Nonoli 1

Luke -bhulɛ 'ɔnɛɛ "bɔgo 'na "ku -ko -weli

1-A 'tito Teofile, -neɛ' tɛtɛ -bɔgo "me, 'e -bhulɛ Zezu 'na -ye 'ɔ -no 'klekle "ne -ye 'ɔ -sloa 'nyakpa "kucidɛku -wɛ 'na weli, 2-kaa "ne Lagɔ yu -lɔ "nɔgɔ "me gbla-. 'Nyakpa 'na -ye 'ɔ -tɔ 'ɔnɛɛ "kɔlepɔnya "ku -wɛ, "ne 'ɔ yua -lɔ Zuzu Wlewle 'na 'bhɛloɛ "me -ye 'wa "kɛ no -wɛ sloa-.

3Zezu 'wlo- lɛ gluzɔ "bhuɔ ne, "ne 'ɔ yi -lɔ "ɛ "kɔlepɔnya -bhele -wɛ 'yliku 'sibhɔ- kosɛ -vu 'na dɛ, -se 'wa "kɛ 'sɛ yibhlele- -gbɔ 'ɔ -yɛ gbligbli -godogodo 'na dɛ. "Ne Zezu yua -lɔ Lagɔ 'na 'Kamalezikpɛ 'na weli bhulɛle- 'yli -glo "sɔ 'na dɛ.

Zezu nɛɛ: 'Ɔ yi Zuzu Wlewle -nɛme

4'Yli -bholo "me, -sɔɔdɛku Zezu -nyɛ 'ɔnɛɛ gɛlenya 'wɔ "bhaa 'wa -ko 'awɔ li dɛku -wɛ, "ne 'ɔ yua -lɔ bhulɛle- nɛɛ: «'A te -na -kɛ Zeluzalɛme -du "me 'bha-, -mɔ, 'a wo- -kɛ -ame To 'na weli -ye 'ɔ -ple -wɛ. -Ame 'nabhɛ, 'e -bhulɛle nɛ 'anye 'ɛnɛɛ weli "kle- nɛɛ: 5Zaa "nyɛle- 'nyakpa batɛme 'ŋu "me, -mɔ, 'anye, 'yli "ne -la dɛtlo -se 'a "kɛ Zuzu Wlewle "me batɛme yle -le.»

Zezu -gblɛ "nɔgɔ "me

6"Ɛ "kɔlepɔnya -wɛ -nyɛ Zezu "bhaa 'wa "zo- 'wli "ne 'wa yu -lɔ lo 'yɔbhɔ nɛɛ: «Anyinɛnyɔ, -dɛme 'ye -e "kɛ bhɔ "ɛ Izlayɛle -du "me 'na -klɔgbɔnyɔ -duku -jilɛ 'a?» 7"Ne Zezu yua -lɔ bhulɛle- nɛɛ: «'A -ka -sɔɔdɛku "ɛ -li -wɛ 'wɔ "kɛ 'yli 'wlole -wɛ yibhlele-. -Mɔ, -ame To -bholo -kpee -kɛ -lɔ 'bhɛloɛ -se "tɛnye -ye 'ɔ -sɛ lɔbhɔ 'ɔyigɛsɛ -wɛ yibhlele-. 8-Mɔ, 'anye, 'a yi 'ce 'bhɛloɛ yle, -ɛ 'bhale Zuzu Wlewle "me -wɛ, "ne 'ɛ yi 'anye "ku 'kwile-, "ne 'a yi 'kwɛmetamaleɛ yle, "ne 'a "kɛ -lɔ 'neɛ -wayeɛdɛ "zo, Zeluzalɛme, Zude -glɔ 'klekle "ku, "ne Samali, -kaa 'du 'na 'wlisɛledɛ.» 9Zezu "kɛ bhulɛ- "bhuɔ ne, 'ɔnɛɛ gɛlenya 'yliku, "ne Lagɔ yu -lɔ "nɔgɔ "me "gbla, "ne "nɔgɔjatlɛ yu -lɔ "ku zizi-, "ne 'wa "no 'awɔ -da 'yli -gɛ. 10-Sɔɔdɛku "ɛ Zezu -ko nɛ "gblɛ dɛku -wɛ, 'wa 'na 'wolo cuu ne, 'nyakpa "sɔ -pla "koti "fɛɛ- "me, "ne 'wa 'nyegboa- yɔko. 11"Ne 'wa yua -lɔ bhulɛle- nɛɛ: «Galile 'na 'nyakpa, sɔɔbɛɛza 'a 'wolo bhɔ "nɔgɔ "me 'a? "Ɛ Zezu -ɔ 'bha- 'anye yɔko "ne 'ɔ yi "nɔgɔ "me "gblɛ -wɛ, -see 'a 'yo- 'ylime "ne 'ɔ yi "gblɛ -wɛ, "ɛ sɛbhele -wɛ 'ye 'a "kɔ -lɔ 'ylime 'ye "ne 'ɔ "kɛ 'ce -lɔ "kusɔ yile-.»

"Kɔlepɔnya 'na -zakpɛ

12"Ne "ɛ "kɔlepɔnya yi -lɔ tlo -ye 'wa la «Olivie -su 'na tlo» -wɛ 'vli 'bha-, "ne 'wa yi -lɔ Zeluzalɛme 'wlizɔ zi, lɔbhɔ "ne 'awɔ dɛtlo, Lɔbhɔ yi 'awɔ 'cilɔ -bholo bhli. 13'Wa "kɛ Zeluzalɛme ylɛ ne, "ne 'wa yi -lɔ "nɔgɔ "ku 'na -bhudu -cibhɛ -mee 'wa "zole 'wli "kle- -wɛ plɛ. Piɛle, Zaa, Zake "ne Adle, Filipo "ne Toma, Batelemi "ne Matie, Alefe yowli Zake, Simɔ -ɔsiduza "me, "ne Zake yowli Zude. 14'Wayi 'klekle, 'gɔme- 'wa bhubhɔle 'awɔ -lɔ kpɛnyee nuɛ -bholo "me. 'Wa -nyɛ Zeluzalɛme 'na 'ŋwenea 'na yɛ "bhaa, Zezu 'ɔ "nɔ Mali -ko -moa 'awɔ 'glɛme, 'ɔ -nyɛ Zezu 'ɔ "nowlia "bhaa.

Matiase "plele- Zuda 'na 'bhulɛ "me

15'Yli -bholo "me, Zezu 'na 'dlekukɛlenya 'na -zakpɛ "zo- 'awɔ 'wli, 'wa yi 'awɔ glo 'gbeplo yle. "Ne Piɛle yua -lɔ 'glɛme "ku -sɔ, "ne 'ɔ yi -lɔ no nɛɛ: 16«"Nowlia 'wanye, Zuzu Wlewle 'na -ye 'ɔ -bhulɛ Lagɔbɔgo "me Zuda 'na dɛku -wɛ, 'ɛ 'nɛne 'awɔ -se 'ɛ "kɛ 'awɔ 'yli 'wlole. Davide 'na nuɛ "me 'ye- Zuzu Wlewle -bhulɛle -lɔ Zuda 'na weli. "Ɛ Zuda -wɛ ne, 'ɔ -gɛ 'awɔ -lɔ 'nyakpa -wa 'sa- Zezu -wɛ 'yuku. 17"Ne 'ɔ -ko -me nɛ -kɛ "fu -anye "kɔlepɔnya 'na -zakpɛ "me, "ne "ɛ libhɔ -ye 'a no -wɛ, 'ɔ no -me nɛ. 18'Ɛ Zuda -wɛ dludlasi -ye 'wa 'jo- kɔ -wɛ, 'ɛyi 'ye 'ɔ -pea -lɔ dodo "me. "Ɛ 'lɛɛ- -wɛ "me 'ye 'ɔ -glɛle -lɔ 'ɔyi, "ne 'ɔ yi -lɔ zɔ bhli-, "ne 'ɔnɛɛ 'go yi -lɔ "me yɔlɔ-, "ne 'ɔnɛɛ "ŋweyo yi -lɔ bidlileɔ-. 19Zeluzalɛme 'na -konya 'klekle 'no- "ɛ weli -wɛ. 'Ɛza, 'wanɛɛ 'gbo "me 'wa lɛ -lɔ "ɛ 'lɛɛ- -wɛ Akɛledama; 'Ɛ -sɛ zɔ nɛɛ: -Zɛ -lɛɛ.

20-Sɛne 'ye 'ɛ kɛleɔ- -lɔ: Lagɔ 'na 'ŋlukwa -bɔgo "me -gbɔ:

'Ɔnɛɛ -bhudu -wɛ "gbɛ 'ce -godogodo,

-se 'nyɔkpɔ te 'ce "me ko.

'Ɛ 'kɛleɔ- -me 'lelee -sɛne nɛɛ:

'Nyɔkpɔ 'na -vinɔ

"kɛ -la -lɔ 'ɔnɛɛ libhɔ 'ylime "plele.

21Piɛle nɛɛ: 'Nyakpa 'na -bedia 'kwɛle nɛ -anye -gwe "ku -moɔ 'klekle, -sɔɔdɛku Anyinɛnyɔ Zezu "bhaa -a 'nɔŋole- 'awɔ 'gɔme 'ye 'ɔ -yɛ nɛ -wɛ; 22'Ɛ 'bhale- -dee Zaa 'nyɛlo- 'awɔ batɛme -wɛ "ku -kaa "ne 'ɛ ylɛ 'ɔnɛɛ "nɔgɔ "me -gblɛzle "ku. "Ɛ 'nyakpa -nyɔ "bhaa -a 'nɔŋo 'awɔ -wɛ 'na 'glɛme 'na -bholo yi -se -a "kɛ 'gɔme Zezu 'na gluzɔwloweli 'na 'ɔyeɛdɛ "zo.»

23Piɛle "kɛ soɔ lɛ "bhuɔ ne, "ne 'wa yi -lɔ 'nyakpa "sɔ lɔbhɔ -sɛ: Zozɛfo, -ye 'wa la Balesabase -wɛ, 'ɔ -nyɛ Matiase "bhaa. "Ɛ Zozɛfo -wɛ, 'wa la 'mo 'awɔ 'lelee Zutuse. 24"Ne 'wa yi -lɔ -sɛne bhubhɔ-: «Anyinɛnyɔ, -eyi -mɔ -yi 'nyakpa 'klekle 'na 'dle -wɛ, tuɔ- 'se -anye 'nyakpa "sɔ 'glɛme 'na -ye -e -sɛ lɔbhɔ -wɛ 'ylime; 25-Se 'ɔ "kɛ Zezu 'na "kɔlepɔnyɔ "zo -me, -see 'ɔ "kɛ Zuda 'na libhɔ -ye 'ɔ 'bha- yɔko -wɛ 'ylime "plele. "Ɛ Zuda -wɛ, 'ɔ 'bha- "ɛ libhɔ ne yɔko "ne 'ɔ yi -lɔ -dee 'nɛno -gɛ -wɛ me.» 26"Ne 'wa yi -lɔ -negbe "pɔ. "Ne 'ɛ yi -lɔ Matiase "ku bhli, "ne 'ɔ yi -lɔ "Kɔlepɔnya -kogbɔ -bholo -wɛ "klo ŋwenia-.

Currently Selected:

Nonoli 1: btg

Highlight

Copy