Marcos 15
15
Ginpaatubang si Jesus kay Gobernador Pilato
(Mat 27:1-2, 11-14; Luc 23:1-5; Juan 18:28-38)
1Kat agahon eon hay nagtililipon ro bilog nga *Sanedrin, nga sanda ro mga pinuno it mga saserdote, ro mga maestro it Kasuguan ag ro kaibahan nandang mga lider. Nagdesisyon dayon sanda kon ano ro andang obrahon kay Jesus. Pagkatapos, ginpagapos nanda imaw ag ginpaatubang kay Pilato nga gobernador. 2Ginpangutana ni Pilato si Jesus, “Ikaw baea ro hari it mga Judio?”
Nagsabat si Jesus, “Tama ro imong hambae ngaron.” 3Abo ro ginaakusar kana ku mga pinuno it mga saserdote 4ngani pinangutana eon man imaw ni Pilato, “Owa ka gid baea it ikasabat? Kaabo-abo't-a ro andang ginaakusar ngara kimo.” 5Owa man gihapon magsabat si Jesus ngani hangawa gid si Pilato.
Ginsintinsyahan si Jesus nga Ieansang sa Krus
(Mat 27:15-26; Luc 23:13-25; Juan 18:39–19:16)
6Kada Pagtililipon sa Pagdumdum ku *Pagtaliwan, si Pilato hay may ginabuhian nga sangka priso nga ginpili it mga tawo nga pabuhian. 7Idto sa prisuhan ku ratong oras hay may isaeang ka priso nga ro ngaean hay Barabas. Imaw ra hay hapriso kaibahan ku mga nagrebelde anay kuntra sa gobyerno it Roma, ag nakapatay imaw it tawo ku pagrebelde nanda ngato. 8Tag ginaimbistigar ni Pilato si Jesus, nagtililipon ro mga tawo ag nagpangabay kay Pilato nga magpaguwa it sambilog nga priso, pareho ku anang ginahimo kada dag-on. 9Nagpangutana si Pilato kanda, “Gusto baea ninyo nga pabuhian ko ro ‘Hari it mga Judio’?” 10Ginpangutana ron ni Pilato ay sayod nana nga ginpaatubang kana ku mga pinuno it mga saserdote si Jesus dahil nahisa sanda kay Jesus. 11Ro mga pinuno it mga saserdote ma't-a hay ginsuesuean ro mga tawo nga si Barabas ro pabuhian imbis nga si Jesus. 12Nangutana eon man si Pilato, “Hay alinon ko raya ngara nga ginatawag ninyo nga ‘Hari it mga Judio’?” 13Nagsabat ro mga tawo, “Ieansang imaw sa krus!” 14Pinangutana eon man sanda ni Pilato, “Ham-an? Ano ro anang saea?”
Pero mas kapin nga nagsininggit pa gid ro mga tawo, “Ieansang imaw sa krus!” 15Agod nga matuman na ro gusto ku mga tawo, ginpabuhian dayon ni Pilato si Barabas, pero ana nga ginpalatigo si Jesus. Ana dayon nga gintugyan si Jesus sa anang mga soldado agod ieansang sa krus.
Si Jesus hay Gin-intrimis it mga Soldado
(Mat 27:27-31; Juan 19:2-3)
16Gindaea dayon si Jesus ku mga soldado sa andang baraks, nga kon siin hay may daeayunan ro gobernador. Ginpatipon dayon nanda ro andang mga kaibahan sa bilog nga batalyon.#15:16 Sa Griniyego, raya nga bisaea hay nagakahueugan nga 600 nga ka soldado. 17Anda dayon imaw nga ginbutangan it violet nga kapa.#15:17 Ro violet hay kolor ku eambong it hari. Nagbuoe dayon sanda it baeagon nga siiton ag gin-obra nanda rato nga korona, ag anda dayon rato nga gintungtung sa ay Jesus nga ueo. 18Anda man imaw nga gin-intrimis. Naghambae sanda, “Mabuhay ro hari it mga Judio!” 19Anda pa gid imaw nga ginbinunaean it kahoy sa ueo, ginpinil-an ag gineuhod-euhuran. 20Pagkatapos nanda it pag-intrimis kay Jesus hay anda nga ginpaeos ratong violet nga kapa kana, ag ginsuksukan imaw it uman ku anang dating eambong. Gindaea dayon nanda imaw sa liwan it syudad agod ieansang sa krus.
Gineansang si Jesus sa Krus
(Mat 27:32-44; Luc 23:26-43; Juan 19:17-27)
21Tag nagapanaw sanda, may hasubeang sanda nga sangka tawo nga bag-ong abot halin sa uma. Rato hay si Simon nga tagaCyrene nga ama nanday Alexander ag Rufus.#15:21 Posible nga ro Rufus nga ginsambit sa Rom 16:13 hay imaw man nga Rufus nga ginsambit iya sa Mar 15:21. Kon matuod ra, si Simon siguro ngara hay nangin tumueuo pagkatapos nga ginpas-an nana ro krus ni Jesus. Ginpilit imaw it mga soldado nga pas-anon ro krus ni Jesus. 22Gindaea dayon it mga soldado si Jesus sa lugar nga ginatawag nga Golgota. Ro kahueugan ku ngaean it ruyon nga lugar hay “Lugar it Bungo.” 23Tag idto eon sanda hay ginapainom kunta nanda si Jesus it bino nga may halo nga mira,#15:23 Ro mira hay sangka mapait nga bagay nga ginsambit man sa Mat 27:34, nga makabuhin it kaeaea. pero owa imaw kato mag-inom. 24Gineansang dayon nanda si Jesus sa krus. Pagkatapos hay nagpagabot-gabot sanda kon ano sa anang mga suksuk ro hiadto kanyo. 25Alas nuybi it agahon kat gineansang nanda imaw sa krus. 26May ginbutang man nga karatula sa may ibabaw ku anang ueo. Ro nakasueat rikato hay ro ginaakusar kana nga “Ro Hari it mga Judio.” 27May daywang ka buyong nga gineansang man kadungan ni Jesus. Ro krus ku isaea hay sa ay Jesus nga waea, ag ro ana ku sambilog hay sa ay Jesus nga tuo.#15:27 Ro bersikulo 28 hay gintapoe sa ibang ulihi nga sagrado nga kasueatan sa Griniyego. Raya ro nasueat dikato: “Natuman gid ro ginsueat sa Sagradong Kasueatan nga: Gin-iba imaw sa mga kriminal.” Raya hay katumanan ku ginsueat ni Propeta Isaias sa Isa 53:12.
29Ro mga nagaagi hay nagalingo-lingo nga may daeang intrimis ag gin-ininsulto man nanda imaw. Sinanda, “Sinimo gid, gub-on mo ro Templo it Dyos ag patindugon mo man dayon sa sueod it tatlong adlaw. 30Euwasa ro imong kaugalingon! Panaog rikaron sa krus!”
31Gin-inintrimis man imaw ku mga pinuno it mga saserdote ag ku mga maestro it Kasuguan. Naghinambae sanda, “Gineuwas nana ro iba, pero indi nana maeuwas ro anang kaugalingon. 32Maneueuwas baea kuno ra nga ginpromisa it Dyos. Nano man nga hari-a it *Israel ra! Dapat manaog imaw sa krus makaron agod kon makita naton hay basi eon lang mapati kita kana.”
Makaruyon man ro pag-insulto kay Jesus ku mga buyong nga gin-eansang kaibahan nana.
Namatay si Jesus
(Mat 27:45-56; Luc 23:44-49; Juan 19:28-30)
33Tag alas dose eon hay nagdueom ro bilog nanda nga nasyon#15:33 Ro kahueugan man kara sa Griniyego hay “bilog nga kalibutan.” hasta it alas tres it hapon. 34Pagkaalas tres hay nagsinggit si Jesus, “Eloi, Eloi, lema sabachthani?” nga ro kahueugan hay “Dyos ko, Dyos ko, ham-an it ginpabay-an mo ako?”#15:34 Salmo 22:1. 35Pagkabati kara ku ibang nagatilindog idto, sinanda, “Pamatii tuo ninyo, nagapatabang imaw kay Elias.” 36May nagbuoe it dali-dali it espongha ag ana rato nga gintum-oy sa maaslom nga bino, ag ginhigot sa punta it matsa tigbaw, ag ginpaduot sa ba-ba ni Jesus agod makasupsup imaw. Naghambae tag tawo, “Anay! Tan-awon ta abi kon maabot matuod si Elias agod tae-taeon imaw sa krus.” 37Suminggit it mabaskog si Jesus ag nabugtuan dayon imaw it ginhawa.
38Idto sa Templo hay gulpi eang nga nagisi ro madamoe nga kurtina halin sa ibabaw paidaeom.#15:38 Ro Pinakasagrado nga Lugar sa Templo hay simbolo ku presensya it Dyos ag raya nga kurtina hay abang agod indi makasueod idto ro tawo (basaha sa Exo 26:31-33). Pero dahil sa kamatayon ni Jesus hay nabuoe eon ro abang ngaron ngani bukas eon ro daean pasueod sa presensya it Dyos.
39Ro kapitan it mga soldado nga nagatindog sa atubang it krus hay nakasaksi kon paalin nabugtuan it ginhawa si Jesus. Naghambae imaw, “Matuod gid-a nga Unga it Dyos ro tawo ngara!”
40Idto sa maeayo-eayo hay may mga bayi nga nagapinamantaw. Kaibahan ku mga bayi ngato hay sanday Maria Magdalena, Salome, ag Maria nga nanay ku magmanghod nga si Joses ag si Santiago nga Putot. 41Ro tatlong ka bayi ngato hay nagsueunod kay Jesus tag idto pa imaw sa Galilea, ag nagbinulig man ra sanda kana. Abo man nga mga bayi nga nagsunod kana sa Jerusalem nga idto man sa may krus.
Gineubong si Jesus
(Mat 27:57-61; Luc 23:50-56; Juan 19:38-42)
42Disperas eon rato ku Adlaw it Inogpahuway, ag rato man ro andang adlaw sa pagpahaom para sa Adlaw it Inogpahuway. Dahil hapon#15:42 Ro Adlaw it Inogpahuway hay nagaumpisa it alas sais it hapon ngani kinahangean nga mabuoe ni Jose ro eawas ni Jesus bago mag-alas sais (Deut 21:22,23). eon gid, 43gin-isog ni Jose nga tagaArimatea ro anang buot ag nag-agto imaw kay Pilato, ag ginhinyo nga itao kana ro eawas ni Jesus. Si Jose ngara hay sambilog sa mga taeahaon nga myembro it *Sanedrin, ag nagapaabot gid ku oras nga magahari eon gid ro Dyos sa anang mga sinakpan.#15:43 Nagahari eon makaron ro Dyos sa anang mga sinakpan ugaling ginaintrahan pa imaw ni Satanas paagi sa pagtentar kanda nga magpakasaea. 44Nangawa si Pilato pagkasayod nana nga patay eon si Jesus. Ginpatawag nana ro kapitan ku anang mga soldado ag ginpangutana kon patay eon matuod si Jesus. 45Pagkabati ni Pilato ku sugid it kapitan nga patay eon si Jesus, hay ginsugtan nana si Jose nga bue-on ro patay nga eawas ni Jesus. 46Nagbakae si Jose it maeahaeon nga tela ag nag-adto imaw sa gineansangan kay Jesus. Gintae-tae nana sa krus ro eawas ni Jesus ag ginputos rato ku ratong tela. Ginbutang nana dayon rato sa sangka eueubngan nga ginsinsil sa dalipi. Pagkatapos hay ana dayon nga ginpaligiran it bato ro pwertahan it eueubngan agod sadhan rato. 47Idto man sanday Maria Magdalena ag Maria nga nanay ni Joses nga nagtinan-aw kon siin ro eawas ni Jesus ginbutang.
Currently Selected:
Marcos 15: akl
Highlight
Share
Copy
Want to have your highlights saved across all your devices? Sign up or sign in
2024 (Active) Wycliffe Bible Translators, Inc.
