Luka 21

Nesyoryo ono Ehidak

Mk 12:41-44

1Ette Yesu mijo ette igonyuna abarak hul ifihye agurusi hosi isenuk imojit gurusi. 2Bwo fe ette inyi igonyuna obo elocaŋ ihidahi an itadohi atarifa itwa senuk. 3Ette Yesu jaran, Ahode ajo ni jihatai jo, obolo esyoryo elocaŋ ihidahi ana agalik daŋ. 4Nyo isyori isi daŋ te ebariti hosi ati te elocaŋ honyi isyarak inyi daŋ hun owoni’to jihonyi.

Ekyana Yesu te Etatturyo Aji Imojit Eneittok

Mt 24:1-2; Mk 13:1-2

5Ikikyanai omuk laati ta aji imojit eneittok jo ilaman inyi ta amorwoi iko ayyel hun isyori laati. Ati ojo Yesu jihosi, 6Imijyete tai erre huna ahana ati ofwonni adi oŋitek hun obeŋ adi obo amorwo arasa ihorwoŋ obo nyo itatturi adi isi daŋ.

Etamijanita iko Ettigemita

Mt 24:3-14; Mk 13:3-13

7Ette isi ifiyo inyi ojori, Hettiyanani, ?baya adi idwoŋi erre huna? ?Anyo adi etamijani an itahutak hohoi ojo ilyahai erre hwa? 8Ojo inyi, Ihumata irrirrya, helaha obo atulo itisyaba itai. Nyo ofwonni adi laati arryai ta afure hoŋ hul ojori, Ani alya Kristo, ojori isi bwo fe, Ilyahai oŋitek attuba, ati hejifatyete isi. 9Al itaniŋuna tai jo owon arrem bwo fe aŋalafa on obolo, hebaŋata, nyo ofwonni adi erre huna ahosyere ati hobeŋ esidi fau.

10Ette inyi jaran jihosi, Ofwoi adi laati hutto maji obo jyo obo irryomoniere, bwo fe laati hutto lobye obo jyo obo. 11Bwo fe ikikiro adi afau bebe, owon adi ahure on obolo imasik arryai iko eŋwati. Ofwonni adi etamijanita hun obolori’to t’edou hun itabaŋi’to laati. 12Ati ahosyere hobeŋi erre huna idwoŋi, inefuni adi laati itai ittigemyere. Iyarai adi itai ihasik imojiti iko ababusi, bwo ihosyere hobwok iko mandiri ta afure hoŋ. 13Ara ana asiruna ono amiji jihatai iramaniere neruk hatai. 14Hegigiloti ahosyere jo itarraŋata adi itai aŋai. 15Nyo esyo adi ni jihatai ekyanita iko olofyoro hun obeŋi adi amyorok hatai oremehini itarraŋ. 16Isyori adi esyok iko illarak hatai itai jyo amyorok hatai, bwo fe isyori adi aati hutta haŋ iko mottyarak hatai itai jihosi bwo ottohori adi omuk hulatai. 17Oliwarik adi itai aati daŋ ta afure hoŋ. 18Ati obeŋ adi obo ofiti to hosi hatai olitohi. 19Bwo al odihu’to italahuni adi.

Afwanna huno Ettigemita hun Obolori

Mt 24:15-28; Mk 13:14-23

20Ati al igonyuna tai oseŋer ikoloni Yerusalem, omijana jo ilyaha atturo honyi. 21Iholoŋ ania ijara hul owoni’to Yudea hotofuhohi lidoŋyok, bwo fe hul owoni’to itwa miji hefwahi addi. Bwo fe ol owon’to limana hotobyaŋa acaharu itwa miji. 22Nyo arai oŋitek huna oŋitek huno enienuna jo oŋida itasiruni erre daŋ hun igyoroni. 23Orroho bebe jyo aŋorwo hun oyeduri’to iko hun itadasye’to to noŋitek hwa. Nyo owon adi ettigemyo on obolo jyo afau ana iko ajore on obolo jyo laati hulo. 24Ottohori adi omuk ta afere bwo iyarai adi omuk apiti ifau paganohyen, bwo fe iryeyere adi paganohyen amiji Yerusalem many ottubarik oŋitek huno paganohyen.

Acohuno ono Yesu

Mt 24:29-31; Mk 13:24-27

25Owoni adi etamijanita liholoŋ iko liyafa bwo lilelyefi. Bwo fe lifau owon adi elafuho iko apapaŋi lihiji wati nyo ifolyahita aari bebe. 26Okwaharai adi laati ta abaŋi al igonyuni isi erre hun ofwonni’to ifau nyo ikikiroi adi erre hutte dou. 27Attati isi igonyuna Lonyi tulo al isuru t’edou lihide idisi iko nadwaran iko akwatan on obolo. 28Al igonyuna tai erre huna idwoŋi, owotyati, ibonnoto ahide, nyo ilyaha etalahuna hatai.

Narryamara ono Aŋaboli

Mt 24:32-35; Mk 13:28-31

29Ette inyi iramana jihosi obo arryamara. Imijyete aŋaboli iko ayyanio daŋ. 30Al oyisuni abene aŋejuho imijana tai ta ahwattek hatai jyo ilyaha atahas. 31Ihwania bu al igonyuna tai erre huna idwoŋi, omijana jyo ilyaha olobye Hollum. 32Ahode ahode ajo ni jihatai, obeŋ adi elahaji ana oyei many ihanierek erre huna daŋ. 33Nyo obyaŋarani adi nedou iko nafau ati obeŋi nekyanita hoŋ opwahi ’tuŋ.

Oŋida Laati Ihum Irrirryai

34Ati ihumata ahwattek hatai bwo fe helaha atajya hatai ifuti iko adaya ojo aruma bwo fe ewahiti huno afau ana, ŋadi oloŋ ania ilunyu jihatai lunyuna ihwa elohit. 35Nyo ottu adi inyi ihwania jyo laati daŋ hutta fau. 36Tania ihumata irrirrya ta asahyen daŋ bwo fe omojoti jo oŋida itai iremehina iris jyo erre hun ofwonni’to huna ittata tai wotya ihosyere Lonyi tulo.

37Ati oŋitek daŋ ittiyenio Yesu ihaji imojit eneittok bwo fe ta attari olo inyi jototyo idoŋe Oliveto. 38Bwo fe ta amotye hanyik ofwonni aati daŋ jihonyi ihaji imojit eneittok itayiruniere ekyanita honyi.

Currently Selected:

Luka 21: LOT1969

Highlight

Copy