John 8

Kehine epaa laua ma kanaka haiꞌavana

1Jesus uhaele i kemouna kela esomo na{Oliv} la nomoe kepo la. 2Kena keualoko keaka, kama la evaꞌai muli hale kapu. Kena keonohenua la hakoa eo aꞌe ia Jesus, kena iko kama la inoho ilalo noaoaꞌo nakama la. 3Nakama polopolo nakuaa lakou ma naFarasi la ehakaꞌi aꞌe kehine. Nakama la elave kehine la epaa laua ma kanaka haiꞌavana. Nakama la hakuu aꞌe kehine la imua keonohenua la, 4kena ime aꞌe Jesus la, “Rabai. Makou elave kehine nei epaa laua ma kanaka haiꞌavana la. 5Nakuaa Moses emea pela ma makou imaꞌa nahaku ikaa nahine penei la imake. Ia kehakaꞌoko aꞌoe eme pehe?” 6Nakama la ekaiꞌi Jesus maikinimea lakou hihai ihai aꞌe kama la. Ko Jesus isulu ilalo nokakaa iluna kaꞌele ma kemakalima aia.

7Ia nakama la ekauhano kevasili aꞌe Jesus. Kena iko kama la imasiꞌe iluna nome aꞌe, “Poi hekama okou ekonu kahi, kama na ekau keꞌamaka nokaua kia kehine nei.” 8Kena iko Jesus isulu ilalo hoi nokakaa iluna kaꞌele la.

9Nakama kela elono nakakala Jesus la uꞌamaka nohaele kama kakahi ikaha. Nakama makua ekaꞌa imua, kena alakama ekaꞌa vamuli. Kena Jesus ukoe soia ilaa, ma kehine la ekuu imua aia. 10Ko Jesus imasiꞌe iluna hoi novasili aꞌe kehine la, “Kehe nakama na? Ea? Sehikama enoho nohai aku aꞌoe?”

11Ko kehine la ime aꞌe, “Seai Kealiꞌi.” Kena ko Jesus ime aꞌe, “Anau hoi mesehai aku aꞌoe. Haele aku. Ia aꞌoe isepena namesala hoi.”

Kemasina kemaalama nei

12Kena Jesus ekakala aꞌe keonohenua la, “Anau ehamasina nakama kemaalama nei. Nakama kaukali anau la meiseo ma kepouli. Ia keahi keola hamaoni mehamasina iluna nakama la.”

13Kena iko naFarasi la ime aꞌe Jesus, “Aꞌoe ekakala kevahi aꞌoe soꞌoe. Ia kena nakakala aꞌoe na esehamaoni.”

14Ko Jesus ime aꞌe, “Niaina anau ekakala kevahi anau sonau, nakakala anau nei ehamaoni avale. Anau emakino keꞌina anau ehamai la. Ia anau emakino hoi keꞌina anau mehaele la. Ia okou semakino keꞌina anau ehamai la ma keꞌina anau mehaele la. 15Okou ehai mai anau kaukali nahakaꞌoko nakama oia. Ia anau sehamai nohai aꞌe alakama. 16Ia niaina anau elaulahu alakama, kehakaꞌoko anau la ehamaoni. Maikinimea anau sekuu sonau. Anau ekuu maua ma Kamana kela nihaunalia mai anau la. 17Nakuaa okou eme pela, ‘poi koꞌolua nakama ekakala hanakahi, kena okou emakino pela nakakala laua la ehamaoni.’ 18Anau ehaꞌali aku nakipukipu anau. Ia Kamana anau la nihaunalia iho anau, kena ihaꞌali aku nakipukipu anau la hoi.”

19Ko nakama la ivasili aꞌe Jesus, “Kehe Kamana aꞌoe na?”

Ko Jesus ime aꞌe, “Okou semakino anau ma Kamana anau. Koaꞌe okou imakino anau, kena okou amemakino Kamana anau la hoi.” 20Jesus eaoaꞌo aꞌe keonohenua la nakakala nei iloko hale kapu, kapili aꞌe keꞌina kela nakama la ehoꞌi aꞌe namoni lakou la. Ia sehikama ekaohi kama la, maikinimea seikae keualoko lakou meikaa kama la imake.

Okou selavaa keo i keꞌina anau mehaele la

21Jesus ekakala aꞌe nakama hamakua na{Jiu} la hoi, “Anau meihaele ikaha. Okou meisesee anau, ia okou selavaa keo i keꞌina anau mehaele la. Okou ekauhano kepena namea esala, kela hea okou memake.”

22Kena iko nakama la ime aꞌe, “Kama la emea pela ma kakou selavaa kekaꞌa i keꞌina aia mehaele la. Ea? Kakala nei emea pela kama la meikuu keola aia soia?”

23Ko Jesus ime aꞌe, “Okou nikama kemaalama ilalo nei. Ia anau ehamai keꞌina iluna la, ia seai kemaalama nei. 24Ia kena anau eme aku okou pela okou ekauhano kepena namea esala, kela hea okou memake. Ia poi okou sehakina pela, {Kenei anau}, kena okou mekauhano kepena namea esala, kena okou memake oia.”

25Kena iko nakama hamakua la ivasili aꞌe Jesus, “Oai aꞌoe?” Ko Jesus ime aꞌe, “Anau ame kakala aku okou pehe? 26Anau amelavaa keme aku okou komaꞌi nakakala ihakonukonu okou. Ia anau ehalono nakakala hamaoni kekama kela ehaunalia mai anau la. Kena anau meme aku okou nakakala aia la.”

27Ia nakama la semakino pela Jesus ekakala aꞌe lakou nakipukipu Kamana. 28Kena iko Jesus ime aꞌe nakama la, “Keualoko okou esau {kama ekipu kama} iluna, okou meimakino pela, {Kenei anau}. Kena okou meimakino pela anau sekaukali kehakaꞌoko anau sonau. Ia anau ekakala hea Kamana eaoaꞌo mai anau la ikakala. 29Ia kekama kela ehaunalia mai anau la ekakaꞌa kahi manau. Kama la sekiaꞌi anau, maikinimea anau epena konu hea kama la hihai.” 30Komaꞌi nakama keonohenua la elono nakakala Jesus, kena ehakina i kama la.

Nakama ekana ma nakama eapikia

31Kena iko Jesus ime aꞌe na{Jiu} kela ehakina i aia la, “Poi okou ekaohi mau naaoaꞌo anau nei, kena okou ekaukali hamaoni anau. 32Kena okou meimakino laoi kehamaoni, ia kehamaoni la meihakana okou.”

33Ko nakama la ime aꞌe, “Makou emamaoha iho keꞌaha Abraham, ia kena makou selepokia alakama. Ia aꞌoe eme mai pela makou meikana pehe?”

34Ko Jesus ime aꞌe nakama la, “Anau eme aku okou kehamaoni. Poi hekama epena namesala, kama na elepokia nahaisala la. 35Kekama heheaꞌu kehale eme pela hoi. Kama la eapikia kahi naheheaꞌu aia la, ia amenoho iloko hale la kamasaika oia. Ia kamaliꞌi hamaoni kehale la ekana ikeseheheaꞌu kahi, ia ekau kenoho ma haleaina aia la naualoko hamau. 36Poi kama Keakua la ehakana okou, kena okou mekana hamaoni.

37“Anau emakino pela okou nimopuna Abraham, ia okou sehalono nakakala anau. Kela hea okou ehaꞌikeꞌike ma ikaa anau imake. 38Anau eꞌike hea Kamana anau la ehuli mai anau, ia kena ime aku okou namela. Ia okou epena hea kamana okou la ekakala aku okou ipena.”

39Ko na{Jiu} la ime aꞌe Jesus, “Kamana makou la Abraham.” Ko Jesus ime aꞌe, “Poi okou nimopuna hamaoni Abraham, okou amepena namea ekonu kela kama la nipena la. 40Anau ekakala aku okou kehamaoni nia Keakua eme mai anau. Ia okou ehaꞌikeꞌike ma ikaa anau imake. Ia Abraham sepena penaa. 41Okou epena hea kamana okou la epena.” Ko nakama la ime aꞌe “Makou nikamaliꞌi Keakua avale, ia seai nikama po.”

42Ko Jesus ime aꞌe na{Jiu} la, “Poi okou nikamaliꞌi hamaoni Keakua, kena okou ame laoi anau. Maikinimea anau ehamai i Keakua. Anau sehamai sonau. Kama la ehaunalia mai anau. 43Okou semakino laoi kehakaꞌoko nakakala anau, maikinimea okou selavaa kehalono nakakala anau. 44Okou nikamaliꞌi, ia kamana okou la Satan. Kela hea okou hihai ikaukali nahakaꞌoko kama la. Amaka mai imua lo, kama la hekama kaa kama, ia sekaukali nakipukipu hamaoni, mai kama la esehamaoni. Keualoko kama la enuku laoi, kama la ekakala nakakala aia soia. Maikinimea kama la enuku laoi kahi. Kama la o kamana nakama nukulaoi hakoa. 45Ia anau ekakala aku kehamaoni, kela hea okou esehakina nakakala anau. 46Oai kekama okou amehai mai pela manau esala? Anau eme aku kehamaoni. Aiea okou sehakina nakakala anau naea? 47Kekama Keakua ehalono nakakala Keakua. Ia okou seinikamaliꞌi Keakua. Kela hea okou sehihai ihalono nakakala aia la.”

Jesus laua ma Abraham

48Kena na{Jiu} la eme aꞌe Jesus, “Makou eme aku aꞌoe pela aꞌoe hekama Samaria, ia eisi kipua saꞌino ekau iloko aꞌoe.”

49Ko Jesus ime aꞌe. “Nakipua saꞌino sekau iloko anau. Anau ehamaha Kamana anau la, ia okou sehamaha i anau. 50Anau sehihai pela okou ihamalu mai anau. Ia kelaa kama ehihai okou ihamalumalu i aia. Kela kekama meihakonukonu okou. 51Anau eme aku okou kehamaoni. Poi hekama ekaukali nakakala anau, kama na meiselavaa kemake.”

52Ko na{Jiu} la ime aꞌe Jesus, “Vahonei makou umakino pela aꞌoe eisi kipua saꞌino! Abraham umake, ia nakama kela hakae nakakala Keakua la umake hoi. Ia aꞌoe eme mai pela nakama kela ehalono nakakala aꞌoe la meiselavaa kemake. 53Aꞌoe sehamakua iluna Abraham, kipuna makou la. Kama la umake. Ia nakama kela nihakae nakakala Keakua imua la umake hoi. Aꞌoe ehakaꞌoko maꞌoe oai?”

54Ko Jesus ime aꞌe, “Poi anau ehamaha i anau sonau, kena anau ehamaha vale oia. Keakua okou la o Kamana anau. Kama la soia ehamaha i anau. 55Okou semakino kama la, ia anau emakino kama la. Poi anau emea pela manau semakino kama la, kena anau amenukulaoi poi okou. Ia anau emakino kama la. Kela hea anau ekaukali nakakala aia la. 56Kipuna okou la Abraham nihakaꞌoko pela aia ameꞌike keaho anau ehananiu la. Ia kena keualoko kama la uꞌike keaho la, kama la uhihia lo.”

57Kena nakama la eme aꞌe Jesus, “Kemakua aꞌoe sekae kipulima nahekau. Okea aꞌoe eme maꞌoe eꞌike Abraham?”

58Ia Jesus eme aꞌe, “Anau eme aku okou kehamaoni. Imua Abraham nihanau mai, {Kenei anau}.” 59Ia kena nakama la eko nahaku ma imaꞌa kama la. Ia Jesus ehaluu soia nohaele ikaha ma keꞌina hale kapu la.

Currently Selected:

John 8: ojv

Highlight

Copy