Matiusu 19

O Yesusu wadotoko o nyawa ma titi manga gogilaka manga ngoluku

Maruku 10:1-12

1De ipaha o Galilea ma tonaka o Yesusu de iwinii-niiki yanoaika de gea yotagi-tagi de yoiki o Yudea ma tonakika. De manga dodagi ma goronaka yomahiadono o Yorodani ma akeroka, ho ma akere gea yomahihoraika. 2De doka o akere ma honongaka, genangokali naga o nyawa manga ngoe yoboa Unangino de ka ihikaika ona iwinii-niiki Una. De abe yopopanyake Una wahitogumu manga popanyakeino gea.

3De o wange moiuku o Farisi manga doomuino ma nyawa yamuruono naga yoboaino. De ona gea iwihideeoka abe ona ato ihititi la genangoka ato o Yesusu wahowono. Abe ona yomatemo ato, “Nako wotemo ai gogiriaka de ai demo ko imakiniikua de o Musa ai Pareta, gea wahowonoka.” Hokogea o Farisi ma nyawa manga hininga, ho ona iwibole ma goa-goa o Yesusika ato, “Ho sarakia, nako naga o nauru womatengo de mangale ma titi o kia dika de ngoi fekata womioluku, gea watilakuroka ma pareta eko koua?”

4De o Yesusu wopaluhu wato, “Ho mode ngini ko niabasauahi Ma Jou ai Demo-demoino ma titi gea? Angamoi genangoka de ihitulihukuoka abe Una wotobatulaada ma dodihiraka de watulaada moi o nauru de moi o ngofeka.#19:4 Dodadi 1:27; Dodadi 5:2 5De naangoli itemo ato,

‘De mangale ma titi Ma Jou watulaada o nauru de o ngofeka la wato yahinooto gea yodadi o badanga moi, gea ma titi ho hiadono o nauru yomatingaka manga baba de manga memeino la gea yogogere moi de manga fekata la ona yodadioka moi.’ # 19:5 Dodadi 2:24

Hokogea itemo Ma Jou ai Demo-demoka. 6Ho ona yahinooto ko yomatengo-tengokaua, masara ona yodadioka yomaketero o badanga moi dika. Ho ona abe Ma Jou wahidadioka o giabereki moi, ufa hiadono o nyawa yahikatingakoli.”

7De o Farisi ma nyawa ona iwilehali Unangika ato, “Ho nako hokogea Ma Jou ai hininga, adodoa ho o Musa wahigunoa o nyawa la manga fekata yaoluku? Angamoi nako o Musa ai higunoa ma demoka, una wato nako hiadono womatengo wato womioluku ngoi fekata, gea o ngolu-ngoluku ma hurata moi wodiai dika de gea ahao ka idadi womioluku. Ho gea done sarakia?”

8De o Yesusu wopaluhu onangika wato, “Iya, igoungu, abe o Musa winihigunoa la niaoluku de hiadono naga o pareta moi wotulihi. Masara gea wotulihi ko ma titiua abe ai hiningaka wato gea irahai dika nimakoluku. Hokogenangua, masara gea wotulihi ma titi ngini nia pea kohadogowini. Abe ngini ma dodihirainohi de ko nihigihenua Ma Jou ai hiningaika angamoi Una gea ko ai hiningaua la ngini nimakoluku. 9De naa tinihingahu abe o nauru onaguna dika nako womioluku ngoi fekata la ahao o ngofeka moioli woilaka, gea wahowonoka ai badangoka. Masara nako to una ngoi fekata muna mahowonoka de o nauru utuika, gea ahao una ka idadi womioluku munangika de ko wahowonua.”

10De o Yesusu ai demo gea iwinii-niiki yoihene de ona yotemo ato, “Nako hokogea o giaberekioka ma hiaturu, koaho ngaro ufa o nyawa yoilaka!”

11De Una wotemo wato, “Masara nia demo gea o nyawa ko mata-mataikaua ka idadi yodafongo la hiadono ko yoilakua ho yowango ka yomatengo dika. Ho ka ona dika abe Ma Jou waduhunu de wahiakunu abe ka idadi hokogea yowango. 12Abe hoka naga o nauru utu ko idadiua yoilaka ma titi manga kangela yomahidoboainohi, de naga utuoli abe o nyawa yakabiirioka onangika ho ko idadiuali. De naga utuohi abe ona ma hirete yomaputuhu ato duru ko yoilakua ma titi ona manga hininga la duru iwileleani Ma Jouika, ho koaho ufa naga manga fekata de ufa manga hininga itobatagi ka onangikahi ilamoko. Ho onagona dika abe ka idadi yodafongo ahi demo naa kiani yodafongo de hiadono yaniiki enangika.” De hokogea o Yesusu ai hitararono ma demo onangika ma titi o nyawa manga gogilaka de manga ngo-ngolukino.

O Yesusu o ngofa-ngofaka wagahoko ma owa Ma Jouiye

Maruku 10:13-16; Lukasa 18:15-17

13De ipahaino o nyawa yao manga ngofa-ngofaka o Yesusino la ato Una wafokumu la wagahoko ma owa Ma Jouino ma titi ona. Masara o Yesusu iwinii-niiki ona yataere manga dimonika ato, “Ei, ko idadiua ma ngofa-ngofaka naa niaoika ma guruika, done iwiruwae!” 14Masara o Yesusu wamake gea yodiai ho wataere iwinii-niikika wato, “Nianoaika! La o ngofa-ngofaka gea yoboa Ngohino, de ufa niatukoro ona gea. Angamoi onagona dika abe manga hininga imaketero hoka o ngofa-ngofakoli naa manga hininga ma dodipokouku, de gea ona abe Ma Jou wadafongo de wahikoano ona.” 15De wataere ibooto de ahao ma ngofa-ngofaka wakokifokumuku de gea wagahoko ma owa Ma Jouiye. De wagahoko ipahaino de Una wosoboka.

Naga o nyawa womatengo wokaya-kaya woboa o Yesusino

Maruku 10:17-27; Lukasa 18:18-27

16De ma moiuku naga womatengo o goduuru woboa o Yesusino de wileha Unangika wato, “Ahi Guru, naa moi tonileha Ngonaika. Sarakia, ahi wowangoino de ma datoro ma rorahai o kia todiai la genangino de ka idadi o wowango tamake ka hiado-adonika?”

17De o Yesusu wipaluhu unangika wato, “Gea ani demo ma goronaka de nohileha ma datoro ma rorahai nato o kia. Masara naa tonileha ngonaika, done ma titi o kia ho hiadono ngona nohileha Ngohino ma titi ma rorahai? Angamoi bote ngona nohiorikoka abe Ma Jou ka Una dika ai hininga ma rorahai, ho koaho to Una ai demo dika nanii-niiki. Ho Ngohi ka idadi tapaluhu ani leleha gea de tonihidumutu ai demoika abe ka Una dika ai datoro irorahai. Abe ma titi nako ngona noigo o wowango namake ka hiado-adonika Unangino, gea kiani natobaniiki to Ma Jou ai Paretaika.”

18De una gea wilehali wato, “Ai Pareta gea naga kohangoe, ho ma pareta o kia kiani taniiki?”

De o Yesusu wopaluhu unangika de ma pareta abe ma dodihiraino ihitulihukuoka wato,

“‘Ngini ko idadiua o nyawa niatoma, ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua, ngini ko idadiua nitohiki, ngini ko idadiua o nyawa niadofa-dofanga de niahiade-ade itorou. 19De ngini kiani de nia horomati nia babaika de nia memeika hiadono niahingounu de niao irahai. De o nyawa utuikaoo kiani niadora imaketero hoka ti ngini nia roehe ma hirete niodora.’”#19:19 Huhupu 20:12-16; Gogao 19:18

20De una ma goduuru womahingahu wato, “Iya, ahi Guru, angamoi ngohi o pareta gea mata-mata ngohi naa duru taniikoka. Ho done o kiahi naga abe ngohi kiani todiai la o wowango tamake?”

21De o Yesusu wipaluhu unangika wato, “Nako ngona noigo la duru ani hininga itotiaioka Ma Jou ai himangoka, gea kiani noiki nolio ani tauika, naika de ani kiahonanga nakokifukunoka mata-mata de naga ani tiwi ahao nahikokidoakoka o nyawa yohu-huhaika. De gea nahikokidoakoka onangika la gea ahao ngona nokaya o Horogaka. Ho ani kiahonanga mata-mata nakokifukunoka de ahao nolioli Ngohino la nohiniiki Ngohi.” 22Ka de hokogea woihene de una ai hininga duru ihuha, ho ka o Yesusu wiporete de woiki wolio angamoi to una ai kiahonanga duru kohangoe de gea ko woigoua wahidotodoaka o nyawaika.

23De una wokaya-kaya una wosoboka de ahao o Yesusu wotemo iwinii-niikika wato, “Naa tagou-goungu tinihingahu, ona abe de manga tiwi-tiwioka duru ihuha yodadi Ma Jou ai kokawaaha la ona ahao wahikoano ona gea. 24De ahi demo gea ka idadi tinihitararonoli de o hiketero ma demo. Abe nako o aewani ma ago-agomo gea o unta de o populaki ma lakoika iwohama la ato ma honongaika ihapongo, ka enangohi hatoli igapanga. Masara nako ona yokaya-kaya la ato yohapongo o Horogaiye, onangohi duru ihuha yohapongo!”

25De ai demo gea yoihene de iwinii-niiki gea duru yokokiheranga hiadono yotemo ato, “Ou! Genangoka abe miataoko ihowono! Ngomi miato bote ona yokaya-kaya kiani yohapongo dakuiye angamoi duru ona gea abe Ma Jou wahiowa hiadono yokaya. Masara naa ngona nomihingahu nato ngaro ona yokaya-kaya ma ko yohapongua. Ho nako o nyawa yokaya-kayaoo de ko yohapongua, gea done o nyawa ko moiua la yamake o wowango ka hiado-adonika.”

26De womalega onangika de wato, “Gea duru niagoungu. Nako o nyawa dika, duru ko yakunua, masara Ma Jou hokogenangua. Nako de Ma Jou, ngaro o kia dika, ma ka wakunu.”

Abe ma titi nanga utumu Ma Jouino nako hitobanii-niiki Unangika

Maruku 10:28-31; Lukasa 18:28-30

27De ahao o Peturusu wotemo o Yesusika wato, “Ho abeika ngomi naa angamoi ko mikayaua. Mata-mata mianoaka la ka ihikaika mininiiki Ngona! Ho done hokokia to ngomi mia utumu miamake?”

28De o Yesusu wahingahu wato, “Naa duru tagou-goungu tinihingahu nginika, abe dokena nanga himangika ma oraha Ngohi o Nyawa ma Ngofaka tahikoano ahi nyawa de togogerukuoka ahi pareta ma kadera ma hohailoaka abe ma debi-debini, de ma oraha gea ahao nginioo naga de de Ngohi. Abe ngini nihitobanii-niiki niborigogeruku o kadera ma hohailoaka abe naga ngimoi de hinooto homoi-homoiika. Abe ahao ngini nia kaderaka gea la genangoka de niatobauru-urusu o Isiraele ma nyawa mata-mataika, abe ona manga doomu ngimoi de hinooto angamoi yomahidutu o Isiraele ai ngofaka abe yangimoi de yahinootoino.”

29“De nagali ti ngini nia hiowa hokonaa. Abe onagona dika manga tau yanoaka, eko manga roria-dodoto yanoaika, eko manga baba, manga meme, manga ngofa-ngofaka yanoaika, eko ngaro manga redi yanoaka la ato ona ihiniiki Ngohi, gea ona ahao yamake ma utumu Ma Jouino. Abe ma utumu gea o duniakahi naa de Ma Jou wodogo onangika hiadono to ona manga tau eko manga redi eko manga ngongakuoka manga gogianongoru, ma gea mata-mata naga kohangoe yamake la idadi manga utumu onangika. De ahao dokena nanga himangino abe ma oraha ahao iboa, ona ahao gea yamake o wowango ka hiado-adonika.”

30“Masara naga o nyawa manga ngoe abe ma oraha naa ona manga gogere hatoli ikurutiye, masara ona gea ahao wahitipokouku Ma Jou abe ma oraha ahao iboa. De o nyawa utuoli naga manga ngoe abe ma oraha naa ona ka yotipokoukuohi, masara ahao Ma Jou wagoraka ona gea la manga gogere ikurutiye o Horogaka.” Hokogea o Yesusu ai hingahu ma demo iwinii-niikika.

Currently Selected:

Matiusu 19: MJDD

Highlight

Copy