Malakỳ Sava lalana
Sava lalana
–Ny bokin’i Malakỳ dia voasoratra tamin’ny tapany voalohan’ny taonjato fahadimy tal J.K., efa ho taonjato iray taorian’ny niverenan’ny Jiosy avy tany Babilônia izay nanaovana sesitany azy nanomboka tamin’ny fiandohan’ny taonjato fahenina ka hatramin’ny taona 538 tal J.K. Taorian’ny fiverenana avy any an-tsesitany, ny fikambanambe israelita dia tafalentika tsikelikely tao anatin’ny hakiviana. Telopolo na dimampolo taona mialoha ny toritenin’i Malakỳ mpaminany dia nanaraka ny antson’i Hagay sy i Zakarià ny Israelita ka nandrafitra indray ny tempolin’i Jerosalema (taona 520 - 515 tal. J.K.). Hatreo anefa dia very an-javony ilay fanantenana fihavaozam-pirenena teo ambany fitarihan’i Zerobabela governora, ary tsy mbola nitranga ilay fanitsiam-pivavahan’i Hezrà (tokony ho tamin’ny 440 tal. J.K.). Nihasimba ny lafiny fivavahana sy môraly: natao an-tsirambina ny fanompoam-pivavahana (1.6-14), fitahina aza Andriamanitra rehefa manao fanatitra ny olona (3.6-11), tsy mahavita ny asa nanirahana azy intsony ny mpisorona ary tsy hajaina intsony ny lalàna izay nomen’Andriamanitra ny vahoakany (2.1-16).
Amin’ny mpaminany dia fanararaotra izany toe-javatra izany mba hampirisihana ny mpisorona sy ny vahoaka ho amin’ny fiovana tanteraka, ka ny nataony dia ny mampahatsiaro azy ireo ny fitiavan’Andriamanitra (1.1-5) nefa koa ny maha antomotra ny fitsaràny sy ny fiaviany (2.17–3.5; 3.13-24). Nambarany taminy ny fandefasan’Andriamanitra ny irany (3.1) sy ny mpaminany iray toa an’i Elià (3.23). Ao amin’ny Vaovao Mahafalin’i Matio sy i Lioka, izany fampanantenana izany dia manambara an’i Jôhany Mpanao Batisa, izay natao hanomana ny fiavian’i Jesoa (Mt 17.11-13; Lk 1.17).
Tsy tantin’i Malakỳ ny fahasimbàn’ny fiainam-pivavahana sy môraly tamin’ny androny; ka izany no ijoroany amin-kery hanomana ny mpino hihaona amin’Andriamaniny. Izany fihaonana izany koa no mbola anasany antsika ankehitriny.
Currently Selected:
Malakỳ Sava lalana: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.