Amós 7

Li Amose laj yil ta xch'ulel c'ulubetic

1A'yo ava'yic c'usi laj yac'bun quil ta jch'ulel li Cajvaltic, ja' li Muc'ul Diose: C'alal sbojoj xa'ox loq'uel sve'el xvacax li ajvalile ipul tal yan velta li ts'i'laltique, li Diose ja'o laj yac' ayinuc epal c'ulubetic.#Jl 1.4; 2.2-11. 2Ts'acal to, c'alal lajubal xa'ox ta lo'el ts'i'laltic yu'un li c'ulubetique, jech laj calbe:

—Cajval, Muc'ul Dios, pasbuncutic perdón, mu xcuch yu'unic li smomnich'nabtac Jacobe, yu'un solel mu'yuc stsatsalic —xcut.

3Li Muc'ul Diose muc to spas li c'usi snopoj tspase, jech laj yal:

—Mu'yuc chc'ot ta pasel jech —xi.

Li Amose i'ac'bat yil jun muc'ta c'oc' ta xch'ulel

4Jech laj yac'bun quil ta jch'ulel noxtoc li Muc'ul Diose: Laj quil la stac tal tsatsal c'oc' sventa stojol mulil. Laj yules scotol li muc'ta nabe xchi'uc ic'ac' c'uuc smuc'ul li banamile.#Jl 1.19-20. 5Jech laj calbe:

—Cajval, Muc'ul Dios, pajeso li c'oq'ue. Mu xcuch yu'unic li smomnich'nab Jacobe, yu'un solel mu'yuc stsatsalic —xcut.

6Li Muc'ul Diose muc to spas li c'usi snopoj tspase, jech laj yal:

—Mu'yuc chc'ot ta pasel —xi li Cajvaltic Diose.

Li Amose i'ac'bat yil ta xch'ulel jun plomo sventa yabtejeb alvanil

7Li Muc'ul Diose oy c'usi yan laj yac'bun quil noxtoc: Te va'al ta sts'el pac'benal na, yich'oj jun plomo sventa yabtejeb alvanil.

8Jech la sjac'bun:

—Amós, ¿c'usi chavil? —xiyutun.

—Ta xquil jun plomo sventa yabtejeb alvanil —xcut.

Jech laj yalbun:

—A'yo ava'ay, vu'un ta xcac'be plomo li smomnich'nab Israele yu'un jech chvinaj ti mu'yuc xa tuc' jech chac c'u cha'al pac'bel na mu'yuc tuq'ue; mu xa xu' cu'un ta jts'icbeic. 9Li toyol c'opojebaletic yu'un Isaaque ta xich' jinesel scotol; li snail sloc'obal diosetic yu'un Israele ta xich' yavnaijesel o, xchi'uc ta jcontrainic ta espada li smomnich'nabtac Jeroboame —xiyutun.

Li j'alc'op Amose la stsac sbaic ta c'op xchi'uc Amasías

10Li pale Amasías te ta Betele jech laj yalbe batel li ajvalil Jeroboam ta Israele: “Ajvalil, li Amose ta xchapilan ac'oplal ta mucul ta stojol li jchi'iltactic ta israelale. Ta sjunul li cosilaltique mu xa sts'ic yu'unic li c'usi chalilane. 11Yu'un jech ta xal: ‘Li Jeroboame ta xich' milel ta espada, scotol li israeletique ta xich'ic chuquel batel ta yan banamil’, xi chal”, xut batel li ajvalile.

12Li Amasiase jech laj yalbe li Amose:

—J'alc'op, batan, jatovan batel ta yosilal Judá. Ja' te xaval li c'usi chc'ot ta pasele; te ac'o yaq'uic ave'el. 13Mu xa xavalilan li' ta Betele, yu'un ja' ch'ulna ti muc' sc'oplal ta scotol Israele, ja' ti bu chich' ta muc' Dios li ajvalile —xut.

14Li Amose jech la stac'be:

—Muc j'alc'opucun, muc xnich'onucun j'alc'opetic noxtoc. Li vu'une jchabichijun no'ox, xchi'uc ja' no'ox ta jq'uelilanbe sat te'tical higoetic. 15Pero li Muc'ul Diose laj yic'un ti c'alal te nabalun ta spat jchijtaque, jech laj yalbun: ‘Batan, bat alo c'usi chc'ot ta pasel ta stojol li jteclumale, ja' li Israele’, xiyutun. 16Ja' yu'un, a'yo ava'ay c'usi chal li Muc'ul Diose. Li vo'ote jech chaval: ‘Mu xaval c'usi chc'ot ta pasel li' ta Israele; mu c'usi xaval ta sventa li smomnich'nab Isaaque’, xachi. 17Pero jech chayalbot li Muc'ul Diose: ‘Li avajnile ta spas ta jmulavil ants li' ta lum; li aquerem atsebetique ta xlajic ta milel ta espada. Li avosile yanlum cristianoetic ta xlic svoq'uilanbe sbaic; li vo'ote te chacham ta yosilal yanlum cristianoetic; li smomnich'nab Israele chucbil chbatic ta yan banamil’, xi li Diose —xut.

Currently Selected:

Amós 7: TZE97

Highlight

Copy