Ezequiel 46
46
C'usi tsc'an tspas jun ajvalil xchi'uc israeletic ta yorail q'uinetic
1“Vu'un li Muc'ul Diosune jech chcal noxtoc: Li sti' xcha'c'olal amac' ta yut ta stuq'uil sloq'ueb c'ac'ale,#46.1 C'ac'ale - Oy boch'o chalic jtotique. macal chcom o li vaquib c'ac'al c'alal yorail abtel avu'unique. Ja' to ta sc'ac'alil cuxub o'ntonal xu' chich' jamel, xchi'uc ti c'alal yorail ch-uninaj ue.#46.1 Ue - Oy boch'o chalic jme'tique. 2Li banquilal avu'unique te ac'o ochuc batel ta ochebal; te ac'o jelovuc batel ti bu muc'ta cuartoe. Te ac'o sva'an sba ta jbej yoyal sti' sba c'olal amac' ti c'alal ja'o chchiq'uic milbil matanaletic li paleetique, xchi'uc ti c'alal ja'o chaq'uic li matanal sventa co'ol co'ntontique. Li banquilale ac'o spatan sba ta banamil te ta sts'el ti'na; ja'o xu' chloc' batel. Li ti'nae jamal ac'o comuc c'alal to ta mal c'ac'al. 3C'alal ja'o sc'ac'alil cuxub o'ntonale, xchi'uc c'alal yorail ch-uninaj ue,#46.3 Ue - Oy boch'o chalic jme'tique. ac'o yich'icun ta muc' te ta ti'na scotol ec li achi'iltaquique. 4Li jmoton tsc'an chiyac'bun banquilal avu'unic sventa chich' chiq'uel ta yorail cuxub o'ntonale ja' vaccot ch'ium chij xchi'uc jcot tot chij ti ven lequique. 5Li xchi'il tsc'an chich' ac'bel ta jujucot tot chije, ja' jtob (20) anmul trigo. Ta sventa li ch'ium chijetique, ja' ti c'u yepal tsnop chac' li banquilal avu'unique. Li jtob (20) anmul trigoe ac'beic o'lol yoxibal litro yaceiteal noxtoc. 6Li jmoton tsc'an chac' c'alal ch-uninaj ue,#46.6 Ue Oy boch'o chalic jme'tique. ja' jcot ch'ium tot vacax, xchi'uc vaccot ch'ium chij, xchi'uc jcot tot chij ti ven lequique. 7Li jujucot ch'ium tot vacaxe, ac'o yac'be jtob (20) anmul strigoal noxtoc, xchi'uc jtob (20) anmul ta sventa li tot chije. Ta sventa li ch'ium chijetique ac'o yac' ti c'u yepal tsnop chaq'ue. Li jtob (20) anmul trigoe ac'beic o'lol yoxibal litro aceite noxtoc.
8“C'alal ch-och batel ta ch'ulna li banquilal avu'unique, tsc'an te ch-och batel ta muc'ta cuarto sventa ochebal; ja' tsc'an te chloc' tal noxtoc. 9Jech noxtoc c'alal ch-och squejan spatan sbaic ta jtojol ta yorail jujun q'uin li achi'iltaquique, me te i'ochic ta ochebal ta nortee, te xa ac'o loq'uicuc batel ta ochebal ta sur. Li boch'o ch-och batel ta ochebal ta sure, te xa ac'o loc'uc ta ochebal ta norte. Mu me teuc xloc' ti bu ono'ox i'och batele; tsc'an ta jot xa ti'na chloc' batel ta yeloval ti bu i'oche. 10Li banquilale tsc'an co'ol ch-och batel xchi'uc li jteclume, xchi'uc tsc'an co'ol chloc' tal xchi'uc noxtoc. 11Ta jujun q'uin ti c'alal tsoboloxuc acotolique, ac'o yac' jtob (20) anmul trigo ta jujucot ch'ium tot vacax, xchi'uc jtob (20) anmul ta sventa li jujucot tot chije. Yan ta sventa li jujucot ch'ium chije, ac'o yac' ti c'u yepal tsnop chaq'ue. Li jtob (20) anmul trigoe tsc'an chac'be o'lol xchanibal litro yaceiteal noxtoc. 12C'alal me oy tsc'an chiyac'bun chic'bil matanal ta yutsil yo'nton li banquilal avu'unique, xchi'uc me chiyac'bun jmoton sventa co'ol co'nton jchi'uque, ja' ac'o yich' jamel li ochebal ta sloq'ueb c'ac'ale;#46.12 C'ac'ale - Oy boch'o chalic jtotique. ac'o yac' li matanaletic jech chac c'u cha'al chich' pasel ta sc'ac'alil cuxub o'ntonale. C'alal me iloq'ue, ac'o yich' maquel li ti'nae.
Sc'oplal smoton Dios chich' aq'uel ta jujun c'ac'al
13“Scotol c'ac'al ta jujun sob, milic jcot ch'ium chij ti jun to jabil svoq'uele ti bu ven leque; ac'o yich' chiq'uel ta sventa jmoton. 14Jech noxtoc ac'beic vucub anmul trigo xchi'uc jun litro aceite; ja' ac'o yich' vots'el o li arinae. Le'e ja' mantal chcom o ta atojolic ti tsc'an jech chapasic ta jujun sobe. 15Li ch'ium chij, xchi'uc li trigo, xchi'uc li aceite chavac'bicun sventa chic'bil matanale, ta jujun sob tsc'an chavaq'uic, yu'un jech te oy o scotol c'ac'al.#Ex 29.38-42.
C'usi tsc'an tspas jun banquilal ta sventa yosil
16“Jech chcal noxtoc vu'un li Muc'ul Diosune: Me oy jun banquilal tsvoc'be junuc xnich'on li osil ti comen ta sbae, ja' yu'un chcom o li xnich'one; xu' xa chich'ic o comel ec li smomnich'nabtaque. 17Pero me oy jun banquilal avu'unic chac'be spuculal osil junuc li j'abteletic yu'une, ja' yu'un chcom o ti c'alal tsta li sjabilal colem chcom scotole.#Lv 25.10. Ts'acal xu' chac'be sutel yan velta li banquilale; jech ec li banquilale xu' xa ja' chac'be li xnich'nabe. 18Li banquilal avu'unique mu xu' tspojbe yosil li steclumale. Ti bu comen ta sventae ja' no'ox xu' chac'be li xnich'one, yu'un jech mu xich' nutsel loq'uel ta yosil junuc li jteclumale”, xi li Muc'ul Diose.
Sc'oplal panub ve'liletic ta ch'ulna
19Li vinique laj yic'un batel noxtoc ta ochebal ta jot xocon cuartoetic ta stuq'uil norte, ja' li ch'ul cuartoetic sventa paleetique. Laj quil ti lec to xocol batel ta yut ta stuq'uil smaleb c'ac'ale.#46.19 C'ac'ale - Oy boch'o chalic jtotique. 20Jech laj yalbun: “Li'i ja' yavil bu tspanic sbec'tal matanaletic li paleetique. Ja' li matanaletic chich' aq'uel ta sventa xch'ayubil muliletique, xchi'uc li yantic matanal chich' aq'uel jech chac c'u cha'al trigoe. Yu'un jech mu persauc chich'ic loq'uel ta amac'; jech mu snop sba xchi'uc achi'iltaquic li c'usitic ts'u'iltasbilique”, xiyutun.
21Ts'acal laj yic'un loq'uel ta sba c'olal amac'; laj yac' jxan scotol xchanjotal xchiquin li amaq'ue. Ta jujun xchiquine laj quil oy juteb yamaq'uil jujun. 22Li yamaq'uil ta jujujot xchiquine co'ol smuc'tiquil; ja' jtob (20) metro snatil, vo'lajuneb (15) metro sjamalil. 23Li jujun yamaq'uil xchiquin li muc'ta amaq'ue setbilic ta ton. Ta sjoyobal yoc li ton ti latsbilic muyele pasbil yav c'oq'uetic. 24Jech laj yalbun: “Li'i ja' panub ve'liletic ta sventa li boch'otic li' chtunic o ta ch'ulnae; ja' li' tspanic li milbil matanaletic chaq'uic achi'iltaquique”, xiyutun.
Currently Selected:
Ezequiel 46: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.