Ai Vola I Isaia, na Parofita 65
65
Sa ra kacivi me lotu na lewe ni veivanua, a sa biu laivi na matanitu vaka-Jutia e na vuku ni nodrai valavala ca, 1-7. Sa ra vakavoci e so ni ra vakabauta, 8-10. Sa ca sara ko ira na vakatitiqa, sa vinaka sara ko ira na vakabauta, 11-16. A gauna ni Mesaia sa vaka ni sa buli na lomalagi vou kei na vuravura vou, ena tubu mai kina na ka vinaka sara, 17-25.
1SA torovi au rawa ko ira sa sega ni tarogi au: sa kunei au rawa ko ira sa sega ni vakasaqarai au: au a kaya, Oi au o qo, oi au o qo, ki na matanitu sa sega ni vakatokai e na yacaqu. 2Au a dodoka na ligaqu e na veisiga ki na dua na mataqali dautalaidredre, era lakova na sala sa tawa vinaka, ka muria na ka era dui nanuma; 3na mataqali sa vakacudrui au ki mataqu e na veisiga; era cabora nai soro e na veiwere, ka vakacaudreva nai madrali boi vinaka e na vatu-buli: 4era tiko ga e nai bulubulu, ka moce e na veiqara; era kania na lewe ni vuaka, ia na waibuta e vakasisilataki sa tu e na medra bilo; 5a ra kaya, Mo tiko tani ko iko; kakua ni ko sudra mai vei au; niʼu sa yalosavasava vei kedaru.
O ira o qo era sa kubou ki ucuqu, na buka sa waqa tu e na veisiga. 6Raica, sa volai tu e mataqu; kaʼu na sega ni cegu, kaʼu na sauma ki na lomaseredra 7na nomudou caka cala vata kei na nodra caka cala na tamamudou, sa kaya ko Jiova, era sa vakacaudreva nai madrali boi vinaka e na veiulu-ni-vanua, e na veiulu-ni-koro talega era sa vosavakacacataki au: ia kaʼu na vakarauta na nodra cakacaka eliu ki na lomaseredra.
8Sa vosa vakaoqo ko Jiova; Me vaka ni sa kune na waini vou e nai yawa vaini, ka sa kaya e dua, Mo kakua ni vakacataka, ni sa tu kina na ka e veivakalougatataki; kaʼu na kitaka vakakina e na vukudra na noqu tamata, meʼu kakua ni vakacataki ira vakaoti: 9ia kaʼu na kauta maivei Jekope e dua na kawa, ka maivei Juta e dua nai taukei ni noqu ulu-ni-vanua; ia ko ira kaʼu sa digitaka era na taukena, o ira talega na noqu tamata era na tiko maikina. 10Ia ko Saroni ena yaco me bai ni sipi, kei na buca i Akori mei kotokoto ni karavau, me nodra na noqu tamata era sa vakasaqarai au.
11Ia koi kemudou, sa biuti Jiova, ka guilecava na noqu ulu-ni-vanua tabu, ka drauna nai kanakana kei Kata, ka tu yaqona nai sevu mei Meni, 12kau na lesi kemudou ki nai seleiwau, ia koi kemudou kece dou na cuva ga me vakamatei: e na vuku niʼu sa kaci, dou sa sega ni rogo mai; niʼu sa vosa, dou sa sega ni rogoca; ia dou a cakava na ka sa ca e mataqu; na ka talega kaʼu sa sega ni vinakata, dou sa digitaka. 13O koya o qo sa vosa vakaoqo kina na Turaga ko Jiova, Raica, o ira na noqu tamata era na kana, ia dou na viakana; raica, o ira na noqu tamata era na gunu, ia dou na viagunu; raica, o ira na noqu tamata era na rereki, ia dou na madua; 14raica, o ira na noqu tamata era na kaila ni sa marau na lomadra, ia dou na tagi ni sa rarawa na lomamudou; ni sa mavoa talega na yalomudou, dou na qoqolou. 15Ia dou na vakalaiva na yacamudou me ka e veivakarusai vei ira kaʼu sa digitaka, ia na Turaga ko Jiova ena vakamatei iko, ka vakatokai ira na nona tamata e na dua na yaca tani: 16ia ko koya sa vosavakalougatataki koya e vuravura me vosavakalougatataki koya e na yaca ga ni Kalou dina; o koya talega sa vosavavakini e vuravura me vosavavakini e na yaca ga ni Kalou dina; e na vuku ni sa guilecavi na ka rarawa eliu, ni sa tabonaki talega ki na mataqu.
17Raica, kaʼu sa cakava na lomalagi vou kei na vuravura vou; ia ena sega ni nanumi na ka eliu, ena sega ni cabe tale ki na lomamudou. 18Ia dou reki ka marau ka tawa mudu e na ka kaʼu sa cakava: raica, kaʼu sa cakavi Jerusalemi me ka ni marau, kei na lewena me ka ni reki. 19Ia kaʼu na marautaki Jerusalemi, ka rekitaki ira na noqu tamata; ena sega ni rogoci tale e lomana na domo ni tagi, se na domo ni qoqolou. 20Ena sega ni kauti tani tale maikea e dua na gone sa vica ga na siga ni nona bula, se dua na qase sa sega ni taucoko sara na siga ni nona bula: ni na sa gone ga ena sa mate ka dua na drau na nona yabaki; ia na tamatai valavala ca sa dua na drau na nona yabaki ena ka veivakarusai. 21A ra na tara vale, ka tikora; era na tea na veivainivaini, ka kania na vuana; 22era na sega ni tara, ka tikora e dua tani, era na sega ni tea, ka kania e dua tani: ni na vaka na siga ni kau na nodra siga na noqu tamata, ia na cakacaka ni ligadra ena madra ka ra kaukauwa tikoga kaʼu sa digitaka. 23Era na sega ni oca walega, so vakasucu me taqaya; ni ra sa nodra kawa era sa vakalougatataki maivei Jiova, o ira kei na luvedra. 24Ia ena yaco ni sa bera na nodra kaci mai, kaʼu na rogo yani; ni ra sa vosa tiko, kaʼu na rogoca. 25A wolifa kei na lami, erau na kana vata; a laioni, me vaka na karavau, erau na kania na co ni sila; ia na gata, na kuvu-ni-soso ena sa kena kakana. Era na sega ni ia na veivakacacani se na veivakarusai e na noqu ulu-ni-vanua tabu kecega, sa kaya ko Jiova.
Currently Selected:
Ai Vola I Isaia, na Parofita 65: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
