Matiusu 23
23
O Yesusu wahitiari o nyawaika abe ma titi o Farisi ma nyawa de abe yotobadoto-dotoko o Musa ai Paretaino
Maruku 12:38-40; Lukasa 11:37-54, 20:45-47
1De ahao o Yesusu wotemo o nyawa yowoe-woeika de abe iwitobanii-niikika. 2De Una wahitiari wato, “Nimahidodiai ona abe yotobadoto-dotoko o Musa ai Paretaino de abe ona o Farisi manga doomuino. De gea igoungu ona de manga tagongoka la inidotoko de inihitararono Ma Jou ai Demo-demoino. 3Ho irahai ngini nianiiki o kia dika abe ona gea inidotoko nginika, masara iti ufa nianiiki to ona manga wowango ma datoro. Angamoi to ona manga dodotoko de manga himatoko imakohowono. 4De ona ka ihidogo Ma Jou ai Paretaino de to ona ma hirete manga pareta abe yomahohiningaiye, de manga paretaino gea de duru yahitubuho o nyawaika. De manga pareta gea kohadubuho hiadono o nyawa tanu ko yakunua yaniiki enangika. De gea ho Ngohi tahiketero ona yotobadotoko ma paretaino de o Farisi ma nyawa. Abe Ngohi tato imaketero hoka o nyawa manga ginaika ona ihitubuho ho duru yahikangela onangika. Masara ona gea duru ma hohutuloo de ko yaduhunua onangika, ka yahikangela dika onangika.”
5“De ona gea manga wowango ma datoro mata-mataika yodiai la ato o nyawa yamake de yahigiriiri onangika. De naa manga datoro moi yotobadiai. Abe ngone o Yahudi ma nyawa ma oraha homaniata de nanga biaha la nanga peaino de nanga giamino homahideho-dehorino de ma ngi ma eteteke gea abe ma dolaka de ma dulihoka. De ma dulihi gea Ma Jou ai Demo-demoino. Masara ona yotobadotoko o Musa ai Paretaino de o Farisi manga doomuino, ona gea ko yapakeua ma ngi ma eteteke dika abe hoka ngone utuoli, masara to ona ihiwoata la gea ma rupa ma amoko o nyawa yamake onangoka la genangino de ato o nyawa yahigiriiri onangika.”
“De naa moioli yotobadiai, abe manga baju ma barene ma lawe yodiai la ikurutuku la genangino de hoka yomahingahu abe ka onangohi yaniiki itiai Ma Jou ai Pareta abe ma titi nanga baju. De hokogea ona yodiai manga bajuika ma titi moi dika, la o nyawa yamake de yahigiriiri onangika ma titi manga hininga bari Ma Jouika dika itagi, masara tanu to ona gea manga hininga hokogenangua.”
6“De naga moioli yoigo, nako o ngolo-ngolomoka de duru yoigo yogogere o kiaka naga yokokurutiye manga gogogeroka. De nako nanga dodotoko ma tau-tauokaoo de duru yoigo o nyawa manga himangoka de yogogeruku. 7De duru yoigo la o nyawa yahayanga onangika o kiaka naga abe o nyawa yowoe-woe, de yoigo la o nyawa yafetongo onangika ato, ‘Mia Guru.’”
8“Masara nako ngini naa, ahi gogianongoru, ngini mata-mata ka nimakoketero dika Ma Jou ai himangoka abe ma titi nia gogere, ho ufa niagorakiye o nyawa utu de niafetongo ‘Mia Guru’ onangika, angamoi tanu ti ngini nia Guru ka womatengo dika. 9De hokogenangoo tinihitiari la ufa o nyawa o duniaka naa de niagoraka la nimahibaba onangika. Angamoi ngini naa mata-mata nidadioka hoka o ria-dodoto moi eko o tau moi abe ti ngini nia Baba ka womatengo dika o Horogaka. 10De ufa nginioka de utu niagorakiye la niafetongo niato ‘Mia Baluhu’ onangika, angamoi tanu ngini mata-mata ka nimakokadaene dika nia gogere Ma Jou ai himangoka. De nako ti ngini nia Baluhu idodutu, gea Ngohi tomatengo dika o Kristusu, ho ufa o nyawaika dika de nimahibaluhu onangika. 11De ufa niawohanga abe onagona dika nginioka nioigo la nia gogere ikurutiye Ma Jou ai himangoka, gea ngini kiani nimahitipokouku de niatobaleleani nia gogianongoruika. 12Ho onagona dika ato yomagorakiye de ona gea ahao Ma Jou wahitipokouku ona. Masara onagona dika abe yomahitipokouku, ona gea Ma Jou ahao wagorakiye.”
O Yesusu ai dodaere ma demo abe wahidumutu o Farisi ma nyawaika de onangika abe yotobadoto-dotoko o Musa ai Paretaino gea
13De ahao o Yesusu ai hitiari ma demo wahidumutu onangika abe yodadi o Yahudi ma nyawa manga hohidimono. De Una wahitiari wato, “De ngini abe nitobadoto-dotoko o Musa ai Paretaino de nginioo abe o Farisi manga doomuino, ahao ti ngini nia hohowono duru kohadubuho niamake nginika! Angamoi ngini ka nimadokangelukino dika abe niato niwileleani Ma Jouika masara ko niagou-goungua niwileleani. De gea ma titi nia wowangoino de ngini niata-tatoko o nyawa abe tanu yoigo yodadi Ma Jou ai nyawa abe ahao wahikoano onangika. Ho ngini ma hirete nimatatoko la ufa nidadi to Una ai nyawa, de hongoli o nyawa utuika niata-tatoko genangino. Ho duru nia datoro gea itorou!”
14“De ngini abe nitobadoto-dotoko o Musa ai Paretaino de nginioo o Farisi manga doomuino, ahao ti ngini nia hohowono duru kohadubuho niamake nginika! Angamoi ngini ka nimadokangelukino dika abe niato niwileleani Ma Jouika masara ko niagou-goungua niwileleani. De gea ma titi ngini niarusi abe o ngo-ngofeka yofao-fao la niaora onangino manga tau de manga kiahonangoo. De gea nidiaioka yofao-faoika de ahao nimaniata kohadekanino la niato nia totiai niahimatoko o nyawa utuika. Ho gea Ngohi tato ti nginiohi nia hohowono ahao duru ilamoko.”#23:14 Nako o buku ma asli utu, genangoka ko hamakeua o ayata naa.
15De o Yesusu wogila-gilali wato, “De naa tohigalioli ma moioli tinihitiari nginika. Ngini abe nitobadoto-dotoko o Musa ai Paretaino de nginioo o Farisi manga doomuino, ahao ti ngini nia hohowono duru kohadubuho niamake nginika! Angamoi ngini duru de nia magawe niatobalingiri o nyawa la niahidadi ona ti ngini nia nyawa abe ininii-niiki ngini. Abe ngini nitagi-tagi duru kohagurutika abe ngaro kiani nimahihora o ngooto ma honongaika eko niloiki o tonaka utuikali ma ngini duru nioigo iti niamake o nyawa abe ona yosanangi ininiiki. Masara ona gea abe initobanii-niiki de ma bahauku de nako ona de ngini de ka onangohi manga dorou ilamoko manga hiningaka. Ho mangale ti ngini nia hohowono ahao niamake o Narakaika, ho hongoli ona gea abe initobanii-niiki, angamoi to onangohi manga hohowono itubuho o uku ma ngootoka gea.”
16“De ngini naa barikua de duru ko itiaiua niataoko Ma Jou ai totiai, ma ka niahihira-hirahi o nyawa utuika! De gea ho tinihiketero de o nyawa abe ko yomahiorikua de ngaro yorafi-rafi ma yodadi o nyawa utu to ona manga hihira o ngekomoka! Ho gea ahao ti ngini nia hohowono duru kohadubuho niamake nginika. Angamoi ti ngini nia dodotokino de duru nirehenoka.”
“Abe hoka nia rerehene ma dodotoko moi o nyawaika abe niato, ‘Nako o behehongo moi o nyawa yomahibehehongoka de o koboto la yato duru yomahitaana abe manga behehongo ma demo duru igou-goungu, de manga koboto ma demoino de yofetongo Ma Jou ai Tau, gea ngini niadotoko niato ngaro ona ko yodiaiua abe hoka yomahibehehongoka ma ko adodoaua.’ De niadotokoo o nyawaika niato, ‘Masara nako o nyawa yomahibehehongo de manga koboto ma demoino yofetongo ma gurasi abe naga Ma Jou ai Tauoka, gea kiani yodiai abe hoka manga behehongo ma demoka de ko idadiua yawohanga done yahowono Unangika de ai hohowono adaene onangika.’ De hokogea ti ngini naa nia rerehene ma dodotoko o nyawaika! 17Ho gea done sarakia nia hininga? De nia dodotoko ma demoino gea de nimahitaana abe nia hiningaka de ko nimahiorikokaua de duru nibodo! Angamoi nako o gurasi de Ma Jou ai Tau, ka o kiahi ikurutiye? Gea kiani Ma Jou ai Tau abe duru ikurutiye, de nako naga o gurasi Ma Jou ai Tauoka, gea ahao ma gurasi idadi itebi-tebini Ma Jou ai himangoka mangale ma titi ena naga ai Tauoka. Masara nako o gurasi biaha dika, gea ko itebinua ai himangoka.”
18“De naga moioli nia rerehene ma dodotoko abe duru imakiniiki de gea ena. Abe ngini niadotoko o nyawaika niato, ‘Nako o behehongo moi o nyawa yomahibehehongoka de gea manga koboto ma demoino de yofetongo dika Ma Jou ai Huhuba ma Ngi, gea ngini niadotoko niato ngaro ko yodiaiua abe hoka yomahibehehongoka ma ko adodoaua.’ De niadotokoo o nyawaika niato, ‘Masara nako o nyawa yomahibehehongo moi de manga koboto ma demoino yofetongo ma huhuba abe akelengauku doka ma Huhuba ma Ngioka,’ gea ngini niato kiani yodiai abe hoka manga behehongo ma demoka de ko idadiua yawohanga done o hohowono yadaene. Hokogea abe ngini niadotoko de niahirehene o nyawaika. 19Ho gea tinihiromangoli nginika tato ngini nia hiningaka nirafioka! Angamoi nako o huhuba de Ma Jou ai Huhuba ma Ngi, ka o kiahi ikurutiye? Gea kiani ma Huhuba ma Ngi abe duru ikurutiye, de nako naga o huhuba akelengaka ma Huhuba ma Ngioka, gea ahao ma huhuba idadi itebi-tebini Ma Jou ai himangoka mangale ma titi ena naga o Huhuba ma Ngioka. Masara nako o huhuba de ko akelengaua ma Ngioka, gea ko itebinua ai himangoka.”
20“Ho Ngohi tato ngaro o huhuba abe akelengauku Ma Jou ai Huhuba ma Ngioka de ngaro to Una ai Huhuba ma Ngi, masara hinooto gea ka moi dika Ma Jou ai himangoka. Ho ngaro o nyawa yomahibehehongo de manga koboto ma demoino de yofetongo ma Huhuba ma Ngi ekola yofetongo ma huhuba abe naga akelengauku genangoka, masara gea tanu ka imaketero dika manga demo ma dumutu. 21De nako o nyawa yomahibehehongo de o koboto, de manga koboto ma demoino de yofetongo Ma Jou ai Tau, gea tanu imaketero hoka iwifetongoo Ma Jou abe womanoa genangoka, angamoi gea ko imakohowonua. 22De nako o nyawa yomahibehehongo de o koboto, de manga koboto ma demoino de yofetongo ato o Horoga, gea tanu imaketero hoka yofetongoo Ma Jou ai pareta ma kadera ma hohailoa abe imanoa genangoka de iwifetongoo Ma Jou abe wogogeruku ai kaderaka, angamoi gea tanu ko idadiua hohikohowono. Masara abe hoka ngini naa niatobadotoko, genangino de duru niahowono.”
23“De naa tinihingahuoli ma titi moioli hiadono ngini nitobadoto-dotoko o Musa ai Paretaino de ngini o Farisi ma nyawa ahao nia hohowono duru kohadubuho niamake nginika! Angamoi ngini duru nihidodiai la ti ngini nia hasili ma utumu niaregu ngimoi la ka idadi niwihidoaka Ma Jouika o regu moi abe nia regu ngimoiino gea. Abe ngaro naga moi duru ka ma eteteke dika ngini niamakeino masara gea nihidodiai niaregu ngimoi la ma regu moi niwihidoaka Ma Jouika. De gea irahai abe niahidoaka ma regu moi, masara naga utuoli ma pareta abe utuohi ikurutiye de ena gea ko niolegaikaua! De gea ma titi hiadono tinihiromanga tato ka nimadokangelukino dika angamoi nimahingahu niato niwileleani Ma Jouika masara ko niagou-goungua niwileleani. Angamoi ngini naa ko niolegaikaua to Una ai pareta abe inahipareta ato kiani naga nanga wowango ma datoro itotiai. De naga moioli abe ko nianiikua, abe itemo ato kiani hao o nyawaika de nanga hininga ma dora. De moioli ko niolegaikaua, abe inahigaro ato kiani hatobagou-goungu Ma Jouika. Abe ma pareta ka genangohi ikurutiye Ma Jou ai himangoka masara ngini duru ko nianiikua enangika.”
24“De genanginoo de nimahitaana abe nia hininga ma lako irafioka! Ho done sarakia de niato niahihira-hira o nyawa utu, angamoi ngini ma hirete de ko nimahiorikua? De mangale ma titi ngini duru nihidodiai nianiiki o pareta abe ko ikurutiyeua Ma Jou ai himangoka masara duru ko nianiikua gea abe Una waetongo wato ikurutiye, ho gea ka idadi tinihiketero moi. De gea tinihiketero ngini hoka nihidodiai niagoraka o hihiri nia akeroka de aino done nialahiri, masara nako o aewani ma amoko hoka o unta gea ko niolegaikaua ho ka nialahiroka dika!”
25De o Yesusu ka wataerohi onangika wato, “Ngini nitobadoto-dotoko o Musa ai Paretaino de nginioo o Farisi ma nyawa ahao nia hohowono duru kohadubuho niamake nginika! Angamoi ngini duru nihidodiai niaihoro nia mangko ma riwoto de ma poretino, masara doka ma goronaka de nia mangko aomangoka de ma dola abe nimagora de abe nia horoodoka de aino iboa! Ho doka ma goronaka de duru ko itebinua. De gea tanu imaketero dika abe hoka nginioli angamoi nako o nyawa inimake de bote ona ato ngini nitebinoka Ma Jou ai himangoka, masara doka nia hiningaka de aomangoka de ma dorou. Ho gea Ngohi tato ngini ka nimadokangelukino dika!”
26“De ngini o Farisi ma nyawa duru ko nimahiorikua nia ngekomo! Abe koaho ihira niaihoro ma mangko ma goronaka la ahao ma poretino enangoo itebinoka, de hokogenangoo ngini kiani nia hininga ihira itebi-tebini la ahao nia datoroo itebini.”
27“De ngini ahao nia hohowono duru kohadubuho niamake nginika abe nitobadoto-dotoko o Musa ai Paretaino de nginioo o Farisi ma nyawa! De ngini ka nimadokangelukino dika! De gea tinihiketero ngini abe nimaketero hoka o lungunu ma tau abe o nyawa ihiehe de ma rupa abe hoka o dofae la gea idadi ma gare-garehe, abe nako ma poretino homalega de hamake ma lungunu ma tau gea duru ma rupa ma hohailoa. Masara nako ka idadi homalega doka ma lungunu ma goronaika de ahao hamake o honenge ma kobo-kobongokahi de ma gorofu de ma dorou irupa-rupa genangoka. 28De gea duru hokogenangoo de ngini, angamoi o nyawa inimake ngini de yafikiri ato naga nia wowango ma totiai, masara doka nia hiningaka de o totiai ko nianiikua ho ka nimadokangelukino dika!”
29De o Yesusu ka wataerohi onangika wato, “Ngini abe nitobadoto-dotoko o Musa ai Paretaino de nginioo o Farisi ma nyawa, ngini ahao nia hohowono duru kohadubuho niamake nginika! De ngini ka nimadokangelukino dika! Angamoi ngini nihigoko de niobilere o lungunu ma tau la duru irorahai la niato genangino de nia horomati niahimatoko onangika abe genangoka yalungunu. Abe naga Ma Jou ai uru ma dodofanga de ai totiai ma nyawa utuoli abe ma dihiraino yalungunu genangoka. Masara abe Ma Jou ai nyawa manga honenge doka ma lungu-lungunoka gea, tanu ti ngini ma hirete nia totofora abe ma dihiraino de yahohonenge onangika! 30De ahao ngini nitemo niato, ‘Nako hoka ngomi naga ma dihiraino gea de duru ko mianiikua ona abe yahohonenge Ma Jou ai uru ma dodofangika.’ De hokogea nia demo, masara tanu ti nginioo nia hininga ka imakadaene dika de nia totofora gea, angamoi ma oraha naa de nagau nia hidee la to Una ai uru ma dodofanga womatengoli niwihohonenge. 31De genangino de nimahitaana abe nimaaduru dika hoka nia totofora manga datoro abe Ma Jou ai uru ma dodofanga manga ngoe yatomaka! 32Ho naa koaho ngini nihihouoka dika Ngohi naa la ingodumoka nia totofora manga hininga ma mau, angamoi Ngohioo to Una ai uru ma dodofanga tomatengo! 33De ngini naa nimaketero de o dodiha ma biha-biha mangale duru ngini nitobadiai ma dorou. Ho done sarakia niato Ma Jou ai hohowono o ukuika ko inidaenua? Gea ahao kiani inikokidaene nginika!”
34“De abeika nitotoihenohi ahi demoino! Angamoi ma titi nia hininga ma dorou ho ahao Ngohi tahidingoto nginika o nyawa o doomu hangeino abe tanu ka idadi iniduhunu de inihidumutu Ma Jou ai hininga ma ngekomika. Abe ona utu Ma Jou ai uru ma dodofanga, de naga utu yososawaro yataoko ma titi Ma Jou ai Demo-demoino, de naga utuoli abe yotobadotoko o nyawaika genangino. De ngaro hokogea tohitaili tinihidumutu ma totiaiika, masara ngini naa ahao ko niadafongua ona abe tahidingo-dingoto nginika. Abe utu ngini niapoha-poha nia dodotoko ma tau-tauoka de niakiniiki ho hiadono ona kiani ka ihikaika yoara o kapongo moiikali. De abe ahi nyawa utuoli ngini ahao niahidapakuika o gota isosalioaka. 35-36De mangale ma titi nia datoro ma dorou gea abe ahao nidiai ahi totiai ma nyawaika ho naa tagou-goungu tinihingahu abe ahao ti ngini naa nia hohowono ka enangohi itubuho nako de o nyawa utuika mata-mata manga hohowono, abe ngaro o nyawa yowango duru ma dodihiraka de ka hiadono ma oraha naa naga, masara ka ti nginiohi nia hohowono duru kohadubuho. De gea imaketero abe hoka o totiai ma nyawa mata-mata abe ma dodihirainohi de nia totofora yatomaka de ka hiadono to Ngohioo ahi totiai ma nyawa abe ahao ngini ma hirete niatoma, masara to ona mata-mata manga awunu idadioka ti ngini nia tagongo ho ma hohowono gea mata-mata inihidotadaene nginiuku! Abe ngaro duru ma dodihiraka o Habele ai awunu ikopoauku de ino ino ka hiadono o Sakaria abe una o Berekia ai ngofaka de unangoo iwitomaka abe Ma Jou ai Tau ma loaka, abe gea ma huhuba ma ngi de Ma Jou ai Tau ma hidogoronaka iwitoma genangoka. Ho o totiai ma nyawa mata-mata manga awunu abe ma dodihirainohi de aino yatomaka ka hiadono ma oraha to Ngohioo ahi nyawa ngini niatoma, gea imaketero hoka ngini naa kiani niatagongo to ona mata-mata manga awunu, de gea ma titi hiadono ti ngini nia hohowono ahao duru kohadubuho.” De hokogea o Yesusu ai dodaere ma demo abe wataere o Farisi ma nyawaika de onangikaoo abe yotobadoto-dotoko o Musa ai Paretaino.
O Yesusu ai hininga ma dora itagi o Yerusaleeme ma nyawaika gea
Lukasa 13:34-35
37De ahao o Yesusu wotemoli o nyawa yowoe-woeika wato, “Hiokoo ngini o Yerusaleeme ma nyawa naa! Angamoi ngaro Ma Jou wahidingotoka ai nyawa manga ngoe nginika abe utu ai uru ma dodofanga de utuoli ai abari ato inihingahu nginika, masara ona gea ngini niatomaka. Abe utu onangino ngini niahakaru onangika ka hiadono yohonenge. Ho gea inihitaana abe ngini niaoluku Ma Jou ai demo nginika. De ngaro ngini nia hininga hokogea masara Ngohi naa ma ngoe toigo tapake ahi hininga ma dora nginika masara Ngohioo nihioluku. De gea tonahiketero abe Ngohi hoka o kuru-kuru ma mayo abe yoigo atoomuino to ena ma ngofa-ngofaka ma gafuufu ma timiuku la duru imahidutuku ma mayoika. Masara ngini naa nioluku niboa Ngohino.”
38“De naa abeika nitotoihene ahi demoino, angamoi tinihingahu abe ahao nia kota ma amokika naa de hongoli hiadono Ma Jou ai Tau, gea mata-mata ahao Una wanoaka ho duru ma homoa dika idadi nia kotaka gea. 39De naa moioli tinihingahu nginika, abe ma oraha nginioka de tosobo de ahao duru ma dekana ipahaika de ahao nihimakeoli Ngohi. De gea kiani ihira ngini nihidafongo Ngohi abe niato,
‘De naa adonoka ma oraha abe Una naa wonahikoano hoka ma dodihiraka abe nanga tofora o Dautu wonahikoano, ho hihigiriiri Unangika!’ # 23:39
Higiriiri 118:26
Ho nako hiadono ngini nihidafongo de nia demo gea, gea de ahao adonoka ma oraha abe ngini ka idadi nihimakeoli Ngohi naa.” De hokogea o Yesusu ai hininga ma huha ma demo o Yahudi ma nyawaika angamoi ona yowoe-woe iwioluku, de Una wohiorikokau abe ahao manga hohowono kohadubuho yamake ma titi manga ngolukino gea.
Currently Selected:
Matiusu 23: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
