Job 38
38
Ic'opanat yu'un Dios li Jobe
1Li Diose lic c'opojuc tal ta jun sutub ic', jech laj yalbe li Jobe:
2—¿Boch'oot ti chamaquilan ta be jbijil
ta sventa li ac'op ti mu'yuc smelole?#Job 42.3.
3Me vinicote, chuco lec avex;
tac'bun tal li c'usi chajac'bote.#Job 40.7; 42.4.
4¿Li vo'ote bu oyot ti c'alal lic jnacan li banamile?
Albun tal me ta melel bijote.
5¿Boch'o la sbis c'u smuc'ul?
¿Boch'o la snit li ch'ojon c'alal laj yich' bisele?
6¿C'usi pasbil o li snaclebtaque?
¿Boch'o laj yac' li ton sventa yich'um yip
7c'alal ja'o chq'uejinic li c'analetic ta sacubbale,
ti c'alal xcuxet no'ox yo'nton scotol li j'almantaletic cu'un ta vinajele?
8“¿Boch'o laj yac'be smac sti' li nabetic
c'alal it'om loq'uel ta banamile?
9Vu'un laj cac' li toc sventa sc'u' nabetique
xchi'uc li pimil ic'al toc sventa xchuque.
10Vu'un laj calbe lec bu no'ox c'alal chpaj li nabe;
vu'un laj cac'be lec sllavial li sti'taque.
11Jech laj calbe: ‘Li' no'ox c'alal chapaj, mu me xajelov batel;
li' no'ox c'alal chpaj li avip ti c'alal tsots chayuq'uilan abae’, xcut.#Sal 104.6-9; Pr 8.29; Jer 5.22.
12¿Me oy bu apasoj mantal ac'o sacubuc osil ti jayib xa jabil cuxulote?
¿Me vo'ot apasoj mantal bu chloc' li c'ac'ale?#38.12 C'ac'ale - Oy boch'o chalic jtotique.
13¿Me vo'ot chavalbe mantal ti ac'o sacubtas c'alal to ta jujujot sti' li banamile
yu'un jech ac'o vinajuc bu oyic li boch'o chopolique?
14C'alal chvoc' tal li yibel vinajele,
chlic vinajuc jutuc c'u x'elan ta q'uelel li banamile;
chlic vinajuc c'u x'elan bonbil li c'usitic oye.
15Pero li boch'otic chopolique toj tsots cha'yic li sac osile,
yu'un mu xu' tspasic li c'usi oy ta yo'ntonique.
16“¿Me ochem aq'uel bu chloc' tal ya'lel li nabe?
¿Me oy ayem apaxalta c'u x'elan mero yut li muc'ta nabe?
17¿Me oy ac'bilot aq'uel bu oy sti' li yavil lajele?
¿Me oy avilojbe sti' li yavil ch'ulelaletique?
18¿Me ana'oj c'u smuc'ul, c'u sjamalil li banamile?
Alo tal me ana'oj scotole.
19“¿Bu xbat sbelal yavil li saquil osile?
¿Bu xcom sna li ic'al osile?
20¿Me xu' avu'un chavic' batel ta slajeb sti' banamil,
xchi'uc me xu' avu'un chavic' sutel tal ta yavil noxtoc?
21Xana' van scotol, yu'un ep xa ajabilal,
yu'un voq'uemot xa'ox ti c'alal laj yich' pasel scotole.
22“¿Me aviloj bu oy snail li tayoe?
¿Me aviloj bu oy snail li bot
23ti jnac'oj sventa chcac'be o svocol li cristianoetique,
xchi'uc sventa ta jtac batel c'alal liquem muc'ta c'op yu'unique?#Ex 9.13-35; Jos 10.11; Is 30.30.
24¿Bu sbeic li saquil osil c'alal tspuc sbaic batel ta banamile?
¿C'u x'elan tspuc sbaic ta sba banamil li ic' chtal ta sloq'ueb c'ac'ale?#38.24 C'ac'ale - Oy boch'o chalic jtotique.
25¿Boch'o tsjambe loq'uel sbe li chauquil vo'e?
¿Boch'o tsbeiltas batel li sacsevuletic, li chauquetic,
26yu'un te ac'o bat yaq'uic vo' ta taqui banamil,
ta xocol banamil ti bu mu'yuc boch'o te nacale,
27yu'un jech ch-ach' li banamil ti jeche' bajbaje,
yo' jech chch'i lec li unin ts'i'laletique?
28“¿Me oy stot li vo' chtale?
¿Boch'o stot li job osile?
29¿Boch'o sme' li pimil tayo ti tsots spatoj sbae?
¿Boch'o sme' li bot ti toj sique?
30¿Boch'o tstsatsubtas li vo' ti xco'laj xchi'uc ton chc'ote?
¿Boch'o chac' ti pim tspat sba li vo' ta sba nabetique?
31“¿Me vo'ot achucoj ta lazu li Xonob-c'anal ti jmoj tsopolique?
¿Me xu' avu'un chatitun c'u x'elan snitoj sba li c'analetic Orión sbie?#Job 9.9; Am 5.8.
32¿Me vo'ot chaloq'ues tal ta yorail li jujuchop c'analetic ta vinajele?
¿Me vo'ot chatojobtas batel li Osa Mayor xchi'uc li yalabtac te xchi'uque?
33¿Me xavotquin li mantaletic sventa vinajel ti jech lec oye?
¿Me vo'ot chavalbe mantal c'u x'elan lec oy li banamile?
34¿Me xu' avu'un chapas ta mantal li toquetic
yu'un ac'o yac' tal ep vo' ta atojole?
35¿Me vo'ot chatac batel bu ac'o baticuc li sacsevuletique?
‘Li' me oyuncutique’, ¿me xiic xa avu'un?
36¿Boch'o laj yac'be sbijil li ibis mutetique?
¿Boch'o laj yac'be sbijil li cotsetique?
37¿Boch'o oy sbijil ti sna' c'u yepal li toquetique?
¿Boch'o xu' yu'un chocobtas li toquetic yu'un ac'o yac' tal li ya'lele,
38yu'un jech ac'o spat sba li pucuque,
xchi'uc jech ac'o spac' sba ti bu t'ajemic li banamile?
39“¿Me vo'ot chatsacbe tal sve'el li leonetique?
¿Me vo'ot chamac'lin c'alal chvi'najic li bic'tal leonetic
40c'alal te patajtic ta xch'enic,
o me ta snac'ubbailic bu tstsac sve'elique?
41¿Boch'o chac'be sve'el li jojetic
c'alal chchamic xa ta vi'nal yalabtaque,
xchi'uc c'alal xch'ivlajetic ta sc'anel ta jtojole?
Currently Selected:
Job 38: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
