Matteyo 15

Emohiti Huno Hohonyok

Mk 7:1-13

1Tania ofwonni Farisei iko legyorok to Yerusalem jyo Yesu ette jaran, 2?Nyo omesye leyiyanak hoi nemohiti huno eleittaha? ?Nyo oŋiye isi hobeŋi ofiniai? 3Ette inyi itarraŋ jihosi, Ara bwo itai, ?nyo imesyete tai efahita huno Hollum te emohiti hatai? 4Nyo ojo Hollum jo, “Itahabuyete monyatai iko honyatai,” bwo fe, “Atulo ol omoryo’to monye kuyya bu honye, ijara inyi hotoye.” 5Ati ijatta tai jo, Oremik obo atulo iyimo alwahyo jyo monyonyi kuyya bu honyonyi ta ajaran honyi jojo, Agurusi hun imojoti tai jihoŋ, arai isi esyoryo jyo Hollum. 6Tania itapwahata tai nekyanita huno Hollum ta nemohiti hatai. 7Itai lenyabak, ikilu nya Isaya on oyyu tetai ojo,

8“Itahabuye laati hulo ani te etuhe hosi,

Ati alamaji atajya hosi jihoŋ.

9Itahabuye isi ani asai.

Ittiyenie isi emohiti wati ihwa arai isi efahita huno Hollum.”

Erre Hun Itarrohojye’to Atulo

Mk 7:14-23

10Iloŋu Yesu eluluŋ wati jihonyi ette jaran, Itayiryete jihoŋ bwo fe itaniŋyete eram ana. 11Obeŋ obo ariŋ on ojiŋak itwa tulo te etuk honyi oremik itarroho inyi, ati erre hun ofwonni’to to hutuk tulo addi arai isi erre hun itarrohojye atulo. 12Ofwonni leyiyanak honyi jihonyi ette jaran, ?Imijak iye jo iloŋojitai Farisei ta nekyana hoi ania? 13Itarraŋ inyi ojo, Ayyanio daŋ hun obeŋ Monyoŋ ette dou idulak orutuni adi isi addi. 14Obusana isi. Arai isi arihok hul oŋodoi’to. Al orihoro oloŋodo atulo ol oŋodo’to okwaharai adi isi daŋ iwure. 15Itarraŋ Petro jihonyi ojo, Itahutak nawoyo hiram ono narryamara ana jihohoi. 16Ojo inyi, Aii, itai, ?ibyaŋata tai itaniŋuna? 17?Ibyaŋata tai imijana jo erre daŋ hun ojiŋani ihutuk afanyi many ihohe attati irrituna alet? 18Ati erre hun ojiŋuni’to to hutuk tulo ofwonnitai to taji bwo fe arai isi ahirre hun itarrohojye’to atulo. 19Nyo to taji tulo ofwonnitai egigilitia hun orrohoji’to, isi: attohyo, aroto, asomon, ahoholyo, amwaŋa, iko etisyaha. 20Erre hunia isi hun itarrohoji’to atulo. Ati al oŋiyo atulo hobeŋ inyi ofinia, obeŋ bu ania oremik itarroho inyi.

Neruk ono Aŋotte Akenenitanani

Mk 7:24-30

21Attati Yesu busana amiji ania ette leten ifau Turo iko Sidon. 22Teyya ottu aŋotte Akenenitanani jihonyi ette iloŋo ta adyaha taji ojo, Hobu, Lonyi Davide, omehinie jihoŋ. Oŋwai ŋarri hoŋ bebe iko ajok. 23Ati obeŋ Yesu itarraŋ jihonyi obo ekyana kai. Ette leyiyanak honyi fwanna ifiyere inyi ifuhari aŋotte ania addi nyo oyyo inyi bebe tehalu hosi. 24Itarraŋ inyi jyo aŋotte ojo, Attu ni jyo aati Israele hama hul arai’to ihwa akyoro hun olitohini’to. 25Attati aŋotte rigoŋi jihonyi ette ilolya ojo, Hobu olwaha ani. 26Ette inyi itarraŋ jo, Obeŋ oyyu iduhuniere aŋirya duri ette irwoŋonia jyo aŋohe. 27Attati aŋotte jaran jihonyi, Afe, Hettiyanani, ati oŋiye aŋohe ebenyiti ŋirya hul odouni’to to teremeja leittok. 28Attati Yesu jaran jihonyi ojo, Hanioŋ, obolo neruk hoi bebe, ihanie adi jihoi ihwa iwak iye. Ta asaa ania ette ŋarri aŋotte ania ŋidari.

Etaŋidaryo Yesu Aŋwak

29Ojyo teyya ette Yesu busana amaji nya ette leten iger hari Galilea. Ette inyi dahina idoŋe ette itoŋo dia. 30Ottu eluluŋ wati jihonyi hul iyaŋunie aŋurak, aŋodok, attuhok, iko hul oretyai’to. Itaferehini isi aŋwak ihosyere Yesu ette inyi itaŋida isi daŋ. 31Tania illillihai aati nyo igonyuni isi aati hunya obeŋi’to ikyanai likyanai, hunya orrohojari’to aŋidari, hunya aŋurai’to adahai, bwo fe hunya oŋodoi’to omijye, ette isi itahabuyo Hollum olo Israele.

Etaŋiyo Yesu Aati Esiha Atomwana Aŋwan

Mk 8:1-10

32Iloŋo Yesu leyiyanak honyi jihonyi ette jaran jihosi jo, Amehino ni jyo laati hulo nyo itoŋoi isi ihwania jihoŋ oŋitek hunihoi bwo fe atuho naŋiyo hosi. Abeŋ ni awak ifahina isi addi hobeŋi isi oŋiye ŋadi ahure ottoho isi te ekoi. 33Ati itarraŋi leyiyanak honyi jihonyi ojo, ?Jyo edyofo ana erumak adi hohoi aŋiyo aja on oremik’to ta aati hul olwaji’to hulo? 34Attati Yesu ifiyo isi jo, ?Omukaja emunio jihatai? Bwo isi itarraŋi jo, Arai emunio hattarik bwo aham hun omutari. 35Tania ette inyi iramana eluluŋ wati hetetoŋohi ifau. 36Attati inyi iduhuna emunio hattarik iko aham ette jaran humo jyo Hollum. Ibibeny inyi isi ette isyo jyo leyiyanak honyi ette leyiyanak harana jyo eluluŋ wati. 37Oŋiye isi daŋ ette ifoŋ. Attati isi iduhuna ofitot hun oremehini ta afejin hattarik hun ifuti. 38Oŋiye isi daŋ. Arai alyawa hama esiha atomwana aŋwan bwo fe owoni aŋorwo iko aduri. 39Ifak inyi eluluŋ wati addi ette inyi dahina itogol lifanyari lifau Madaga.

Currently Selected:

Matteyo 15: LOT1969

Highlight

Copy