Š. Matéu 27
27
Krie XXVII.
1E si u‐bê ndritšem, mbióθtin kundzilje gjiθ krerat e príftravet, e piékjet e gjíndies kunter Džesúit, se te dergjojen mbe mort.
2E po tše e ljíδetin, e kjeltin e e vûn nde dúart Pontse Pilatit tše atié kumandóneje.
3Aχíera Juδa, tše e traδirti, pâr se kiš kjẽn dergúar mbe mort; i metanosur, prúar triδiét te regjẽndat kréravet e príftravet, e piékjevet,
4Tue θẽn: Ftesa, tše traδirta gjakun te paftese. E atá θân: Tše e dúami na? ti kat e šoχeš.
5E po tše štû te regjẽndat te kjiša, iku: e vatur u‐vúar.
6E krerat e príftravet, mârr te regjẽndat, θân: Nẽng ešt mîr te štíemi kto te terzúari: se jân pretse gjaku.
7E mbáitur kundzilje, biéitin me ató δéun e kjaramiδarit, per varr te χúajvet.
8Per kte aí δê kje θerritur, Δê gjaku, njera me sot.
9Aχíerna u‐bê e θẽna Džeremîs profetit, tže θot: E múartin triδiét te regjẽndat pretsi i te pritsármit, tše biéitin kâ te biljet e Israélit:
10E i δân per δéun e kjaramiδarit, si me kumandói Inzót.
11E Džesúi kje perpara kréut e vendit, e kreu e píeti, tue θẽn: Ti jê Rregji i Juδivet? E Džesúi θa atîje: Ti e θua.
12E kûr e ngaljésien krerat e príftravet, e piékjete, fare pergjegjej.
13Aχíerna i θot Pilati: Ẽng gjegjen sâ θôn mbi tîj martrît?
14E nẽng ju pergjekje atîje per mos nje fiâlje, sâ te mērósneje šûm kréin.
15Nga te krémtie prana krei vendit kiš dzakôn te lješóneje gjíndies nje te ljiδur, ke dúajen atá.
16E kiš aχíera nje te ljiδur te njoχur, tše ja θojen Barabba.
17Naní si atá u‐mbióθtin, i θa Pilati: Tsiljin doni te ju lješonje: Barabben, o Džesúin, tše ja θôn Krišt?
18Pse dîje se per ziljî ja kišen δẽn nder dúar.
19E si u‐ulj aí mbi θronin e ljíkjies, i dergói θẽn e šókjia tîje: Mosgjê pafše ti me ate te dréit, pse šûm pesova sot nd’ ẽnderr per té.
20E krerat e príftravet, e piékjete porsítetin gjindet te ljípien Barabben, e Džesúin te vrísien.
21E pergjegjur krei, θa atire: Tsiljin doni te ju ljé nder kta te di? E atá θân: Barabben.
22Θot atire Pilati: Njî tše kam te bẽnje Džesúin, tše ê i θẽn Krište?
23I θôn atîje gjiθ: Kâ te veχet mbe krikje. E krei θa: Tše ljik beri? E atá mê šûm θerrísien tue θẽn: Kâ te veχet mbe krikje.
24E pâr Pilati se fare e ndíχneje, po mê kekje barebûlje beχej: mârr tsa ûj, ljáiti dúart perpara gjíndies, tue θẽn: Ú se kam ftes per gjakun ketîje te dréiti: šíχenie ju.
25E pergjegjur gjiθ gjíndia, θa: Gjaku i tîje mbi nê, e mbi bíljete tâne.
26Aχíerna lješôje atire Barabben: e Džesúin po tše e fradželarti ja δa te vejen mbe krikje.
27Aχíerna suljdetet e kréit χeljkjur Džesúin nde pretoret, mbióδetin rrêz atîje gjiθ šókete:
28E po tše e džéšetin, i vûn ngraχ nje mantiélje te kukje,
29E piéksur nje kurôr gjẽmbaš, ja vûn mbe krie, e nje kalmer te dora e diáθte e tîje. E pergjunjur perpara atîje, e šajen, tue θẽn: Te fáljemi, rregje i Juδivet.
30E tue peštíjetur mbi até, múartin kálmerin, e ja kersísien te kríet e tîje.
31E po tše e šáitin, i džéšetin mantiéljin, e e véšetin me mbroljat e tîje, e e kjeltin te vejen mbe krikje.
32E dâlje gjétetin nje njerî Tširenê, per emer Simún: kte e štrengúan te ngrakóneje krikjen e tîje.
33E vatur mbe vente i θẽn Gólgote, tše vién me θẽn vent Kútule,
34I δân te pîje vere me fêl te perzíer. E po tše e vû nde buzet, ẽng diš te pîje.
35E po tše e vûn mbe krikje, ndáitin te véšurat e tîje, tue štẽn šórtazit: se te mbióχej tše u‐θa ka profeti: Ndáitin te véšurat time nder ta, e mbi te véšuren time štûn šórtazit.
36E uljur e rúajen atié.
37E vûn mbi kríen e tîje ftesmen e tîje te škrúar: Kî ê Džesúi Rregji i Juδivet.
38Aχíerna jân te vẽn mbe krikje bašk me té di latrún: nje ka kraχu i diáθt, e nje ka i manδžinte.
39E atá tše škojen e malkojen, tue tundur krerat e tire,
40E tue θẽn: Ti tše šuljaren kjišen, e me trî dit e stisen: salvó vetχên: nde jê bîr Tinzoti, kalaru ka kríkjia.
41E keštú eδé krerat e príftravet tše e kjéšejen bašk me Skribrat, e piékjete θojen:
42Aí salvói te tiêr, e se mund salvônje vetχên: nde ešt rregje i Israélit, é te kalaret ka kríkjia, e i kemi bes:
43Aí u‐kumbís mbi Tenzôn: lje te lješônje naní, nde e do: pse θa: Jam bîr Tinzoti.
44Eδé kte i štijen nde buzet latrunte, tše išen vẽn mbe krikje bašk me té.
45E tše te e gjašta ôr u‐bê erret mbi gjiθ δéun njera tek e nẽ́ndeta.
46E si mbi te nẽ́ndeten ôr θerriti Džesúi me vûdže te maδe, tue θẽn: Ilí, ilí, lamá sabaχθaní? tše ešt: Inzoti im, Inzoti im, pertšé me ljereve?
47E ditsá nde ta tše rrijen atié, si e gjékjetin, θojen: Elîn θerrét kî.
48E mbiátu tue rankartur nje nder ta e mârr nje spôndze, po tše e mbiói me uθul, e e vû mbi nje kalmer, i δa te pîje.
49E te tiéret θojen: Ljê, šomi nde vién Elía te salvônje.
50E Džesúi papâ tue θirrur me vûdže te maδe, ndzúar špirtin.
51E njô skjepi kjíšese u‐škjúar dîše tše ljart njera pošt, e δeu u‐tunte, e timbat u‐tšáitin,
52E varret u‐χaptin: e šûm kúrmera šéitraš, tše fiéjen, u‐ngréiten.
53E dâlje ka varret pas te ngjálturit e tîje, érθetin te χora e šéite, e u‐buθtúan šumve.
54E Tšenturiúni, e atá tše me té rúajen Dšesúin, pâr δéun tše tundej e šurbiset tše beχšin, u‐trẽ́mbetin šûm, tue θẽn: Vertét Bîr Tinzoti iš kî.
55E išen atié šûm grâ, tše rúajen preselargu, ató tše kišen vât pas Džesúit ka Galiléa, te e šurbejen:
56Nder to iš Maríeja Maddalena, e Maríeja e jema Jápekut, e Sépese, e e jema te bíljevet Dzebeδéut.
57E kûr u‐ngris, erθ nje njerî i begát ka Arimatéa, tše kiš émerin Sep, tše eδé aí kiš mesúar ka Džesúi.
58Kî kjasur te Pilati, ljipi kurmin e Džesúit. Aχíera Pilati kumandói ti jipej kurmi.
59E mârr kurmin, Sepa e peštúal me peljχûr te pastrúame.
60E e vû te nje varr i tîje i rî, tše preu te guri. E po tše prúar nje plak te maδe te dera e varrit, u‐nis e vate.
61E iš atié Maríeja Maddalena, e jatra Maríe, uljur perpara varrit.
62E te jatra dit, tše ê pas te Prẽmtes, u‐mbióθtin krerat e príftravet, e Fariserat te Pilati,
63Tue θẽn: Zot, u‐kujetúam, se aí burr genjemeš θa kûr iš eδé i gjâl: Pas trî dite ngjalem.
64Andái kumandó te ruχet varri njera tek e treta dit: se arδur δišípuljit e tîje naten te mos kalonjen até, e te θôn gjíndies: U‐ngre ka te vdékurit: e l’ últemia genjeme te jêt mê zî se e para.
65E θa atire Pilati: Ju kini guárdien, étseni, rúani si dini.
66E atá vatur, rúajetin varrin, po tše šenúan gurin, bašk me guárdien.
Currently Selected:
Š. Matéu 27: AAE1869
Highlight
Share
Copy
Want to have your highlights saved across all your devices? Sign up or sign in
Përktheu nga greqishtja 1869.
