Job 33
33
Li Eliue toj bij la scuy sba ta stojol li Jobe
1“Ja' yu'un ta jc'an chava'ibun li jc'ope;
a'yo lec ava'ay scotol li c'usi chcale.
2Li' ta orae ta jam que ta atojol;
ta jbaq'ues jutuc li c'oq'ue xchi'uc li jnuq'ue.
3Ta yutsil co'nton chcal li c'usi oy ta co'ntone;
puru melelic li c'usi ta xloc' ta quee.
4Yu'un pasbilun ta stsatsal Dios,
ta yic'al ye Boch'o ech'em svu'el licuxi.
5“Tac'bun tal me xu' avu'une;
chapano lec c'usi chaval, jva'lebin jbatic ta c'op.
6Yu'un co'olutic ta stojol Dios;
pasbilun ta ts'u'ilum ec li vu'une.
7Ja' yu'un mu'yuc xi'bal jba;
muc vu'cun xa ech'em xu' cu'un ta jpas jba ta atojol.
8Laj ca'ay lec ta jchiquin li c'usi laj avale;
laj ca'ay lec ti jech iloc' ta avee:
9‘Li vu'une lec oyun, mu'yuc jmul;
mu'yuc c'usi chopol jpasoj, mu'yuc mulil ta co'nton.
10Pero li Diose ja' la sa' c'u x'elan la sa'bun jmul;
laj xa scuyun ta yajcontra.
11Laj xa slats'bun ta lats'ubte' ya'yel li cacane;
solel sq'uelojbun li jujujet cacan bu chixanove’, xachi.
12“Pero li c'usi laj avale mu'yuc lec,
yu'un li Diose ja' toj ech'em smuc'ul ta scotol li cristianoetique.
13¿C'u yu'un ti tsots chatsac ta c'op li Diose?
Yu'un chaval ti mu'yuc xastac'bot li c'usi chajaq'ue.
14Yu'un li Diose oy ep ta chop c'u x'elan chc'opoj,
pero li cristianoe mu xa'ibe smelol.
15Oy chisc'opanutic ta jvayechtic, ta jch'uleltic;
oy chisc'opanutic c'alal ja' to no'ox ch-och jvayeltic,
xchi'uc c'alal ja'o batem lec jvayeltic.
16Jech chlic tsc'opan li cristianoetique,
tstaq'ui, tsibtas,
17yu'un jech ac'o scomtsan li c'usi chopol tspase;
ac'o svoc' sba ta sventa li toybaile.
18Yu'un jech mu xbat ta muquinal ta ora,
jech chcol ta sventa lajel.
19“Jech noxtoc xu' chac'be stoj smul ta chamel;
xu' chti'van scotol li sbaquiltaque.
20Ta xac' ibajuc xa'ay li ve'liletique;
ac'o me lec li ve'lile, mu xa sc'an yo'nton.
21Chlic yaluc li sbec'tale;
chlic vinajanuc li sbaquiltaque.
22Ta ti'ch'en xa oy batel;
sve'el xa chamel lajel c'otem.
23Pero me chtal c'opanatuc yu'un jun yaj'almantal Dios ti t'ujbil chloc' tal ta epal mil j'almantaletique,
me ja' chalbe ta jamal Dios ti ta melel tuc' yo'nton li vinique,
24me jech chlic yalbe li Diose: ‘C'uxubino li vinique;
coltao xa, yu'un jech mu xbat ta ch'en,
yu'un laj xa jtabe xq'uexol sventa smul’, me xute,
25li sbec'tale chlic lecubuc yan velta;
chlic sta jech chac c'u cha'al ta squeremal ono'ox.
26Xu' chlic sc'opan li Diose, ta xlic c'uxubinatuc;
xcuxet no'ox yo'nton chich' ta muc',
yu'un la sta yan velta ti c'u cha'al ono'ox oye.
27Jech chlic yal: ‘La jta jmul; muc jpas c'usi tuc',
pero li Diose muc xiyac'bun jtoj.
28La spojun jech muc xibat ta ch'en,
jech li' to ta jq'uel saquil osil yu'un’, xi chlic yal.
29“Ja' jech ch-abtej jayibuc velta
ta stojol cristiano li Diose.
30Xu' chlic scolta ta sventa lajel,
jech ta to xac'be yil saquil osil.
31Job, a'ibun li jc'ope;
ch'anchan ava'ay, ta xic'opoj.
32Me oy to stac'ubil avu'une, tac'bun me;
c'opojan, yu'un ta jc'an ac'o vinajuc me ta melel mu'yuc amule.
33Me mu'yuc chac'opoje, a'ibun jc'op li vu'une;
ch'anchan ava'ay, chajchanubtasot c'u x'elan chabijub, xi.
Currently Selected:
Job 33: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
