Lukasa 4

O Ibilihi ma haeke iwitaili o Yesusika

Matiusu 4:1-11; Maruku 1:12-13

1De o Yesusu iwiohiki ipahaino de Una duru iwilufungu de Ma Jou o Womaha. Ho Una wanoaika o Yorodani ma akere de Ma Jou o Womaha wihihira-hira o tonaka ma kakaahaika abe genangoka ko iwa o nyawa. 2De genangoka o Ibilihi ma haeke iwitaili abe ai futu moruatino ai dekana. De o Yesusu Una ko wolo-olomua ngaro o wange ngaro o futu. De ai futu moruata ibooto genangoka ho duru iwihafinoka.

3De ahao o Ibilihi ma haeke abe yatobataili o nyawaika, ena gea itemo Unangika ato, “Nako ngona igou-goungu Ma Jou ai Ngofaka, abeika o hakaruino naa ngona nomadiai ani roti, la ani datorino gea de nomahitaana abe ngona to Una ai Ngofaka.”

4Masara o Yesusu wopaluhu enangika wato, “Koua! Angamoi naga moi ai Demo-demoka ihitulihukuoka ato,

‘O nyawa manga wowango gea ka o rotinoua dika.’” # 4:4 Higalioli 8:3

5De ahao o Ibilihi ma haeke iwiao o ngi moiiye abe duru kohagurutiye, de genangoka iwihimatoko o Yesusika o tonaka homoi-homoiika o dunia ma amokika abe ona yomahiparetaka, la gea mata-mata ka ma moi ka idadi wakokimake. 6De gea iwihimatoko Unangika de iwitemo ato, “Abeika naa ma hohailoa mata-mataika ka idadi tonihidoaka ngonaika la ahao idadi to ngona ani kuahaka, angamoi ena gea mata-mata to ngohi ahi kuahaka ho ngohi dika ka idadi tohidoaka onagonaika dika abe ahi hininga adaene onangika. 7Ho ngona iti natilabukuku ahi himangoka de nomahuba ngohino de gea mata-mata idadioka to ngona!”

8De o Yesusu wopaluhu enangika wato, “Masara Ngohi ko idadiua tonihingounu ani demoika, angamoi Ma Jou ai Demo-demoka naga moi itemo ato,

‘Ngini kiani nimahuba nia Baluhu idodutu Ma Jouika dika, de ko idadiua utuika ngini nioleleani.’” # 4:8 Higalioli 6:13

9De ahao o Ibilihi ma haeke iwiaoli o Yesusu o Yerusaleeme ma kotaika. De o Yerusaleemoka de iwikelenga o Yesusu Ma Jou ai Tau ma deturoka abe ma ngi gea duru ikurutiye. De genangoka o Ibilihi ma haeke iwihigaro o Yesusika ato, “Nako ngona nagou-goungu Ma Jou ai Ngofaka, abeika nomangumo genangoka de nauku dau ma tonakuku. 10-11Angamoi naga o demo moi abe ma dihiraino ihitulihukuoka ma titi Ma Jou ai Ngofaka abe itemo ato,

‘Ma Jou wahuloko ai momalaekatika la ona iniduhunu Ngonaika, ho gea inilegono de manga giama la ato ufa noruba de idadi abe ani badanga ma odiri. Ho ai momalaekata gea inigoana Ngona la ngaro ani lou yodigi o hakaruku ma ko ihigunoaua la gea idadi.’” # 4:10-11 Higiriiri 91:11-12

12De o Yesusu wopaluhu enangika wato, “Koua, ko tomangumoua, angamoi nagali ihitulihukuoka Ma Jou ai Demo-demoka o hitiari naa abe itemo ato,

‘Ngini ufa niwitaili nia Baluhu idodutu Ma Jouika.’” # 4:12 Higalioli 6:16

13De hokogea o Ibilihi ma haeke iwitaili o Yesusika. Ho iwitaili ibooto de ahao iwinoaika de isoboka. De ena ka yododamaa dika de imalingi-lingiri o ngekomo o kiali apake la ka idadi ma moioli iwitaili Unangika.

O Nasarete ma nyawa iwioluku o Yesusika

14De ipahaino de o Yesusu wolio o Galilea ma tonakika, de Ma Jou o Womaha ai kuaha duru iwihihira-hira Unangika. De ahao ma nyawa genangoka duru yomaketeade-ade ma titi to Una ai datoro wodiaioka hiadono ona mata-mata ma tonakoka gea iwihioriki ma titi Una. 15De Una ka ihikaika wadotoko abe to ona o Yahudi ma nyawa manga dodotoko ma tau-tauoka, de o nyawa mata-mata iwihigiriiri Unangika.

16De ahao o Yesusu womahiadono to Una ai kapongo o Nasarete, abe Una wolamoko genangoka. De o Hiaini ma wangeoka Una woiki manga dodotoko ma tauika abe hoka ai biaha watobanii-niiki. De Una womaokoino manga himangoka la wobasa Ma Jou ai Demo-demoino. 17Ho iwihidoaka Unangika o buku ma lulu moi abe ma dolaka naga ihitulihuku Ma Jou ai uru ma dodofanga o Yesaya ai demo. De wahohe ma buku gea de wolingiri hiadono wamake ma demo abe ai hininga wato wabasa onangika. De ahao Una wobasa ma demo abe itemo ato,

18 “Ngohi ihilufungu de Ma Jou o Womaha ai kuaha, abe Una wohiiriki de wohihitagongo ngohino la o Abari ma Rorahai tohingahu-ngahu o hu-huha ma nyawaika. De Una wohihidingoto ngohi naa la tohingahu-ngahu abe o nyawa yatao-taokino ahao yahiluasa ma hohailoaika. De abe o nyawa yorafi-rafioka ahao ka idadi yomahioriki. De ona abe duru o kokangela ma goronaka Una wohihidingoto la tahihohe manga papakitino la yohupu ma hohailoaika.

19 De Una woigo la ngohi tohingahu-ngahuoo abe ma oraha adonoka la nanga Baluhu idodutu Una duru waduhunu ai nyawaika.” # 4:19 Yesaya 61:1-2 a

20De o Yesusu wabasa onangika ibooto de ahao waluluinoli ma buku de wohigilio unangika abe wotobagoa-goana ma buku ma lulu. De ahao o Yesusu wogogeruku la wadotoko o nyawaika gea, de ona mata-mata duru iwidodamaana Unangika. 21De o Yesusu wotemo onangika wato, “O wange naa dika de Ma Jou wohingodumu to Una ai demo gea abe ahao naa tinibasa nginika. De gea wohingodumu ti ngini naa nia hidogoronaka!”

22De ona mata-mata genangoka duru yososanangi ai dodotoko ma demoika de yokokiheranga ma titi ai demo ma hohailoa ai uruoka de aiye wohibengaiye duru ma rorahai. Masara nagali utu genangoka abe ona yomakokeleha ato, “Naa hoihenoka done sarakia? Angamoi done una naa ka o Yusupu ai ngofaka dika? Ho done sarakia una wato ma datoro ma rorahai gea una ka wakunu wodiai?”

23De ahao o Yesusu wotemo onangika wato, “Ngini naa boteua de nihitemo Ngohino nanga demo ma dulu abe itemo ato, ‘Nako ngona nohou-houru, gea kiani nomahitaana abe ngona nomahitogumu ngona ma hirete ani badanga de ahao ngomi naa miningaku ngonaika.’ Abe gea ma demoino de imaketero hoka ngini nihihuloko niato, ‘O kia dika ani datoro abe miihenoka ngona nodiaioka o Kapenaumu ma kapongoka, gea mata-mata kiani nodiai nenangokaoo abe to ngona ma hirete ani kapongokali. Ho nako hiadono gea nodiai naangoka de ahao ngomi ka idadi miningaku.’ Hokogea ti ngini nia hininga Ngohino.”

24De ahao Una watemo onangika wato, “Masara naa duru tagou-goungu tinihingahu nginika tato abe Ma Jou ai uru ma dodofanga, o nyawa o kia-kiaka dika ma naga manga horomati onangika gea. Masara nako to ona manga nyawa abe yomahikapongo moi de de una, ona dika ko iwa manga horomati ai uru ma dodofangika gea.”

25De ahao Una ka wotemohi onangika wato, “De naa moi o ade-ade tinihihohininga abe hokokia idadi ma dodihiraino abe ma oraha o Elia wileleani Ma Jouika. Masara ma oraha gea de o Isiraele ma nyawa manga ngoe ko iwihoromatiua unangika. De ma oraha gea naga o ngofeka manga ngoe o Isiraele ma tonakoka naa abe yofao-fao. De abe ma oraha gea o taongo hange de ma honongaino de duru ko iawa-awanua ho naga o hafini ma amoko. 26De ngaro o Isiraeloka naga manga ngoe yofao-fao masara Ma Jou wihidingoto o Elia ko onangikaua la waduhunu, ma wihidingoto momatengoika mofaooka abe muna o Sarapata ma kapongoka ma nyawa. De muna gea ko o Isiraelokaua, masara o homoa ma nyawa abe mogogere o Sidono ma tonakoka, de ka munangika Ma Jou wihidingoto la womiduhunu.”

27“De hokogenangoo abe ma dihira ma oraha o Elisa wileleani Ma Jouika, abe unangikaoo ikuranga iwihoromati o Isiraele ma nyawa. De ma oraha gea de naga manga ngoe o Isiraele ma nyawa yapado-pado, masara o Elisa ko wahitogumua onangika gea. Ma nako o Siria ma nyawa ai romanga o Naamana abe iwipado, unangika dika o Elisa wihitogumu ai panyakeino.” Hokogea o Yesusu ai demo onangika.

28De ona mata-mata o dodotoko ma tauoka ka de yoihene to Una ai demo gea de duru iwingamo angamoi Una wofetongo ma titi Ma Jou ai duduhunu abe itagi onangika abe ko o Yahudi ma nyawaikaua. 29De ona ka ma moi yomaokoino de iwikiniiki o Yesusu o kapongo ma hoanika de iwiao o loku ma bakorika. Abe o Nasarete ma kapongo gea ihigoko o lokuoka. Ho ona mata-mata iwiao ma bakorika angamoi manga hininga la ato iwiumo dau ma bakoruku. 30Masara o Yesusu Una ka woiki o nyawa manga biri-birinoka gea manga hidogoronaino de wanoaika wosobo o ngi moiikali.

O Yesusu o nyawa manga ngoe wahitogumu de abe yakokitokatoo watitoko manga tokata

Matiusu 8:14-17; Maruku 1:29-34

31De ahao o Yesusu woikoli o Kapenaumu ma kapongika abe imanoa o Galilea ma tonakoka. De genangoka o Hiaini ma wange ma getongo de Una wotobadotoko manga dodotoko ma tauoka. 32De onangoo duru yoheranga ma titi ai dodotoko ma demoika, angamoi to Una ai demo naga de ma kuahaka.

33De o Hiaini ma wangeoka abe o Yesusu naga manga dodotoko ma tauoka de naga womatengo woboaino abe iwikitokata. De woboaino de wopoaka waamo-amokiye o Yesusika wato, 34“Adoo! Ngona o Yesusu abe o Nasaretoka de naino noboa, Ngona ka o kia nodiai ngomino? Bote Ngona nato adonoka ma oraha la nomihibinaaha ngomi naa? Abe ngohi tonihioriki Ngona gea o Debi-debini ma nyawa abe Ma Jou wonihidingoto naanguku!”

35De o Yesusu duru wataere ma tokatika gea wato, “Ibootohi notemo ho nohupuoka unangoka gea!” De wotemo ibooto de ma tokata iwihiruba ma nauru gea ma tonakuku. De barikua iwihirubauku masara ahao iwinoaika dika de ko iwihiodiruali. De naa mata-mata idadi duru o nyawa mata-mata manga kokihimangoka ho ona mata-mata iwilega-lega.

36De ona mata-mata duru yokokiheranga de yomakoketemo ato, “Abeika Una naa ai dodotoko duru o fara moi! Angamoi Una wohuloko o tokatika de ai kuaha de ai buturungu de ena gea ka ihupu dika o nyawaino!” 37De ma abari abe ma titi to Una ai datoro gea duru imahora-hora o tonaka gea mata-mataika hiadono o nyawa mata-mata yokokiihenoka.

38De o Yesusu manga dodotoko ma tauoka de wosobo woiki o Simono ai tauika. De o Simono ngoi toroa muna imigogama abe duru imihauku. De ona genangoka yomagahoko o duduhunu o Yesusika la ato womihitogumu. 39De Una woiki munangika de womaoko ami datekoka de ahao wotemo ami gogamika, de ami hauku gea ihupuoka abe hoka ma dihirainoli. Ho duru ma oraha gea dika de muna momomikiye ami ngingiduino de maleleani de o inomo onangika.

40De ahao ihumuririhuku ho o Hiaini ma wange ipahaka, de ahao o nyawa manga ngoe yoboa Unangino. Abe ona mata-mata abe naga manga dutu eko manga dodiawo yagogama ma titi manga panyake irupa-rupa, ona gea yaoino o Yesusino. De Una wakokiso de ai giama ona homoi-homoiika de wahikokitogumu ona mata-mataika. 41De nagali abe yakokitokata abe yao Unangino, de onangoo waduhunu abe wohikokititoko la ma toka-tokata ihupu onangoka de aino. De ma tokata utu ipoa-poaka ato, “Ngona naa Ma Jou ai Ngofaka!” Masara o Yesusu wataere enangika de ko wohigunoaua la ena gea itemo-temo, angamoi ihioriki abe Una gea Ma Jou ai Mesia abe wihidingoto o duniauku.

O Yesusu o Abari ma Rorahai wogila-gilali wohingahu-ngahu

42De ma dawangeino abe o wange ko ipotokauahi de o Yesusu ma kotaka de wosobo woiki o tonaka ma kakaahaika abe ko iwa o nyawa genangoka. De ko iwitedekanuahi de o nyawa duru ko manga ngoe iwilingiri. De ipahaino iwimakeoka de duru yogaho-gahoko Unangika la ato ufa wanoaika ma kiani womagoo-gogere onangoka dika. 43Masara Una wapaluhu onangika wato, “Ngohi naa kiani togila-gila o kapongo de o kota utuikali la onangikaoo tahingahu-ngahu o Abari ma Rorahai abe ma titi hokokia Ma Jou wahikoano ai nyawaika. Angamoi duru ena gea Ma Jou ai hininga ma dumutu hiadono wohihidingoto naanguku.” 44De ahao Una wogila-gila woiki abe wakokiloliti o Yahudi ma nyawa manga tonaka mata-mataika de watobadotoko manga dodotoko ma tau-tauoka.

Currently Selected:

Lukasa 4: MJDD

Highlight

Copy