Marko 9

1Ette inyi jaran jihosi, Ahode eramak ni jihatai, itoŋoi omuk dini hul obeŋi adi igonyuni naye many igonyunierek isi olobye ono Hollum ottu ta nadwaran.

Etakwaco Hollum Yesu to Doŋe

Mt 17:1-13; Lk 9:28-36

2Ihalu oŋitek ille iyaro Yesu Petro, Yakobo iko Yoane t’ehiji wati hama ihide doŋe attati inyi lufaji to homomite hosi. 3Attati aboŋojin honyi bwaran bwo fe opipyahi. Obwori isi agalihini aboŋojin hun illillaye. 4Teyya teyya oleye Mose iko Elija hul ikyanai iko Yesu. 5Ojo Petro jyo Yesu ojo, Hettiyanani, oyyu jihohoi iwanari ini. Eduhok hohoi akukuhyen hunihoi, obo jihoi obo jyo Mose, bwo fe obo jyo Elija. 6Nyo obeŋ inyi omijak ojo adi inyi aŋai nyo abaŋi isi daŋ bebe. 7Attati edis ’tuna ette tihonia oloŋ, ette nekyana ’tuna totwa idis on ojo, “Lonyi hoŋ olo al amuno ni bebe, itayiryete jihonyi.” 8Teyya teyya ette isi fyalatyo ati obeŋi isi igonyuni obo atulo arari Yesu hama.

9Ninya isuruni isi to doŋe iramak Yesu leyiyanak honyi hotobyaŋahi iramani erre hun igonyuni isi many ibuhuniere Lonyi tulo to ye. 10Ifahai isi efahi ania bwo fe ifiye isi ta ahwattek hosi awoyo hiram ono ebuhuna to ye. 11Ette isi ifiyo inyi, ?Aŋai ojori legyorok jo ottu adi Elija ahosyere? 12Attati inyi itarraŋ ojo, Ottu adi Elija ahode ahosyere, ihuhumaniere erre daŋ. ?Ati obeŋi igyoroni to Lonyi tulo jo odihu adi inyi ettigemita hun obolori bwo fe laati ihari inyi? 13Ati eramak ni itai ottu nya Elija bwo ihanie nya isi jihonyi ihwa awahi isi, ihwa igyoroni tenyi.

Etaŋidaryo Yesu Eito al Owon iko Ajok on Orroho’to

Mt 17:14-21; Lk 9:37-43

14Al afwonni isi jyo leyiyanak hul omuk igonyuni isi eluluŋ wati ikoloni isi, ati itarisai egyorok ikosi. 15Ninya ligonyuni laati Yesu illillihai isi ette ŋyoron ifonyere inyi. 16Ette inyi ifiyo leyiyanak honyi, ?Anyo itarisati tai ikosi? 17Itarraŋ obo t’eluluŋ ojo, Hettiyanani, eyaŋuno ni lonyi hoŋ jihoi, nyo owon inyi iko ajok on obeŋ’to ikyana. 18Inef ajok inyi ette bwarana inyi ifau, ette obulal ’tuna to hutuk, ette inyi itisyahina aala ette ahwan golyoro. Ekyana ni jyo leyiyanak hoi hetefuha ajok addi ati obeŋi isi oremehini fuhara. 19Itarraŋ Yesu jihosi ojo, Aii, itai aati hul obeŋ iko neruk. ?Many baya adi etoŋo ni ikatai? ?Many baya adi adik ni itai? Iyaŋunie inyi jihoŋ. 20Tania ette isi iyaŋuno eito jihonyi. Ninya igonyu ajok Yesu ette inyi ihanana ahwe jyo eito ette inyi kwaharo ifau ette ibalaŋatyo, attati olobulal ’tuna to hutuk. 21Attati Yesu ifiyo monye, ?Nya baya itteryo inyi aŋwai? Itarraŋ inyi ojo, Hara inyi ahito. 22Enyyahita arryai obwarata inyi ihima bwo fe ihari jo oŋida inyi attoho, ati kuyya iremik iye itaŋida inyi, omehinie jihohoi. Tolwaha hohoi. 23Ojo Yesu jihonyi, ?Nyo ikuyya iye? Oremehini erre daŋ jyo atulo al iruk’to. 24Teyya teyya ette monye hito ilulwo ojo, Hobu eruk ni ahode. Ofonik neruk jihoŋ. 25Igonyu Yesu eluluŋ wati omuk oŋeruni ajihonyi ette inyi ifuhara ajok on orroho’to ojo, Iye ajok an ibeŋ’to ikyana bwo fe ittuho, waŋ jihonyi addi. Efak ni iye oŋida ibeŋ inyyak jiŋana itwa honyi. 26Attati ajok ilulwo bebe ette ihanana ahwe hun orrohoji bebe jyo eito ette ’tuna addi totwa honyi ette eito mijo ihwa atulo ol oye’to, tania ojori aati arryai aye inyi. 27Attati Yesu inef inyi ta naani attati itadet inyi ahide ette itawojihina inyi. 28Ninya afany Yesu itwa haji ette leyiyanak honyi ifiyo inyi hama ojori, ?Nyo ebeŋ hohoi eremik ifuhara inyi addi? 29Ette Yesu itarraŋ ojo, Oremehini ifuhara ajok ihwa ana ta amojo hama.

Enyyak Yesu Ikiluna Aye Honyi

Mt 17:22-23; Lk 9:43-45

30Obusani Yesu iko leyiyanak honyi amaji ania ette cul te ehiji fau Galilea ati obeŋ inyi owak obo atulo omijak jo inyi adia. 31Nyo iramak inyi leyiyanak honyi ojo, Itinyyaŋani adi Lonyi tulo ihas wati, ottohori adi isi inyi ati ihalu oŋitek hunihoi ibuhu adi inyi. 32Ati obeŋi isi itayiruni ana bwo fe abaŋi isi efiyo inyi awoyo hiram ana.

Etarisa Heyiyanak jyo Ŋai adi Eleittok

Mt 18:1-5; Lk 9:46-48

33Attati isi fanyan imiji Kapernaum bwo ojiŋak Yesu itwa haji ette ifiyo leyiyanak ojo, ?Anyo itarisati tai ihiji koi? 34Ati odwahinie isi nyo itarisai dwo isi daŋ likoi ojo alali adi eleittok. 35Tania itoŋo inyi ifau ette iloŋuna leyiyanak honyi ’tomon harrihai, ette jaran jihosi, Al awak obo ’tuna ratan eleittok ijara inyi hetera do ehalu bwo fe ehegyamani wati daŋ. 36Attati Yesu iduhuna eito on odiha’to attati ititoŋonia ihiji hosi ette kafuna inyi ihas honyi ette jaran jihosi, 37Atulo al ifwotu’to eito on odiha’to ihwa ana ta afure hoŋ, ifwotu inyi ani. Bwo fe atulo al ifwotu’to ani, obeŋ inyi ifwotu ani hama ati ifwotu inyi lya al ifahu’to ani.

?Ŋai Amotte Hohoi?

Mt 10:42; Lk 9:49-50

38Ojo Yoane jihonyi, Hettiyanani, egonyu dwo hohoi obo atulo al ifuha’to ajohin hun orrohoji’to ta afure hoi ette hohoi itik inyi nyo obeŋ inyi ara olohoi. 39Attati Yesu itarraŋ jihonyi, Hetihoto inyi, nyo obeŋ obo oremik ihanio edwariti ta afure hoŋ bwo ihalu ikyana erre hun orrohoji’to toni. 40Ati ol obeŋ’to ara amyotononi ara inyi amotte hohoi. 41Ahode eramak ni itai jo atulo al isyo’to jihatai akos ematit hari nyo irata tai ahulo Kristo obeŋ adi edumit honyi olitohi.

Eema on Obeŋ’to Odunya

Mt 18:6-9; Lk 17:1-2

42Kuyya itipalyo obo atulo eito an iruk’to jihoŋ, osiru ifitani amorwo on obolo’to imurut honyi ette irwoŋonia ihari. 43Kuyya itipal aani hoi iye liyyata, oŋotoi addi. Oyyu adi jihoi ijiŋaniere lisu iko aani abotye, agalik aleten hoi iko ahas arrihai ihima on obeŋ’to odunya. 44Limaji on obyaŋarik ahuru oyerik bwo fe eema obeŋ odunya. 45Kuyya itipal eju hoi iye liyyata, oŋutoi addi. Oyyu adi jihoi ijiŋaniere lisu iko eju abotye, agalik aleten hoi ihima iko ejek arrihai. 46Limaji on obyaŋarik ahuru oyerik bwo fe eema obeŋ odunya. 47Kuyya itipal onyek hoi iye liyyata, ogolotu addi. Oyyu adi jihoi ijiŋaniere ilobye Hollum iko onyek abotye agalik irwoŋoniere iye lihima iko oŋite arrihai. 48Limaji on obyaŋarik ahuru oyerik bwo fe eema obeŋ odunya. 49Okemye adi aati daŋ te eema. 50Oyyu amile ati kuyya ilik amile, ?aŋai adi inyyak iye eŋolito honyi? Iwanata iko amile. Itoŋoti iko laati omuk te elik tajya.

Currently Selected:

Marko 9: LOT1969

Highlight

Copy