Marko 7

Emohiti huno Hohonyok

Mt 15:1-9

1To obo oloŋ ofwonni Farisei iko legyorok to Yerusalem jyo Yesu. 2Igonyuni isi leyiyanak honyi oŋiye hul hobeŋi ofiniai. 3Nyo Farisei iko laati Yudea omuk obeŋi oŋiye hobeŋi isi ofiniai ihwa omohoroi isi jyo hohonyok hosi. 4Bwo fe al ofwonni isi to suk obeŋi isi oŋiye do hobeŋi isi illillai erre. Bwo fe owoni omuk emohiti hun ijifatye isi, isi huna: ellillayo kosi iko ehulo iko atobohin. 5Attati Farisei iko legyorok ifiyo inyi, ?Nyo obeŋi leyiyanak hoi ijifatye nemohiti hunya beryen? ?Nyo oŋiye isi do hobeŋi ofiniai? 6Ette inyi itarraŋ jo, Igyoro nya eyani sayyo Isaya on oyyu tetai enyabak ojo,

“Itahabuye aati hulya ani te etuhe hosi,

Ati alamaji atajya hosi jihoŋ.

7Ara etahabuyo hosi jihoŋ asai.

Ittiyenie isi nefahita wati ihwa arai isi nefahita huno Hollum.”

8Idehina tai nefahita huno Hollum jo oŋida igotyete tai nemohiti wati ihwa ellillayo kosi iko ehulo bwo omuk erre arryai ihwa hunia.

9Attati Yesu jaran jihosi, Ahode ihara tai nefahita huno Hollum jo oŋida igotyete tai nemohiti hatai. 10Nyo ojo Mose, “Itahabuyete monyatai iko honyatai,” bwo fe, “Atulo ol omoryo’to monye iko honye ijara inyi hotoye.” 11Ati ijatta tai jo, Oremik obo atulo jaran jyo monye kuyya honye ojo, Agurusi hun iwahata tai mojuna jihoŋ arai isi Korban on ojo arai isi esyoryo jyo Hollum. 12Al ihaniete tai ihwania ihara tai inyi ilwahyere monye iko honye. 13Tania itapwahata tai nekyanita huno Hollum ta nemohiti hunya beryen bwo fe owoni omuk nemohiti jihatai ihwo huna.

Erre hun Itarrohojye’to Atulo

Mt 15:10-20

14Bwo fe inyyak inyi iloŋuna neluluŋ wati jihonyi ojo, Itayiryete daŋ jihoŋ bwo fe itaniŋyete. 15Obeŋ obo ariŋ on ojiŋak itwa tulo to let oremik itarroho inyi ati erre hun ojiŋuni’to to taji tulo alet oremehini isi itarroho inyi. 16Lya ol owon’to iko ayyaha ijara inyi hetaniŋu. 17Labusaro inyi eluluŋ wati attati leten ihaŋ honyi, ifiye leyiyanak honyi inyi awoyo hiram ono arryamara ania. 18Attati inyi itarraŋ jihosi, ?Itai bwo fe ibyaŋata tai itaniŋuna? ?Ibyaŋata tai imijana jo obeŋ obo ariŋ on ojiŋak’to itwa tulo to let oremik itarroho inyi? 19Nyo obeŋ aŋiyo ojiŋak itwa taji honyi ati itwa hohe honyi ijai attati irrituna alet. Ta nekyana ana ojo inyi oyiji naŋiyo daŋ. 20Bwo fe ojo inyi, Ariŋ on ojiŋu’to to taji tulo alet inyi ariŋ an itarroho’to inyi. 21Nyo to taji tulo ojiŋuni egigilita hun orrohoji’to, arai isi aroto, ahoho, attohyo, 22asomon, adaya, aliwari, enyobyo, ahaini, amwaŋa, etadara, iko ecaforo. 23Asaŋ hun orrohoji’to huna ofwonni totwa tulo ette itarrohojuno atulo.

Neruk ono Aŋotte ono Surofenisa

Mt 15:21-28

24Attati inyi busana amaji ania ette leten ifau Turo iko Sidon. Ette inyi jiŋana itwa haji nyo obeŋ inyi awak obo omijak awanan honyi dia ati obeŋ inyi oremik idimana ahwan honyi. 25Owon obo aŋotte iko ŋarri honyi on odiha on owon iko ajok. Ninya itaniŋu inyi attuna Yesu ette inyi leten jihonyi ette rigoŋi ihosyere honyi. 26Ara inyi apagano. Ikyana inyi ekyana Grik; isiuni inyi to fau Surofenisa. Attati inyi lwaha bebe jyo Yesu ojo ijara hetefuhai ajok jyo ŋarri honyi addi. 27Ette Yesu jaran jihonyi, Ijara aduri hotoŋiyehe ahosyere. Obeŋ oyyu iduhuniere aŋirya duri ette rwoŋonia jyo aŋohe. 28Attati aŋotte itarraŋ jihonyi ojo, Afe Hettiyanani, ati oŋiye aŋohe ebenyiti ŋirya huttowoyo teremeja hul itadohini aduri. 29Attati Yesu jaran jihonyi, Al ijo iye ihwania ilo ati imiji hatai, obusak ajok on orroho’to ŋarri hoi. 30Attati inyi leten ihaji honyi ette nyurana ŋarri honyi ijotit ette mijana jo obusak ajok on orroho’to inyi.

Etaŋidaryo Yesu Atulo ol Ottuho’to Bwo fe Obeŋ Ikyana

31Attati inyi busana nafau Turo ette galaru Sidon ette cul te ehiji fau ono amisihi ’tomon many ilotifor hari Galilea. 32Attati laati iyaŋuno jyo Yesu atulo ol ottuho’to bwo fe obeŋ ikyana. Attati isi mojo inyi hotottirok ahas honyi jihonyi. 33Attati Yesu iyaro inyi hama t’eluluŋ wati attati ’tuhonia afyala honyi iyyaha lya ol ottuho’to ette mitana amilak ette ’tir aŋadyef honyi ta amilak. 34Attati Yesu ibonno ahide ette yirita ette jaran jihonyi, Efata, on ojo ijara hataŋai. 35Bwo fe ayyaha honyi hataŋahi bwo fe aŋadyef honyi hetekyanai ette inyi itteryo ikyana on obis. 36Attati inyi iramana isi hotobyaŋahi iramani obo atulo eram ana. Ati iramani isi laati arryai. 37Attati aati daŋ illilliha bebe ette ikyana ojori, Ihanio inyi erre hun obolori’to. Aŋa inyi ayyaha wati hun ottuhoi’to bwo fe itaŋida aŋadyefa hun obeŋi’to ikyanai.

Currently Selected:

Marko 7: LOT1969

Highlight

Copy