Job 32
32
Li Eliue lic stac'be sutel sc'op li Jobe
1Li oxib viniquetique ipajic ta lo'il c'alal laj yilic tsots yo'nton laj yal Job ti mu'yuc smule. 2Ja' yu'un li Eliú xnich'on Baraquel liquem ta Buz, smomnich'on Rame, tsots i'ilin ta stojol Job c'alal laj yal ti mu'yuc smule, yu'un la snop ti ja' xjelov stuq'uil jech chac c'u cha'al Diose. 3Jech noxtoc i'ilin ta stojol li oxibic ti lec sc'opan sbaic xchi'uc li Jobe, yu'un mu sna'ic staq'uel; ja' oy smul icom yu'unic li Diose. 4Li Eliue la smala ilaj yo'ntonic ta lo'il xchi'uc Job li oxibique, yu'un ja' molic xa. 5C'alal laj yil Eliú ti mu xa sna' c'usi chalic li oxibique, i'ilin, 6jech lic c'opojuc ta ora, jech laj yal:
—Ta sventa ti queremun toe, jech lixi',
muc xcal ta ora li c'usi oy ta co'ntone, yu'un vo'oxuc moloxuc xa.
7Jech la jnop: ‘Ac'o c'opojicuc li boch'o oy xa c'usi sna'ique;
ac'o yac' ta ilel sbijilic li boch'o ep xa jabil xch'ielique’, xichi.
8Pero jcotoltic ac'bilutic jbijiltic;
ja' chijyac'butic jna'tic c'usi chcaltic li Boch'o ech'em svu'ele.
9Ma'uc toj bijic li boch'o ep xa sjabilalique;
ma'uc oy xa c'usi lec sna'ic li boch'o ta isimilic xae.
10Ja' yu'un jech laj cal: ‘A'ibicun ca'yej ec;
ta jc'an ta xcal ec li c'usi jna'e’, xichi.
11“Li vu'une la jmala ti c'alal chalo'ilajique;
laj ca'ay lec li c'usi laj avalique;
laj quil ti laj asa'ilanic avalojic c'usi lec chatac'beic li Jobe.
12Laj ca'ay ti mu'yuc boch'o junucal avu'unic
lec sna' stac'bel sutel sc'op li Jobe.
13Ta sventa mu xlic avalic ti toj bijoxuque,
ja' Dios ta stac'be sutel stuc; muc xa cristianouc ta spacbe sutel.
14Ta sventa mu'yuc bu chistsacun ta lo'il li Jobe,
jech mu'yuc c'usi ta jtac'be sutel ec
jech chac c'u cha'al li vo'oxuque.
15“Job, li viniquetic li'i, mu'yuc xa stac'ubil yu'unic li ac'ope;
ich'ay xa yo'ntonic.
16Laj xa jmala, pero mu xa xc'opojic;
ipajic o ta lo'il, mu xa sna' c'uxi chtac'ovic.
17Ja' yu'un chi'och ta lo'il j'ich'uc ec;
ta xcal ec li c'usi oy ta co'ntone.
18Li' nojem ta co'nton li c'usi ta jc'an chcale;
mu xa sts'ic cu'un ti mu xic'opoje.
19Naca xa muc cht'om jch'ut yu'un ya'yel
jech chac c'u cha'al nucul yavil ya'lel ts'usub ti chjat yu'un li sbele.
20Ja' yu'un chic'opoj, yu'un jech xu' chlic quich' jutuc ic';
ta jc'an ta jtac'bot sutel li ava'yeje.
21Li vu'une mu'yuc ta jt'uj boch'o ta jc'uxubin;
muc t'ujbiluc no'ox boch'o lec chquil.
22Mu jechuc jtalel ti t'ujbil ta jpase;
me jech ta jpase, ac'o smilun ta ora li Boch'o la spasune.
Currently Selected:
Job 32: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
