Job 39
39
1“¿Me xana'be yorail c'usi ora chvoc' yol li te'tical tentsunetique?
¿Me oy aviloj c'u x'elan chvoc' yol li te'tical chijetique?
2¿Me ana'oj c'usi ora chlic ayinuc xch'ut,
xchi'uc ta jayib to u chbat voc'uc li yole?
3C'alal tsvoq'ues li yolique, ta slot'an sbaic,
jech ta xvoc' yu'unic.
4Li yolique lec tsots chbat, te ta xch'iic o ta te'tic;
ts'acal chloq'uic batel, mu xtal xchi'in o li sme'ique.
5“¿Boch'o la scolta batel li te'tical buroe?
¿Boch'o laj yac' ti colem batel ta te'tique?
6Vu'un laj cac'be snain li soplejtic ti bu mu'yuc xa boch'o te chnaquie,
xchi'uc li banamil ti bu mu xa c'usi xch'i oe.
7Yu'un li stuquique mu sc'anic ti xvochlajet no'ox cristianoetic ta lumetique;
mu xich'ic ta muc' c'alal ch-avan li yajval arieroe.
8Ja' no'ox te chanovic ta vitsetic, tsa'ic sve'elic;
te tsa'ic c'usitic lec yoxic slo'ic.
9“¿Me chanop ti chch'un abtel avu'un li tot te'tical vacaxe,
xchi'uc me chanop ti xu' chavac' vayuc ta snail avacaxe?
10¿Me xu' avu'un chachucbe yabtejeb ta snuc' yu'un chaslocbot li avosile?
¿Me chanop ti te xna'pnun batel ta apat chch'un amantale?
11¿Me xu' chapat avo'nton ch-abtej avu'un?
¿Me xu' chapat avo'nton ta sventa ti tsots slomoe?
12¿Me chanop ti xu' chascoltaot ta xcuchel li c'usi chloc' avu'une,
xchi'uc ti tscoltaot ta sloq'uesel sbec' li atrigoe?
13“¿Me vo'ot laj avac'be st'ujumal xic'
xchi'uc sc'uc'umal li avestruz mutetique?
14Le'e tsmuc comel ta yi'tic li stone
yu'un jech te ac'o q'uixnajuc ta c'ac'al.#39.14 C'ac'al - Oy boch'o chalic jtotic.
15Mu snop me xu' ch-ech' t'usatuc ta teq'uel;
mu snop me xu' ch-ech' tec'atuc ta te'tical chonbolometic.
16Toj simaron tspas sba ta stojol li yole, mu scuy ta yol yilel;
mu'yuc ta yo'nton me altic ch-ech' li yabtele.
17Yu'un mu'yuc ep sbijil laj cac'be;
mu'yuc laj cac'be lec snopubil yu'un.
18Pero c'alal chlic sjapu tsots anile,
mu xtaat yu'un li ca'etic xchi'uc li boch'otic cajajtique.
19“¿Me vo'ot laj avac'be stsatsal li ca'etique?
¿Me vo'ot laj avac'be li sbonoc' ta snuq'uique?
20¿Me vo'ot chavac' ti xbitic no'ox jech chac c'u cha'al c'ulubetique?
¿Me vo'ot chavac' ti xpiet no'ox sni', ti xi'bal xa sba ta q'uelele?
21Yu'un xjot'jun xa ta banamil tspas, xcuxet no'ox yo'nton ti lec xu' yu'un cha'ye;
sjip no'ox sba batel ta anil sventa pasc'op.
22Me jutuc mu'yuc xi'el ta yo'nton;
mu sna' xi' sutel ta sventa li espadae.
23Ac'o me xchac'lajet no'ox li yavil flechaetique,
ac'o me sts'aylajet no'ox li lanzaetic
xchi'uc li yantic taq'uinetic ti lequic sni'e, pero mu xi' o.
24Ta scotol yip xchi'uc ta sc'ac'al yo'nton ch-anilaj batel;
mu xa sventauc c'alal chbac' li oq'uese.
25Sts'ijts'un no'ox tstac' c'alal cha'ay chbac' li oq'uese;
ta nom no'ox chjuch'ta batel li pasc'ope,
yu'un cha'ay ti x'avlajetic no'ox ta pasmantal li banquilal soldadoetique,
xchi'uc ti xvochetic no'oxe.
26“¿Me vo'ot ta abijil chvil batel li xiquetic
ti te chbatic ta stuq'uil sure?
27¿Me vo'ot chapas ta mantal ti chbatic ta toyole,
xchi'uc ti chac' stasic ta toyole?
28Le'e te nacalic o ta ch'entic;
te sa'oj lec snac'ubbailic ta mero jol ch'entic.
29Te to chlic sq'uel tal ta nom li sve'ele
yu'un lec xc'ot satic ta nom.
30Li yalabtaquique ja' sve'elinojic li ch'ich'e;
te chbatic ti bu chmilbat sve'elique.
Currently Selected:
Job 39: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
