Matiusu 22

Ma koano ai ngofaka ai gogilaka ma rame-rame ma hiketero

Lukasa 14:15-24

1Ka de gea ipaha de o Yesusu wahingahu onangika o hiketero ma ade-ade moioli. De Una wotemo wato, 2“Abe ma oraha Ma Jou wahikoano ai nyawa de gea ka idadi tohiketero hokonaa. De naga womatengo o koano, de ma oraha adonoka la to una ai ngofaka woilaka. De ma koano gea wahidiaioka ai ngofaka ai gogilaka ma rame-rame duru ma amoko. 3De o nyawa manga ngoe ma dihiraino de wahingahuokau de wahokino la nako ma oraha adonoka de ka idadi yoboaino de yaniiki ma rame-rame gea. Ho ipaha de ma oraha adonoka, ho ma koano wahuloko ai duduhunu yamuruono naga la yoiki onangika abe ma koano wahingahuoka la ona ato, ‘Adonoka ma oraha abe ma koano ai ngofaka woilaka, ho ngini niboaino ma gogilaka ma rame-rameino!’ Masara gea barikua wahokoka ma ona yoluku yoboa!”

4“De gea ahao ma koano wahidingoto ai duduhunu utuoli la onangoli yoiki onangika abe ma dihiraino de wahokoka. De wahuloko la yadofanga to una ai demo ma nyawaika gea, abe una wato, ‘O gogilaka ma rame-rame mihidiaioka! De ahi hapi ma rorahai akokitetoroka de akokiharongoka ho ma inomo mata-mata mihidiaioka! Ho ngini nimataiti niboaino ma rame-rameino!’”

5“De ai huhuloko yaniiki itiai ma koano ai demo onangika gea, masara ona ka yolukohi ho ko yoboaua. Abe utu yomahiaka ato naga manga karajaanga kiani yodiai, ho utu yoiki bari yokarajaanga manga redika de utuoli manga tokoika yoiki la bari yofuku-fukunu genangoka. 6De naga utu abe ma dihiraino de ma koano wahokoka abe duru ko itiaiua yao ma koano ai duduhunika abe wahidingo-dingoto onangika. De hiadono utu yahiodiri manga badanga de utuoli naga abe yatomaka.”

7“De gea ka de ma koano woihenino abe hokokia yao ai duduhunika de una duru wongamo ai hiningaka. De ahao to una ai tentara wahidingoto onangika abe yatoma-tomaka ai nyawa la ai tentara onangoli yahibalaha onangika. De manga kota enangoo yatufuku la youkuoka.”

8“De ipaha de ma koano wotemo ai duduhunika wato, ‘Ma gogilaka ma rame-rame ihidiaiokau, masara ma nyawa abe nengokadauino tahokoka ona gea ko idadiuali yoboa ma titi manga hininga ko itiaiua. 9Ho naa tinihulokoli la nihupu o ngeko-ngekomika, de onagona dika niamake ona gea mata-mata niakokiahokino la yaniiki ma rame-rame naa abe ihidiaioka.’”

10“De ma koano ai duduhunu ona yohupu de yahoko o nyawa onagona dika abe yamake o ngeko-ngekomoka abe ngaro manga hininga ma datoro itiai eko itorou, ma, mata-mataika yakokiahokino. De ipahaino de ma koano ai rame-rame ma ngi abe kohaamoko, gea atokemoka de o nyawa abe yoboaino la ato yaniiki ma gogilaka ma rame-rame gea.”

11“De ko itedekanuahi de ma koano woboa ma rame-rame ma ngiino la wato wamake o nyawa mata-mata gea abe yoboaino. Masara naga womatengo genangoka wimake abe ai pakeanga ko itaanua de o gogilaka ma rame-rame ma pakeanga abe itiai o nyawa yomahinoauku o gogilaka ma rame-rameoka. 12De gea ma koano wamake ho woiki unangika de wato, ‘Hobata, naa ani pakeanga done sarakia? Abeika ona utu mata-mata nenangoka yomahinoaukuoka de o rame-rame ma pakeanga, masara to ngona ani pakeanga ka biaha dika. Ho done sarakia hiadono ngona nato nowohamino de naniiki ma rame-rame naa angamoi ani pakeanga ko itaanua!’ Masara una gea ko idadiua womademo ho ka womarii-riidoka dika.”

13“De gea ho ma koano wahuloko ai duduhunika wato, ‘Una naa niwipaki-pakitoka ai giamoo de ai louoo de ahao niwiumoika ai hohowono ma ngiika abe genangoka duru kohamofufutu. De genangoka o nyawa manga hohowono kohadubuho ho hiadono ona ahao yopoa-poaka ma amokiye de manga ingiri ka ihikaika ihidokagoli ma titi manga odiri ko apoaua.’”

14De hokogea o Yesusu ai hiketero ma ade-ade wabooto de ahao wahitararono onangika wato, “De gea ahi hiketero ma ade-ade ma demoino de ka idadi hamake abe Ma Jou wahoko o nyawa mata-mataika la yoboa Unangino, masara ko mata-mataikaua abe iwihigihene hiadono yodadi to Una ai nyawa idodutu abe ahao wahikoano ona gea.”#22:14 Nako ma demo ma asli gea itemo ato, [wahoko o nyawa manga ngoe, masara ko yowoeua abe airiki]. Masara gea ma demo tanu hoka o dulu ma demo abe ma titi genangino [wahoko o nyawa mata-mataika la yoboa Unangino, masara ko mata-mataikaua airiki.]

O Yesusu iwitaili abe iwileha ma titi o pajaka ma tiwi

Maruku 12:13-17; Lukasa 20:20-26

15De ipaha de o Farisi manga doomuino ma nyawa yomatoomuino de yomakoketemo abe ma titi hokokia iwileha o Yesusika la wahowono ai bobaluhu de ihititi genangino la ka idadi iwitae. 16Ho ona yomaputuhu la ahao yahidingoto o Yesusika o nyawa abe o doomu hinootoino. Abe ma doomu moiino to ona ma hirete manga nyawa abe yatobanii-niiki ona o Farisi ma nyawaika. De ma doomu moioli gea o Herodese ai nyawa yamuruono naga. De ko yahidingotuahi de yadotoko onangika abe hokokia ahao kiani iwileha o Yesusika.

Ho ona yoiki iwitutumu o Yesusu de yoleha Unangika yato, “Mia Guru, abe Ngona minihiorikoka Ngona natobagou-goungu ani demoino. De minihiorikoo abe Ngona nomidotoko ngomino Ma Jou ai mau de enangoo duru nagou-goungu abe ngaro hokokia dika idadi. De Ngona duru ko nairikua o nyawa. 17Ho gea miato Ngonaika minileha, de hokonaa mia leleha. Sarakia, abe naga o pajaka ma tiwi abe wogaho-gahoko o Roma ma nyawa manga koano ngone homoi-homoiino, masara nagali nanga agama ma pareta hohidifikiri. Ho gea minileha, Ngona nato ma tiwi gea itiai hohidoaka unangika eko ngaro ufa hohidoaka? Sarakia Ngona?”

18De o Yesusu ka de woihene manga leleha gea de wahiorikoka ma titi to ona manga hininga ma dorou ho watemo onangika wato, “Ngini naa ka nimadokangelukino dika abe niato niangaku ahi demoika gea! Adodoa ho ngini nihitaili? 19Abeika niaoino moi o tiwi ise-senge abe biaha o nyawa yapake la yofangu ma pajaka, la gea ka idadi tolegahi.” De ahao gea moi iwihidoaka de ahao 20Una waleha onangika wato, “Ma tiwioka naa to onaguna ai rupa naga de to onaguna ai romanga?”

21De gea iwipaluhu ato, “De gea to o Roma ma nyawa manga koano.”

De ahao watemoli onangika wato, “Ho gea tato o kia dika naga abe hohiromanga hato to ma koano, gea itiai nihidoaka ma koanoika. Masara nagali o kia dika abe hato to Ma Jou, ena gea kiani niwihidoaka Ma Jouika.” 22De gea duru yoheranga ma titi to Una ai bobaluhu, ho hiadono ka yosobo de iwinoaika genangoka.

O Yesusu iwitaili abe ma titi o hohonenge ma momomiki

Maruku 12:18-27; Lukasa 20:27-40

23De ahao ma wangeoka gea de nagali o Saduki manga doomuino ma nyawa yoboa o Yesusino. De nako o Saduki ma nyawa ona yotobadotoko abe nako o nyawa yohonengoka de duru ko idadiokaua yomomiki manga honengino. Masara naa onangoo yoboa o Yesusino de ato iwileha moi angamoi yoigo ihititi genangino la hiadono iwitae o Yesusika. 24De ona iwitemo Unangika ato, “Mia Guru, naga moi mia leleha. Ma dodihiraka nanga tofora o Musa wohitulihuku Ma Jou ai Pareta moi abe itemo hokonaa, ato,

‘Masara nako womatengo woilakoka masara ko wamakeuahi ai ngofaka de gea wohonenge, ho ai dodotoli kiani womile ai riaka ngoi fao gea de ahao nako o ngofaka yamake yamuruono naga de o ngofaka gea hahiromanga to ai riaka ai ngofa-ngofaka la ufa ai romanga ihihanga.’ # 22:24 Higalioli 25:5-6

Hokogea itemo o Musa ai Paretaka.”

25“De ahao naga ma moiuku naga o nauru yatumidi, de gea ona o roria-dodoto ma dutu mata-mata. De ma riaka gea una woilaka masara ko wamakeuahi ai ngofaka de una wohonengoka. De ipaha de ai riaka widatekuku ai riaka ngoi fao unangoli womile, 26masara unangoli ko iwa ai ngofaka de wohonengoka. De ahao ma gorona widatekuku ahao unangoli womile, de unangoli ko iwa ai ngofaka de wohonenge. De ka hokogea mata-mata idadi abe yatumidika ko iwa manga ngofaka. Ho ona gea ko moiua yamake o ngofaka ma ngofeka momatengoino gea. 27Ho de ma bahauku de ma ngofekali mohonengoka. 28Ho naa minileha, ahao abe ma oraha yohone-honenge yokokimomikiye, ahao ma oraha gea de ma ngofeka to onaguna ngoi fekata, abe ma dihira o duniakahi de ona yatumidi yokokiilaka munangika gea?”

29De o Yesusu wapaluhu onangika wato, “Iya, marai naga abe duru niataoko ihowono! Nako ngini niafikiri niato o nyawa yohonengoka gea ko yomomikokaua, gea ma titi Ma Jou ai Demo-demo ikuranga nimangaratii, de ngaro Ma Jou ai kuaha ma enangoo ko niataokuahi. 30Ho ihira-hira marai tinihitararono abe ona yohone-honengoka ahao hokokia ma oraha yokokimomikiye. Angamoi ma oraha gea de o nyawa ko yoilakokaua. Abe ma oraha gea ona ngade-ngade yomaketero de Ma Jou ai momalaekata o Horogaka abe onangoo ko yoila-ilakua.”

31“De abe ma titi ona yohonengoka de yomomiki, mode ngini ko nibasauahi Ma Jou ai Demo-demoka abe inahingahu ma titi gea? Naga abe Ma Jou witemo o Musaika hokonaa, wato,

32 ‘Abe ani totofora o Abarahaama de o Isaka de o Yakubu, ona gea ka ihihigiriiriohi Ngohino.’ # 22:32 Huhupu 3:6

Hokogea Ma Jou ai demo. Ho abeika naa niafikiri, abe ma oraha gea Ma Jou witemo o Musaika, gea ona yaruange manga badanga yokokihonengokau, eko sarakia? Masara Ma Jou ka wotemohi wato, ‘Ona gea ka ihihigiriiriohi Ngohino.’ Ho abeika, nako ka manga honenge dika, done sarakia de iwihigiriiriohi Ma Jouika? Angamoi ona yohone-honenge ko yakunua iwihigiriiri. Ho genangino naga hamake abe ona gea yaruange ka yowangohi naga Ma Jouoka de ka hiadono ma oraha naa nagahi manga gogao manga Jouika. Angamoi nako ona ka manga honengokahi dika, gea de Ma Jou ko wafetongua wato, ‘Ona gea ka ihihigiriiriohi Ngohino.’ Ho nako ngini niato ona yohone-honengoka ahao ko yomomikokaua, genangoka de hiadono duru niahowono!” Hokogea o Yesusu ai dodaere ma demo onangika.

33De abe ona yowoe-woe genangoka yototoihene o Yesusu ai dodotoko ma demo de duru yoheranga ai demoika gea.

Ma Jou ai Pareta abe duru ikurutiye

Maruku 12:28-34; Lukasa 10:25-28

34Ho ka de o Farisi ma nyawa yoihene abe o Saduki ma nyawa o Yesusu wahikalaka ma titi ai demoino gea, ho ona yomakoketemoli hiadono yomaputuhu ato o leleha moioli iwileha la ato genangino ihititi de hiadono iwitae Unangika. 35De womatengoli naga o Farisi ma nyawa manga doomuino abe duru wososawaro o Musa ai Paretaino de unangoli gea wileha Unangika la witaili. De hokonaa to una ai leleha o Yesusika, wato 36“Ahi Guru, nako Ma Jou ai Pareta mata-mata ngoneino abe o Musa wohitulihuku ma dihira, o pareta o kiahi abe duru ikurutiye?”

37De o Yesusu wopaluhu unangika wato,

“‘De kiani nia Jou o Yaweikahi niwidora de nia womaha ma gahumu, de kiani niwidora de nia wowango ma gahumu, de kiani niwidora Unangika de nia hiningaoo ma gahumu.’ # 22:37 Higalioli 6:5

38De ma pareta ka genangohi duru ikurutiye nako Ma Jou ai Pareta mata-mataika. 39De nagali ai pareta moioli abe ngade-ngade imaketero ma gurutiye, de gea ma pareta inahigaro hokonaa ato,

‘O nyawa utuika kiani niadora imaketero hoka ti ngini nia roehe ma hirete niodora.’ # 22:39 Gogao 19:18

40De nako Ma Jou ai Pareta mata-mataika de ngaro ma pareta mata-mata abe ma dodihiraino de Ma Jou ai uru ma dodofanga ihitulihukuoka, masara gea duru mata-mataika ihititi ka o pareta hinootoka gea, ho ka o pareta hinootohi dika gea duru ikurutiye.”

O Yesusu ai leleha abe ma titi hokokia o Dautu de Ma Jou ai Mesia

Maruku 12:35-37; Lukasa 20:41-44

41De ka de wotemo ibooto abe ma titi Ma Jou ai Pareta de o Yesusoli waleha moi o Farisi ma nyawaika, angamoi ona nagahi Unangoka yomatoomuino. 42De Una waleha onangika wato, “De naa Ngohi tinileha moi nginika la ti ngini nia hininga sarakia, de hokonaa ahi leleha. Nako Ma Jou ai Mesia eko ai Koano abe ma dodihiraino de Una wonahibehehongoka, gea Una to onagona manga totoforaino womaboa? Sarakia ngini?”

De ona yopaluhu ato, “De Una gea nanga koano ma dihiraino o Dautu ai toforaukuino womaboa.”

43De o Yesusu wato, “Gea niagoungu abe Ma Jou ai Mesia gea o Dautu ai toforaukuino womaboa. Masara ngaro Una wodadi o Dautu ai toforauku womatengo ma o Dautu wiahoko unangika gea wato ‘Ahi Baluhu idodutu.’ Ho abeika homafikirohi ma titi o kia naga o Dautu ai hiningaka hiadono womahibaluhu to una ai toforauku gea. Angamoi done sarakia o Dautu ai toforauku womatengo de wodadioo to Dautu ai Baluhu? Ho abeika hotoihene Ma Jou ai Demo-demoka moi abe naga ihitulihukuoka to Dautu ai demo. De ma dodihiraino gea de Ma Jou o Womaha wihiakunu o Dautu hiadono wohitulihuku ma demo naa abe Ma Jou o Baba de to Una ai Mesia yomakoketemo. Ho o Dautu wohitulihuku wato,

44 ‘Ma Jou wotemo ahi Baluhu idodutuika wato,

“Naino nogogere ahi nirakoka la Ngone hahikoano mata-mataika

ka hiadono ani musu gea duru manga hingounu naga Ngonaika.”’” # 22:44 Higiriiri 110:1

45De ahao o Yesusu ka wogila-gilahi wotemo wato, “Abeika o Dautu ai demo ma goronaka gea de wiahoko nanga Mesia abe Ma Jou wonahibehehongoka gea wiahoko wato, ‘Ahi Baluhu idodutu.’ Masara nako ngone o nyawa, done sarakia de o nyawa ka idadi yomahibaluhu to ona manga toforaukuika? Gea kiani o dimonika yomahibaluhu! Masara duru hokogea o Dautu womahibaluhu ai toforaukuika ma dodihiraino gea. Ho gea ma titi igoungu nanga Mesia gea wodadi to Dautu ai Baluhu idodutu, ho sarakia, gea itiai hiahoko nanga Mesia gea hato Una o nyawa biaha dika? Duru ko idadiua! Angamoi nako o nyawa biaha dika gea ko idadiua Una gea wodadi o Dautu ai toforauku de ka ma moi wodadioo to Dautu ai Baluhu idodutu. Masara nako Ma Jou ai Mesia Una gea ko o nyawa biahaua, de gea ma titi ho hiadono duru itaana abe o Dautu womahibaluhu Unangika! Ho abeika ngini nimafikirohi ma titi nanga Mesia gea!”

46De o Yesusu wotemo ibooto de moioo de ko iwa abe ka idadi iwipaluhu Unangika. De gea ipaha de o nyawa mata-mataika ko yamoroinokaua iwileha Unangika abe ato genangino de ihititi ai howono ai demoino.

Currently Selected:

Matiusu 22: MJDD

Highlight

Copy