Lukasa 10
10
O Yesusu wahidingoto iwinii-niikino yamoritumidi
1De ipahainoli de nanga Baluhu idodutu Una wairiki o nauru utu yamoritumidi abe iwinii-niikino la ona yohira yoiki o kapo-kapongika de o kota-kotaika angamoi ko itedekanokaua de Una ahao woiki watutumu ma nyawa abe yogogere ma ngi homoi-homoiika gea. De gea wahidingoto de waregu la ona o nyawa yahohinooto yoiki. 2De ona ko yosobouahi de Una wahibehehongohi onangika wato, “Naga o nyawa duru ko manga ngoe abe yoigo ato yotoihene o Abari ma Rorahaiino, masara ka hokurangohi abe hahingahu-ngahu o nyawaika. Ho gea ka idadi tahiketero ona gea hoka o redi ma amoko ma pine abe ikokilomukoka ho adonoka ma oraha la o nyawa yoboaino de youtuku. Masara ona youtu-utuku duru yohutulu. Ho Ngohi tato irahai la ngini nimaniata Ma Jouika de duru nigahoko la Una ahao wahidingoto youtu-utuku ma nyawa utuohi yowoe ai redi ma goronaika. La gea onangoo inaduhunu ngone nanga karajaanga ma goronaka. De gea kiani Ma Jouika nigahoko angamoi Una gea abe wohikaaturu ai redioka ma gugutuku, ho ka idadi hihiromanga Unangika hato o Gugutuku ma Baluhu.”
3De o Yesusu wohigila-gila ai behehongo ma demo abe ona yamoritumidika wato, “De naa abeika nitotoihene to Ngohi ahi demoino, angamoi tinihingahu nginika abe ma titi hokokia ahao idadi. De tinihiketero ngini abe ngade-ngade hoka o domba de tinihidingoto o fuhuku ma kaho ma ngi-ngiika, ho kiani duru nimahidodiai ma titi nia demo de nia wowango ma datoro la ufa niaruwae onangika abe yototualono done inihikangela nginika. 4De nia dodagi naa de ufa nia tiwi nimagao. De ngaro ufa dika de niao nia beta-beta abe biaha nia kiahonanga nihilulu genangino. De ka idadi nimasandaaliye, masara nako nia sandaala ma dodagali gea ngaro ufa dika de niao. De nia dodagi ma goronaka de ufa nia dekana nimaketeade-ade dika de o nyawa abe nimakamake o ngekomoka ma hatoli nimataiti nigila-gila nia dumutika.”
5De wogila-gilali wahibehehongo wato, “De nia dodagioka abe nimahiadonoka o kapongo eko o kota moiika, onagona dika iniahoko la nimanoa onangoka, ka de niwohama manga tauika gea de niagahoko ma owa Ma Jouika ma titi ona gea la Una wahiowa manga wowangoka de o hininga ma miriidi. 6De nako ona ma tauoka gea igou-goungu yaniiki Ma Jou ai hininga ma miriidi manga wowangoka, nia gogahoko ma owa ahao idadi onangika. Masara nako manga wowango yao ko itiaiua, gea ahao ko yamakeuali to Una ai hiowa onangika. 7De nako ona ma tauoka gea inidafongo irahai, ufa nimaturuuruoli o tau moiikali, ma onangoka dika nimanoa ka hiadono nihupu ma kapongino gea. De abe inihidiai nginika ma titi o inomo eko o ngokere, gea niolomo de niokere dika de ufa niaoluku manga hidoaka. Abe o kia dika inihidiaiuku, gea ka idadi niodafongo de nia hininga ma sanangi, angamoi gea imaketero hoka ti ngini nia leleani ma karajaanga ma hibalaha inihidoaka nginika, de gea itiai ngini niamake nia hasili abe nia karajaangino.”
8De o Yesusu wogila-gila wato, “De nako o kapongo gea ma nyawa inidafongo de manga hininga ma rahai, gea ka idadi niaolomo o kia dika abe inihidiaiuku. 9De abe ma oraha ngini nigogerohi genangoka de ka idadi o nyawa abe naga yopopanyake niahitogumu onangika. De abe ma oraha niahitogumu nia gogiriaka de niahingahu onangika niato, ‘Naa itigioka ma oraha abe Ma Jou wahikoano ai nyawaika.’”
10“Masara nako ahao idadi abe o kapongo moioka de ko inidafongua, gea ngini kiani manga ngeko-ngekomoka de niahingahu onangika niato, 11‘Naa ngomi mininoaika nia kapongo, masara ihira mia lou mihieheoka la nia kapongo ma tonaka ma kuhuhunu gea ireroka. De gea idadioka abe o hohowono ma dodunguu nginika angamoi ko nimidafongua ngomi. De ufa ngini niawohanga abe ma oraha itigioka la Ma Jou wahikoano ai nyawaika ho gea nia hohowono enangoo itigioka!’ Hokogea ngini niahingahuohi de ahao nihupu dika ma kapongino gea abe inioluku nginika. 12De naa tagou-goungu tinihingahu abe ahao dokengika de Ma Jou watailako de wahohowono o nyawaika de ona gea manga hohowono duru kohadubuho. Abe ngaro o Sodomo de o Gomora ma nyawa manga datoro duru itorou, masara ka onangohi iniolu-oluku nginika abe manga hohowono duru itubuho.”
13De ahao o Yesusu wahitararono yamoritumidika abe ma titi o nyawa utu manga hohowono abe nengokadauino de iwiolukoka o Yesusika. De gea o Yesusu ai demo imaketero hoka watemo onangika abe ahao yamake manga hohowono ngaro abe ona ko yaiwa Unangoka. Ho Una wato, “Abeika nitotoihene ahi demoino, ngini abe o Korasimi de o Besaida ma kapo-kapongoka nigogere! De ngini ahao nia hohowono kohaamoko niamake nginika ma titi abe ngaro niamakeoka ma heheranga abe Ngohi todiai nginioka ma ko nitobaua nia howo-howonino.”
“De barikua nako hoka ahi heheranga gea todiai o Tirusu de o Sidono manga kapongoka abe genangoka ona ko o Yahudi ma nyawaua, masara ona gea ka yotoba manga howonino de iwinii-niiki Ma Jouika. De manga toba gea yomahitunguu abe yomahinoaukuoka de o pakeanga ma kokekekere abe o karongino yodiai, de nagali abe o uku ma kafo yomadoburaraha manga peauku ma titi manga toba ihitunguu. Masara ngini naa ko nitobaua ngaro ahi heheranga niamakeoka nia hidogoronaka! 14Ho naa tinihingahuohi nginika abe ahao dokengika o hohowono ma wangeoka de nako ngini de ona abe o Tirusu de o Sidonoka, ma ka ti nginiohi nia hohowono duru itubuho nginika ma titi ko nitobaua.” De hokogea o Yesusu ai demo abe ma titi o Korasimi de o Besaida ma nyawa.
15De ahao ai demo wohigila-gila masara naa ai demo ma dumutu o Kapenaumu ma nyawaika. Masara onangoo ko yaiwa Unangoka, ho Una wahingahu dika ma titi manga hohowono ahao hokokia yamake onangika. Ho Una wotemo wato, “De nginioli abe o Kapenaumu ma kapongoka nigoo-gogere, naa moi tinileha nginika. Sarakia, ngini mode nimaetongo niato nia wowango ma datoro ma rorahai naga ho genangino niato bote ka idadi nimahidatao o Horogaiye? Duru hokogenangua, masara tanu ngini ahao inihigutiuku o Narakauku angamoi nginioo ma ko nitobaua nia howo-howonino abe ma oraha o heheranga gea todiaioka ti ngini nia hidogoronaka o Kapenaumoka.”
16De ahao o Yesusu wahitararono moioli ona yamoritumidika wato, “Onagona dika abe ahao yodafongo de manga sanangi ti ngini nia hingahu ma demo, ona gea ihidafongoli Ngohi naa. Masara onagona dika abe inioluku nginika, gea Ngohioo ihioluku. De abe ihioluku Ngohino, gea ka Ngohiua dika ihioluku masara ahi Baba abe wohihidingo-dingotino, Unangoo iwiolukoka.” De hokogea o Yesusu ai behehongo ma demo wahibehehongo abe iwinii-niiki yamoritumidika. De wahibehehongo ibooto de ona yokokisobo manga dumutu ma ngiika amomoiika.
17De ona yotagi-tagi de yaniiki ai behehongo gea manga dodagioka de ahao ipahaino de ona yamoritumidi iwigilioli o Yesusino. De ona mata-mata duru yogogarago de yoade-ade Unangika ato, “Ngomi ka idadi o nyawa manga popanyake miakunu miahitogumu, de hongoli ma toka-tokata imihingounu abe ma oraha mihititoko de miapake to Ngona ani romanga, de gea ka ikokiloaroka!”
18De o Yesusu wapaluhu onangika wato, “Duru niagoungu abe o Ibilihi ma haeke ma kuaha ilamaanoka. Angamoi ma oraha ngini nia dodagiokahi de nihititoko o toka-tokata de gea Ngohi tamake o Ibilihi ma haeke gea yaotaka o dihangoka de auku, de gea duru itaiti yaotaka abe imaketero hoka o leletongo ma hiapoto itagi. 19De Ngohi tinihidoakoka o kuaha la ngaro nanga musu ena gea ma buturungu hokokia dika naga masara ka ti nginiohi nia kuaha ifoloiika ilamoko. De nanga musu o Ibilihi ma haeke de to ena ma toka-tokata, ena gea tahiketero hoka o dodiha de o waitota. Ho ngini naa naga de ahi kuahaka, ho ngaro nia dodagioka de niadoko o dodihauku eko o waitotauku masara ena gea ko idadiua inihiodiri nginika. Abe ahi demo gea ma titi nanga musu ma toka-tokata ko idadiua inihikala nginika. 20De abe ngini niato nigogarago, gea ufa ma titi o toka-tokata inihingounu nginika de gea dika ma titi ho hiadono niodogarago. Angamoi koaho niodogarago abe ma titi ti ngini nia roma-romanga homoi-homoi atulihukuoka o Horogaka, de ka enangohi idadi nia gogarago ma titi.”
21De abe ma oraha gea de o Yesusu iwilufungoka de o garago abe Ma Jou o Womahoka de aino iboa. Ho Una witemo ai Babaika wato, “Ahi Baba Ngona o Horogaka ma Baluhu de o duniaka naa enangoo ma Baluhu idodutu. De naa duru totarimakase Ngonaika ma titi ma dodihirainohi de nohikaaturu la abe ani hingahu ma demo ma gou-goungu gea nagogono onangino abe yomagorakaholi la ufa ihioriki ani demo gea. Abe ngaro ona yomahiromanga ato yososawaroka masara Ngona nohikaaturu la ko idadiua yataoko. Masara ona gea abe yomahitipokouku imaketero hoka o ngofa-ngofakoli manga hininga ma dodipokouku, onangika gea ma gou-goungu ma demo gea nahimatokoka la ka idadi yataoko irahai. De tohioriki abe ma dodihiraino de nohideeoka la hokogea nodiai de abe ani hidee gea duru inihisanangi Ngonaika.”
22De ahao o Yesusu wotemoli o nyawaika abe naga Unangoka wato, “Ahi Baba wohihidoakoka o kuaha Ngohino la mata-mataika imanoa to Ngohi ahi giama ma hoatoka. De Ngohi naa Ma Jou ai Ngofaka, ho Ngohi naa de ahi Baba duru mimahikoriki. De ko iwa utu abe duru ihihioriki Ngohino imaketero hoka ahi Babali wohihioriki. De ko iwa utu abe duru iwihioriki ahi Babaika, bowahu Ngohi naa ai Ngofaka. Masara nagali o nyawa abe o Baba tahimatoko onangika la ka idadi iwihioriki, ho ka Ngohi de ona dika abe wiwihioriki o Babaika.”
23De ahao o Yesusu womaidulu iwinii-niikika la ka ona dika yomakoketemo de Una wotemo wato, “Ngini naa duru niutumoka ma titi niamakeoka de nia lako to Ngohi ahi datoro. 24Angamoi naa tinihingahu abe ma dodihiraino de naga Ma Jou ai uru ma dodofanga de o kokoano manga ngoe abe duru yoigo yamake gea abe ma oraha naa de ngini niamake Ngohi todiai, masara ona ko ihidaenua ho ko yamakeua ahi datoro gea. De ona gea ma dihiraino de duru yoigo yoihene abe ngini niihenoka to Ngohi ahi uruino, ma ona ko yoihenua angamoi ko ihidaenua ahi oraha toboa.”
Ma Jou ai Pareta abe duru ikurutiye de o hiketero moi
Matiusu 22:34-40; Maruku 12:28-34
25De ma moiukuoli naga womatengo duru wososawaro o Musa ai Paretaino de una woboaino o Yesusino la wato wileha moi Unangika la ai babaluhino ihititi de hiadono ka idadi wikalaki o Yesusu. Ho una gea wileha wato, “Ahi Guru, ngohi kiani o kia todiai la genangino de o wowango ka hiado-adonika tamake?”
26De o Yesusu wipaluhu unangika wato, “Bote ngona ma hirete nabasaka o Musa ai Pareta, ho ngona nataoko hokokia ma babaluhu genangino?”
27De una gea wipaluhu o Yesusika wato, “Nako ma Pareta haniiki, gea itemo ato,
‘De kiani nia Jou o Yaweikahi niwidora de nia womaha ma gahumu, de kiani niwidora de nia wowango ma gahumu, de kiani niwidora de nia hininga ma gahumu, de kiani niwidora Unangika de o kia dika mata-mata abe naga nginioka!’
De nagali ma pareta moioli abe itemo ato,
‘O nyawa utuika kiani niadora imaketero hoka ti ngini nia roehe ma hirete niodora.’”
28De o Yesusu wotemo wato, “Ani demoino gea duru nagoungu! Ho iti gea naniiki enangika de ngona o wowango ka idadi namake!”
29Masara una gea woigo womademo ma titi ai wowango ma datoro ho wilehali o Yesusika wato, “Masara o nyawa utu gea tanu onagona abe kiani tadora onangika?”
30De o Yesusu wopaluhu de o hiketero moi abe wotemo wato, “Naga womatengo o Yahudi ma nyawa abe o Yerusaleeme ma kotaka de woiki ai dumutu o Yeriko ma kotaika. De ai dodagi ma goronaka de naga yotobaora-ora ma nyawa yamuruono naga iwibaatika. De ona yahuputu to una ai pakeanga la yomahitoona de yomagoraka ai tiwi mata-mata, de duru iwipoha-poha, de ahao ka iwinoaika dika o ngekomo ma datekoka gea ngaro una gea ngade-ngade wohonenge.”
31“Ho ka de idadioka de naga womatengo woboa abe ngone o Yahudi ma nyawa nanga hidemo Ma Jouiye abe una waniiki ma ngekomo gea de una wimake abe iwipoha-poha gea womotumuku ma tonakoka. Masara ka wogila-gila dika abe wirehenoka la ko womahitigikaua ma nyawaika gea, ho ko widuhunua.”
32“De ahao nagali woboaino womatengoli abe wotobaleleani Ma Jou ai Tauoka, de una womahitigika la wilega unangika, masara ka jai-jai dika wilega de ahao unangoo wogila-gila dika abe waniiki o ngekomo ma datekiha.”
33“De ahao naga womatengoli woboaino o Samaria ma nyawa abe ona ko yomahidutu moiua de o Yahudi ma nyawa. Ho una wotagi-tagi de womahiadono unangika o Yahudi ma nyawa abe iwipoha-poha ho ka de wimake de iwilufungu de ai hininga ma dora unangika. 34De una woiki unangika de ai nabo wohituagi de o angguru ma teongo la ma gani ahohonenge de nagali wohituagi de o saitunu ma minyaoo la ma odiri hatoli ikuranga. De wohituagi ipaha de ahao wohitamunu de o ngoere ma bela-belaka. De wohitamunu ai nabo ibooto de wigoraka de wihibarene ai keledaiuku de wiao o dodogumu ma tauika la wipaliara genangoka. 35De ma dawangeino de o Samaria ma nyawa gea kiani wogila-gila ai dodagioka ho wohihupu o tiwi ai popojeino de wihibehehongo o dodogumu ma tau ma dutuika wato, ‘Ma tiwi naa ngona napake la nipaliara una gea. De nako ko iwedonua la ai perelu nahidailako hiadono wotogumoka, togahoko la ngona nofanguohi ma titi ai perelu utuoli. De naa ngohi tonihibehehongo ngonaika abe ahao ngohi ma oraha tolioli naangino de taturuuru ani tiwi abe napakeoka gea.’” Hokogea to Yesusu ai babaluhu o hiketero ma demoino abe wipaluhu woleha-lehaika ma titi onagonaika kiani wadora.
36De ahao o Yesusu wilehali moi unangika abe wosawaro ma titi o Musa ai Paretaino, ho Una woleha wato, “Nako ngona nafikiri, o nyawa yaruange gea abe iwimake ma nauru iwipoha-poha de iwiora o ngekomo ma datekoka gea, ho onagona yaruangeino gea abe iwidora unangika? De onagona yaniiki Ma Jou ai Pareta?”
37De una wipaluhu wato, “Una gea abe wapake ai dora ma hiokoo unangika.”
De o Yesusu wotemo wato, “Gea duru nagoungu. Ho naa ngonaoo kiani nomaaduru abe imaketero hoka to unangoli ai hininga ma datoro ma rahai.”
O Yesusu watutumu o ngo Marata de o ngo Maria
38De o Yesusu de iwitobanii-niiki ona yogila-gila manga dodagioka abe manga dumutu o Yerusaleeme ma kotaika, de yomahiadono o kapongo moiika de genangoka naga momatengo ami romanga o ngo Marata. De muna midafongo irahai o Yesusu ami tau ma goronaka la mato mileleani Unangika. 39De nagali ma tauoka gea o ngo Marata ngomi dodoto abe ami romanga o ngo Maria. De o ngo Maria muna mogogeruku o Yesusu ai louoka la mototoihene ai demoika. 40Masara o ngo Marata duru ami hininga hinooto ma titi ami karajaanga abe o ngolo-ngolomo ma hidiai, ho ikuranga motoihene ai demoika. De ipahaino o ngo Marata moboa Unangino de ami gurubungu ma demo mato, “Ahi Baluhu, naa ko itiaiua! Angamoi ngohi dodoto gea ko mohiduhunua ma titi o leleani ma hidiai, ho naa kiani ka tomatengo dika tokarajaanga! Ho naa tanu irahai la Ngona nomihuloko munangika la kiani mohiniiki mohiduhunu ahi karajaanga.”
41Masara o Yesusu womipaluhu wato, “Ngohi ora, o ngo Marata, ngona ka nopusingiholi de ani hininga aruwaeoka angamoi nafikiri ma titi ma ngoeika. 42Masara tanu koaho ma titi moi dika abe duru iperelu ani hininga aniiki, de ena gea abe hoka ngoni dodotoli o ngo Maria momangiriki angamoi mototoihene ahi demoino. Ho Ngohi ko toigoua la ahi dodotoko ma demo moporete ho ko moihenua.”
Currently Selected:
Lukasa 10: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
