2 Reyes 20
20
Itsacat ta chamel Ezequías
(2 Cr 32.24-26; Is 38.1-8)
1C'alal jech ic'ot ta pasele, ja'o yorail itsacat ta tsatsal chamel li Ezequiase. Li j'alc'op Isaías, xnich'on Amoze, ibat svu'lan jech c'ot yalbe:
—Jech chayalbot li Muc'ul Diose: ‘Albo comel mantal li avajnil anich'nabe yu'un ta xacham’, xayutot —xut.
2Li Ezequiase ijoyij batel ta c'alna; la sc'opan Dios jech laj yal: 3“Muc'ul Dios, avocoluc mu me xch'ay ta avo'nton ti jun co'nton litun avu'une, xchi'uc ti scotol co'nton la jpas c'usi chac'ane”, xut. Ep laj yoc'ta sba.
4C'alal te to'ox x'ech' batel ta o'lol yamaq'uil spasubmantal ajvalil li Isaiase, ic'opanat yu'un li Muc'ul Diose, jech i'albat: 5“Sutan batel, jech xavalbe li Ezequiase, ja' li banquilal yu'un jteclumale: ‘Jech chayalbot li Muc'ul Diose, ja' li Dios yu'un amoltot Davide: Laj ca'ay li ac'ope, xchi'uc laj quil ti iloc' ya'lel asate, ja' yu'un ta jcoltaot. Le' ta oxib c'ac'ale xu' xa chabat ta jch'ulna. 6Ta to xcac' cuxian yan vo'lajuneb (15) jabil. Ta jcoltaot loq'uel ta sc'ob ajvalil ta Asiria achi'uc li lum Jerusalene. Vu'un ta jchabi li lum li'i, yu'un jech ta jc'an jtuc, xchi'uc ja' ta sventa ti lec jc'anoj li cajtunel Davide’, xayutot li Diose”, xi li Isaiase.
7Li Isaiase jech laj yal: “Noyic tal jutebuc higo”, xi. La snoyic; te la xjaxbeic ti bu ip sbec'tal li Ezequiase, jech icol. 8Li Ezequiase jech la sjac'be li Isaiase:
—¿C'usi sq'uelubil xu' ta jna' me ta melel chiscoltaun li Muc'ul Diose, xchi'uc me melel ti xu' xa chibat ta ch'ulna ta oxib c'ac'ale? —xut.
9Itac'ov li Isaiase:
—Li sq'uelubil sventa chana' o ti ja' melel c'usi laj yal ta atojol li Muc'ul Diose ja' li'i: ¿Me chac'an ti chjelov lajuncojuc ta tec'ubal li snac'ubal c'usi chac' ta na'el jayib orae, o me chac'an ti ta sut lajuncoj ta tec'ubale? —xut.
10Itac'ov li Ezequiase:
—Me ja' chjelov batel lajuncojuc ta ba'yucbee, le'e mu vocoluc. Yan me ja' tsut lajuncojuc ta ts'acalpate, ja' vocol —xi.
11Ja' yu'un li j'alc'op Isaiase lic sc'opan li Muc'ul Diose, lic sc'anbe ti ac'o sutuc lajuncoj ta tec'ubal li yora Acaze.
Li Ezequiase lec laj ya'ibe sc'op li j'almantaletic liquemic ta Babiloniae
(2 Cr 32.27-31; Is 39.1-8)
12C'alal jech ic'ot ta pasele, ja'o yorail la stac batel j'almantaletic, xchi'uc cartaetic, xchi'uc matanaletic ta stojol ajvalil Ezequías li ajvalil ta Babiloniae, ja' li Merodac-baladán, xnich'on Baladane, yu'un laj ya'ay ti tsacbil ta chamele. 13Li Ezequiase lec laj ya'ibe sc'op. Laj yac'be yil scotol li sc'ulejale, ja' li saquil taq'uin, c'anal taq'uin, perfumeetic, lequil aceiteetic, xchi'uc snail abtejebaletic yu'un sventa pleitoe. Mu'yuc xa c'usi ti muc xac'be yil te ta spasubmantale; scotol laj yac'be yil ti bu c'alal sventainoje. 14Ja' yu'un li j'alc'op Isaiase ital sc'opan li ajvalil Ezequiase, jech laj yalbe:
—¿Bu liquemic tal li viniquetique; c'usi laj yalbicot? —xut.
Itac'ov:
—Liquemic tal ta namal banamil, ta Babilonia —xi.
15Itac'ov li Isaiase:
—¿C'usi laj yilic li' ta apasubmantale? —xut.
—Laj yilic scotol li c'usitic oy tee. Xquechet laj cac'beic yil scotol li c'usitic oy li'i —xut.
16Li Isaiase jech laj yalbe li Ezequiase:
—A'yo ava'ay c'usi chal li Muc'ul Diose: 17“Scotol li c'usitic oy ta apasubmantale xchi'uc li c'usitic stsobojic ono'ox comel li amoltotac xchi'uc c'alal to tanae, ta to sta yorail chich'ic batel ta Babilonia scotol. Me jutuc mu'yuc c'usi chcom.#2 R 24.13; 2 Cr 36.10. 18Jech noxtoc li amomnich'nabtaque ta to x'ic'atic batel ta Babilonia. Ta xich'ic pasel ta capon; te chich'ic mozoinel ta spasubmantal li ajvalil ta Babiloniae”,#2 R 24.14-15; Dn 1.1-7. xi li Muc'ul Diose —x'utat yu'un li Isaiase.
19Li Ezequiase jech la snop: “Ti jayib c'ac'al to cuxulune, mu'yuc ta jta jvocol”, xi. Jech la stac'be li Isaiase:
—Li c'usi laj yal Muc'ul Diose toj lec —xut.
Icham Ezequías
(2 Cr 32.32-33)
20Li yantic sc'oplal Ezequiase, xchi'uc li c'usitic ivu' yu'un la spase, xchi'uc ti c'u x'elan la spasbe stanqueal vo'e xchi'uc li sbe vo' sventa chc'ot ta lum yu'une, te ts'ibabil ta svunal c'usitic ic'ot ta pasel yu'un li ajvaliletic ta Judae. 21C'alal ichame, ja' i'och ta xq'uexol jun xnich'on, Manasés sbi.
Currently Selected:
2 Reyes 20: TZE97
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.