2 Reyes 21
21
I'och ta ajvalilal Manasés
(2 Cr 33.1-20)
1C'alal i'och ta ajvalilal li Manasese, lajchab (12) to jabil yich'oj. Vo'lajuneb yoxvinic (55) jabil i'abtej ta Jerusalén. Li sme'e Hepsiba sbi. 2Pero li Manasese toj chopol c'usi la spas ta stojol li Muc'ul Diose.#Jer 15.4. Ja' co'ol la spas jech chac c'u cha'al sbol talelic li yanlum cristianoetic ti inutsbatic loq'uel yu'un Muc'ul Dios ta stojol israeletique. 3Yu'un la xcha'pas li toyol c'opojebaletic ti la sjines ono'ox li stote, ja' li Ezequiase. Xchi'uc la xcha'pasbe scajleb smoton li Baale, xchi'uc la spasbe jun sloc'obal sjalalme'ic Asera jech chac c'u cha'al la spas li Acab, ajvalil ta Israele. Jech noxtoc lic yich' ta muc' scotol li c'usitic oy ta vinajele. 4La spas yantic scajleb matanaletic te ta xch'ulna Muc'ul Dios, ja' li Muc'ul Dios ti jech ono'ox laj yalbe sc'oplal li ch'ulnae: “Ja' no'ox xu' te chich' ich'el ta muc' jbi ta ch'ulna ta Jerusalén”,#2 S 7.13. xi ono'ox. 5La spasbe scajlebtac smoton noxtoc li c'usitic oy ta vinajele; ja' te la spas ta xcha'jotal yamaq'uil ch'ulna.
6Jech noxtoc la xchic' xnich'nab sventa smoton sdios, xchi'uc la xchan ic'-ch'ulelal, t'unul, yaq'uel j'ilc'op, xchi'uc ac'chamel. Bats'i toj chopolic c'usi la spas ta stojol li Muc'ul Diose, jech ilic sc'ac'al yo'nton yu'un. 7Jech noxtoc la sva'an sloc'obal Asera te ta xch'ulna Muc'ul Dios, ja' li ch'ulna ti jech laj yalbe sc'oplal Muc'ul Dios ta stojol li David xchi'uc xnich'one, ja' li Salomone: “Li' ta ch'ulna ta Jerusalén ti t'ujbil cu'un ta scotol yosilal jaychop achi'iltaque ja' yavil bu xu' chi'ich'at o ta muc' sbatel osil. 8Mu'yuc ta jloq'uesic o batel ta yosilic li achi'iltac ti bu laj cac'beic li amoltotic ta vo'onee. Ja' no'ox venta me chch'unic, me tspasic scotol li c'usitic calojbeique xchi'uc li chanubtaseletic ti i'albatic yu'un li cajtunel Moisese”,#1 R 9.3-5; 2 Cr 7.12-18. xi ono'ox.
9Pero muc ono'ox xich'ic ta muc'. Li Manasese yo'to laj yac'be spasic c'usitic toj chopol jech chac c'u cha'al la spasic li yantic lum ti i'ulesbatic yu'un Muc'ul Diose. 10Li Muc'ul Diose jech laj yal ta sventa li j'alc'opetic yu'une: 11“Ta sventa ti toj chopol c'usi la spas li Manasese xchi'uc ti toj ech'em chopol la spas jech chac c'u cha'al la spasic li amorretic ti ba'yuc ijelovic yu'une, xchi'uc ti laj yac'be sa' smulic li judaetic ta sventa li sloc'obal diosetic yu'unique, 12ja' yu'un jech jamal chcal vu'un li Muc'ul Diosun yu'un Israele: Ta jtac tal tsots vocol ta Jerusalén xchi'uc ta Judá. Li boch'otic cha'ibeic sc'oplale toj c'ux ta a'yel cha'yic. 13Ti c'u x'elan sbisol laj cac'be li Samaria xchi'uc li smomnich'nabtac Acabe ja' jech sbisol chcac'be ec li Jerusalene. Ta jsuc'be loq'uel yic'ubal li Jerusalén jech chac c'u cha'al chich' suq'uel jun plato ti ts'acal chich' nujanele. 14Ti c'u to yepal chcomic li jteclumale, ta jip o ta co'nton; ta xcac' ochicuc ta sc'ob yajcontraic, yu'un jech ac'o yich'ic pojbel scotol li c'usitic oy yu'unique. 15Yu'un toj chopol c'usitic la spasic ta jtojol. C'alal la jloq'uesic tal ta Egipto li smoltotaquique, te ono'ox chisa'ilanbicun o tal sc'ac'al co'nton. Ja' jechic o c'alal to tana”, xi li Muc'ul Diose.
16Jech noxtoc li Manasese ep la smalbe xch'ich'alic li boch'otic mu'yuc smulique; solel noj ta ch'ich' c'alal ta sti'il-ti'il li Jerusalene. Ja' slecoj o li muliletic laj yac'be spas judaetique, jech toj chopolic c'usi la spasic ta stojol li Muc'ul Diose. 17Li yantic sc'oplal Manasese, xchi'uc scotol li c'usitic la spase, xchi'uc ti c'u x'elan la sa' smule te ts'ibabil ta svunal c'usitic ic'ot ta pasel yu'un li ajvaliletic ta Judae. 18C'alal ichame, te no'ox la smuquic ta ts'unubaltic yu'un Uza te ta spasubmantal. Ja' i'och ta xq'uexol jun xnich'on, Amón sbi.
I'och ta ajvalilal ta Judá li Amone
(2 Cr 33.21-25)
19C'alal i'och ta ajvalilal li Amone, yich'oj chib xcha'vinic (22) jabil. Chib jabil i'abtej ta Jerusalén. Li sme'e Mesulemet sbi; ja' stseb Haruz te ta Jotba. 20Li Amone toj chopol c'usi la spas ta stojol li Muc'ul Diose. Ja' co'ol la spas jech chac c'u cha'al li stote, ja' li Manasese. 21Ja' la xchan spasel scotol c'usitic chopol jech chac c'u cha'al la spas li stote. Ja' laj yich' ta muc' ec li sloc'obal diosetic ti laj yich' ta muc' stote. 22Ja' la scomtsan o li Muc'ul Diose, ja' li Dios yu'un smoltotaque. Mu ja'uc la spasbe li c'usitic tsc'ane.
23Li j'abteletic yu'un Amone la xchap sc'opic, jech bat smilic te ta spasubmantal. 24Pero li yajvaltac lume la smilic ec li boch'otic la smilic ajvalil Amone. Ja' laj yaq'uic ochuc ta xq'uexol jun xnich'on li Amone, Josías sbi.
25Li yantic c'usitic la spas Amone te ts'ibabil ta svunal c'usitic ic'ot ta pasel yu'un li ajvaliletic ta Judae. 26C'alal ichame, te la smuquic noxtoc ta ts'unubaltic yu'un Uza. Ja' i'och ta xq'uexol jun xnich'on, Josías sbi.
Currently Selected:
2 Reyes 21: TZE97
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.