Marika 15

Sa lewai Jisu ko Pilato, a sa sereki Parapa, a sa soli Jisu vei ira na tamata, 1-15. Era sa qai vakacacana, ka vakota ki na kauveilatai, 16-41. Sa buluti Jisu ko Josefa, 42-47.

1IA e na mataka era sa qai bose vata ko ira na bete levu kei ira na qase kei ira na vu-ni-vola kei ira kece na mataveilewai, ka vesuki Jisu, ka kauta tani, ka solia vei Pilato.

2A sa tarogi koya ko Pilato, O sa nodra Tui na kai Jutia, se segai? A sa vosa ko koya, ka kaya vua, O sa kaya dina mai. 3A sa vuqa na ka era sa beitaki koya kina ko ira na bete levu. 4Sa qai tarogi koya tale ko Pilato, ka kaya, O sa sega ni kaya e dua na ka, ne? raica na kena vuqa ni ka era sa beitaka vei iko. 5A sa sega na ka sa kaya ko Jisu; a sa kidacala kina ko Pilato.

6A sa dau nonai valavala e na solevu me sereka vei ira e dua na tamata sa vesu, o koya era sa digitaka. 7A sa tiko e dua, na yacana ko Parapa, sa vesuki vata kei ira e so na tamata ue era a laba ni sa ia na ue. 8A ra sa kaci tiko na lewe vuqa, ka vakatekivu me vakamamasu me vaka sa dau nonai valavala me kitaka vei ira. 9A sa vosa vei ira ko Pilato, ka kaya, Dou sa vinakata meʼu sereka vei kemudou na nodra Tui na kai Jutia, se segai? 10ni sa kila ko koya ni ra a soli koya yani ko ira na bete levu ni ra sa vuvutaka.

11A ra sa vakauqeti ira na lewe vuqa ko ira na bete levu, me sereki Parapa ga vei ira ko koya. 12Sa qai vosa ko Pilato, ka kaya tale vei ira, A cava dou sa qai vinakata meʼu kitaka vua dou sa vakatoka me nodra Tui na kai Jutia? 13A ra sa qoqolou tale, Vakota ki na kauveilatai. 14Sa qai kaya vei ira ko Pilato, A cava na ka ca sa mai cakava ko koya? A ra sa qai qoqolou vakalevu cake, Vakota ki na kauveilatai.

15Ia ni sa vinakata ko Pilato me vakavinavinakataki ira na lewe vuqa, sa sereki Parapa vei ira, a sa soli Jisu yani, ni sa vakanakuitataka mada eliu, me vakoti ki na kauveilatai.

16A ra sa kauta tani ko ira na tamatai valu ki na yasana sa vale ni turaga, ka vakasoqoni ira vata na matai valu taucoko. 17A ra sa vakasulumi koya e na ka-damudamu, a ra sa talia e dua nai sala e na veiwa-vakavotona, ka salagi koya kina. 18A ra sa vakatekivu me kida vaka, Sa loloma, na nodra Tui na kai Jutia! 19A ra sa yavita na uluna e na dua na gasau, a ra sa kasivita, a ra sa tekiduru ka masu vua. 20Ia ni ra sa vakalialia oti, era sa luvata vua na ka-damudamu, ka vakasuluma e na nonai sulu dina, ka kauta yani me ra vakota ki na kauveilatai.

21A sa dua na kai Kirini, o Saimoni, a tamadrau ko Alekisadro kei Rufo, o koya sa lako tu, ni sa lako mai na yasana kisau, a ra sa vakasaurarataki koya me colata na nona kauveilatai.

22A ra sa kauti koya ki na dua na yasana, ko Kolikoca, (a kenai balebale, A yasana ni qavokavoka.) 23A ra sa solia vua na waini sa veiwaki vata kei na mura me gunuva; a sa sega ni taura ko koya.

24Ia ni ra vakota oti ki na kauveilatai, era sa qai vota na nona veisulu, e na vakawiri madigi, me ra dui kila nodrai votavota.

25Ia ka sa kenai katolu ni tiki-ni-siga, ni ra sa vakota ki na kauveilatai.

26A sa vola ecake na ka sa beitaki vua: A NODRA TUI NA KAI JUTIA.

27A ra sa vakota vata kaya ki na kauveilatai e lewe rua na daubutako; e dua ena ligana i matau, ka dua e nai mawi. 28A sa vakayacori kina nai Vola, sa kaya, Sa wili vata kei ira na tamatai valavala ca ko koya.

29Ia ko ira sa lako voli, era sa vosavakacacataki koya, ni ra sa kuretaka na uludra, ka kaya, Drasa, o iko sa basuka na vale ni soro, ka tara e na bogi e tolu, 30vakabulai iko mada ga, ka kevu sobu mai na kauveilatai. 31A sa vaka talega kina ko ira na bete levu, era sa vakalialia vakai ira, vata kei ira na vu-ni-vola, ka kaya, O koya sa dauvakabulai ira na tani; sa sega ni vakabulai koya rawa: 32me kevu sobu edaidai mai na kauveilatai na Karisito na nodra Tui na Isireli, me keimami raica ka vakabauta. Oi rau talega eratou a vakoti vata kaya ki na kauveilatai, erau sa vakalialiai koya.

33Ia ni sa yaco nai kaono ni tiki-ni-siga, sa butobuto na vanua taucoko, ka yacova nai kaciwa ni tiki-ni-siga.

34Ia e nai kaciwa ni tiki-ni-siga sa kaci ko Jisu e na domo levu, ka kaya, Iloi, Iloi, lama sapakicani? (a kenai balebale, Noqu Kalou, noqu Kalou, o sa biuti au e na vuku ni cava?) 35Ia ka so vei ira sa tu voleka, ni ra sa rogoca, era sa kaya, Raica, sa kacivi Ilija ko koya. 36A sa cici e dua, ka tonisua e dua na vutovuto e na wai wiwi, ka vivia ki na dua na gasau, a sa vagunuvi koya, ka kaya, Biuta mada; me da raica se na lako mai ko Ilija me kevutaki koya sobu mai, se segai.

37Ia ko Jisu, ni sa kaci e na domo levu, sa qai ciba yani.

38A sa sei rua nai lati ni vale ni soro mai na tikina ecake ka kauta ki ra.

39Ia ni sa raica na turaga ni valu, ko koya sa tu voleka ka donui koya, ni sa kaci vakaoqo ko koya, ka qai ciba yani, sa kaya, E dina ga ni sa Luve ni Kalou na tamata o qo.

40E so talega na yalewa era sa vakaraica vakayawa; e dua vei ira ko Meri na kai Makitala, kei Meri na tinadrau ko Jemesi sa gone kei Josese, ko Salomi talega; 41(eratou a daumuria, ka dauqarava, ni sa tiko mai Kalili ko koya;) kei ira talega na yalewa e lewe vuqa era a lako vata kaya ki Jerusalemi.

42Ia ni sa yakavi mai, ni sa siga vakarau, na siga sa tarava na siga ni vakacecegu, 43sa lako mai ko Josefa, na kai Arimacia, a matanivanua, a sa dua vei ira na mataveilewai, a sa waraka me yaco na matanitu ni Kalou, a sa lako doudou vei Pilato, ka kerea na yago i Jisu. 44A sa kidacala ko Pilato ni sa tei mate oti ko koya; a sa kaciva na turaga ni valu, ka taroga se mate tu vakadede ko koya, se segai? 45Ia ni sa kila vua na turaga ni valu, sa solia na yagona vei Josefa: 46a sa volia ko koya e dua na gatu matailalai, a sa kevutaki koya sobu, ka solega e na gatu matailalai, a sa vakotora e na dua nai bulubulu sa ta e na vatu; a sa vaqiqica e dua na vatu ki na katuba ni bulubulu. 47A rau sa raica na yasana sa vakotori kina ko koya, koi rau ko Meri na kai Makitala kei Meri na tina i Josese.

Currently Selected:

Marika 15: FIJ1864

Highlight

Copy