1 Crónicas 17
17
Li Davide oy c'usi la xchapan xchi'uc Dios
(2 S 7.1-29)
1C'alal nacal xa'ox ta spasubmantal li ajvalil Davide, jech lic yalbe li j'alc'op Natane:
—Q'uelavil, li vu'une nacalun xa ta jpasubmantal ti pasbil lec ta ch'ut te'e, pero li xcaxail smantal Muc'ul Diose te no'ox vuchul ta yolon poq'uetic —xut.
2Itac'ov li Natane:
—Xu' chapas scotol li c'usi lec anopoje, yu'un li Muc'ul Diose li' xchi'inojot —xut.
3Te no'ox ta yac'ubalil ital c'opanatuc yu'un Dios li Natane, jech i'albat: 4“Batan, jech xbat avalbe li cajtunel Davide: ‘Jech chayalbot li Muc'ul Diose: Muc vo'cot oy ta aventa chapasbun jna ti bu xu' chinaquie. 5Ta sliqueb c'alal la jloq'uesic tal ta Egipto li achi'iltac ta israelale, mu'yuc ono'ox xinaqui ta junuc ch'ulna. Ta carpanaetic no'ox linaqui batel. 6Buyuc no'ox la jchi'inic tal ta xanubal, me junuc banquilaletic ti cac'ojbe yabtel tsventainic achi'iltaquique; mu'yuc la jc'anbeic ti ac'o spasbicun lec jbejuc ch'ulna ta ch'ut te'e’, xi. 7Ja' yu'un jech chayalbot li Muc'ul Dios ti tspas ta mantal scotol te ta vinajele: ‘Vu'un laj quic'ot loq'uel tal ta scoralil achij, xchi'uc ti c'alal te chaxanov ta spat achijtaque, yu'un vo'ot chacom ta banquilal yu'un scotol li jteclumale. 8La jchi'inot ti buyuc no'ox labate. La jtsalbot scotol li avajcontra c'alal la scontrainicote, xchi'uc laj cac' pucuc lec ac'oplal jech chac c'u cha'al puquem sc'oplal li boch'otic toj tsots yabtelic li' ta banamile. 9Jech noxtoc la jchapanbe lec jun yavil stuquic li jteclum cu'une, jech te laj quiq'uic jelovel yu'un ac'o naquiicuc ta yosil stuquic, jech mu xa boch'o x'uts'intaatic; mu xa x'ac'bat svocolic yu'un li chopol cristianoetic jech chac c'u cha'al ta sliqueb 10ti c'alal lic jt'ujbe jchapanvanejetic yu'unique. Vu'un ta jtsalbot scotol li avajcontrae. Jech noxtoc chcac' ana' ti chacac'bot ep amomnich'nabtaque. 11C'alal tsta yorail chacham, chbat achi'in atot ame'e, vu'un ta xlic jva'an junuc amomnich'on; ta jtic' ta ajvalilal. 12Ja' chlic spasbun jbej ch'ulna cu'un. Mu xcac' lajuc o li yabtel ta ajvalilale. 13Vu'un stotun chic'ot; ja' jnich'on ta xc'ot o ec.#2 Co 6.18; Heb 1.5. Mu'yuc ta jpojbe c'uxubinel cu'un jech chac c'u cha'al la jpojbe li boch'otic ba'yuc jelovenic avu'une. 14J'ech'el ta xcac' comuc o ta ch'ulna cu'un. J'ech'el ta jventain o; mu'yuc ta xcac' lajuc o sc'oplal li yabtel ta ajvalilale’, uto li Davide”, x'utat yu'un Dios li Natane.
15Ti c'u x'elan i'albat ya'ay, xchi'uc ti c'u x'elan i'ac'bat yil yu'un Dios li Natane, ja' jech laj yalbe ya'ay scotol li Davide. 16Li ajvalil Davide i'och batel, bat sc'opan li Muc'ul Diose, jech laj yalbe: “Muc'ul Dios, ¿c'usi cabtel li vu'une xchi'uc c'usi yabtel li cuts' calaltac ti laj avic'uncutic tal li' to c'alale? 17Mu'yuc to muc' chava'ay li c'usi apasojbune, ja' yu'un laj avalbun noxtoc ti ta to xtal jmomnich'nabtac ta ts'acal, vu'un li avajtunelune. Muc'ul Dios, laj acuyun jech chac c'u cha'al jun vinic ti toj leque. 18¿C'usi yan xu' chacalbot ta sventa ti laj avich'un ta muc', vu'un li avajtunelune? Yu'un vo'ot xavotquin li avajtunele. 19Muc'ul Dios, scotol li c'usitic toj muc'tic laj apase ja' ta sventa ti lec ac'anoj li avajtunele, xchi'uc ta sventa ti jech la sc'an avo'ntone, yu'un jech ac'o vinajuc ac'oplal. 20Muc'ul Dios, mu'yuc yan Dios jech chac c'u cha'al vo'ot; vo'ot no'ox atuc Diosot. Ja' ono'ox jech ca'yojcutic tal ta jchiquincutic. 21Ja' no'ox stuc jech jun muc'ta lum li' ta banamil li jteclum avu'une, ja' li israeletique. Vo'ot laj apoj, jech ja' ateclumal ic'otic o. Laj apuc batel ac'oplal ta sventa ti toj muc'tic, ti toj tsotsic c'usi laj apase. Li ateclumal ti laj apoj loq'uel tal ta Egipto banamile laj anutsbe loq'uel ta stojolic li yajvaltac muc'tic lumetique. 22Yu'un vo'ot laj avic' ta atojol li Israele, ja' ateclumal ic'otic o. Vo'ot li Muc'ul Diosote, vo'ot Diosot yu'unic ic'ot o.
23“Ja' yu'un Muc'ul Dios, j'ech'el me jech c'otuc o li c'usi laj avalbun, vu'un li avajtunelune, xchi'uc c'usi laj aval ta sventa li jmomnich'nabtaque. Ac'o me c'otuc ta pasel li c'usi laj avale. 24Li c'usi laj avale, jech ac'o comuc o, xchi'uc j'ech'el jech ac'o ich'biluc o ta muc' li abie. Jech ac'o yich' alel o: ‘Li Muc'ul Dios ti tspas ta mantal scotole ja' Dios yu'un Israel; ta melel ja' Dios ta sventa li israeletique’, ac'o xiicuc. J'ech'el me te ac'o comicuc o ta atojol jmomnich'nabtac, vu'un li avajtunelune. 25Dios cu'un, laj xa avalbun ti j'ech'el chcom o ta atojol li jmomnich'nabe, ja' yu'un vu'un li avajtunelune, ta jc'anbot tsots vocol ta atojol. 26Muc'ul Dios, vo'ot Diosot ti laj xa avalbun c'usitic lec, vu'un li avajtunelune. 27Li' ta orae chac'an chavac'be bendición jmomnich'nabtac, vu'un li avajtunelune, yu'un jech j'ech'el te chcomic o ta atojol. Laj xa avac'be bendición, j'ech'el me te yich'ojicuc chcomic o”, xut.
Currently Selected:
1 Crónicas 17: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
