Marko 10

Esyarana Yesu Efahi ono Apyaha

Mt 19:1-12; Lk 16:18

1Labusak Yesu amaji nya allaŋ inyi jyo aŋati tole ono Yordano attati jiŋana lifau Yudea. Attati eluluŋ wati inyyak irwaŋanio ikonyi ette ikolonia inyi. Attati inyi itteryo ittiyenio isi ihwa motye motye.

2Ette bwo fe omuk Farisei fwanna jihonyi ikemyere inyi ette ifiyo inyi ojori, ?Oyyu jyo atulo al apyahai iko ŋorwoi honyi? 3Ette inyi itarraŋ ojo, ?Ifak nya Mose jihatai aŋai? 4Itarraŋi isi, Ifak nya Mose ojo, Atulo al awak’to apyaha iko ŋorwoi honyi oŋida isyo awaraga ono apyaha jihonyi bwo fe ette busana inyi. 5Ati ojo Yesu, Isyo Mose itai nefahi ania nyo odwari atajya hatai, 6ati t’etteri ’yeti oyyeu Hollum alle iko aŋotte. 7Ta eram ana obusak adi alle monyonyi iko honyonyi ette manya iko ŋorwoi honyi, 8attati isi arrihai ratan ihwa ahwan abotye. Ihwania obeŋi isi inyyahi rahan arrihai ati arai isi ihwa ahwan abotye. 9Hul inosok Hollum arabotye helaha obo itapek.

10Lafanyi isi itwa haji inyyahi leyiyanak ifiyo Yesu ta neram ana. 11Bwo inyi ette jaran, Atulo ol opyahai’to iko ŋorwoi honyi ette yama obo aŋotte oroto inyi roto. 12Bwo fe al apyahai aŋotte iko habi honyi bwo ette obo atulo yama inyi, oroto aŋotte ania roto.

Amuno Yesu Aduri

Mt 19:13-15; Lk 18:15-17

13Ihwania iyaŋunie aati aduri hun odihara’to jyo Yesu oŋida Yesu ottiryo isi ati itihi leyiyanak isi. 14Iloŋojita Yesu al igonyu inyi leyiyanak honyi ihanie ihwo nya, ette jaran, Obusana aduri ofwonni jihoŋ. Hetihoto isi nyo ara Hollum a Hobu hosi. 15Ahode eramak ni itai jojo ol obeŋ’to iruk Hollum irari a Hobu honyi ihwa an iruhori eito on odiha’to, obeŋ adi bu inyi ojiŋak ilobye Hollum. 16Attati inyi kafuna isi ihas honyi bwo fe iyyabak ahas honyi jihosi ababo, ette mojo jyo Hollum jo oŋida omuk erre hun orrohoji’to obeŋi ofwonni jihosi.

Abarani al Awak’to Nesu

Mt 19:16-30; Lk 18:18-30

17Ninya itteryo Yesu adaha, oŋer obo atulo many jihonyi ette rigoŋi ihosyere honyi ette ifiyo inyi ojo, Hettiyanani ol oyyu, ?anyo adi ehanio ni irumaniere nesu on osyo fur? 18Ojo Yesu jihonyi, ?Anyo iloŋo iye ani ol oyijo? Obeŋ obo oyyu arari Hollum hama. 19Imijak iye efahita: “Hettoho, hehanio erre somon, hehoholyo, henyobyo, hemumunio, itahabuye monyohoi iko honyohoi.” 20Ette inyi jaran jihonyi, Hettiyanani, efaha ni nefahita huna daŋ, hara ni ahito many iko ahana. 21Attati Yesu mijo jihonyi, ette muno inyi ette jaran jihonyi, Owon ariŋ abotye an ipwak iye. Ilo itinyyaŋak asaŋ hoi daŋ, isyara agurusi jyo alocaŋak bwo fe owoni adi ebariti hoi idou. Ihalu waŋ, ijifatye ani. 22Tania ette inyi ijiriŋa bebe ette leten addi nyo owoni ebariti arryai jihonyi.

23Attati Yesu fyala ette jaran jyo leyiyanak honyi, Ogol bebe jyo hul owoni iko ebariti ijiŋaniere ilobye ono Hollum. 24Attati leyiyanak illilliha bebe te ekyana ania. Ette Yesu inyyak mijo jihosi ette inyyak jaran jihosi, Illarak hoŋ, ogol bebe jyo hul iyihini’to ibariti hosi ijiŋaniere ilobye Hollum. 25Ogol bebe jyo labarani ijiŋaniere ilobye ono Hollum agalik ajiŋana konnikonni ittulit libira. 26Ette isi illilliha bebe ette jaran jihonyi, ?Ŋai ’tadi al italahuni? 27Attati Yesu mijo jihosi ette jaran, Obeŋi aati oremehini italahuna ahwattek hosi ati oremik Hollum, nyo oremik inyi ihanio erre daŋ. 28Attati Petro jaran jihonyi, Ebusak hohoi erre hohoi daŋ ette jifatyo iye. 29Ojo Yesu, Eramak ni itai ahode, atulo ol obusak’to aji honyi, illarak honyi, haniarak honyi, honyonyi, monyonyi, aduri honyi, kuyya amatta honyi ta afure hoŋ bwo fe ta asayyo hun oyiji’to, 30ifwotu adi inyi erre enyyahita esiha abotye ta nesu ana. Orumak adi inyi asik iko illarak, haniarak, honyye, aduri iko amata iko nettigemita ta nesu ana, bwo fe ihalu nesu on osyo fur. 31Ati laati arryai huttohosyere ofwonni adi ehalu bwo huttehalu ofwoi adi ahosyere.

Ekiluna Yesu Aye Honyi Enyyahi Etahunihi

Mt 20:17-19; Lk 18:31-34

32Hadahai isi likoi on olo’to imiji Yerusalem attati Yesu daha tohosyere ette leyiyanak honyi illilliha bebe ati abaŋi omuk hul ijifatye’to inyi. Inyyak inyi iyaro leyiyanak honyi ’tomon harrihai aŋati ette iramana jihosi erre hun ihanie adi jihonyi. 33Ette jaran, Imijyete, efwo hohoi Yerusalem. Isyarani adi Lonyi tulo jyo ehumak eleittaha iko egyorok, ette ŋot aye jihonyi ette isyo inyi jyo paganohyen. 34Osuhotye adi isi inyi ette mita, ette bahyo inyi ette ’tohoro inyi. Ihalu oŋitek hunihoi ette inyi ibuhuna.

Awahan Yoane iko Yakobo Ratan Eleittaha

Mt 20:20-28

35Ette Yoane iko Yakobo lonyirok Sebedeyo fwanna jihonyi ette jaran, Hettiyanani, ewak hohoi iye ihanio jihohoi ariŋ en efiyo hohoi jihoi. 36Ojo inyi jihosi, ?Anyo riŋ iwahata tai ehanio ni jihatai? 37Itarraŋi isi jihonyi, Aharak hohoi itoŋori ilobye hoi, obo ihani iŋet hoi bwo fe obo ihani ihorroŋ hoi. 38Ojo Yesu jo, Ibyaŋata tai imijana anyo ifiyete tai. ?Iremehina tai mata ta akos#10:38 akosIkyana Yesu ta adyaha iko naye honyi. an amatari adi ni? ?Kuyya iremehina tai ifwotuna batisimo#10:38 batisimoIkyana Yesu ta adyaha iko naye honyi. ihwa an efwotu ni? 39Itarraŋi isi jihonyi, Eremik hohoi. Ette Yesu jaran, Imatati adi itai ta akos an amatari ni. Ibatisye adi bwo fe itai ta batisimo an efwotu ni. 40Ati itoŋori oŋyatai hoŋ iko arraŋai hoŋ obeŋ ara onoŋ isyoryere. Ihuhumak Hollum amaji ania to hya hul onyimu inyi. 41Itaniŋuni leyiyanak ’tomon nekyana ana ette isi itteryo iloŋojita jyo Yakobo iko Yoane. 42Tania ette Yesu iloŋuna isi jihonyi ette jaran, Imijana tai jo ilettohorik hobwok hulo paganohyen laati hosi, bwo fe eleittaha hosi ittigemye isi. 43Ati obeŋ ara ihwania jihatai. Al awak obo alatai ’tuna ratan eleittok ijara hetera do ahegyamani hatai. 44Al awak’to ratan a hobu ijara hetera do apit jyo laati daŋ. 45Ihwa ottu Lonyi tulo, obeŋ inyi ottu oŋida aati igyamai jihonyi ati ottu inyi igyamari jyo aati bwo fe isyo inyi nesu honyi idumari ta laati arryai.

Esyarana Yesu Bartimeo Namijo

Mt 20:29-34; Lk 18:35-43

46Attati Yesu iko leyiyanak honyi bwo eluluŋ wati fanyan imiji Yeriko. Obusani isi Yeriko, ette isi igonyuna oloŋodo otileŋita iger ikoi, afure honyi Bartimeo lonyi Timayo. 47Itayiru inyi jo ottu Yesu olo Nasaret ette iloŋo ojo, Yesu lonyi Davide, omehinie jihoŋ. 48Itterye aati arryai isiŋyo inyi ette iramana inyi hotodwai, ati arasa inyi iloŋo bebe ojo, Lonyi Davide, omehinie jihoŋ. 49Attati Yesu wotya ette iloŋo inyi ojo, Iramana hetettu. Tania ette isi iloŋo oloŋodo ojo, Hebaŋ, itagolo ataji. Otte, iloŋo inyi iye. 50Attati inyi busana aboŋo honyi ette lwara te ejek honyi ette ’tuna jyo Yesu. 51Attati Yesu ifiyo inyi, ?Anyo iwak iye oŋida ani ehanio jihoi? Attati oloŋodo itarraŋ ojo, Hettiyanani ol oyyu, awak ni mijo. 52Ojo Yesu jihonyi, Ilo, itaŋida eruk hoi iye. Teyya teyya amijo inyi ette itteryo ijifaro Yesu.

Currently Selected:

Marko 10: LOT1969

Highlight

Copy