Luka 9

Efahina Yesu Leyiyanak Honyi ’Tomon Harrihai

Mt 10:5-15; Mk 6:7-13

1Attati inyi iloŋuna leyiyanak honyi ’tomon harrihai ette isyo jihosi adwaran iko elaballok igalihiniere ajohin iko itaŋidaryere eŋwati wati. 2Bwo inyi ette ifahina isi ittiyeniere laati olobye ono Hollum bwo fe itaŋidaryere aŋwak. 3Attati inyi jaran jihosi, Heyatti obo ariŋ ta adaha hatai ara dwadi bu elluhi kuyya akisi, kuyya aŋirya, kuyya agurusi, kuyya agamisi arrihai. 4Bwo jyo naji an ijiŋaniete tai itoŋoti dia many ifwatta tai jyo amaji ania addi. 5Kuyya ihari omuk aati itai, al ibusana tai amiji ania iddiddyaŋata attuduha to hejek hatai itahutaniere etamijani jihosi. 6Tania ofwoi isi ette fwatan ta atwa misihi ittiyeniere aati asayyo hun oyiji bwo fe itaŋidaryere aati imasik daŋ.

Naye ono Yoane Batista

Mt 14:1-12; Mk 6:14-29

7Ihwania itaniŋu Hobu Erode nerre hunya ihanio Yesu ette inyi illilliha nyo ojori nya omuk jo ibuhu Yoane to ye. 8Bwo omuk ojori jo inyi Elija, bwo omuk ojori inyi eyani sayyo linya beryen al ibuhu’to. 9Attati Erode jaran, Aŋotuni nya ahou Yoane addi, ?ati ŋai alya al etaniŋu ni erre honyi huna? Bwo awak inyi igonyuniere Yesu.

Etaŋiyo Yesu Aati Esiha Atomwana Miet

Mt 14:13-21; Mk 6:30-44; Yn 6:1-14

10Ocohunie lefahat ette iramana Yesu erre daŋ hunya ihanie isi, attati inyi iyaro isi many iger miji Beteseda. 11Ijifarai eluluŋ wati inyi al igonyuni isi isi ofwoi. Attati inyi irraŋuna isi bwo ette ittiyenio jihosi eram ono olobye Hollum bwo fe itaŋida hya hunya awahi’to aŋidari. 12Inya amuta oloŋ ofwonni leyiyanak honyi jihonyi ette jaran, Ifak eluluŋ wati addi, oŋida isi ofwoi itwa misihi iŋiyere bwo fe ijotori nyo ewon hohoi dini ihotohoto. 13Ati ojo inyi jihosi, Isyatta isi erre hun oŋiye isi. Bwo isi ojori, Ebeŋ hohoi ewon iko nobo aŋiyo arari emunio miet iko aham arrihai. ?Oŋida ati hohoi efwo inyyaŋuno aŋiyo ta aati hulo daŋ? 14Nyo arai nya laati hulya esiha atomwana miet. Bwo Yesu ette jaran jyo leyiyanak ojo, Iramana aati hetetoŋohi lifau te eluluŋi atomwana miet. 15Attati isi ihanio ihwo nya ette ititoŋonia aati. 16Attati inyi iduhuna emunio huna miet iko aham arrihai ette ibonno bwo ette jaran humo jyo Hollum ette ibibeny attati isyo jyo leyiyanak honyi hataharaniehe jyo aati. 17Oŋiye isi daŋ ette ifoŋ bwo isi ette iddudduhuna ofitot hun oremehini afejin ’tomon harrihai.

Elyet Petro Neruk Honyi

Mt 16:13-19; Mk 8:27-29

18To obo oloŋ al omojo Yesu abotye, ofwonni leyiyanak honyi jihonyi. Attati inyi ifiyo isi ojo, ?Ojori aati ani ŋai? 19Itarraŋi isi, Ojori omuk iye Yoane Batista, bwo omuk ojori iye Elija, bwo fe omuk ojori iye leyani sayyo linya beryen al ibuhu’to ihwania. 20Attati inyi inyyak ifiyo isi ojo, ?Ati ijatta tai ani ŋai? Itarraŋ Petro jihonyi ojo, Iye Kristo olo Hollum.

Ekiluna Yesu ta Naye Honyi

Mt 16:20-28; Mk 8:30—9:1

21Attati inyi ifahina isi hotobyaŋahi iramani obo atulo eram ania. 22Ojo inyi bwo fe, Ittigemye adi Lonyi tulo te erre arryai, ihari adi amarwak iko ehumak eleittaha bwo egyorok inyi. Bwo ottohori adi laati inyi ati ihalu oŋitek hunihoi ibuhu adi inyi.

23Attati inyi jaran jihosi daŋ ojo, Al awak obo atulo ijifatyo ani, ijara inyi hetehai ahwan honyi, hotolorotye akruce honyi oŋitek daŋ, hetejifatye ani. 24Al awak obo atulo italahuna nesu honyi italitohi adi inyi. Ati lya al isyo’to nesu honyi te eram hoŋ, italahuni adi inyi fur. 25?Anyo adi ayiji al opocou obo atulo erre daŋ hutta fau bwo nesu on osyo fur olitohi? 26Lya al iloriri’to jihoŋ bwo fe jyo ekyanita hoŋ, iloriri adi bwo fe Lonyi tulo jihonyi al ottu inyi iko akwatan honyi iko ono Monyonyi bwo fe iko ono anjelohyen hul olibori’to. 27Bwo fe ekyana ni nelahode jihatai, itoŋoi omuk dini hul obeŋi adi igonyuni naye many igonyunierek isi olobye ono Hollum.

Etakwaco Hollum Yesu to Doŋe

Mt 17:1-8; Mk 9:2-8

28Ninya allaŋi oŋitek hottohunik ihalu ekyanita huna, iyaro Yesu Petro, Yoane, iko Yakobo ihide doŋe imojori. 29Homojo inyi ette ahwan honyi lufaji ette aboŋojin honyi bwaran bwo fe opipyahi. 30Teyya oleye omuk aati arrihai hul ikyanai’to ikonyi, isi Mose iko Elija. 31Oleye isi ta akwatan bwo ikyanai isi ta naye honyi on ottu adi inyi iyeri imiji Yerusalem. 32Ati ijoŋitai Petro iko hya hul owoni’to ikonyi bwo al ohenyuni isi, igonyuni isi akwatan ono Yesu iko aati hulo arrihai hul owoni’to ikonyi. 33Lafwoi isi addi ojo Petro jyo Yesu ojo, Hettiyanani, oyyu jihohoi iwanari dini. Eduhok adi hohoi akukuhyen hunihoi, obo jihoi, obo jyo Mose, bwo obo jyo Elija; nyo obeŋ Petro omijak anyo an ikyana inyi. 34Hekyana inyi ottu nedis ette itihonia isi ette isi baŋi al itihok edis isi. 35Attati nekyana ’tuna totwa idis on ojo, “Lonyi hoŋ olo al anyimu ni. Itayiryete jihonyi.” 36Latuhuno nekyana ette Yesu wanan hama. Obeŋi isi iramani obo atulo erre hun igonyuni isi to oŋitek hwa.

Etaŋidaryo Yesu Eito ol Owon iko Ajok on Orroho’to

Mt 17:14-21; Mk 9:14-29

37To noloŋ an ijifak’to ofwonni isi to doŋe. Orwaŋanie isi iko eluluŋ wati arryai. 38Owon obo atulo ihiji iluluŋ al iloŋo inyi ojo, Hettiyanani, omehinie jihoŋ, imija lonyi hoŋ olo, ara abotye. 39Inef ajok inyi ette bwarana inyi lifau ol oyyo bwo ididyaŋa inyi ette obulal ’tuna to hutuk bwo fe ititoŋosyo inyi. Obeŋ bwo fe inyi obusak inyi. 40Bwo elolya ni jyo leyiyanak hoi hetefuhahi ajok addi ati obeŋi isi oremehini. 41Attati Yesu jaran jihosi ojo, Aii, itai aati hul obeŋi iko neruk bwo fe hul ogoli tajya. ?Many baya adi etoŋo ni ikatai? ?Many baya adi adik ni itai? Iyaŋunie lonyi hoi dini. 42Ati hottu inyi inef ajok inyi ette bwarana inyi lifau ette inyi didyaŋa. Attati Yesu ifuhara ajok on orroho’to addi ette eito ŋidari attati Yesu isyo inyi jyo monyonyi. 43Illillihai isi daŋ ta adwaran ono Hollum on obolo’to.

Enyyak Yesu Ikiluna ta Naye Honyi

Mt 17:22-23; Mk 9:30-32

Ati hellillihai isi te erre daŋ hun ihanio Yesu jyo aati, ette inyi ikyana jyo leyiyanak honyi ojo, 44Ijara ekyanita huna hotojiŋaniehe liyyaha hatai, nyo isyori adi Lonyi tulo lihas wati. 45Ati obeŋi isi itaniŋye ekyanita huna nyo idimani awoyo hiram jihosi jo oŋida isi obeŋi itaniŋuni, bwo isi ette baŋi ifiyere inyi te ekyana ana.

Etarisa Heyiyanak jo Ŋai adi Eleittok

Mt 18:1-5; Mk 9:33-37

46Attati isi itteryo itarisa ojori, ?Ŋai adi eleittok? 47Ati al omijak Yesu egigilita hosi ette inyi iduhuna eito on odiha’to ette ititoŋonia iger honyi. 48Ette jaran jihosi, Lya al ifwotu’to eito on odiha’to ta afure hoŋ, ifwotu inyi ani. Bwo fe lya al ifwotu’to ani ifwotu inyi lya al ifahu’to ani. Nyo lya ol omuta’to tehiji hatai daŋ, obolo adi.

?Ŋai Motte Hohoi?

Mk 9:38-40

49Itarraŋ Yoane jihonyi ojo, Hettiyanani, egonyu dwo hohoi lobo al ifuha’to ajohin hun orrohoji’to ta afure hoi attati hohoi itik inyi nyo obeŋ inyi ara aholohoi. 50Attati Yesu jaran jihonyi, Hetihoto inyi, nyo lya ol obeŋ’to ara amyotononi hatai ara inyi amotte hatai

Ehara Aati Samaria Yesu

51Ihwania ilyahai oŋitek attuba hun ifwotunierek inyi idou, bwo ihwania iyihi inyi ahode iculari Yerusalem. 52Ifak inyi lefahat ahosyere honyi, bwo isi ette fwatan jiŋana imiji Samaria ihuhumaniere amaji tenyi. 53Ati obeŋi nya laati ifwotuni inyi nyo olo inyi Yerusalem. 54Ninya igonyuni Yakobo iko Yoane eram ania, ojori isi, Hobu, ?iwak iye hohoi eloŋu neema t’edou iswahiniere isi? 55Ati oyito inyi ette isiŋyo isi ette jaran jihosi, Ibyaŋata tai imijana anyo an ikyanati tai. 56Nyo obeŋ nya Lonyi tulo ottu lifau ittohyere laati, ati ottu inyi italahuniere isi. Attati isi fwatan jyo obo amiji.

Elyeti Huno Aati Omuk

Mt 8:19-22

57Hadahai isi te ekoi ojo obo atulo jihonyi, Ejifatyo adi ni iye jyo amasik daŋ hun ilari iye. 58Bwo Yesu ette jaran jihonyi, Owoni obeyohi iko ewuryo hosi. Owoni aheny iko asik hosi, ati obeŋ obo amaji jyo Lonyi tulo iferyere. 59Attati inyi jaran jyo lobo, Ijifunie ani. Itarraŋ lya ojo, Hobu, ijara do ani alo nuhana monyoŋ. 60Ojo Yesu jihonyi, Ijara ayak onuhani ayak hosi ati ilo, ittiyenie eram ono olobye Hollum. 61Bwo fe lobo ette jaran, Hobu ejifatyo adi ni iye. Ati ijara do ani alo imalauno hutta haŋ hohoi. 62Ati ojo Yesu jihonyi, Atulo al itteryo’to adaha bwo ofyala orwaŋai obeŋ inyi osiru igyamari ilobye ono Hollum.

Currently Selected:

Luka 9: LOT1969

Highlight

Copy