Luka 2
2
Esiuna ono Yesu
Mt 1:18-25
1To noŋitek hwa ottu nya neram an ifahu hobu Cesare Agusto jo oŋida igyoroni afureta wati daŋ hutta fauhyen. 2Ara nya ana negyeri etteri an igyororik to ninya arari Kwirino eleittok olo Sirya. 3Ofwoi nya isi daŋ itigyoroniere afureta hosi imisihi hosi. 4Olo nya Yosefo to miji Nasaret otto Galilea many ifau Yudea imiji Davide an ifurani Betlehem nyo inyi atta haŋ ba Davide. 5Afwoi inyi iko Maria ŋorwoi honyi an ilyaha’to nesyo itigyoroniere afureta hosi. 6Howoni isi dia ette noloŋ idwoŋ an isyori inyi, 7ette inyi isiuna lonyi honyi oloŋeu ette bubunana inyi ta aboŋojin attati itaferehina inyi itogol husuŋ nyo obeŋ nya namaji tesi ’totwa haji lojotori.
Leyyak Hidye iko Anjelohyen
8Jyo nafau ania owoni nya lomuk leyyak hidye hul irrirryai nedye hosi ta narwe imur. 9Teyya oleyo anjelo olo Hobu jihosi ette afaŋan ono Hobu itafaŋ isi attati isi daŋ baŋi. 10Attati anjelo jaran jihosi, Hebaŋata, nyo eyaŋuno ni jihatai asayyo hun oyiji hun iyaŋunie adi amuno on obolo jyo aati daŋ. 11Isiuni ahana jihatai Etalahani, to miji Davide, al anya Kristo Hobu. 12Ara fe ana etamijani jihatai jo inyurana adi itai olodole obubuna ta aboŋojin ol oferyo litogol husuŋ. 13Teyya teyya oleye anjelohyen arryai iko anjelo lya ette isi itahabuyo Hollum ojori,
14Ijara akwatan hatawana lidou jyo Hollum
Bwo nelik tajya lifau jyo aati hul itamunoye’to inyi.
15Lafwoi anjelohyen lidou, ojori leyyak, Hafata Betlehem, efwo mijo ariŋ an idwoŋ’to ana an itahutak Hobu jihohoi. 16Attati isi fwatan kokwak ette nyurana Maria iko Yosefo iko leito ol oferyo litogol husuŋ. 17Igonyuni leyyak hidye inyi ette isi iramana neram hito lodwo iramani jihosi. 18Illillihai aati arryai al itaniŋuni isi erre hun iramani leyyak jihosi. 19Ati ottunak Maria hodwo hirre itaji honyi ette igigilo tesi. 20Acaharai leyyak hul itahabuye Hollum ta nerre hun itaniŋuni isi bwo fe igonyuni; nyo onyurani isi erre ihwa iramani dwo jihosi.
Efurana Yesu
21Ihalu oŋitek hottohunik al oŋoti inyi ette isi ifurana inyi Yesu ihwa ninya ifuraniere anjelo inyi hobeŋ honyonyi oyedu inyi.
Eyaro Yesu Ihaji Imojit Eneittok
22Ati inya attubai oŋitek huno etaliboryo ihwa igyoroni ifahita huno Mose, iyaŋunie isi inyi Yerusalem isyoryere inyi jyo Hobu. 23Nyo igyoroni lifahita huno Hobu ojo, “Iloŋoi adi alyawa daŋ oloŋehwa ahegyamak jyo Hollum.” 24Bwo fe isyori isi ehumita ihwa ojori lifahita huno Hobu jo oŋida isyori awolosin arrihai kuyya amami arrihai. 25Owon obo atulo afure honyi Simeona imiji Yerusalem. Ara nya inyi atulo ol obis bwo fe omuno inyi Hollum. Ottifya nya inyi alwahyo ono Israele bwo owon nya inyi iko Oloyiri ol Olibo. 26Bwo fe italeyehini jihonyi jo obeŋ adi inyi oye many igonyuniere inyi Kristo#2:26 KristoAn ojo onyimoto olo Hollum. olo Hobu. 27Ottu inyi ihaji imojit eneittok ihwa iramak Oloyiri ol Olibo inyi. Al iyaŋunie esyok Yesu ihaniere jihonyi ihwa igyoroni ifahita, 28akafu inyi Yesu ihas honyi ette itahabuyo Hollum ojo,
29Ihwania Hobu ijara yo egyamani hoi hotoye ta nelik taji
Ihwa ikyana iye.
30Nyo igonyuni oŋite hoŋ etalahuna hoi,
31An ihuhumak iye ihosyere wati daŋ.
32Ara inyi afaŋan on oleyo adi jyo paganohyen,
Bwo isyo adi akwatan jyo aati hoi Israele.
33Illillihai nya honye iko monye hito ta nerre hun ikyana Simeona tenyi. 34Bwo fe Simeona ette itajahina isi ette jaran jyo Maria ojo, Imijye, ta leito olo okwaharai adi omuk bwo odetunie adi omuk aati arryai hulo Israele, bwo fe ara inyi etamijani olo Hollum. Ati obeŋi laati iruhi, 35bwo fe italeyeuni adi egigilita tajya hosi. Tania ocuk adi ejiriŋa ataji hoi ihwa ademi.
36Owon nya bwo fe nobo neyani sayyo afure honyi Anna ŋarri Fanuele otto woyo ba Aser. Imarwak inyi bwo amanyai inyi iko habi honyi aŋasi hattarik many hayamarik inyi, 37ette habi honyi ye bwo fe ara inyi nolobiloŋ. Arai aŋasi honyi atomwana hottohunik haŋwan. Odulo inyi itahabuyo Hollum ta aferuna iko amojo ette ilak busana aji imojit eneittok. Odulo inyi dia ta attari iko ta afanni daŋ. 38Ati inya attu asaa nya, ottu inyi ette isyo ahumo jyo Hollum ette ikyana te eito jyo hya hul ottifyai’to etalahuna ono Yerusalem.
Acaharo Hosi Nasaret
39Ninya attubani isi erre daŋ hun igyoroni ifahita huno Hobu, acaharai isi Galilea, amiji hosi Nasaret. 40Oboboloro nya leito alya ol ogol ette wanan iko nolofyoro bwo fe ifut inyi iko amehino ono Hollum.
Awanan Yesu Ihaji Imojit Eneittok
41Adahatye esyok honyi Yerusalem aŋasi daŋ ta neyom ono Allaŋan Anjelo. 42Inya labolo Yesu aŋasi ’tomon harrihai ofwoi nya isi daŋ ta amojo ihwa amok jihosi. 43Bwo fe ninya lacohunie isi te esidi ono neyom, arasa Yesu imiji Yerusalem. Obeŋi esyok honyi omijani. 44Ati igigiloi isi jo owon adi inyi liluluŋ wati. Adahai isi noloŋ abotye bwo fe ihalu ottifyai isi inyi jyo hutta haŋ hosi iko aati hul omijani’to inyi. 45Obeŋi isi onyurani inyi ette isi caharu Yerusalem ittifyari inyi. 46Ihalu oŋitek hunihoi onyurani isi inyi ihaji imojit eneittok ihiji hettiyanak. Itayiryo inyi jihosi bwo fe ifiyo inyi isi nefita. 47Illillihai aati daŋ hul itaniŋuni’to nyo ilofyoro inyi bwo fe obisi etarraŋita honyi. 48Ninya onyurani esyok honyi inyi, ette isi illilliha ette honyonyi jaran jihonyi, Lonyi hoŋ, ?nyo ittigemyo iye hohoi ihwania? Ettoho ani iko monyohoi attifya iye ta amijan tajya. 49Attati Yesu jaran, ?Nyo ittifyati tai ani? ?Itimoti tai jo oŋida ani awon ihaji Monyoŋ? 50Ati obeŋi nya isi itaniŋuni anyo ojo inyi jihosi. 51Acaharai inyi ikosi ette ruboro Nasaret bwo fe ifaha nya inyi jihosi, ette honyonyi gotyere erre huna itaji honyi.
52Bwo fe oboboloruno Yesu to ofyoro bwo abolori hwan honyi iko ayiji honyi ihomom Hollum iko aati.
Currently Selected:
Luka 2: LOT1969
Highlight
Share
Copy
Want to have your highlights saved across all your devices? Sign up or sign in
This text was originally published by the British and Foreign Bible Society in 1969.
