Nai Vakatekivu 22

Sa vosa vei Eparaama ko Jiova me cabora na luvena, 1, 2. A sa vakabauta ko Eparaama; a sa tarova na Kalou; a sa qai cabora na sipi mei sosomi ni luvena, 3-14. Sa vosavakalougatataki Eparaama na Kalou, 15-19. A kawa ni tuaka i Eparaama, 20-24.

1IA ni sa oti na ka o qori, sa qai vakatovolei Eparaama na Kalou, a sa kaya vua, I Eparaama. A sa kaya ko koya, Raica, koi au. 2A sa kaya, Mo kauta mada na luvemu, na luvemu e dua bauga, o koya ko Aisake ko sa lomana, ka lako ki na vanua mai Moria; ka cabori koya maikina mei soro kama e na dela ni dua na ulu-ni-vanua kaʼu na vakatakila vei iko.

3A sa sou e na sabogibogi ko Eparaama, ka vauca na vodovodo ki na nona asa, ka kauta kaya e rua na nona cauravou, kei Aisake na luvena, ka tasea na buka ni soro kama, ka ia, ka lako kivaka ki na yasana ka vosa kina vua na Kalou. 4Ia e na kenai katolu ni siga sa ta cake e na matana ko Eparaama, ka raica na yasana ni sa vakayawa tu. 5A sa kaya ko Eparaama vei rau na nona cauravou, Drau tikotiko ga eke kei na asa; ia keirau na lako kei na gone ki na yasana ko ya me soro, ka lako tale mai vei kemudrau. 6A sa kauta na buka ni soro kama ko Eparaama, ka tauca vei Aisake na luvena; a sa taura lako e ligana na buka sa waqa, kei nai sele: a rau a lako ruarua vata. 7A sa vosa ko Aisake vei Eparaama na tamana, ka kaya, I tamaqu. A sa kaya, Raica, koi au, na luvequ. A sa kaya ko Aisake, Raica, na buka kei na buka sa waqa; ia sa evei mada na lami mei soro kama? 8A sa kaya ko Eparaama, Na luvequ, ena vakarautaki na Kalou vei koya na lami mei soro kama. A rau a lako vata ruarua tiko.

9A rau a yaco ki na yasana ka vosa kina vua na Kalou; a sa cakava maikina nai cabocabo-ni-soro ko Eparaama, a sa tuva na buka; a sa vauci Aisake na luvena, ka tauca ki nai cabocabo-ni-soro, ki na dela ni buka. 10A sa dodoka na ligana ko Eparaama, ka taura nai sele, me vakamatea na luvena. 11A sa kaci vua mai lomalagi ko koya na Agilose i Jiova, a sa kaya, I Eparaama, i Eparaama! A sa kaya, Raica, koi au. 12A sa kaya ko koya, Mo kakua ni dodoka na ligamu vua na gone, ia mo kakua ni kitaka vua e dua na ka: niʼu sa qai kila ni ko sa rerevaka na Kalou, e na vuku ni ko sa tawa bureitaka vei au na luvemu, na luvemu e dua bauga. 13A sa ta cake e na matana ko Eparaama, ka rai voli, ka, raica, sa tiko mai dakuna e dua na sipi tagane sa tacori e na kau na kena kaukamea; a sa laʼki taura mai na sipi tagane ko Eparaama, ka cabora mei soro kama mei sosomi ni luvena.

14A sa kaciva na yaca ni yasana ko ya ko Eparaama ko Jiova-jaire [Ena vakarau-taka ko Jiova]: me vaka sa kainaki ka yacova na siga o qo, Mai na ulu-ni-vanua ena vakarautaka ko Jiova.

15A sa kaci vakarua vei Eparaama mai lomalagi ko koya na Agilose i Jiova, 16a sa kaya, Sa vaka ko Jiova, Au sa vosavavakini ki na yacaqu; e na vuku ni ko sa cakava na ka o qo, ka sa tawa bureitaka na luvemu, na luvemu e dua bauga; 17au na vakalougatataki iko vakalevu, ka vakavu-qataka vakalevu na nomu kawa me ra vaka na kalokalo ni lomalagi, kei na nuku mai na matasawa; ia ena taukena na nomu kawa na matamata-ni-koro ni nodra meca: 18ena kalougata talega na veimatanitu kecega e vuravura e na nomu kawa; e na vuku ni ko a vakarorogo ki domoqu.

19A sa lesu tale vei rau na nona cauravou ko Eparaama; a ratou a tu cake ka lako vata ki Pieri-sepa: a sa tiko mai Pieri-sepa ko Eparaama.

20Ia ni sa oti na ka o qo sa tukuni vei Eparaama, ka vaka, Raica, ko Milika, sa vakasucu gone talega vei Neori na tuakamu; 21ko Usa na nona ulumatua, kei Pusa na tacina, kei Kemueli na tama i Erama, 22kei Kiseti, kei Eso, kei Pilitasa, kei Jetilafi, kei Pecueli: 23(ia ka sa sucu vei Pecueli ko Repeka:) o iratou na lewe walu o qo sa vakasucuma ko Milika vei Neori na tuaka i Eparaama. 24A watina lailai talega, na yacana ko Reuma, sa vakasucumi Tipa, kei Keama, kei Ceasi, kei Meeka.

Currently Selected:

Nai Vakatekivu 22: FIJ1864

Highlight

Copy