1 Crónicas 10
10
Icham xchi'uc xnich'nab li Saule
(1 S 31.1-13)
1Li filistaetique lic scontrainic li israeletique jech ijatovic batel, pero ep ichamic te ta vits Gilboa. 2Li filistaetique la snutsic batel li Saúl xchi'uc xnich'nabe. Te la smilbeic li xnich'nabe, ja' li Jonatán, Abinadab, xchi'uc Malquisuae. 3Ts'acal ja' xa no'ox lic scomantaic li Saule. Li j'ac'flechaetique la staic ta be; ep ituch' yu'unic ta flecha. 4Li Saule jech laj yalbe li jcuch-abtejebal yu'une: “Loq'ueso avespada, milun yu'un jech mu ja'uc xtal yuts'intaicun li cristianoetic le'e ti mu'yuc yich'ojic circuncisione, jech mu spasbicun c'usi tsc'an yo'ntonic”, xut.
Pero li yajcoltaubbaile muc sc'an spas, yu'un ta xi'. Jech la sloq'ues yespada stuc li Saule; la smil sba o. 5C'alal laj yil jcuch-abtejebal ti icham xa li Saule, la sloq'ues yespada; la smil sba ec. 6Ja' yorail te icham li Saúl xchi'uc oxib xnich'nabe; jmoj te ichamic o. 7Li israeletic te nacajtic ta stenlejaltique laj ya'yic ti ijatov batel li soldadoetic yu'unique xchi'uc ti icham xa li Saúl xchi'uc xnich'nabe, jech la scomtsanic li lumetic yu'unique; ijatovic batel. Ja' te ital naquiicuc li filistaetique.
8Li filistaetique ta yoc'omal bat sloq'uesbeic c'usitic oy yu'un li boch'otic ichamique; laj yilic te telajtic ta vits Gilboa xchi'uc xnich'nab li Saule. 9Ts'acal la sloc'beic sc'u' li Saule; la sc'ocbeic sjol, xchi'uc laj yich'beic batel yabtejebic. La staquic batel j'almantaletic ta scotol yosilalic, yu'un bat yalbe xchi'iltaquic xchi'uc diosetic yu'unic li c'usi lec ic'ot ta pasele. 10Li yabtejeb Saule te c'ot sjoc'anic ta xch'ulna diosetic yu'unic, xchi'uc te la sjoc'anbeic ta xch'ulna Dagón li sjole.
11Li israeletic te nacajtic ta Jabes Galaade laj ya'yic c'usi la spasbeic li Saúl xchi'uc xnich'nabe, 12jech lic xchap sc'opic scotol li viniquetic ti lec tsots yo'ntonique, bat yich'beic tal li sbec'tal Saúl xchi'uc xnich'nabe. Te ic'ot smuquic ta yolon jpets tulan ta Jabes. Vucub c'ac'al laj yictabeic yiximal.
13Ja' jech icham li Saule, yu'un la stoy sba ta stojol Muc'ul Dios, la sbajbe smantal,#1 S 13.8-14; 15.1-24. xchi'uc ay sc'opan jun me' j'ic'ch'ulelal.#Lv 19.31; 20.6; 1 S 28.7-8. 14Muc ja'uc la sc'opan li Muc'ul Diose. Ja' yu'un imilat yu'un li Muc'ul Diose, ja' laj yac' ochuc ta xq'uexol li David, xnich'on Isaie.
Currently Selected:
1 Crónicas 10: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
