukama. anau ekini kama nei, kena okou ihalono aꞌe kama nei.”

36Keualoko Keakua nikakala iho, Jesus soia ekuu mai la. Peter, James, lakou ma John unoho semuu. Ia keualoko la, sehikama ekakala aꞌe hea lakou eꞌike la.

Jesus ehaise kipua saꞌino ikaha ma kaupeala

(Mat 17.14-18; Mrk 9.14-27)

37Ia kaiao, nakama la uo iho ilalo kemouna la, nokili keonohenua elahi. 38Kela hekama enoho ilaa eanaa aꞌe Jesus, “Rabai, hamai nomaka kaupeala anau nei. Kenei kaukahi kama anau. 39Kipua saꞌino la ekau iloko kama nei noapihi kevalo. Kena kaupeala la esuꞌe nohakapeꞌape valalo kaꞌele, kena kealaꞌala la uꞌo puꞌua, ia kinokama aia umasesele. Ia kipua la ehainakaa kehaele ikaha. 40Anau eainoa aꞌe nakama kaukali aꞌoe la ihaise kipua la ikaha ma kama nei, ia nakama la selavaa.”

41Ko Jesus ime aꞌe nakama la, “Nakama kaukama okou na ikau kehakina, ia okou evale oia. Anau enoho ma okou saika loloa haeꞌo, ia okou sehakina anau.” Kena iko Jesus ime aꞌe kamana kaupeala la, “Ko mai kaupeala aꞌoe na.”

42Keualoko kaupeala la nihaele aꞌe, kipua saꞌino la ukau kama la nosuꞌe nohakapeꞌape valalo kaꞌele. Kena iko Jesus ihamakaꞌu aꞌe kipua la, kena ihaise kipua la ikaha ma kaupeala la. Vahola kaupeala la ukaualeꞌa, kena Jesus eau aꞌe muli kaupeala la i kamana aia la. 43Keualoko nakama la eꞌike namahi hananiu Keakua la, nakama la umasalo hakoa.

Jesus ekakala kana make

(Mat 17.22-23; Mrk 9.30-32)

Nakama la hakoa umasalo i namahi kela Jesus ehuli aꞌe la. Kena iko Jesus ime aꞌe nakama kaukali aia la, 44“Okou ihalono hakaualeꞌa nakakala anau nei. Kela hekama meau aꞌe {kama ekipu kama} i nakama hananiu.” 45Ia nakama kaukali la semakino hea Jesus ekakala aꞌe lakou. Maikinimea Keakua ehuu kehakaꞌoko nakakala Jesus la ikaha ma nakama la, isemakino nakama la kehakaꞌoko la. Ia nakama la enapa kevasili aꞌe Jesus kela kehakaꞌoko nakakala aia la.

Oai kekama meihananiu

(Mat 18.1-5; Mrk 9.33-37)

46Nakama kaukali Jesus la uhakauoki solakou, pela oai kekama lakou mehananiu. 47Ia Jesus umakino nahakaꞌoko nakama la, kena isau kamaliꞌi holiliꞌi nohakuu kevahi aia. 48Kena iko Jesus ime aꞌe nakama la, “Poi hekama ekaukali nakipukipu anau, kena hihai nakamaliꞌi penei, kama na ehihai anau hoi. Poi hekama ehihai anau, kama na ehihai kekama kela ehaunalia iho anau la hoi. Ia kekama moulalo okou hakoa, kena kekama hananiu.”

Hekama okou

(Mrk 9.38-40)

49Kena John eme aꞌe, “Kealiꞌi, makou eꞌike kekama kela ehaise nakipua saꞌino i kemale aꞌoe. Kena makou epui kama la, maikinimea kama la sehikama kaukali aꞌoe.”

50Ia Jesus eme aꞌe kama la, “Aꞌoe isepui kama la. Poi hekama sehakauꞌaa ma okou, kena hekama okou.”

Kemakaꞌina i Samaria

51Keualoko Jesus ukapili ihaele i kevaelani, kama la uhaele valoko Samaria nokae Jerusalem. 52Kena kama la ehaunalia nakama kaukali aia la imua aia, nokaꞌa iloko kemakaꞌina i Samaria, nokanakana keꞌina aia memoe. 53Ia nakama kemakaꞌina la sehihai Jesus, maikinimea kama la ehaele i Jerusalem.*f5* 54Ia keualoko James laua ma John emakino pela nakama kemakaꞌina la sehihai Jesus, koꞌolua eme aꞌe, “Kealiꞌi, aꞌoe hihai maua ianaa keahi kevaelani ihaele iho noseu nakama kemakaꞌina la?”

55Kena iko Jesus ihakiꞌe nohai aꞌe koꞌolua la, 56kena ikaꞌa i kelaa makaꞌina.

Nakama hihai kaukali Jesus

(Mat 8.19-22)

57Keualoko nakama la nio valoko keala, kela hekama eme aꞌe Jesus, “Anau mekaukali aꞌoe heꞌina pehe aꞌoe haele.”

58Ia Jesus eme aꞌe kama la, “Alamanu emoe nalua lakou, ia namanu lelele eisi naohana lakou; ia {kama ekipu kama} seisi keꞌina aia inoho.”

59Kena iko Jesus ime aꞌe kelaa kama, “Kaukali mai anau.” Ko kama la ime aꞌe, “Kealiꞌi. Hakali ikanu kamana anau la imua.”

60Ia Jesus eme aꞌe kama la, “Nakama kela seiko keola hamaoni la ekau kekanu nakama emake. Ia aꞌoe uhaele nokakala pela Keakua mehamai nohamakua kenoholana aia la.”

61Ko kela kama ime aꞌe, “Kealiꞌi, anau mekaukali aꞌoe. Ia anau amehaele imua noaloha aꞌe nahaleaina anau la.”

62Kena iko Jesus ime aꞌe, “Poi hekama uko pulamoa aia,*f6* kena ihaele novelevele kalina, ia kena imuli ehakaꞌoko kekiaꞌi kalina aia la, kama la mesekau kekae kenoholana Keakua.”

Currently Selected:

Luke 9: ojv

Highlight

Copy