Amós 8
8
Sc'oplal jun moch noj ta sat te'etic lec yijic
1Li Cajvaltic, ja' li Muc'ul Diose, oy c'usi laj yac'bun quil noxtoc: Laj quil jun moch noj ta sat te'etic, lec xa yijic. 2Jech laj yalbun:
—Amós, ¿c'usi chavil? —xiyutun.
—Ta xquil jun moch noj ta sat te'etic, lec xa yijic —xcut.
Jech laj yalbun:
—Ja' jechic li israeletique, iyijubic xa. Ic'ot xa sc'ac'alilic; mu xa xu' cu'un ta jts'icbeic. 3Li jq'uejimoletic ta ch'ulnae ta to x'oq'uic me la sta sc'ac'alile. Ep boch'o ta xcham; puru anima te mochajtic, me jutuc mu'yuc xa boch'o ta xbac' —xi li Cajvaltic Diose.
Nopol xa sc'ac'alil chich' ac'bel stoj smul li Israele
4A'yo ava'yic, vo'oxuc ti chavuts'intaic li boch'otic abul sbae, ti chavulesic o li me'onetic te ta avosilalique, 5jech chavalic: “Ech'uc ta ora ca'tic li sq'uinal unin ue, xchi'uc ech'uc ta ora ca'tic li sc'ac'alil cuxub o'ntonale, yu'un jech xu' ta jchon jtrigotic, xchi'uc xu' oy c'usi ta jchontic ta toyol stojol. Xu' ta jbic'tajesbetic li sbisubile; xu' mu'yuc ts'acal ta xcac'tic.#Lv 19.35-36; Dt 25.13-16; Pr 11.1; 20.10,13; Mi 6.10-11. 6Xu' ta jchontic c'alal ta spat li jtrigotique. Jech xu' chlic xchon sbaic ta mozoil ta jtojoltic li me'onetique; xu' chlic sjel sbaic ta xonobil li boch'o abul sbaique”, xachiic. 7Li Muc'ul Diose, ja' li stsatsal yo'nton Jacobe, jech chal ta jamal: “Me jutuc mu xch'ay ta co'nton o li c'usi tspasique”, xi.
8¿Me mu'yuc ta xlic nicuc banamil ta sventa le'e?
¿Me mu'yuc chlic oc'uc li jnaclumetic te ta yosilalique?
Li banamile ta xlic syuq'uilan sba;
xyal xmuy no'ox jech chac c'u cha'al uc'um Nilo ta Egipto.
9Jech chal li Cajvaltic Diose:
“C'alal me la sta sc'ac'alil le'e, ta xcac' ic'ubuc osil ta o'lol c'ac'al#8.9 C'ac'al - Oy boch'o chalic jtotic. no'ox;
c'alal lec to sac li osile, ta xlic ic'ubuc li banamile.#Jl 2.10.
10Li q'uinetic avu'unique ta jc'atajes ta at-o'nton;
li q'ueojetic avu'unique ta jc'atajes ta oq'uel.
Ta xcac' alapic c'u'il sventa at-o'nton,
xchi'uc chlic ajux ajolic ta sventa at-o'nton.
Ta xcac' oc'anic jech chac c'u cha'al ch-oc' boch'o chcham xnich'on ti c'ajumal jun oy yu'une;
chalajic ta ven tsatsal vocol”, xi.
11Jech chal noxtoc li Muc'ul Diose:
“Ta to sta sc'ac'alil ta jtac tal tsots vi'nal li' ta banamil,
pero mu ja'uc vi'nal ta sventa mu'yuc ave'elic,
mu ja'uc ta sventa mu'yuc c'usi chavuch'ic, o mu'yuc ava'alic;
ja' vi'nal ta sventa ti mu'yuc xa bu chava'yic o jc'op, vu'un li Muc'ul Diosune.
12Jech chaliquic ta vovil xanubal,
chabatic c'alal to ta sti' muc'ta nab xchi'uc c'alal to ta sti' li Nab Muerto sbie,
c'alal ta vitsetic ta Líbano xchi'uc c'alal to ta ti' uc'um Jordán;
chasa'ilanic li jc'ope,
pero mu xataic o.
13Me la sta sc'ac'alil le'e,
ta xlic alubicuc ta taqui-o'nal
li tsebetic avu'unic ti toj c'upilic sbae
xchi'uc li queremetic ti lec tsotsique.
14Li boch'otic tsva'anic ta testigo li sloc'obal diosetic ta Samariae,
li boch'o tsva'anic ta testigo li sloc'obal dios ta Dane,
li boch'o tsva'anic ta testigo li sloc'obal dios ta Beersebae,
j'ech'el chyalic o ta lum, mu xa stotsic o”, xi li Muc'ul Diose.
Currently Selected:
Amós 8: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
