Acts 17

1Paul ma nakama ekakaꞌa maia la uo valoko Amphipolis ma Apollonia, nokae i Thessalonica, kemakaꞌina kehale loku na{Jiu} la. 2I keaho kapu, Paul uhaele i kehale loku, ehau poi aia nihaele noloku naaho kapu la hakoa. Koukolu naaho kapu Paul epolopolo aꞌe keonohenua la nakakala kelauniu kapu. 3Paul eaoaꞌo nakama la ihuli aꞌe pela keMesaea ehalono lihu nomake, kena imasiꞌe ikaha ma kemake. Paul ekakala penei, “Anau eme aku okou nakipukipu Jesus. Kama la o keMesaea.” 4Komaꞌi na{Jiu} la uhakina nakakala Paul, kena isuꞌui aꞌe ia Paul laua ma Silas. Ia komaꞌi nahine hananiu la ia ma nakama haGreek kela ehamalumalu Keakua ehakina hoi. Kena nakama la esuꞌui aꞌe ma koꞌolua la hoi.

5Ia kena na{Jiu} la usano, kena ihaꞌuku nakanaka saꞌino napapae la, kena iapihi navalo lakou valoko kemakaꞌina la. Kena iko keonohenua la ihulo i kehale Jason, ma isolo iho Paul laua ma Silas. 6Ia nakama la selave koꞌolua la, kena ikaohi Jason ma nahakina ana la nohakaꞌi nakama la imua nakama hananiu kemakaꞌina la. Nakama la uhai aꞌe nakakala lakou ma, “Nakanaka nei ehakauoki valoko nahenua hakoa. Ia kena vahonei, nakama nei ukae mai inei hoi. 7Ia Jason eko nakama la iloko hale aia. Nakama na hakoa sekaukali nakuaa kekuꞌu haRome, kena ikakala ma kelaa hekuꞌu hoi, kemale aia Jesus.” 8Keualoko keonohenua lakou ma nakama hananiu kemakaꞌina la elono nakakala nei, nakama la eloko. 9Kena nakama hananiu la emea Jason ma nahakina ana la isui namoni ihuli aꞌe pela lakou meisepena namesala hoi, kena uhakana lakou ikaꞌa.

Paul laua ma Silas ekaꞌa i Berea

10Kepo la oia, nahakina ana la uhaunalia Paul laua ma Silas nokaꞌa i Berea. Koꞌolua la ukae i keꞌina la, kena io iloko hale loku na{Jiu} la. 11Na{Jiu} kela enoho i Berea la epasemuu iluna na{Jiu} kela enoho i Thessalonica. Keaho ma keaho nakama Berea la ehalono hakaualeꞌa nakakala Paul, kena ipaupau nalauniu kapu la, imakino lakou pela nakakala Paul la ehamaoni. 12Ia komaꞌi nakama kemakaꞌina la uhakina, nahine hananiu haGreek lakou ma nakanaka haGreek la hoi. 13Ia keualoko na{Jiu} iloko Thessalonica elono pela ma Paul ekaukaꞌu nakakala Keakua iloko Berea, nakama la ekaꞌa ilaa nousuusu aꞌe keonohenua la. 14Vahola, nahakina ana la uhaunalia Paul nokae ikahua ikai, ia Silas laua ma Timothy enoho i Berea. 15Alakama ehakaꞌi Paul nokae i Athens, kena ivaꞌai muli nokakala aꞌe Silas laua ma Timothy io vave nokaꞌa Athens hoi.

Paul ekaukaꞌu iloko Athens

16Paul ehakali ia Silas laua ma Timothy iloko Athens. Ia Paul ekipuaina keualoko aia eꞌike pela nahakipua kemakaꞌina la ekomaꞌi. 17Kama la ekakala ma na{Jiu} ia ma nakama haGreek kela ehamalumalu Keakua iloko hale loku na{Jiu} la. Keaho ma keaho Paul ekakala aꞌe keonohenua iloko kemakaꞌina la hoi. 18Saꞌukulana enoho ilaa, keukulana nakama valekoa namea hainakaa, lakou ma keukulana nakama ehihai keola akoa. Alakama ehakauoki ma Paul, kena ikakala ma, “Kama na ekakala vale pehe?” Ia alakama emea ma, “Kama na ekakala nakipukipu nakipua naꞌina emao.” Nakama la ekakala penei maikinimea Paul ekakala pela ma Jesus umasiꞌe mai ikaha ma kemake. 19Nakama la eko Paul ihakaꞌi kama la ihaꞌuku ma lakou i keꞌina ekapa ma Areopagus, kena eme aꞌe Paul, “Makou ehihai imakino laoi kehakaꞌoko keaoaꞌo vahonei aꞌoe me mai na. 20Makou emasalo keaoaꞌo aꞌoe na. Kena makou ehihai iailoa hea keaoaꞌo na.” 21(Nakama Athens lakou ma nakama nahenua emao kela enoho iloko kemakaꞌina la ehihai ilono ia ikakala kahi i nahakaꞌoko vahonei.)

22Kena Paul ukuu iloko keꞌina Areopagus la, kena ime aꞌe nakama la, “Keonohenua Athens. Anau emakino pela okou elokuloku kahi. 23Anau ehaele valoko kemakaꞌina nei, noꞌike nahakipua okou kela ehamalumalu la. Anau eꞌike ke{olta} hoi. Nakakala nei emau iluna kemela penei, KEAKUA KELA MAKOU SEMAKINO. Okou ehamalumalu Keakua kela okou semakino. Kenei o Keakua kela anau ekakala aku.

24“Kama la epena namea hakoa iloko kemaalama nei. Kama la ehamakua kevaelani ma kemaalama nei. Kama la senoho iloko nahale nakama epena la. 25Kama la sehakali makou ikonaꞌi aia. Keakua eau mai kakou keola, keloumakani, ia ma namea hakoa. 26Keakua epena kanaka hokahi. Nakama nahenua hakoa kemaalama nei eo mai i kama la. Keakua soia ekuu saika lakou meinoho iloko nahenua la, ia ekuu hoi naoina nahenua la. 27Keakua ehihai nakama isesee ma ilave i aia. Ia kama la semao ikaha ma kakou hakoa.

28‘Kama la ehaola kakou,

Ilavaa kakou kehahaele,

Kena inoho i kemaalama nei.’

Ia kena nakama makonu okou la imua ekakala ma,

‘Kakou nikamaliꞌi Keakua.’

29“Ia amea kakou nikamaliꞌi Keakua, kakou isehakaꞌoko pela ma kama la ehau poi hekamaiku. Nakama epena nahakipua la i napahaku mea ma napahaku iva ia nahakupaa. Ia Keakua sehau poi nahakipua kela nakama hakaꞌoko ikakaa. 30Imua lo, Keakua esili hia nahakaꞌoko vale keonohenua la. Ia vahonei kama la ehihai nakama i naꞌina hakoa ikiꞌe ikaha ma nakipukipu saꞌino lakou la. 31Maikinimea Keakua ekuꞌu saika aia meihakonu nakama kemaalama nei hakoa. Keakua nakini avale kama hakonukonu la, kena ihamasiꞌe kama la ikaha ma kemake. Kena kakou emakino laoi pela kama la meihakonukonu hamaoni.”

32Keualoko keonohenua la nilono nakakala kela kemasiꞌe ikaha ma kemake, alakama eakaꞌaka aꞌe i Paul, ia alakama emea ma, “Makou ehihai ilono aꞌoe ikakala mai namea nei hoi.” 33Kena Paul uhaele ikaha ma nakama la. 34Alakama uhakina nakakala Paul, kena isuꞌui aꞌe ma kama la. Kela hekama keukulana Areopagus uhakina, kanamale Dionysius. Kela hehine kanamale Damaris, lakou ma alakama uhakina hoi.

Currently Selected:

Acts 17: ojv

Highlight

Copy