Job 40
40
1Li Muc'ul Diose jech to laj yalbe li Jobe:
2—¿Me ja' jech bijot ti chatsaquilan ta c'op li Boch'o ech'em svu'ele?
¿Me xu' to avu'un chataq'uilanbun li c'usi la jac'bote?#Job 13.15-23; 23.5; 31.35-37. —xut.
3Itac'ov li Jobe:
4—¿C'usi xu' chajtac'bot li vu'une yu'un toj biq'uitun ta atojol?
Ja' lec ta jmac o li quee.
5Oy xa jayibuc velta lic'opoj,
pero li' ta orae mu'yuc xa c'usi chcal o —xi li Jobe.
Ic'opoj yan velta li Diose
6Li Muc'ul Diose ic'opoj tal yan velta ta sutub ic', jech laj yalbe li Jobe:
7—Li' ta orae chuco lec avex jech chac c'u cha'al vinic;
tac'bun tal li c'usi chajac'bote.#Job 38.3.
8¿Me chac'an chaval ti mu'yuc tuc' c'usi ta jpase?
¿Me chac'an chatic'bun jmul yu'un jech ac'o vinajuc ti mu'yuc amul li vo'ote?
9¿Me tsots avu'el jech chac c'u cha'alun?
¿Me xco'laj xchi'uc chauc xac'opoj jech chac c'u cha'al li vu'une?
10Lapo ta ora jech chac c'u cha'al ac'u' li amuc'ul atsatsale;
pixo lec aba quic ta avutsil xchi'uc ta axojobal.
11Q'uelo avil scotol li jtoybaetique;#Is 2.12.
malbo batel ta stojolic li sc'ac'al avo'ntone, bic'tajeso o ta j'ech'el.
12Mu'yuc stu ac'o comicuc o ta asat;
pech'bil ta teq'uel ac'o comicuc avu'un ta buyuc no'ox oyic li boch'otic chopolique.
13Mucul ac'o comicuc ta pucuctic avu'un scotol;
macbo satic, ac'o batel ta ic' osil.
14Jech xu' chaquich'ot ta muc',
yu'un ta jna' ti xu' avu'un chacolta abae.
15“Q'uelavil li muc'ta Behemot#40.15 Behemot - Ja' jun muc'ta chonbolom ti toj x'ibal sbae. ti vu'un jpasoj jech chac c'u cha'alote;
ts'i'laletic ta slo' jech chac c'u cha'al vacaxetic.
16Pero toj tsots yipal,
bats'i tsots li slomotaque.
17Li snee ja' jech chac c'u cha'al ch'ut te';
li xch'uxuviltaque solel lec jalbilic.
18Li sbaquiltaque lec tsotsic jech chac c'u cha'al bronce taq'uin;
scotol li yoc sc'obe xco'laj xchi'uc stsatsal balbal taq'uin.
19Le'e ja' yabtel coc jc'ob;
ja' no'ox vu'un yajvalun ti xu' cu'un ta jmile.
20Ja' te chch'i sve'el ta vitsetic
yo' bu xpaxajebic li chonbolometique.
21Ts'acal chbat patluc ta yaxinaltic;
chbat suban sba ta ajtic ti bu t'uxul no'oxe.
22Li te'etic ti oy lec sc'obc'obe lec tsmaquic ta xyaxinalic;
li sauce-te'etic ta ti' uc'ume te setelic ta spat xocon.
23Ac'o me chnoj li uc'um jech chac c'u cha'al Jordane, mu'yuc xi'bal sba chil;
ac'o me chc'ot c'alal ta ye li snojelale, jun yo'nton te mochol o.
24¿Me oy boch'o xu' yu'un tstsac ti c'alal lec viq'uil sate?
¿Me oy boch'o xu' yu'un chojbe xch'ajanul sni'?
Currently Selected:
Job 40: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.