Acts 16

Timothy esuꞌui lakou ma Paul laua ma Silas

1Paul ehaele nokae kemakaꞌina Derbe, kena ihaele nokae Lystra hoi. Kela hekama keꞌina la ekaukali Jesus, kanamale Timothy. Kina aia la hehine ha{Jiu} kela ehakina i Keakua. Ia kamana aia la hekama haGreek. 2Nahakina ana iloko Lystra ma Iconium ekakala pela Timothy hekama kaualeꞌa. 3Kena Paul hihai kama la ikaꞌa lakou. Ia kena Paul ehamakino kapukapu kama la, maikinimea na{Jiu} enoho valaa eailoa pela kamana Timothy la hekama haGreek. 4Nakama la uo hakiꞌe namakaꞌina la nome aꞌe nahakina ana la ihalono nahakaꞌoko nakama heheaꞌu Jesus la ma nakama hamakua keloku i Jerusalem la. 5Ia kena nakama keloku la ehakina mahi. Keaho ma keaho komaꞌi nakama esuꞌui ma nahakina ana la.

Paul iloko Troas

6Nakama la uo valoko Phrygia ma Galatia. Ia Keanana Kapu epui nakama la isekaukaꞌu nakakala Keakua iloko Asia. 7Nakama la esasaika aꞌe Mysia, kena ehihai ikaꞌa valoko Bithynia. Ia Keanana Jesus epui nakama la. 8Kena nakama la uo halaꞌa Mysia nokaꞌa i kai i Troas. 9Kulana kepo, Paul uꞌike hekama i Macedonia ehakumaka aꞌe i aia. Kama la eme aꞌe Paul ma, “Hamai i Macedonia nokonaꞌi makou.” 10Saika Paul niꞌike kama la, makou ukanakana io i Macedonia, maikinimea makou ehakina pela Keakua eanaa makou io nokaukaꞌu kelono kaualeꞌa ilaa.

Lydia ehakina

11Makou uuhu i Troas ihulo kahi nokae i Samothrace. Kena kela aho makou ukae kemakaꞌina Neapolis, 12kena ihulo nokae i Philippi. Kela kemakaꞌina hamakua i Macedonia, keꞌina nakama haRome elolosi la. Kena naaho la, makou enoho iloko kemakaꞌina la.

13Makou uo ikaha ma kemakaꞌina la i keaho kapu, nokae kevahi ke{liva}. Makou ehakaꞌoko ma nikama meiloku ilaa. Kena makou unoho nokakala aꞌe nahine kela eꞌuku ilaa la. 14Kela hehine kemakaꞌina Thyatira enoho ilaa nohamalumalu Keakua, kanamale Lydia. Kama la esusui napamalo ekea mea pouli.*f11* Kealiꞌi ekonaꞌi kehine la iaunahie kehalono nakakala Paul. 15Kena makou ehaauꞌau kapu kehine la ma haleaina aia la. Kena kehine la ealu kahi mai makou, “Amea okou ehakaꞌoko pela anau ehakina hamaoni i Kealiꞌi, okou uo mai nonoho iloko hale kehale anau.”

Paul laua ma Silas upono kia i kelokapu

16Kela heaho, makou uo i keꞌina keloku la. Saika la, hekaupu ekili makou, ia kipua saꞌino keꞌaka ekau iloko kaupu la. Kipua la eau aꞌe namahi kaupu la iailoa nia meiapihi mai imuli. Kena nakama lolosi kaupu la eko komaꞌi namoni i nakakala kama la. 17Kaupu la ekaukali mai makou ma Paul, iananaa hamaloa penei, “Nakanaka nei eheheaꞌu ma Keakua ialuna. Nakama nei ekakala aku keala Keakua mekonaꞌi okou.” 18Kaupu la ekauhano kekakala penei, elava naaho. Ia emea Paul nokipuaina haeꞌo. Ia kena Paul ehakiꞌe nome aꞌe kipua saꞌino la, “Anau eme aku aꞌoe i kemale Jesus Christ. Haele ikaha ma kaupu na.” Vahola oia, kipua saꞌino la uhaele ikaha ma kaupu na.

19Keualoko nakama lolosi kaupu la uꞌike pela kipua la uhaele ikaha, nakama la umakino pela keala lakou meiko komaꞌi namoni la useai. Kena nakama la ekaohi Paul laua ma Silas ihakosi koꞌolua la iloko malae, imua namaisu nakama hananiu kemakaꞌina la. 20Nakama la ehakuu koꞌolua la imua nakama hananiu la, kena ime aꞌe, “Makou nakama kemakaꞌina nei ekipuaina haeꞌo i nakakala na{Jiu} nei. 21Makou nakama haRome eselavaa kehalono naaoaꞌo koꞌolua nei, maikinimea nakuaa makou epui makou isekaukali namakeala sekonu la.”

22Keonohenua la ehakauoki ma Paul laua ma Silas. Kena nakama hananiu la usae naauꞌahu koꞌolua la, kena ime aꞌe napulepule la ililiꞌi koꞌolua la. 23Liliꞌi haeꞌo kia, kena ipono koꞌolua la iloko kelokapu, kena ime aꞌe kama hamakua kelokapu la ilolosi hamakonu koꞌolua la. 24Kama la ehalono nakakala nakama hananiu la, kena iko koꞌolua la ipono iloko puikana kelokapu la, kena ihapiꞌi navae koꞌolua la i na{seni} ma nahono.

25Paul laua ma Silas uloku nokae lakonu kepo, kena ihuhua hamaha i Keakua. Ia ala{palaseni} ehalolono nahua koꞌolua la ehua la. 26Vahola oia, kelulu henua elahi elulu kelokapu la hakoa. Nakokoꞌa hale la hakoa ukalaꞌi na. Na{seni} na{palaseni} la usopo ikaha. 27Kena kekama lolosi kelokapu la umahulu noꞌike nakokoꞌa hale la ukalaꞌi na. Ia kama la ehakaꞌoko ma na{palaseni} la uhulo nosao hakoa. Kena kama la euhu penisi aia la ma ikalo soia. 28Ia Paul uanaa aꞌe hamaloa, “Au sekaa soꞌoe. Makou hakoa inei.”

29Kekama lolosi kelokapu la ume aꞌe kelaa kama iau aꞌe keahi, kena isopo nokele iloko hale kelokapu la. Kama la upole, kena ikoukuli imua Paul laua ma Silas. 30Kena kama la uko iho koꞌolua la imaka hale, kena ime aꞌe, “Kama hamakua. Hea anau mehai pela anau meola?”

31Paul laua ma Silas eme aꞌe, “Hakina ia Kealiꞌi Jesus, kena kama la meikonaꞌi aꞌoe ma haleaina aꞌoe na iola.” 32Kena koꞌolua la ukakala aꞌe haleaina la nakakala Kealiꞌi. 33Saika la oia, kama lolosi kelokapu la ehakaꞌi Paul laua ma Silas nosolo naꞌina koꞌolua la nilili kia lia la nomakahua. Kena iko koꞌolua la ihaauꞌau kapu kama la ma haleaina aia la. 34Kama la ma haleaina aia la uhakina i Keakua, kena uhihia hakoa. Kena kama la uko Paul laua ma Silas iloko hale kehale aia la, kena iau aꞌe naꞌai koꞌolua la iꞌai.

35Kena kahaka, nakama hananiu la eme aꞌe napulepule la, “Hasao koꞌolua la ikaꞌa,” kena ihaunalia napulepule la.

36Kekama hamakua kelokapu la ume aꞌe ia Paul, “Nakama hananiu la ehaunalia napulepule ihakana olua ikaꞌa. Ia kena vahonei olua ulavaa keo semuu.”

37Ia Paul eme aꞌe napulepule la, “Niaina maua nikama haRome, nakama hananiu kemakaꞌina nei sehalono hakaualeꞌa maua. Nakama la eliliꞌi maua imua namaisu keonohenua hakoa, kena ipono maua iloko kelokapu nei. Ia vahonei nakama la ehakaꞌoko pela ma lakou elavaa keave hamuni maua ikaha? Selavaa! Nakama na io mai solakou nohakana maua ikaꞌa.”

38Napulepule la eme aꞌe nakama hananiu la nakakala Paul laua ma Silas. Ia keualoko nakama hamakua la ulono pela ma koꞌolua la nikama haRome, nakama la umakaꞌu haeꞌo. 39Nakama la uo noaloha aꞌe koꞌolua la, kena ihakaꞌi koꞌolua la ikaha ma kelokapu la, kena ime aꞌe koꞌolua la ikaꞌa ikaha ma kemakaꞌina la. 40Ia keualoko Paul laua ma Silas ekaꞌa ikaha ma kelokapu la, koꞌolua la uo iloko kehale Lydia. Koꞌolua la ekili ma nahakina ana la ihapulupulu nakama la, kena ikaꞌa ikaha.

Currently Selected:

Acts 16: ojv

Highlight

Copy