Lukasa 9
9
O Yesusu wahidingoto ona yangimoi de yahinooto o Yahudi ma nyawaika
Matiusu 10:1-15; Maruku 6:7-13
1De ma moiukuoli o Yesusu wahokino ona yangimoi de yahinooto abe iwitobanii-niiki Unangika. De ona yomatoomuinoka de ahao Una wahiakunu onangika de o kuaha de o buturungu la ona ahao ka idadi o tokata mata-mata ihititoko o nyawaino, de o nyawa abe de manga popanyakeoka enangoo mata-mata ka idadi ona yahitogumu. 2De wahiakunu ipaha de ahao wahidingoto o kapo-kapongika la wato ona yahingahu-ngahu o nyawa mata-mataika abe ma titi itigioka ma oraha la Ma Jou wahikoano ai nyawaika. De manga dodagi gea ma goronaka de woigo wato ona ka idadi yahitogumu o nyawa manga popanyakeino. 3Ho ko yosobouahi de Una wahibehehongohi onangika wato, “De nia dodagi naa de ufa nia kiahonanga nimagao. Abe ngaro nia tutukunu de nia beta-beta abe biaha nia kiahonanga nionoa genanguku, ma gea ngaro ufa dika nimagao. De nia bilaono de nia tiwi enangoo ufa nimagao, de abe nia baju ka idadi nimahinoauku de nia baju abe ka nia kokiroehoka dika niapake, masara nako nia baju ma doduruuru gea ngaro ufa dika de niao.”
4“De nia dodagioka abe nimahiadonoka o kapongo eko o kota moiika, gea nimanoa o tau moioka dika de ufa nimaturuuruoli o tau moiikali, ma onangoka dika nimanoa ka hiadono nihupu ma kapongino gea. 5De nako ahao idadi abe o kapongo moioka de ona ko inidafongua abe ka yoluku yoihene nia abari ma demoino ma oraha nimulaenge niahingahu onangika, gea nihupu dika manga kapongino. De gea nihupu de kiani nia lou niafureereokahi la ma tonaka ma kuhuhunu gea ireroka. De gea idadioka abe o hohowono ma dodunguu onangika angamoi ko inidafongua.” Hokogea o Yesusu wahibehehongohi ona yangimoi de yahinootoika.
6De wahibehehongo ibooto de ahao ona yosoboka de yotulu-tulu o kapongo amomoiika la o Abari ma Rorahai yahingahu-ngahu de abe yopopanyakeuku ona yahikokitogumu.
O Herodese una wopusingi ai hiningaka ma titi o Yesusu ai heheranga
7De ma oraha gea de o Galilea ma tonakoka manga popareta ma hidimono o Herodese Antipasa. De o Herodese una gea woihenino ma titi o Yesusu ai heheranga abe wotobadiai o Galilea ma tonakoka gea. Masara ma abari gea woihene de doka ai hiningaka duru wopusingi de wohawana, angamoi o nyawa utu naga iwihingahu ato, “Maraioka gea o Yohanese Wotobaohi-ohiki womomikoka ai honengino de naa wotobadiai o heheranga.” De yotemo hokogea angamoi nengokadauino de o Herodese witomakau o Yohanese ho una wopahaka, masara o nyawa utu yohawana ato done womomikokali ai honengino. 8De masara o nyawa utu iwihingahu o Herodesika ato, “Koua, abe o heheranga wotobadiai una gea Ma Jou ai uru ma dodofanga ma dodihiraino o Elia abe womomikoka ai honengino.” De utuoli yotemo ato, “Koua, gea Ma Jou ai uru ma dodofanga womatengoli abe ma dodihiraka wileleani Unangika masara naa womomikokali de wotobadiai o heheranga imaketero dika hoka ma dodihiraino abe ko wohonenguahi de wotobadiai.”
9De manga demo gea o Herodese woihene masara ka wopusingohi ai hiningaka de wato, “Masara nako o Yohanese una gea titomaka abe ai pea yaleokau, ho naa done onaguna abe ai datoro duru o fara moi gea toihenino?” Hokogea o Herodese ai demo. Ho una duru woigo witutumu unangika abe o heheranga wotobadiai.
O Yesusu wahiolomo o nyawa yasana motoa yofoloi
Matiusu 14:13-21; Maruku 6:30-44; Yohanese 6:1-14
10De ipaha de ai hidingoto ma nyawa abe nengokadauino de o Yesusu wahidingoto la yahingahu-ngahu o nyawaika de yahitogumu manga popanyakeino, ona gea yolioino Unangino. Yolioino de iwiade-ade mata-mata abe idadi manga dodagi ma goronaka. De ahao ka ona dika yomakiniiki de o Yesusu abe yoiki o Besaida ma kapongika. 11Masara o nyawa manga ngoe ihioriki to Yesusu ai dumutu o kiaika, ho ona iwiniiki de iwimake genangoka. De Una wadafongo de ai hininga ma sanangi de wahingahu-ngahu onangika abe hokokia idadi ma oraha Ma Jou wahikoano ai nyawaika. De onagona dika abe de manga kangelaka eko de manga panyakeoka, onangika wahikokitogumu.
12De o bobimaowaka de ona yangimoi de yahinooto yoboa o Yesusino de yotemo ato, “Mia Baluhu, koaho Ngona nahulokoka o nyawa manga ngoe naa la yosobo yoiki o kapo-kapongika eko o nyawaika abe de manga redi-redioka la yomahidodogumu de yomamake manga inomo genangoka. Angamoi nako nenangoka duru ko kia-kiaua ka idadi yamake.”
13De o Yesusu wapaluhu onangika wato, “Koua. Tanu koaho ngini ma hirete niahidailako to ona manga inomo.”
De ona ato, “Ou! Ko idadiua! Angamoi ngomioka ka o roti motoa dika, de mia nawoko ka o ngai hinooto dika! Ho gea duru ko yawedonikaua, sawali ngomi miloiki de miaijaino o inomo la miahikawedono ona mata-mataika.” 14De hokogea to ona manga babaluhu angamoi naga genangoka o nauru o balu-baluhu ngade-ngade yasana motoa, de gea ko haetonguahi o ngo-ngofeka de manga ngofa-ngofaka.
De o Yesusu wotemo wato, “Ngini niahuloko onangika la ona yomagogeruku de yomatatorika la manga doomu amomoiika gea o nyawa yamo-moritoa.” 15De hokogea yodiai ho ona mata-mata yomagogeruku ma tonakuku. 16De ahao ma roti motoa de ma nawoko hinooto gea waleino o Yesusu de womamatagaiye o Horogaiye de wohitarimakaseohi Ma Jouika. Wohitarimakase ibooto de ahao ma roti watobiki de wahidoaka iwinii-niikika, de ma nawoko enangoo wahikodoku iwinii-niiki homoi-homoiika. De ahao onangoli yahikodoku o nyawa mata-mataika. 17De ona mata-mata yolomo hiadono yakokipunuhoka. De yolomo ibooto de ahao o roti de o nawoko ma hou yagorakiye iwinii-niiki gea, de naga o tupa ngimoi de hinooto aomangiye manga inomo ma hou.
O Peturusu womahingahu ai hininga wato o Yesusu Una Ma Jou ai Mesia
Matiusu 16:13-20; Maruku 8:27-30
18De o wange moiukuoli de o Yesusu naga womaniata de abe iwitobanii-niiki ka ona dika naga Unangoka. De ahao Una waleha onangika wato, “Abe ngini niihene o nyawa yowoe-woeino, ona gea yafikiri ato Ngohi naa onaguna?”
19De abe iwinii-niiki yopaluhu ato, “O nyawa utu ato Ngona o Yohanese Wotobaohi-ohiki, de utuoli ato Ngona Ma Jou ai uru ma dodofanga ma dodihiraino o Elia eko ai uru ma dodofanga womatengoli abe womomikoka ai honengino.”
20De ahao Una waleha onangika wato, “De nako ngini naa, ngini niato bote Ngohi onaguna?”
De o Peturusu wipaluhu o Yesusika wato, “Ngona naa o Mesia, mia Koano abe ma dihira Ma Jou womihibehehongoka.”
21De ahao o Yesusu wahitiari onangika wato, “Ngini naa ko idadiuahi ma titi gea niahingahu o nyawaika.”
O Yesusu wahingahuohi abe ahao kiani iwihikangela de iwitoma
Matiusu 16:21-27; Maruku 8:31—9:1
22De o Yesusu wogila-gila wotemo iwitobanii-niikika wato, “Duru tagou-goungu tinihingahu moi nginika. Abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa. De ngaro Ngohi o Horogaino toboa, masara ahao kiani o kokangela ma ngoe taohana. De abe nanga hohidimono de nanga hidemo ma nyawa Ma Jouiye abe yokokurutiye, de ona abe yotobadoto-dotoko o Musa ai Paretaino, ona mata-mata ahao ihikokioluku Ngohi. De ipaha ihitoma, masara ahao o wange hange ipahaikahi de Ngohi ihihimomikokali ahi honengino.”
23De ahao o nyawa yowoe-woeika o Yesusu wotemo wato, “Onagona dika nginioka abe niato nihinii-niiki Ngohi, gea ibootohi ngini nimahisosanangi dika. De ngaro duru inihikangela ma ngoe ma titi nihinii-niiki Ngohi, ngaro ka hiadono marai o nyawa utu ato inihohonenge o gota isosalioainoka, ma ufa genangino de inihirehenoka Ngohino. Abe nako o wange-wangeiye nimaputuhu la nihiniiki Ngohi ho ngaro abe ma kokangela niamakeoka masara gea de ko inihirehenua Ngohino, gea ahao nihinii-niiki igou-goungu. 24De onagona dika ko ihiniikua Ngohi angamoi ato manga wowango yomadatoko la ato ufa yohonenge, ma, ahao ona gea ka yohonengohi. Masara onagona dika abe ihingakuoka de manga wowango yomahidoaka ma titi Ngohi ihiniiki, ona gea tanu manga badanga dika ihonengoka, masara manga wowango nagahi. 25Ho naa tinileha. Done o kia o nyawa manga utumu nako o nyawa o kiahonanga mata-mata o dunia ma amokika yomaleinoka, masara ka de ma oraha yohonenge de duru yomakitingaka ma gurutika Ma Jouino angamoi o Narakaka? Gea manga utumu duru ko iwa!”
26“De naa moioli tinihingahu. Abe nginioka onagona dika inimaleke ma titi Ngohi eko ma titi ahi demo-demo ho hiadono ko inimagaweua Ngohi nihiniiki, ahao Ngohioo ko ihimagaweua tinihiromanga ahi nyawa. De abe ma oraha gea Ngohi o Nyawa ma Ngofaka toboali de naga de ahi medebini ma dararonoka. De hongoli ahao dokengika ma oraha toboali gea de ka to Ngohiua dika ahi medebini ma dararono naga, masara nagaoo nanga Baba o Horogaka de o momalaekata o Horogaino to onangoo manga medebini ma dararono naga Ngohioka ma oraha toboali. 27De naa moioli duru tagou-goungu tinihingahu, abe naga utu nia hidogoronaka naa abe ona ko yohonenguahi de gea ona yamakeoka de manga lako abe hokokia Ma Jou wahikoano ai nyawaika.”
O Yesusu womahimatoko ai medebini ma dararono
Matiusu 17:1-8; Maruku 9:2-8
28De o Yesusu wahingahu gea mata-mata onangika de ahao ngade-ngade o wange tufange ipahaika de o Yesusu wodoa o lokuiye la womaniata dakenangoka. De Una wahoko o Peturusu de o Yakobusu de o Yohanese la ona yomakiniiki yodoa daku o lokuiye. 29De o Yesusu womaniata ai gogiriaka de ka itodokanino ai himanga imaturuuruoka ho idadi o fara moioli, de ai pakeanga gea idadi duru iarehoka hiadono hoiletongo. 30De ka itodokanino naga yahinooto genangoka abe yomakoketemo de o Yesusu, abe ona gea o Musa de o Elia. 31De ona yahinooto gea naga de manga medebini ma dararonoka. De ona yomakoketemo de o Yesusu abe ma titi to Una ai gahe ma hidee, abe ma hidee gea itigioka o Yesusu wohingodumu o Yerusaleeme ma kotaka.
32De ma oraha gea de o Peturusu de ai dodiawo yahinooto ona duru yakiookohi, masara naa yomatodokanino de yamake abe o Yesusu naga de ai medebini ma dararonoka, de yamakeoo ona yahinooto abe yomaokoino Unangoka. 33De o Musa de o Elia ona ato yosobo masara o Peturusu wotemo o Yesusika wato, “Ahi Baluhu, abe ngomi miamakeoka naa duru irahai. Ho nako ani hininga adaene de ngohi ka idadi o hijai-jai ma tau o gahumu hange todiai nenangoka. Abe moi to Ngona, moi to Musa, de moi to Elia.” Masara gea o Peturusu ko wofikirikauahi de ka oko dika wotemo. 34Ho o Peturusu ka wotemo ai gogiriakahi de o lobi moi yafofonguku onanguku, de ona yaruange gea duru yohawanoka angamoi ma lobi yakokihawoka.
35De ahao Ma Jou wotemo ho yoihene o lobino ma ilingi itemo ato, “Naa to Ngohi ahi Ngofaka abe tiirikoka de tihitagongoka de o tagongo abe duru ikokurutiye, ho kiani Unangika niwihigihene.” 36De ma ilingi gea ipahaka de ahao yomalegaika de iwimake o Yesusu ka womatengokahi genangoka. De gea ipahaino de ahao ona yaruange duru ko yoade-adeuahi abe hokokia yamake o lokuoka gea.
O ngofaka iwikokitokata ka hiadono wohone-honenge de o Yesusu wohititoko ma tokata unangoka de aino
Matiusu 17:14-21; Maruku 9:14-29
37De ma dawangeino de o Yesusu de yaruange iwitobanii-niikino yomahiadonuku manga dodiawouku, de naga o nyawa ko manga ngoe iwibuhuku o Yesusu genangoka. 38De naga womatengo yowoe-woeino wopoaka o Yesusika wato, “Ahi Guru, duru togahoko la nilegahi to ngohi ahi ngofaka de niduhunu unangika, abe una ahi ngofaka ka womatengo dika. 39De abeika tonihingahu hokokia idadi unangika. Abe o tokata iwibarene de ka itodokanino de ahi ngofaka wopoa-poaka. De ena gea iwihifafara de hiadono iwidiai la o gabo-gabo ihupu ai uruoka de aino. De ka ihikaika iwihikangela de iwihiodiri unangika ho ko iwinoa-noaua. 40De kanganoino ngohi naa tomagahoko ibooto onangika abe initobanii-niiki Ngonaika la tato ona ihititoko ma tokata gea unangino, masara ona ko yakunua.”
41De o Yesusu duru ai hininga ihuha ma titi gea ho wotemo wato, “Adoo! Ngaro ahi dekanoka nginioka masara ngini naa mata-mata ko iwahi nia ngongaku Ngohino! De ngini ka ihikaika nirehene Ma Jou ai ngekomoka de aino! Ho mode muruonoka de ahao nihingaku?” De ahao o Yesusu witemo ma ngofaka ai babaika wato, “Abeika to ngona ani ngofaka niao Ngohino.” 42De ma ngofaka gea iwiao o Yesusika, masara abe ko wiadonuahi Unangino de ma tokata iwihiruba dau ma tonakuku de iwihifafara. De gea de o Yesusu wataere ma tokata ma dorouika de wihitogumu ma ngofaka gea ai kokangelaino. De ipaha ma ngofaka gea wigilio ai babaika. 43De ona genangoka yakokimake o Yesusu ai heheranga ma datoro gea de duru yokokiheranga abe ma titi Ma Jou ai kuaha.
O Yesusu wahingahuoli abe ahao kiani iwihikangela
Matiusu 17:22-23; Maruku 9:30-32
De abe ma oraha o nyawa gea ka yomakoketemohi ma titi o Yesusu ai heheranga ma datoro wodiaioka, de Una wotemo iwinii-niikika. Ho Una wato, 44“Ahi hingahu ma demo naa nginika kiani niagogono nia borihiningaka de ufa niawohanga enangika. Ahao Ngohi o Nyawa ma Ngofaka ihihidoaka o nyawa utuikali la ahao ona gea ihitaoko de ihiurusu.” 45Masara ona abe iwitobaniiki gea ko yataokua ai demo ma titi, angamoi to ena ma titi ka atatokohi la ko idadiuahi yomangaratii. De ona ko yomoroinua la iwileha Unangika ai demo ma titi angamoi naga manga hawana.
Ka onagonahi de duru yokurutiye?
Matiusu 18:1-5; Maruku 9:33-37
46De ahao naga o liliara moi abe ona iwitobanii-niiki yomaketeribuutu, angamoi ona homoi-homoi ato ka onangohi yokurutiye nako de manga dodiawo. 47De o Yesusu Una wahioriki to ona manga hininga ma dola gea, ho Una wiaoino womatengo o ngofaka ai etetekohi la womaokoino o Yesusu ai datekoka. 48De Una watemo iwinii-niikika wato, “Ufa ngini nioigo la nimahikurutiye masara koaho nia hiningaka de nimahitipokouku. Abeika tinihitararono hokonaa. De onagona dika abe yadafongo o ngofaka hoka naa una mangale ma titi manga hiningaka ato ihihisanangi Ngohino, ona gea taetongo abe ka ma ngofakua dika yadafongo, masara gea Ngohioli naa ma hirete ihidafongoka. De nako Ngohi nihidafongoka, gea ka Ngohiua dika nihidafongo masara ahi Baba abe wohihidingo-dingotino, Unangoo niwidafongoka. Ho onagona dika nginioka abe nimahitipokouku la nialeleani nia gogianongoruika abe biaha o nyawa yaetongo ato ko kia-kiaua manga wowango ma gogere, ka nginiohi gea abe duru nikokurutiye Ma Jou ai himangoka.” Hokogea o Yesusu ai hitararono onangika abe ma titi ka onagonahi de duru yokurutiye Ma Jou ai himangoka.
Womatengo o tokata wohitito-titoko o nyawaino
Maruku 9:38-40
49De ahao o Yohanese witemo o Yesusika wato, “Mia Baluhu, ma moiuku de ngomi wiwimake naga o nyawa womatengo, abe una gea o toka-tokata ma dorou wohitito-titoko o nyawaino. De una gea ma oraha wohititoko o tokata de wafetongo to Ngona ani romanga. Masara una gea ko wonanii-niikua ngone naa ho gea ngomi wiwihuloko unangika miato, ‘Ibootohi ani datoro gea nodiai.’”
50Masara o Yesusu Una wopaluhu wato, “Una gea niwihigunoa dika de ufa niwitaere. Angamoi Ngohi tato onagona dika abe ko inilawanua nginika, gea ona de ngini nimakomotekika.”
O kapongo moi o Samaria ma tonakoka ona iwioluku o Yesusika
51De abe ma oraha ka itigi moduku abe o Yesusu wogoraka wolio daku o Horogaiye de Una ai hiningaka duru womaputuhoka abe kiani woiki o Yerusaleeme ma kotaiye. Ho Una de iwinii-niiki ona yosoboka abe manga dumutu o Yerusaleemika. 52De manga dodagi ma goronaka abe o Samaria ma tonakokahi de Una wahidingoto o nyawa yamuruono naga la ona yohira de yahiaturu manga dodogumu ma ngi. De abe wahidingo-dingotoka ona yowohama o kapongo moiika o Samaria ma tonakoka gea la ato to Una ai perelu iwihidiaiohi. 53Masara o Samaria ma kapongo ma nyawa ona gea ka yoluku iwidafongo o Yesusu angamoi ona yoihene abe Una womaputuhoka wato wogila-gila o Yahudi ma nyawa manga kota o Yerusaleemika. Abe ona iwioluku mangale ma titi o Samaria ma nyawa ko yomahuba-hubaua o Yerusaleeme ma kotaka. 54De abe ma oraha o Yakobusu de o Yohanese yoihene ma titi o Samaria ma nyawa manga ngongoluku gea de yotemo o Yesusika ato, “Mia Baluhu, nako Ngona ka nomodeke, koaho irahai ngomi migahoko o uku o Horogaka de manga kaponguku la yahikokibinaaha ona gea.” 55Masara o Yesusu womadogilioro onangika de wataere ho ko wahigunoaua yodiai hokogea. 56Ho ona yogila-gila dika o kapongo moiikali.
Abe ma titi o nyawa manga kangela hokokia nako o Yesusu iwinii-niiki
Matiusu 8:19-22
57De o Yesusu de iwinii-niiki manga dodagi ma goronaka de naga womatengo woboa o Yesusino de womahidemo wato, “Ngohi naa toigo toniniiki. Abe Ngona o kiaika dika noiki, ma ngohi toniniiki mata-mataika.”
58Masara o Yesusu wipaluhu unangika wato, “Sarakia, gea ani demoino nagou-goungu la nato ka ihikaika nohinii-niiki Ngohi de ko nohinoaua? Angamoi nako o fuhuku ma kaho ena gea naga ma ngingidu ma ngi abe imatobaidu-idu genangoka. De o totaleo naga to enangoo homoi-homoi ma dididu, masara Ngohi naa ko iwa to Ngohi ahi ngingidu ma ngi abe biaha tomatobaidu-idu genangoka. Abe ngaro Ngohi o Nyawa ma Ngofaka abe o Horogaka de tauku toboa, ma duru ko iwa ma ngi abe biaha tomaiduiha genangoka.” Hokogea o Yesusu ai babaluhu unangika.
59De ipahaino de o Yesusu naga wimake womatengoli de wiahoko unangika wato, “Ngona naino nohiniiki Ngohi.”
De una gea tanu wosanangi winiiki masara wotemo wato, “Ahi Baluhu, ngohi toigo ka ihikaika toninii-niiki Ngonaika. Masara ngohi tomagahokohi abe nako Ngona ka nomodeke de ngohi naa toliohi ahi tauika de tidamaa ahi baba wohonengokahi. De gea wiwilungunohi de ahao ngohi toboa de gea ka ihikaika toninii-niiki Ngonaika.”
60Masara o Yesusu wipaluhu unangika wato, “Gea irahai ani hininga itagi ani babaika. Masara ona abe manga wowango Ma Jouino ko iwa, ona gea yohonengoka Ma Jou ai himangoka. Ho irahai nahigunoa la ona gea yomahikokoona dika yomakulungunu manga honenge. Ho gea koaho ngona nohihitihira Ngohi ani wowangoka, ho irahai ma oraha naa dika de ngona nomulaengoka nahingahu-ngahu o nyawaika abe hokokia Ma Jou wahikoano ai nyawaika.” Hokogea o Yesusu ai demo unangika.
61De ahao naga womatengoli abe o Yesusu wiahokoka masara una wipaluhu wato, “Ahi Baluhu, ngohi tosanangi ka ihikaika toninii-niiki Ngonaika. Masara ngohi tomagahokohi abe nako Ngona ka nomodeke de ngohi naa toliohi ahi tauika la tomahilooahi ahi dimonika. De ahao toboali de tonitobaniiki Ngonaika.”
62Masara o Yesusu wipaluhu unangika gea wato, “Onagona dika abe ato yaloliti o goroba eko o ngotiri de ona yosoboka masara ka ihikaika yomadogilioro manga poretoko, ona gea ahao yorehene ma ngekomino de ko yomahiadonikaua manga dumutika. De hokogenangoo o nyawa abe manga hininga ka hinootohi abe ma titi ihiniiki Ngohi eko koua, ho ona gea ko idadiua yowohama abe ma oraha Ma Jou wahikoano ai nyawaika.”
Currently Selected:
Lukasa 9: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
