Luke 11

Kipukipu keloku

(Mat 6.9-13; 7.7-11)

1Kela heaho Jesus enoho noloku. Ia keualoko kama la nioki keloku, kela hekama kaukali aia la eme aꞌe, “John aoaꞌo nakama kaukali aia la iailoa keloku. Kealiꞌi, aoaꞌo mai makou iailoa laoi keloku hoi.”

2Ko Jesus ime aꞌe nakama la, “Keualoko okou eloku, okou ikakala penei,

‘Kamana

Makou hakoa ihamalu kemale aꞌoe ekapu.

Hamai nohamakua naonohenua hakoa.

3Au mai niꞌai ma makou keaho ma keaho.

4Haialoha mai makou nia makou ehaisala,

Ihau poi makou ehaialoha nakama hakoa kela haisaꞌino mai makou.

Sehakaꞌi makou ikaoleole hia namakeala saꞌino.’ ”

5Kena Jesus eme aꞌe nakama la, “Poi hekama okou ehaele kehale kesoa aia ilakonu kepo, kena iainoa aꞌe kama la ma, ‘Kausoa, au mai koukolu nahalaoa, ia anau meisui muli aku. 6Kesoa anau la ukae mai keholau aia, ia anau sehiꞌai au aꞌe kama la iꞌai.’

7“Kena kesoa aꞌoe iloko hale la meme aku, ‘Kumoe anau hanoa aꞌoe. Kokoꞌa hale makou nei napui avale, ia nakamaliꞌi anau nei emoe manau kapaꞌau hokahi. Kena anau selavaa kemahulu noau aku niꞌai.’

8“Anau eme aku, niaina koꞌolua la esoa laoi, kama la mesehihai keau aꞌe naꞌai la. Ia poi kama imaka hale la ekauhano keainoa aꞌe, kama iloko hale la memahulu noau aꞌe hea kama la hihai.

9“Anau eme aku okou, ainoa aꞌe Keakua, kena kama la meau aku nia okou hihai la. Poi okou sesee, kena okou melave. Poi okou kikili kokoꞌa, kena kokoꞌa la mekalaꞌi aku ma okou. 10Poi hekama eainoa, kama na meiko. Ia poi hekama esesee, kama na meilave. Poi hekama ekikili kokoꞌa, kokoꞌa la mekalaꞌi aꞌe ma aia.

11“Poi kamaliꞌi eainoa aꞌe kamana aia la iau aꞌe keiꞌa, kama la selavaa keau aꞌe keꞌaka. 12Ia ame kamaliꞌi la me aꞌe kehua moa, kamana aia la selavaa keau aꞌe heunu. 13Niaina nakipukipu okou saꞌino, okou iailoa keau aꞌe namea kaualeꞌa i nakamaliꞌi okou la. Ia hamaoni, Kamana okou i kevaelani la eailoa keau aꞌe Keanana Kapu i nakama okou kela eainoa aꞌe i aia la.”

Jesus ia ma Baꞌal Zebub

(Mat 12.2-30; Mrk 3.20-27)

14Kela heaho, Jesus uhaise kipua saꞌino ikaha ma kekama kela selavaa kekakala. Kena keualoko kipua la nihaele ikaha la, kama la ulavaa kekakala, ia kena keonohenua la umasalo. 15Ia alakama keonohenua la eme aꞌe ma, “Jesus esasaꞌa namahi Baꞌal Zebub, kipua hamakua nakipua saꞌino hakoa. Kela hea Jesus elavaa kehaise nakipua saꞌino la ikaha.”

16Alakama ekaiꞌi Jesus ma ihuli aꞌe lakou nahaꞌaku i namahi Keakua. 17Ia Jesus umakino nahakaꞌoko nakama la, kena ime aꞌe, “Poi nakama henua la ehavavaꞌee solakou, nakama la memake. Ia pena haimakua ehavavaꞌee solakou, nakama la meselavaa kenoho kaualeꞌa. 18Poi nakipua Satan ehavavaꞌee solakou, kena namahi kama la meimaseuseu.

“Anau ekakala aku penei, maikinimea okou emea ma Baꞌal Zebub eau mai namahi anau ihaise nakipua la ikaha. 19Anau sehuli aꞌe namahi Baꞌal Zebub ihaise nakipua aia la ikaha. Seai. Nakama kaukali okou la ehuli aꞌe namahi ai kehaise nakipua la ikaha? Nakama la solakou meme aku pela nakakala okou la esala. 20Emeia anau esasaꞌa namahi Keakua nohakui nakipua saꞌino la ikaha. Ia kena okou emakino pela Keakua uhamai nohamakua kenoholana aia la.

21“Keualoko kama eivi la elolosi hale aia la ma nahana aia, naheheaꞌu aia isemounu kia. 22Kama la ehakina nahana aia la ilolosi kaualeꞌa naheheaꞌu aia la. Ia ame kelaa kama eivi haimahi ehamai novuhu laua ma kama kehale la la, kena kama haimahi la meko nahana kama kehale la ikaha, kena ivavae namea la.

23“Nakama kela sekuu kevahi anau mehakauꞌaa manau. Ia poi hekama seheheaꞌu manau ihaopo nakama io mai anau, kena kama la mehaiseise nakama la ikaha manau.

Nakipua saꞌino uvaꞌai

(Mat 12.43-45)

24“Keualoko kipua saꞌino uhaele ikaha ma kekama, kipua la ehaele valoko naꞌina kukuaha, nosesee heꞌina maia inoho. Ia sehiꞌina elave. Kena kipua la ukakala soia, ‘Anau meivaꞌai muli i kehale anau nikiaꞌi la.’ 25Kulana kipua la nivaꞌai muli, kama la elave keꞌina la uoki kehakaa noakea. 26Kena kipua la uhaele nohakaꞌi mai koahiku nakipua saꞌino haeꞌo, noulu iloko kama la. Kena keola kama la meisaꞌino, elaꞌa ma imua.”

Nakama hakapu hamaoni

27Keualoko Jesus nikakala penei, kela hehine iloko keonohenua la eanaa aꞌe, “Kina aꞌoe la ehakapu lia Keakua, maikinimea kama la ehanau mai aꞌoe, kena ihauu aꞌoe.”

28Kena iko Jesus ime aꞌe, “Emeia Keakua mehakapu nakama kela elono nakakala aia, kena ikaukali la.”

Naonohenua eainoa aꞌe Jesus ihuli aꞌe namahi Keakua

(Mat 12.38-42)

29Naonohenua la emumui aꞌe Jesus, kena kama la ume aꞌe, “Nakama kaukama nei la esaꞌino haeꞌo, kena hihai iꞌike nahaꞌaku. Ia Keakua mehuli aꞌe haꞌaku hokahi oia, ehau poi aia nihuli aꞌe ia Jonah. 30{Kama ekipu kama} mehuli aꞌe namahi Keakua i nakama kaukama nei la, ehau poi Jonah nihuli aꞌe namahi Keakua i nakama Nineveh.

31“Keualoko Keakua mehakonukonu nakama kemaalama nei hakoa, keꞌavana kekuꞌu i keꞌupu la meihakonukonu nakama kaukama nei la. Maikinimea kehine la ehamai keꞌina emao nohalono nakakala keakamai Solomon la. Anau eme aku okou, kekama hananiu iluna Solomon enoho inei nopolopolo aku okou, ia okou sehihai ihalono i aia.

32“Keualoko Keakua mehakonukonu nakama kemaalama nei hakoa, nakama Nineveh mehakonukonu nakama kaukama nei la. Maikinimea kulana Jonah nipolopolo aꞌe nakama Nineveh la, nakama la uui ikaha ma nahaisala lakou la. Ia anau eme aku okou, kekama hananiu iluna Jonah enoho i nei nopolopolo aku okou, ia okou sehihai halono i aia.

Kakala hulihuli keahi

(Mat 5.15; 6.22-23)

33“Selavaa hekama kehaula keahi, kena ihuu keahi la iloko puikana. Kama na meseko keumeke noꞌuhi kemela. Emeia kama la mehakuu keahi la iluna imasina, pela nakama kela eo mai i hale la meꞌike laoi.

34“Naꞌalemaka aꞌoe ehuli aꞌe nakipukipu keola aꞌoe. Poi naꞌalemaka aꞌoe la ekaualeꞌa, keola aꞌoe memalama hakoa. Ia poi naꞌalemaka aꞌoe esaꞌino, keola aꞌoe mepouli kakano. 35Kena lolosi hamakonu, aoki kemasina aꞌoe na amehanopouli. 36Poi keola aꞌoe la emalama hakoa, sehikamaꞌina pouli, kena keola aꞌoe memasina hamaoni, poi keahi hakua emasina iluna aꞌoe.”

Jesus ehai aꞌe naFarasi

(Mat 23.1-36; Mrk 12.38-40)

37Keualoko Jesus nikakala nooki, kena heFarasi ealu Jesus iꞌai maia. Kena iko Jesus ihaele noꞌai ma kama la. 38KeFarasi la eꞌike pela Jesus sesolo nalima aia imakahua imua aia eꞌai. Kena keFarasi la emasalo haeꞌo.

39Ko Kealiꞌi ime aꞌe kama la, “Okou naFarasi esolo navahi na{kapu} ma na{peleke}, ia iloko namea la esaꞌino, ehau poi naola okou. Okou ehaisala, kena ihailavaꞌa alakama. 40Okou evale oia. Keakua epena nakinokama okou, ia eau aku naola okou hoi. 41Okou ihoꞌi aꞌe naola okou ikonaꞌi nakama haaloha, kena naola okou memakahua hamaoni.

42“Okou naFarasi meihalono lihu haeꞌo. Okou ehoꞌi aꞌe Keakua nahua soliliꞌi okou la; pela poi na{minti}, na{rue}, kena alahua hoi. Ia okou sekonaꞌi nakama haaloha, ia okou selaoi Keakua hoi. Okou ekonu kehoꞌi aꞌe nahua okou i Keakua. Ia okou ikau kelaoi kama la, kena ukonaꞌi alakama.

43“Okou naFarasi meihalono lihu haeꞌo, maikinimea okou hihai inoho ma nakama hamakua iloko nahale loku, ia okou hihai keonohenua la ihamamaha okou valoko kemakaꞌina.

44“Okou meihalono lihu haeꞌo. Okou ehau ma nakaluma kela sehamakino lia nahaku. Alakama kakaꞌa valuna nakaluma la, ia semakino.”

Jesus ehai aꞌe nakama polopolo nakuaa

45Kela hekama nakama polopolo nakuaa eme aꞌe Jesus, “Rabai. Keualoko aꞌoe ekakala pena, aꞌoe ehai mai makou hoi.”

46Ko Jesus ime aꞌe, “Okou nakama polopolo nakuaa meihalono lihu hoi. Maikinimea okou hapili aꞌe namea emaha iamo keonohenua la. Ia okou sehimakalima esau iluna nokonaꞌi nakama la iamo namea la.

47“Okou meihalono lihu haeꞌo, maikinimea okou hakuu nahaku i nakaluma kela nakama hakae nakakala Keakua la. Ia nakipuna okou imua ekaa nakama la nomake. 48Okou ehakaꞌoko pela nakipuna okou imua la epena namea ekonu. Ia nakipuna okou la ekaa nakama hakae nakakala Keakua la nomake. Kena vahonei, okou ehakuu nahaku ihamakino nakaluma nakama Keakua la.

49“Ia kena Keakua emakonu keualoko aia eme aꞌe, ‘Anau mehaunalia nakama hakae nakakala anau la, ia ma nakama heheaꞌu anau la ikonaꞌi keonohenua la. Ia nakama keonohenua la meikaa alakama nomake, ia meimeme haeꞌo kia alakama.’ 50Kena nakama kaukama nei la mehalono lihu, maikinimea lakou esala i kemake nakama hakae nakakala Keakua la hakoa; 51amaka ma kemake Abel, hanokae kemake Zechariah, kela nikaia lakonu ke{olta} ma keꞌina ekapu la. Nakama kaukama nei la mehalono lihu, maikinimea lakou esala i kemake nakama la hakoa.

52“Okou nakama polopolo nakuaa meihalono lihu haeꞌo. Maikinimea okou sepolopolo naonohenua la iailoa Keakua. Okou soꞌokou seailoa kama la. Ia niaina ma alakama hihai iailoa kama la, ia okou epui nakama la hoi.”

53Keualoko Jesus nihaele, kena nakama polopolo nakuaa la ukaumaluu haeꞌo kama la. Ia nakama la evasisili kahi aꞌe kama la, 54ma ilaulahu ilave lakou ma kama la sehimea esala.

Currently Selected:

Luke 11: ojv

Highlight

Copy