1 Tesalonicenses 4
4
Lec chil Dios me lec c'usi ta jpastique
1Quermanotac, oy to c'usi chacalboxuc tal. Ta jc'anboxuc vocol ta atojolic, ta jtaq'uioxuc ta sventa li Cajvaltic Jesuse, jech me xapasic o batel jech chac c'u cha'al laj achanic ta jventacutique, yu'un ja' no'ox jech tsc'an chapasic o, jech lec chil li Diose. Ech'em to jech tsc'an chapasic batel.
2Yu'un xana'ic lec c'usi chanubtasel laj calcutic comel ava'yic ta sventa li Cajvaltic Jesuse. 3Yu'un li c'usi oy ta yo'nton Diose, ja' ti ac'o lecubanic batele, ti ac'o acomtsanic li mulivajele. 4Jujunoxuc tsc'an ac'o ana'ic lec c'u x'elan chaventain abec'tal atuquic;#4.4 Abec'tal atuquic - Oy bu sloq'uesbeic smelol ti ja' sc'oplal c'u x'elan sc'an spas ta stojol yajnil jun vinic. tuc' xapasic ta stojol, ich'ic me ta muc'. 5Mu me ja'uc no'ox xapas c'usi tsc'an abec'talic jech chac c'u cha'al tspasic li boch'otic mu xotquinic Diose. 6Mu me boch'o xavac'beic svocol, mu me boch'o xalo'laic ta sventa li mulil le'e. Yu'un ta me spac sutel stuc li Cajvaltique jech chac c'u cha'al calojcutic xa ono'ox ava'yique. 7Yu'un muc ic'biluticuc yu'un Dios sventa ac'o jpastic c'usi tsc'an jbec'taltic; ja' ic'bilutic sventa ac'o lecubcutic batel. 8Me oy boch'o ja' no'ox tsna'le li mantal li'i, muc ja'uc cristiano tsna'le; ja' tsna'le li Dios ti laj yac'butic li Ch'ul Espiritue.
9Ta sventa ti tsc'an chac'anan abaique, mu xa persauc ta jts'ibacutic tal ava'yic. Yu'un achanojic xa lec atuquic ta sventa Dios ti chac'anan abaique. 10Xchi'uc ac'anojic noxtoc scotol li jch'unolajeletic ta scotol avosilalic ta Macedonia banamile. Pero ta jc'anboxuc vocol ta atojolic quermanotac, ti ech'em to jech ac'o apasic batele. 11Ja' me tsotsuc sc'oplal chava'yic ti jun avo'nton lamaloxuque. Ja' no'ox ac'beic yipal spasel li c'usi tsc'an pasel avu'unique. Abtejanic jech chac c'u cha'al laj calboxuc comele. 12Yu'un jech lec cha'ilatic yu'un yan cristianoetic, yu'un mu ja'uc chapat avo'ntonic ta stojol yan.
Sc'oplal chcha'tal Cajvaltic
13Quermanotac, ta jc'ancutic noxtoc ti ac'o ana'ic c'usi chc'ot ta pasel ta stojol li boch'otic chamenic xae, yu'un jech mu xavat avo'ntonic jech chac c'u cha'al li boch'otic mu'yuc c'usi tsmalaique. 14Yu'un me jch'unojtic ti icham li Jesuse xchi'uc ti icha'cuxie, ja' no'ox jech ec li boch'otic oyic ta stojol Jesús c'alal chchamique, ta x'ic'atic batel yu'un Dios c'alal chtal li Jesuse.
15Ja' yu'un chcalcutic ava'yic c'usi laj yal li Cajvaltique: Vu'utic ti cuxulutic toe, me jech li' to cuxulutic o chvul stautic li Cajvaltique, muc vu'uticuc ba'yuc chijelovutic batel yu'un li jch'unolajeletic ti chamenic xae. 16Yu'un c'alal chyal tal ta vinajel stuc li Cajvaltique, oy boch'o tsots ch-avan tal, tsots chal mantal. Tsots ch-avan tal li banquilal yaj'almantal Diose, xchi'uc chca'itic oq'ues noxtoc. Jech li boch'otic xch'unojic Cajvaltic c'alal chchamique, ja' ba'yuc ta xcha'cuxiic. 17Me jech to cuxulutic chvul stautic o vu'utic ti comenutic toe, co'ol chijcuchat muyel ta toc jchi'uctic, yu'un jech co'ol chbat jtatic li Cajvaltic te ta toyole, jech te ta jchi'intic o sbatel osil.#Mt 24.30-31; Mr 13.26-27; 1 Co 15.51-52. 18Ja' yu'un muq'uibtasbo aba avo'ntonic ta sventa li c'op li'i.
Currently Selected:
1 Tesalonicenses 4: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.