Lukasa 3
3
O Yohanese Wotobaohi-ohiki wadotoko de waohiki o nyawaika
Matiusu 3:1-12
1De o taongo muruono naga ipahaino ho naa o Roma manga koano wokokurutiye iwituruuruoka ho manga Kaisara ma oraha naa ai romanga o Tiberiusu. De una gea iwigorakiye de ahao wokoano ai taongo ngimoi de motoa ibooto. De ma oraha gea naga o Roma ma nyawa womatengoli ai romanga o Pontiusu Pilatusu abe una wodadi o Yudea ma tonaka manga hihira ho iwihiromanga manga gubernuuru.
De abe doka o Galilea ma tonakoka de to ona manga popareta ma hidimono gea o Herodese Antipasa. De to una gea ai riaka o Filipusu una wodadi o Iturea ma tonaka de o Tarakonitisi ma tonaka manga popareta ma hidimono. De doka o Abilene ma tonakoka de to ona manga popareta ma hidimono gea o Lisaniasa.
2De abe ma oraha gea o Yahudi ma nyawaka to ona manga hidemo ma nyawa Ma Jouiye abe ka onangohi yokokurutiye gea o Hanasa de o Kayafasa.
De abe ma oraha manga hihira gea mata-mata naga de manga kuahaka manga ngi homoi-homoioka, duru ma oraha gea Ma Jou ai behehongo ma demo moi ka wihiree-reeika o Sakaria ai ngofaka o Yohanesika. Abe ma oraha gea de o Yohanese wogogere o tonaka ma kakaahaka abe ko iwa o nyawa genangoka. 3De o Yohanese una wohingounu Ma Jou ai behehongika ho una woiki wotagi-tagi o Yorodani ma akere ma dolaka de gea wotulu-tulu o kapo-kapongoka de wahingahu-ngahu wato, “Ngini kiani nitoba nia howo-howonino la ka idadi Ma Jou winiapongo de waofi nia howono gea. De ahao kiani iniohiki la genangino nimahitunguu o nyawa manga hima-himangoka abe ngini nioporetoka nia howo-howono gea.”
4De ai demoino de ai datorino gea duru wohingodumu abe Ma Jou ai uru ma dodofanga o Yesaya ai demo. Abe o Yesaya ma dihiraino de naga moi ai demo wohitulihuku wato,
“Ho ahao naga to una ai ilingi o tonaka ma kakaahaka, waamo-amokiye wabobanarata wahitararono o nyawaika wato, ‘Nako o koano woboaino, gea kiani to una ai ngekomo hohidiaioka la hidafongo irahai. De naa itigioka abe Ma Jou woboa ngoneino la wonatutumu. Ho ti ngini nia hininga kiani nimahidiaioka la niwidafongo irahai Unangika abe imaketero hoka o koano ai ngekomo hohidiaioka de hidafongo irahai. Ho ngini nihitiaioka Ma Jou ai ngekomo gea!
5 Abe ma ngekomoka nako naga iguhuku gea kiani niopohuku de o tonaka la duru itiaiika, de nako ihikokaika itotoporono gea kiani nihitiai la hiadono itiaiika ma tonaka. De nako ma ngekomo ijiko-jiko gea kiani nihirikoto, de nako ihikokaika ipuku-puku enangoo nihitiai la ma ngekomo duru itiaiika mata-mataika.
6 De ma oraha nihitiaioka to Una ai ngekomo de ahao o nyawa mata-mata ka idadi yamake Ma Jou ai duduhunu iboaino.’” # 3:6
Yesaya 40:3-5
De hokogea o Yesaya ai demo ma dodihiraino abe to ena ma dumutu o Yohanesika, angamoi o Yohanese ai hininga ma dumutu la wahidiai o nyawa manga hininga la ona ahao iwidafongo Ma Jouika.
7De mangale ma titi o Yohanese ai demo gea abe wahingahu-ngahu o nyawaika ho ko manga ngoe yoboa unangino la ato waohiki onangika. Masara o Yohanese una wohioriki abe ona ko mata-mataikaua yoigo yaniiki Ma Jou ai totiai ma ngekomika, ho una wataere onangika gea wato, “Ho ngini naa done sarakia nia hiningaka hiadono niboa la niato tiniohiki nginika? Angamoi ngini nimaketero abe hoka o dodiha iloara o ukuoka de aino, abe ma titi ngini niato Ma Jou ai hohowono nginika ka idadi niodokaowara nako ngohi tiniohiki.”
8“Masara ngini nia hiningaka de nimadokangeluku dika ho ko nitobaua nia howo-howonino, ho gea ngaro o gogohiki ma ko idadiua iniduhunu Ma Jou ai himangoka. Ho koaho ngini nitobaka de nioporetoka nia howono. De gea nia howono nioporetoka de ahao nia wowango ma datoro ma rorahaiino de ka idadi nimahitaana abe niagou-goungu nitobaka. Ho ngini nitobakahi de ahao Ma Jou ka idadi winisanangi nginika.”
De ahao o Yohanese ai dodaere ma demo wohigila-gila onangika wato, “De ngini ufa niataoko ihowono abe Ma Jou ai hininga ngone o Yahudi ma nyawaino. Abe ufa nimatemo nia hiningaka niato, ‘Ngone naa o Abarahaama ai totoforauku ho ahao Ma Jou Una ko wonahohowonua ngoneino.’ Ufa hokogea nimafikiri angamoi Ma Jou wonadafongo ngone abe gea ko ma titiua nanga tofora o Abarahaamino masara abe ma titi nanga hininga Ma Jouika. Angamoi nako Ma Jou woigo wodiai, tanu Una ka idadi wapake ka o hakaru dika abe dau nanga louoka naa abe ko kia-kiaua ma titi de genangino wahidadi o Abarahaama ai totoforauku utuoli la winituruuru ngini. Ho ufa ngini niataoko ihowono de nimafikiri abe nia hohowono ko niamakeua mangale ma titi nimahinganono ti ngini nia tofora o Abarahaamika. Angamoi ko genanginoua ma titi abe Ma Jou winidafongo.”
9“De gea igoungu abe Ma Jou ai hohowono o nyawaika, ena gea wohidiaioka la ko itedekanokaua de wahohowono o nyawaika abe ko yotobaua. De gea ka idadi tohiketero abe womatengo womahidiaioka la ai gota watolanga ma titi ma gota gea duru ko ihihofokua ma hofoko ma rorahai. Ho una gea ai bahuku wagorakoka ho duru itigioka abe ai gota gea watolanga dau ma roehino la ahao waumo o uku ma goronaika. De ngini naa nimaketero abe hoka to una ai gota, ho ngini onagona dika abe nia wowangoka de ko nihihofokua de ma rorahaiino, gea itigioka nia hohowono niaohana.” Hokogea o Yohanese ai dodaere ma demo onangika.
10De ahao o nyawa manga ngoe yomaleha o Yohanesika ato, “Ho ngomi naa koaho o kia midiai la ufa mia hohowono imidaene ngomiuku?”
11De o Yohanese wapaluhu onangika wato, “Onagona dika nginioka abe nia baju ma biri-birini naga hinooto, gea moi niahidoaka o nyawaika abe to ona manga baju ma biri-birini ko iwa. De nako nia inomo naga iniwedono, enangoo ka idadi utu niahikodoku onangika abe manga inomo ko iwa.”
12De o nyawa abe yotobagaho-gahoko o pajaka ma tiwi onangoo yoboa o Yohanesino la ato waohiki onangika de yomaleha ato, “Mia guru, ngomi naa koaho o kia midiai?”
13De una wopaluhu wato, “Ngini naa iti ufa niarusi o nyawaika. Abe hokokia dika ma amoko ma tiwi abe o Roma ma popareta inihuloko la ato niale o nyawaino, hokogea dika ma amoko niale. Ho ufa ma boloi niahuloko inihidoaka la genangino nimahitingini.”
14De ahao nagali o tentara ma nyawa yomaleha unangika ato, “Ho sarakia ngomi naa? Ngomi koaho o kia midiai?”
De una wapaluhu onangika wato, “Ufa ngini niaribuutu o nyawaika la niato inihidoaka o tiwi nginika. De nako o nyawa manga howono ko iwa, gea ufa niatae onangika la genangino de o bobangu ma tiwi nimalingiri. Masara abe nia hewa nia karajaangino nimamake, gea ufa de nia gurubungoka ma koaho niodafongo dika de nia hininga ma rorahai.” Hokogea o Yohanese ai babaluhu ma demo o nyawaika la ufa manga hohowono yadaene onanguku.
15De o nyawa utu genangoka duru yongano-nganono de iwidodamaa de manga hininga ma gahumu ma titi Ma Jou ai behehongo abe ma dodihirainohi de Una wohibehehongoka wato ahao ai Mesia gea wihidingoto naa o duniauku. De naa o nyawa manga ngoe yomaleha-leha manga hiningaka ato, “Marai una naa o Yohanese una bote wodadi to ngone nanga Mesia abe Ma Jou wonahibehehongoka?” De ona utu iwileha unangika la ato iwihioriki gea una eko koua.
16De o Yohanese wapaluhu ona manga ngoeika wato, “Abeika ngohi naa tinihiohiki ka de o akere dika. Masara ko itedekanokaua de naga womatengoli woboaino abe nako Una de ngohi, duru ka Unangohi de ai kuaha ikurutiye. De ai kuaha duru ikurutiye hiadono ngohi naa tamao abe ko takunua todadi to Una ai gilaongo, ho ngaro tileleani Unangika masara tamao ko takunua angamoi Una ai kuaha ikurutiyeholi.”
“De igoungu ngohi tinihiohiki de tinihingohama o akerika, masara Una gea woboaino de ahao o gogohiki utuohi winihidoaka nginika. Abe ngini utu winihingohama Ma Jou o Womaha ai kuaha ma goronaika, masara naga ngini utuoli winihingohama o uku ma goronaika la nia hohowono niamake nginika.”
17“De abe ma titi Ma Jou ai Mesia, Una gea ka idadi tihiketero abe womatengo ai pine mata-mata wotalo-taloko la wohikatingaka ma pine ma akeme ma afaino. De una wotaloko ibootino de ahao ma akeme watoomuino de wagogono to una ai rawongo ma tau ma goronaka, masara abe to ena ma afa enangoo watoomuino ma gea wakokitufuku de o uku abe ka ihikaika itokara de ko ihonengua. De hokogea tihiketero Una abe ahao woboaino, angamoi Una gea woboaino de ahao wahikatingaka o nyawa la utu wahigogere to Una ma hirete ai ngioka de o nyawa utuoli ahao wahohowono o ukuika.” Hokogea o Yohanese wahitararono abe ma titi ko unangua abe Ma Jou ai Behehongo.
18De naga utuoli ai hitiari ma demo abe wahitiari onangika ma oraha wahingahu-ngahu o Abari ma Rorahai o nyawa yowoe-woeika gea.
19De ipahaino nagali idadi abe o Yohanese witaere manga popareta ma hidimono o Herodese Antipasika ma titi ai howono. Angamoi o Herodese una gea womagora to una ma hirete ai riaka ngoi fekata de woilaka munangika, abe muna gea ami romanga o ngo Herodiasa. Ho o Yohanese witaere ma hidimonika ma titi ai howono gea de naga utuoli ai howono ma ngoe. 20De ahao o Herodese wodogo-dogo wahowono, angamoi wahuloko ai nyawa la o Yohanese iwitaokino de hiadono iwibuika.
O Yesusu iwiohiki
Matiusu 3:13-17; Maruku 1:9-11
21De abe ma oraha o Yohanese ko iwitaokuahi ho ka watobaohi-ohikohi o nyawa ko manga ngoeika, de naga ma wange abe o Yesusu woboaino de Unangoo wiohiki. De o Yesusu wiohiki ibootino de ahao womaniata. De womaniata ai gogiriaka de o Horoga ifelenga. 22De ahao Ma Jou o Womaha wouti o Yesusuku abe hoka o namodaara de iwidangi Unanguku. De nagali o ilingi o Horogauku itemo ato, “Ngona naa ahi Ngofaka abe duru tonidora de duru tonidosanangi Ngonaika.” Hokogea idadi abe ma oraha o Yesusu iwiohiki.
O Yesusu ai totofora manga roma-romanga homoi-homoiika
Matiusu 1:1-17
23De ipahaino abe ma oraha o Yesusu Una ai taongo ngade-ngade moruange adonoka de ahao Una womulaenge wileleani Ma Jouika abe o nyawa wadotoko de wahidumutu ai Babaika. De o Yesusu o nyawa ato bote Una to Yusupu ai ngofaka.
De o Yusupu una gea to Eli ai ngofaka.
24De iyeoli o Eli una gea to Matata ai ngofaka,
de o Matata una o Lewi ai ngofaka,
de o Lewi una o Maliki ai ngofaka.
De iyeoli o Maliki una o Yanai ai ngofaka,
de o Yanai una o Yusupu ai ngofaka.
25De iyeoli o Yusupu una o Matika ai ngofaka,
de o Matika una o Amoso ai ngofaka.
De iyeoli o Amoso una o Nahumu ai ngofaka,
de o Nahumu una o Hesili ai ngofaka,
de o Hesili una o Nagai ai ngofaka.
26De iyeoli o Nagai una o Maata ai ngofaka,
de o Maata una o Matika ai ngofaka,
de o Matika una o Simei ai ngofaka.
De iyeoli o Simei una o Yoseke ai ngofaka,
de o Yoseke una o Yoda ai ngofaka.
27De iyeoli o Yoda una o Yohanana ai ngofaka,
de o Yohanana una o Resa ai ngofaka,
de o Resa una o Serubabele ai ngofaka.
De iyeoli o Serubabele una o Seatiele ai ngofaka,
de o Seatiele una o Neri ai ngofaka.
28De iyeoli o Neri una o Maliki ai ngofaka,
de o Maliki una o Adi ai ngofaka,
de o Adi una o Kosama ai ngofaka.
De iyeoli o Kosama una o Emadama ai ngofaka,
de o Emadama una o Ere ai ngofaka.
29De iyeoli o Ere una o Yesua ai ngofaka,
de o Yesua una o Eliesere ai ngofaka,
de o Eliesere una o Yorimi ai ngofaka.
De iyeoli o Yorimi una o Matata ai ngofaka,
de o Matata una o Lewi ai ngofaka.
30De iyeoli o Lewi una o Simeono ai ngofaka,
de o Simeono una o Yehuda ai ngofaka,
de o Yehuda una o Yusupu ai ngofaka.
De iyeoli o Yusupu una o Yonama ai ngofaka,
de o Yonama una o Eliakimi ai ngofaka.
31De iyeoli o Eliakimi una o Melea ai ngofaka,
de o Melea una o Mina ai ngofaka.
De iyeoli o Mina una o Mataata ai ngofaka,
de o Mataata una o Natana ai ngofaka,
de o Natana una nanga koano o Dautu ai ngofaka.
32De iyeoli o Dautu una o Isai ai ngofaka,
de o Isai una o Obede ai ngofaka,
de o Obede una o Boasa ai ngofaka.
De iyeoli o Boasa una o Salamono ai ngofaka,
de o Salamono una o Nahasono ai ngofaka.
33De iyeoli o Nahasono una o Aminadaba ai ngofaka,
de o Aminadaba una o Adamina ai ngofaka.
De iyeoli o Adamina una o Arini ai ngofaka,
de o Arini una o Heserono ai ngofaka.
De iyeoli o Heserono una o Perese ai ngofaka,
de o Perese una o Yehuda ai ngofaka.
34De iyeoli o Yehuda una o Yakubu ai ngofaka,
de o Yakubu una o Isaka ai ngofaka,
de o Isaka una o Abarahaama ai ngofaka.
De iyeoli o Abarahaama una o Tera ai ngofaka,
de o Tera una o Nahoro ai ngofaka.
35De iyeoli o Nahoro una o Serugu ai ngofaka,
de o Serugu una o Rehu ai ngofaka,
de o Rehu una o Pelege ai ngofaka.
De iyeoli o Pelege una o Ebere ai ngofaka,
de o Ebere una o Salamono ai ngofaka.
36De iyeoli o Salamono una o Kenana ai ngofaka,
de o Kenana una o Arapasaada ai ngofaka,
de o Arapasaada una o Seeme ai ngofaka.
De iyeoli o Seeme una o Nuhi ai ngofaka,
de o Nuhi una o Lameke ai ngofaka.
37De iyeoli o Lameke una o Metusala ai ngofaka,
de o Metusala una o Henoko ai ngofaka.
De iyeoli o Henoko una o Yarete ai ngofaka,
de o Yarete una o Mahalale ai ngofaka,
de o Mahalale una o Kenana ai ngofaka.
38De iyeoli o Kenana una o Enoso ai ngofaka,
de o Enoso una o Seete ai ngofaka,
de o Seete una o Adama ai ngofaka.
De iyeoli o Adama una Ma Jou ai ngofaka.
De hokogea o Yesusu ai totofora yolape-lapeiye.
Currently Selected:
Lukasa 3: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
