Marcos 16

Ro Pagkabanhaw ni Jesus

(Mat 28:1-8; Luc 24:1-12; Juan 20:1-10)

1Pagkataliwan ku Adlaw it Inogpahuway, si Maria Magdalena, si Salome ag si Maria nga nanay ni Santiago hay nagbakae it mga bueong nga mahumot agod ibanyos sa eawas ni Jesus. 2Aga-aga pa ku adlaw nga Dominggo hay nag-agto sanda sa eueubngan. Nagabutlak pa eang ro adlaw pag-abot nanda idto. 3Tag sa daean pa eang sanda, nagapaeangutan-an sanda kon sin-o ro magapaligid ku bato ngato nga ginsara sa pwertahan it eueubngan, 4ay kabahoe gid abi ku rato nga bato.

Pag-abot nanda idto hay hakita nanda nga bukas eo't-a ro eueubngan, ay hapaligid eo't-a ro bato nga ginsara dikato. 5Nagsueod sanda sa eueubngan ag hakibot sanda ag kinuebaan gid it duro, ay may hakita sanda idto nga eaki nga pamatan-on nga nakasuksuk it mahabang puti nga eambong nga nagalingkod sa may tuo banda.

6Pero naghambae dayon ro eaki, “Ayaw kamo magpakueba. Ro inyong ginausoy nga si Jesus nga tagaNazaret nga gineansang sa krus hay owa eo't-a iya, ay nabanhaw eon imaw. Haron, tan-awa ninyo ro ginbutangan kana. 7Adtuni ninyo ro anang mga sumueunod ag sugiran sanda, kapin gid si Pedro, nga mauna maton kinyo si Jesus idto sa Galilea. Ginhambae eon ron maton nana kato kinyo nga idto kamo gataeabo.”

8Gumuwa eagi sanda sa eueubngan ag dumaeagan paeayo. Kinuebaan gid sanda it duro ag nagpaeangurog, ag owa gid sanda it ginsugiran sa daean.

Nagpakita si Jesus kay Maria Magdalena

(Mat 28:9-10; Juan 20:11-18)

9 # 16:9 Matsa ro punta ku ginsueat ni Marcos hay naduea gid-a. Owa it nakasayod kon sin-o ro nagsueat ku rayang mga bersikulo nga 9-20 nga gin-gamit bilang kabaylo sa naduea ngato. Temprano pa, pagkabanhaw ni Jesus ku adlaw it Dominggo hay kay Maria Magdalena eagi imaw una nga nagpakita. Rayang si Maria Magdalena hay ginsubuean ni Jesus it pitong ka demonyo. 10Nag-adto si Maria Magdalena sa mga sumueunod nga nagatinangis ag nagakangusbo. Ginsugiran nana sanda nga hakita nana si Jesus. 11Pero owa sanda nagpati sa anang sugid nga buhi si Jesus ag hakita ra nana.

Nagpakita si Jesus sa Daywa ku Anang mga Sumueunod

(Luc 24:13-35)

12Pagkataliwan it pilang adlaw hay nagpakita man si Jesus sa daywa ku anang mga sumueunod nga nagapaagto sa baryo, pero eain ro anang itsura. 13Nagbalik ro daywa sa andang mga kaibahan ag ginsugid ro andang hakita, pero owa man gihapon sanda magpati.

Ro Katapusan nga Pagpakita ni Jesus sa Anang mga Sumueunod ag ro Anang Mga Bilin Kanda

(Mat 28:16-20; Luc 24:36-49; Binuhatan 1:3-8)

14Ku ulihi gid, nagpakita si Jesus sa onse nanang ka sumueunod tag nagakaon sanda. Ana sanda nga ginpangisgan dahil sa andang kadungoe, ay owa gid sanda magpati sa sugid ku mga nakakita kana nga imaw hay nabanhaw.

15Naghambae man imaw kanda, “Panaw kamo sa tanan nga lugar sa kalibutan ag iwali ro Mayad nga Balita sa tanan nga mga katawhan bisan siin. 16Ro bisan sin-o nga magpati ag mabawtismuhan hay maeuwas. Pero ro indi magpati hay pagakondenahon. 17Ro mga nagatuo kakon hay taw-an it gahom nga makahimo it rayang mga milagro bilang pamatuod nga ginagamhan ko sanda: makasuboe sanda it mga demonyo sa akon nga ngaean, ag makahambae sanda it mga bag-o nga linggwahe nga owa pa nanda hatun-i. 18Kon makabuyot sanda it sawa o makainom it makahieilo nga ilimnon hay indi sanda maalin. Kon magtungtung sanda ku andang alima sa mga nagamasakit hay magamayad ruyong mga nagamasakit.”

Ginpakayab si Jesus sa Eangit

(Luc 24:50-53; Binuhatan 1:9-11)

19Pagkahambae kara ni Jesus sa anang mga sumueunod hay ginpakayab imaw sa eangit, ag nagpungko dayon imaw sa pinakadungganon nga pwesto sa tuo it Dyos. 20Umpisa kato hay nagpanaw ro mga sumueunod sa tanan nga lugar ag nagwali parti kay Ginuong Jesus. Ginbuligan nana sanda ag anang gintaw-an sanda it gahom nga makahimo it milagro, agod pamatud-an sa mga tawo nga minatuod ro andang ginawali.

Currently Selected:

Marcos 16: akl

Highlight

Copy