Ezequiel 47
47
Sc'oplal vo' chloc' ta ch'ulna
1Li vinique laj yic'un batel noxtoc ta yochebal li ch'ulnae; laj quil te chloc' vo' ta yolon li ti'na ta sloq'ueb c'ac'ale,#47.1 C'ac'ale - Oy boch'o chalic jtotique.#Is 44.3; Jl 3.18; Zac 13.1; 14.8; Jn 7.38; Ap 22.1. yu'un li yeloval sjol ch'ulnae ja' sq'ueloj batel sloq'ueb c'ac'al. Li vo'e te chanov yalel ta xocon ch'ulna ta bats'ic'ob ta stuq'uil sur yu'un li scajleb smoton Diose. 2Ts'acal laj yic'un loq'uel ta ti'na ta stuq'uil norte. Te lixanov batel ta spat yosilal li ch'ulnae; te lijoyij tal ta yan ochebal ta sloq'ueb c'ac'al.#47.2 C'ac'al - Oy boch'o chalic jtotic. Te laj quil noxtoc chloc' vo' ta xocon ti'na ta bats'ic'ob. 3Li vinique iloc' batel ta stuq'uil sloq'ueb c'ac'al,#47.3 C'ac'al - Oy boch'o chalic jtotic. yich'oj loq'uel jlic ch'ojon. Lic sbis batel vo'ob cien (500) metro, ja'o laj yac' jelovcun ti bu chanov yoc li vo'e. Li vo'e la sta c'alal ta snuc' cacan. 4Ts'acal la sbis batel yan vo'ob cien (500) metro noxtoc. Laj yac' jelovcun yan velta ta yoc li vo'e; la sta xa'ox c'alal ta sjol cacan. La sbis batel yan vo'ob cien (500) metro noxtoc. Laj yac' jelovcun yan velta ta yoc li vo'e; la sta xa'ox c'alal ta xchucbenal jch'ut. 5La sbis batel yan vo'ob cien (500) metro noxtoc. Li vo'e ipas xa'ox ta jun muc'ta uc'um; mu xa xtuch' cu'un. Yu'un inatub ta jyalel, mu xa stac' tuch'el; ja' xa no'ox xu' chich' tuch'el ta nux. 6Jech laj yalbun: “Q'uelo me lec avil”, xiyutun.
Ts'acal laj yic'un batel ta sti'ti' li uc'ume; 7te laj quil ti oy lec te'etic ta xcha'jotal sti' li uc'ume. 8Jech laj yalbun: “Li uc'um li'i te chbat ta yosilal sloq'ueb c'ac'al;#47.8 C'ac'al - Oy boch'o chalic jtotic. te chyal batel ta ti' uc'um Jordán; te ch-och batel ta Nab Muerto. C'alal ch-och batele, li ya'lel nabe chlic lecubuc. 9Buyuc no'ox chc'ot ochuc li vo' le'e, chlic cuxiicuc li c'usitic cuxajtic ta yut nabe; chlic boluc epal choyetic ta nab ti bu chc'ot ochuc li vo'e. Yu'un li vo' le'e tslecubtas li vo'etique, jech chlic cuxiuc scotol li c'usitic oy ta yut nabe. 10Jech chlic ayinuc ep jtsacchoyetic; te chlic sq'uiic batel snuti'ic ta En-gadi c'alal to ta En-eglaim. Yu'un chlic ayinuc ep ta chop choyetic jech chac c'u cha'al xchoyal li Muc'ta Nab Mediterraneoe. 11Pero li ts'anleb vo'etic, li bic'tal nabetic yu'une mu'yuc chlecub; staoj yav chi' chcom o, yu'un ja' chtun sventa te chich' loq'uesel o ats'am. 12Ta xcha'jotal sti' li uc'ume ta xch'i ep ta chop jsatinom te'etic. Mu'yuc ta xlilij o yanal; mu'yuc ta xlaj yo'nton o ta satinel. Ta jujun u chyijub li sate, yu'un lec ch-ach' ta sventa li vo' chloc' tal ta ch'ulnae. Li sate ja' sventa chich' lo'el; li yanale ja' chtun ta sventa poxil”,#Ap 22.2. xiyutun.
Sc'oplal sts'aquiltac yosilal israeletic
13Jech chal li Cajvaltic Muc'ul Diose: “Li sts'aquiltac osil#Nm 34.1-12. ti chich'ic voc'bel li lajcha'chop (12) sts'unubal Israele ja' jech chac li'i: Li Josee ja' cha'sep spuculal osil chich'. 14Yu'un c'alal laj calbe amoltotic ta vo'one ti ja' chcac'beic li banamil li'i, jtoyoj jc'ob laj calbeic ta jamal. Ja' yu'un li banamil li'i ja' avu'unic; co'ol xapasbe abaic ta jujuchopoxuc. 15Li sts'aquil ta stuq'uil nortee te chlic batel ta Muc'ta Nab Mediterráneo, te chjelov batel ta lum Hetlón, te chjoybij tal ta lum Zedad, 16ta Berota, ta Sibraim ti cacal ta o'lol yu'unic li yosilal Damasco xchi'uc Hamate. Te chjelov batel ta Hazar-haticón ti sts'aquinoj sba xchi'uc Haurane. 17Ja' yu'un li sts'aquil ta nortee te chlic batel ta Nab Mediterráneo c'alal ta Hazar-enán. Li yosilal Damasco xchi'uc Hamate ta stuq'uil norte chcom. 18Li sts'aquil ta sloq'ueb c'ac'ale#47.18 C'ac'ale - Oy boch'o chalic jtotique. te chlic batel ta o'lol yu'unic li Haurán xchi'uc Damascoe; te xyal batel c'alal ta lum Tamar. Li ti'ti' uc'um Jordane ja' sts'aquic chc'ot xchi'uc Galaad li Israele. 19Li sts'aquil ta sure te xlic batel ta Tamar; xjelov batel ta yaxaltic yo' bu chloc' vo'etic ta Meriba-Cades xchi'uc ta yuc'umal Egipto; chc'ot c'alal to ta Nab Mediterráneo. 20Li sts'aquil ta smaleb c'ac'ale#47.20 C'ac'ale - Oy boch'o chalic jtotique. ja' li muc'ta Nab Mediterraneoe; xc'ot c'alal to ta yeloval yochebal lum Hamat. 21Li banamil le'e lec chapal xavoc'be abaic ta alajcha'chopalic li israeloxuque. 22Voc'bo abaic, yu'un ja' avu'unic chcom o achi'uquic li yanlum cristianoetic ti te chlic achi'inic ta nacleje. Xchi'uc ja' yu'unic chcom o ec li yalab xnich'nab te chlic voc'uc ta avosilalique. Ja' yu'un tsc'an chacuyic ta mero achi'ilic ta israelal. C'alal chavoq'uique, te me nabalicuc ec, yu'un jech xu' chich'ic yosilic te ta atojolic. 23Ti bu jchopucal achi'iltaquic nabalique ja' te ac'o yich' ac'bel spuculal osilic ec. Vu'un chcal jtuc, vu'un li Muc'ul Diosune.
Currently Selected:
Ezequiel 47: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.