Nai Vakatekivu 23
23
A mate i Sera, 1, 2. Sa volia ko Eparaama e dua na tiki ni vanua mei bulubulu, a sa buluti Sera, 3-20.
1Ia ko Sera, sa dua na drau ka ruasagavulu ka vitu na nona yabaki: o qo na veiyabaki ni bula i Sera. 2Sa ciba ko Sera mai Kiriaci-aripa, ko ya ko Hepironi, e na vanua ko Kenani: a sa lako mai ko Eparaama me yasovaki Sera, ka tagicaki koya.
3A sa tu cake ko Eparaama mai na mata ni nona mate, ka vosa vei ira na luve i Eci, a sa kaya, 4Oi au na kai tani ka sa tiko vakavulagi vei kemudou: dou solia mai me noqu e dua na tiki ni vanua me mara vei kemudou, meʼu buluta kina na noqu mate me yali kina ki mataqu.
5A ra sa vosa vei Eparaama na luve i Eci, a sa kaya vua, 6Mo rogoci keitou mada, noqu turaga: o iko na turaga vaka na kalou e na keimami maliwa: e na nei-mami mara digitaki mo buluta nomu mate: sa sega e dua na tamata me bureitaka vei iko na nonai bulubulu, mo kakua kina ni buluta nomu mate.
7A sa tu cake ko Eparaama, ka cuva vei ira na lewe ni vanua, io vei ira na luve i Eci; 8a sa veivosaki kei ira, ka kaya, Kevaka sa lomamudou meʼu buluta na noqu mate me yali ki mataqu, dou rogoci au, ka vakamasuti Efironi na luve i Sobari e na vukuqu, 9me solia vei au na qara-vatu mai Makipila, a ya sa nona, sa koto mai na yalayala ni nona veiwere: ia me solia mada me noqu, meʼu solia kina vua na kenai voli dodonu e nai lavo, ka me noqu tiki ni vanua me mara e na kemudou maliwa.
10A sa tiko e na kedra maliwa na luve i Eci ko Efironi. A sa vosa vei Eparaama ko Efironi na luve i Eci, ni ra rogoca tiko na luve i Eci, io ko ira kecega ka ra curuma na matamata-ni-koro ni nona koro, a sa kaya, 11Me kakua, noqu turaga, mo rogoci au: a tiki ni vanua ko ya, kaʼu sa solia vei iko, kei na qara-vatu sa tiko kina, kaʼu sa solia vei iko; e na mata ni luvedra na noqu mataqali, kaʼu sa solia vei iko: buluta mada na nomu mate.
12A sa cuva sobu e matadra na lewe ni vanua ko Eparaama; 13a sa vosa vei Efironi ni ra rogoca tiko na lewe ni vanua, a sa kaya, Kevaka sa vinaka vei iko, mo rogoci au mada: au na solia nai lavo mei voli ni tiki ni vanua; mo taura mada vei au, kaʼu na qai buluta maikina na noqu mate.
14A sa vosa vei Eparaama ko Efironi, a sa kaya vua, 15Mo rogoci au mada, noqu turaga: a tiki ni vanua ko ya, sa va na drau na sikeli siliva na kenai voli; a cava o qo vei kedaru? buluta ga na nomu mate.
16A sa vakarorogo vei Efironi ko Eparaama: a sa vakarautaka na siliva ko Eparaama me nei Efironi, a ya ka cavuta ko koya ni ra rogoca na luve i Eci, e va na drau na sikeli siliva, nai lavo era dauveivoli kina ko ira na tamata dauveivoli. 17Ia na tiki ni vanua nei Efironi a ya mai Makipila, sa donui Mamire, na tiki ni vanua, kei na qara-vatu sa koto kina, kei na kau kecega e na tiki ni vanua ko ya, a ya sa volita na kena veiyasana kecega, sa vaka-taudeitaki 18vei Eparaama me nona, e matadra na luve i Eci, e nodra maliwa kecega ka ra curuma na matamata-ni-koro ni nona koro.
19A sa oti na ka o qori, sa qai buluti Sera na watina ko Eparaama e na qara-vatu e na tiki ni vanua mai Makipila, sa donui Mamire: ko ya ko Hepironi mai na vanua ko Kenani. 20Ia na tiki ni vanua, kei na qara-vatu sa koto kina, sa vakataudeitaki vei Eparaama, me nona vanua ni mara, maivei ira na luve i Eci.
Currently Selected:
Nai Vakatekivu 23: FIJ1864
Highlight
Share
Copy
Want to have your highlights saved across all your devices? Sign up or sign in
First full Bible in the Fijian language © British and Foreign Bible Society, 1864.
