Luka 22

Aŋoco ono Attohoro Yesu

Mt 26:1-5, 14-16; Mk 14:1-2, 10-11; Yn 11:45-53

1Ihwania ilyaha neyom an ifurani Allaŋan Anjelo bwo fe neyom on oŋiyerek isi emune on obeŋi bula. 2Attati ehumak eleittaha iko legyorok ’tifya aŋai adi ottohori isi Yesu. Nyo abaŋi isi laati.

3Attati Sitan jiŋana Yuda al ifurani Iskariote al ara’to olo ’tomon harrihai. 4Ette inyi leten iwwaha iko ehumak eleittaha bwo oseŋer, aŋai adi itinyyaŋak inyi Yesu jihosi. 5Omunoi isi ette coronia jihonyi aduma. 6Iruk inyi ette ’tifyatyo amaji an obyaŋarik laati isyoryere Yesu jihosi.

Aŋiyo Yesu iko Leyiyanak Honyi

Mt 26:17-25; Mk 14:12-21; Yn 13:21-30

7Ette oloŋ ania ’tuna ono nemunio iko on ottohyerek isi aker ono ehuma. 8Ette inyi ifahina Petro iko Yoane ojo, Ifwatta ihuhumana amaji jihohoi iŋiyere ta neyom ono Allaŋan Anjelo. 9Ojori isi jihonyi, ?Anani maji an efwo hohoi ihuhumyo? 10Ojo inyi jihosi, Imijyete, al ijiŋana tai itwa miji irumana adi itai obo atulo al iwwahatyo atobok hari. Ijifati inyi jyo aji an alari inyi. 11Ijatta jyo amonye haji jo, Ojo Ettiyanani, ?tani aji tamonok oŋida ani aŋiyere ta neyom iko leyiyanak hoŋ? 12Itahutak adi inyi itai aji an alat iko nerre daŋ huno neyomita bwo itai ihuhumana amaji to hohoi. 13Ette isi fwatan ette rumana erre daŋ ihwa iramak dwo inyi isi. Tania ihuhumani isi aŋiyo te eyom ono Allaŋan Anjelo.

Ateremeja Hobu

Mt 26:26-30; Mk 14:22-26; 1 Kor 11:23-26

14Ninya attuba asaa itoŋo inyi iko lefahat honyi. 15Attati inyi jaran jihosi, Ta awahan on obolo itaji hoŋ awak dwo ni iŋiyere te eyom ana ikatai ihosyere ettigemyo hoŋ. 16Nyo ajo ni jihatai, abeŋ adi ni enyyak ŋiyo inyi many etaleyehiniere ni awoyo hiram honyi ilobye Hollum. 17Ette inyi ifwotuna akos ette jaran humo jyo Hollum, ette isyarana jyo leyiyanak honyi ojo, Hibetina, ihiharana ihiji hatai. 18Nyo ajo ni jihatai abeŋ ni enyyak mat aari ajalaŋi many ottuniere olobye Hollum. 19Ette inyi iduhuna emune ette jaran humo jyo Hollum, ette ibibeny attati isyarana jihosi ojo, Ara ana ihwa ahwan hoŋ an esyo ni tetai, ihaniete ihwania igiluniere ani. 20Ninya atuhuno aŋiyo ette inyi iduhuna akos ojo, Ara akos ana ecorit aŋejuk ono nooto hoŋ, on owouno’to addi tetai. 21Ati imijyete, lya al itinyyaŋa’to ani el ewon ikohoi iteremeja. 22Nyo oye adi Lonyi tulo ihwa onyimok nya Hollum tenyi ati orroho bebe jyo alya al itinyyaŋa’to inyi. 23Ette isi itteryo ififiyo ta ahwattek hosi jo ŋai alya al ihanio’to ariŋ ania.

?Ŋai Adi Eleittok?

24Ette isi ŋalafa jo ŋai adi eleittok ihiji hosi. 25Attati Yesu jaran jihosi, Ilettohorik hobwok hulo paganohyen aati hosi. Bwo fe iloŋoi aati isi ahalwak hosi. 26Ati obeŋ ara ihwania jihatai, nyo ijara eleittok hatai hetera do apit, bwo fe ijara hobu hetera do ahegyamani. 27?Ŋai adi eleittok? ?Inyi alya al itoŋo’to iŋiyere kuyya lya al isyo jihonyi aŋiyo? Ahode lya ol oŋiyo’to, inyi eleittok. Ati attu ni ihiji hatai ihwa alya al igyama’to.

28Ati jihatai hul edulo’to ikoŋ te ettigemyo hoŋ, 29acorok ni jihatai olobye ihwa ocorok nya Monyoŋ jihoŋ. 30Iŋiyete adi itai bwo fe imatati iteremeja hoŋ ilobye hoŋ. Itoŋoti adi itai bwo fe imaji leittok iŋocere awoi ’tomon harrihai huno Israele.

Ekiluna Yesu Ehara Petro Inyi

Mt 26:31-35; Mk 14:27-31; Yn 13:36-38

31Ojo Yesu, Simone, Simone, imijye awak Sitan iye igilyo ihwa ema. 32Ati amojo ni teye jo oŋida neruk hoi obeŋ opwak. Bwo fe al irwe iye itagolo illarak hoi. 33Ati ojo Petro jihonyi, Hobu ehuhuma ni ilari ibabus dwadi iyeri ikoye. 34Ati ojo Yesu, Eramak ni iye Petro jo hobeŋ ahohoro ilok ahana, iha adi iye ani enyyahita hunihoi.

35Attati inyi jaran jihosi, Ninya efahuniere ni itai ahania ta abyaŋan kis, kuyya ettunit gurusi, kuyya bu amuha, ?iwahata nya itai omuk erre? Ojori isi, Obeŋ nya obo. 36Bwo ojo inyi jihosi, Ati ihwania ijara alya ol owon’to iko akis heyaro inyi, iko lya ol owon’to iko ettunit gurusi. Bwo fe ol obeŋ’to owon iko afere ijara inyi itinyyaŋak agamis honyi inyyaŋuniere afere. 37Nyo ajo ni jihatai, etasiru adi ni ekyana ana on ojo, “Ihyanani inyi iko aati hul iyyauni’to”. Nyo itasiruni adi erre daŋ hun igyoroni toni. 38Ojori isi jihonyi jo, Hobu imijye, afyara arrihai huna. Bwo ojo inyi jihosi oremehini hunia.

Amojo Yesu Limana Jetsemani

Mt 26:36-46; Mk 14:32-42

39Ette inyi jiŋuna to miji ette leten lidoŋe Oliveto ihwa ihanio inyi toloŋi. Attati leyiyanak honyi jifaro inyi. 40Ninya afanyi isi jyo amaji ania, ojo inyi jihosi, Omojoti jo oŋida esusuyo obeŋ ottu jihatai. 41Ihut inyi alamarai kai ihwa oremik atulo irwoŋoro amorwo. Origoŋ inyi ette mojo. 42Ojo, Monye kuyya ara awahan hoi iyai akos#22:42 akosIkyana Yesu ta nadyaha iko naye honyi. ana addi jihoŋ, ati ijara awahan hoi ihanie, obyaŋara awahan hoŋ. 43Attati anjelo leyo jihonyi t’edou itagolyere inyi. 44Ette ataji honyi dyaha bebe ette inyi mojo ta amijan taji bwo fe opulo omom honyi ahoto ette itihuna many ifau. 45Ninya atuhuno amojo ette inyi dyoto ette leten jyo leyiyanak honyi. Onyurak inyi isi ojotoi nyo obolo ejiriŋa jihosi. 46Ette inyi jaran jihosi, ?Nyo ijototi tai? Ottena, omojoti jo oŋida esusuyo obeŋ ottu jihatai.

Esyarana Yesu jyo Amyorok

Mt 26:47-56; Mk 14:43-50; Yn 18:2-11

47Hekyana inyi ofwonni eluluŋ wati iko Yuda al ara’to olo ’tomon harrihai al ikyem osyere. Ihutok inyi jyo Yesu bwo awak inyi jur inyi. 48Ati ifiyo Yesu inyi ojo, ?Yuda, itaminyeyo iye Lonyi tulo ta ajuryo hoi? 49Ninya igonyuni laati hul owoni’to iko Yesu erre hun idwoŋi’to ojori isi, ?Hobu, errem adi hohoi isi ta afyara? 50Bwo oyef obo olosi egyamani olo ehumani ol obolo’to, ette isaluna neyyok honyi etteŋet. 51Ati ojo Yesu jihonyi, Obusak, ette inyi ’tir eyyok egyamani ette itaŋida inyi. 52Ojo Yesu jyo ehumak eleittaha, iko oseŋer hulo aji imojit eneittok bwo amarwak hul ofwonni’to jihonyi, ?Ifwanna tai iko afyara bwo elluhi inefuniere ani ihwa olohoho? 53Ati oŋitek daŋ ewon ni ikatai ihaji imojit eneitok bwo ibyaŋata tai ani inefuna. Ati ara asaa ana anatai iko adwaran ono edumele.

Ehara Petro Yesu

Mt 26:57-58; Mk 14:53-54, 66-72; Yn 18:12-18, 25-27

54Inefuni isi inyi ette rihoro inyi many ihaji ono ehumani ol obolo’to. Ati ijifaro Petro isi alamarai. 55Inahini isi eema itwa haŋ ette isi suja arabotye. Itoŋo Petro bwo fe ikosi. 56Ati igonyu obo odwoti inyi itoŋo ifaŋit hima ette inyi yadari jihonyi ette jaran, Owon dwo atulo olo ikonyi. 57Ati orisa inyi ojo, Hanioŋ, abeŋ ni amijak inyi. 58Ojo gaa igonyu obo inyi ette jaran, Ira iye obo olosi. Ati ojo Petro, Olo, obeŋ. 59Al allaŋ asaa abotye ette obo ikyana ojo, Ahode amijak ni jyo owon dwo atulo olo ikonyi, nyo ara inyi olo Galilea. 60Ati ojo Petro, Olo, abeŋ ni amijak anyo ikyana iye. Teyya hekyana inyi ette ahohoro ilok. 61Oyito Hobu ette fyala jyo Petro. Attati Petro giluna ekyana ono Hobu, odwo ojo inyi jihonyi jo, Hobeŋ ahohoro ilok ahana iha adi iye ani eharita hunihoi. 62Olo inyi ilet ette ’yo bebe.

Abahyo Hosi Yesu

Mt 26:67-68; Mk 14:65

63Attati laati hul inefuni’to Yesu osuhotyere inyi ette bahyo inyi. 64Ifitani isi aboŋo ihoŋite honyi ette isi jaran jihonyi, ?Ottenu, ŋai al anaŋ’to iye? 65Ette isi moryo inyi te erre arryai.

Eyaro Yesu Ihosyere Okikoi

Mt 26:59-66; Mk 14:55-64; Yn 18:19-24

66Nya motye ottubanie amarwak iko ehumak eleittaha bwo legyorok ette iyaro inyi ihosyere okikoi hosi. Ojori isi, 67Kuyya ira iye Kristo, iramak hohoi. Ati ojo inyi jihosi, Kuyya eramak ni itai ibyaŋata tai iruhoto. 68Bwo fe kuyya efiyo ni itai obo efi ibyaŋata adi itai itarraŋata. 69Ati igonyuna adi itai Lonyi tulo al itoŋo’to ihani iŋet ono Hollum adwarani. 70Ojori isi, ?Ira ati iye Lonyi Hollum? Ojo inyi jihosi, Ihwa ijatta tai, ani alya. 71Ojori isi, ?Anyo nyi ettifya hohoi etamijanak omuk? Etaniŋu hohoi ta ahwattek hohoi ekyanita honyi.

Currently Selected:

Luka 22: LOT1969

Highlight

Copy