Nonoli Welipiɛ
Welipiɛ
Luke dotlɛyu yɔ 'awɔ -lɔ. 'Ɔ kɛle- "bɔgo "sɔ: Tɛtɛ "bɔgo 'pa- -lɔ 'Denaade, "ne 'ɛnɛɛ "sɔnɛ 'pa- -lɔ "kɔlepɔnya 'na nonoli. 'Ɛ "Bɔgo ne "me Luke 'kwɛle 'awɔ -lɔ Pɔle -gwe "ku 'lowlime -me 'ɔ me 'awɔ 'Denaade -sɛle -ka -wɛ. 'Ɛ "bɔgo ne, 'wa la me 'lelee -lɔ Zuzu Wlewle 'na nonoli. Sɛko -wɛ Luke bhulɛ Zuzu Wlewle 'na weli -ɛ 'zi "ku 'yli -glo "sɔ 'yli -kogbɔ 'na dɛ. 'Ɛnɛɛ "sɔnɛ ne bhulɛle -lɔ -anye -see Lagɔ 'nyoa Zuzu Wlewle "ne -see Lagɔgligbɛ -lele 'ci- "ku -wɛ 'na weli. 'Ɔ bhulɛ -me 'lelee "kɔlepɔnya 'na nonoli -ye 'wa -nole 'ylobɛ 'na -glo -bholo yɛ -kogbɔ "ne 'ɛ 'ple- lɔbhɔ -wɛ 'na weli: -Se 'ɛ 'bhale Zezu 'na "nɔgɔ "me 'gblɛɛ "ku -kaa "ne 'ɛ -ylɛ Pɔle 'na Wlɔmo 'na -du -ylɛɛ "ku sɛgbɛɛ -jiɛnyɔ. Luke nɛɛ: "Kucidɛku, Zezu 'na "kɔlepɔnya -sɛle Lagɔ 'na 'Denaade Zeluzalɛme 'na zufonya -gbaa "ne -wa "ne zufonya 'waa -wɛ "bhuɔ "ne 'wa 'yi 'da -lɔ -glɔ 'klekle "ku -sɛle -ka me. 'Ɛ "bɔgo ne 'sloa -anye -li 'na 'wli -mɔɔnɔ: (Noli 1–7), Zezu -me lɛ "nɔgɔ "me "bhuɔ ne, "ne Zuzu Wlewle yi -lɔ 'ɔnɛɛ "Kɔlepɔnya "ku 'kwile- "ne 'ɔ yua -lɔ Lagɔ 'na 'bhɛloɛ kɔ 'je -se 'wa "kɛ 'ɔnɛɛ 'Denaade -sɛ. "Ne Zeluzalɛme 'na 'klecɛnya yi -lɔ zimale- "ne zufonya yua -lɔ 'gbapea- (Noli 8–12). Zezu 'na gɛlenya yi -lɔ bidlileɔ-, -bedia me Samali -glɔ "me "ne -wa -wɛ me Zude -glɔ "me. "Ne Zufonya 'na 'glɛme 'na -bholo -ɔ 'gbapea nɛ 'klecɛnya kpɛnyee -wɛ yi -lɔ Zezu Kli 'na "kɔlepɔnyɔ "zo, 'ɔ 'pa- -lɔ Sɔle. "Ne Zezu yu -lɔ 'yli "klo ylɛle- "ne 'ɔ yu -lɔ bhulɛle nɛɛ: 'Zo 'neɛ "kɔlepɔnyɔ -wa "ne zufonya 'waa -wɛ 'glɛme (Noli 13–26). "Ne 'wa yi -lɔ Sɔle, Pɔle ziɛle-, "ne 'ɔ yi -lɔ -glɔ "yitɛ "ku me "ku ta 'na dɛ, -se 'ɔ "kɛ "bhle Lagɔ 'na 'Denaade -sɛle. 'Klecɛnya -kwleyia 'kwɛle Pɔle -gwe "ku -glɔ 'na -mee 'ɔ me -wɛ, Balabase, Silase, Timote, Tite, Apolɔse, Malke "ne Luke (Noli 15.1-35). Luke bhulɛ Zezu 'na "kɔlepɔnya 'na "kusibhɔleɛ "yitɛ 'na weli (Noli 27.1-28). Luke -sɛ -see 'wa -lebhe Pɔle Wlɔmo -du "me "ne -see 'ɔ ko "bhle -wɛ 'na weli. Luke nɛɛ: Pɔle -no Lagɔ 'na libhɔ kpɛnyee "ne 'wa yu -lɔ 'gbapea.
Currently Selected:
Nonoli Welipiɛ: btg
Highlight
Share
Copy

Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.