1 Crónicas 11
11
I'och ta ajvalilal ta Israel, xchi'uc ta Judá li Davide
(2 S 5.1-5)
1Scotol li israeletique la stsob sbaic batel, bat sc'opanic li David te ta Hebrone. Jech c'ot yalbeic: “Li vu'utique jun jbec'taltic, jun jch'ich'altic. 2Ta melel ja' to'ox ajvalil cu'uncutic li Saule, pero vo'ot ono'ox laj acoltauncutic ta sventa pleito; laj avic'uncutic sutel tal. Jech noxtoc yalojbot ono'ox Muc'ul Dios cu'untic ti vo'ot chlic aventainuncutic, chlic ochan ta banquilal cu'uncutique”, xutic.
3Te italic scotol li moletic ta Israele, tal sc'opanic li ajvalil David te ta Hebrone. Ja' yu'un li Davide oy c'usi lic xchapanic ta stojol Muc'ul Dios. Jech te la stiq'uic ta ajvalilal ta Israel li David jech chac c'u cha'al yaloj ono'ox Muc'ul Dios ta stojol Samuele.
Li Davide la spoj li tsatsal coralton yu'un lum Sione
(2 S 5.6-10)
4Li Davide la xchi'in batel scotol li israeletique ibatic ta Jerusalén, ja' li Jebús yan sbie. Ja' to'ox te nacal li jebusetique.#Jos 15.63; Jue 1.21. 5Li jebusetique jech laj yalbeic li Davide: “Mu xu' cha'och tal li'i”, xutic. Pero li Davide laj ono'ox spoj li coralton yu'un lum Sión#11.5 Sión - Q'uelo Glosario. ti lec tsots pasbile, ja' li Lum yu'un David xi xa sbie. 6Li Davide jech ono'ox yaloj: “Li boch'o ba'yuc ch-och smil li jebusetique ja' chcom ta banquilal jpasmantal”, xi ono'ox. Li boch'o ba'yuc bat smile ja' li Joab yol Sarviae. Jech ja' icom o ta banquilal. 7Li Davide te inaqui o ta yut lum. Ja' yu'un Lum yu'un David xi sbi laj yac'beic. 8La xcha'va'an noxtoc li yantic naetic te ta joyobe. Te la sliques ta yamaq'uil ti bu nojesbil ta lume c'alal to ta coralton. Jech ec li Joabe la xcha'va'anan li yantic naetic yu'un lume. 9Li Davide i'ayin lec tsatsal yo'nton, yu'un te chi'inbil o yu'un li Muc'ul Dios ti ech'em stsatsale.
Sc'oplal svinictac David ti lec tsots yo'ntonique
(2 S 23.8-39)
10Li'i ja' banquilaletic yu'un svinictac David ti lec tsots yo'ntonique, ti la scoltaic ta yabtel sventa ajvalilal li Davide, xchi'uc jmoj la stiq'uic ta ajvalilal xchi'uc scotol li israeletic jech chac c'u cha'al yaloj ono'ox li Muc'ul Diose.
11Li sbiic svinictac David ti lec tsots yo'ntonique ja': Jasobeam xnich'on Hacmoni, ja' banquilal yu'un li lajuneb xcha'vinic (30) lec tsots yo'ntonique, xchi'uc ja' ti oy jun velta la smil ta slanza vo'lajunvinic (300) viniquetique. 12Ja'o te xtal Eleazar xnich'on Dodo ahoh vinic; ja' jun li oxibic ti lec tsots yo'ntonique. 13Le'e ja' te xchi'inoj David ta Pas-damim ti c'alal la stsob sbaic tal sventa pleito li filistaetique. Li israeletique ijatovic batel scotolic. Oy jsep cebada te ts'unbil. 14Ja' te la sva'an sbaic lec li svinictac Davide; la spoj sbaic, jech tsalbil ic'ot yu'unic li filistaetique yu'un icoltaatic yu'un li Muc'ul Diose.
15Li oxib banquilaletic yu'un li lajuneb xcha'vinic (30) lec tsots yo'ntonique iyalic batel ta Adulam nailch'en yo' bu oy li Davide. Li filistaetique te spasoj lec scarpanaic ta stenlejaltic Refaim. 16Li Davide ja'o te oy ta tsatsal nailch'en ti c'alal ja'o te xa oy jtsob filista soldadoetic ta Belene. 17Li Davide te lic yal li c'usi tsc'ane: “Oyuc boch'o xtal yac'bun cuch' li vo' ta pozo ti te oy ta nopol sti' Belene”, xi.
18Ja' yu'un li oxib ti lec tsots yo'ntonique ijelovic batel yo' bu spasoj scarpanaic li filistaetique, bat slupic tal li ya'lel pozo te ta nopol sti' Belene. Laj yich'beic batel li Davide, pero muc sc'an xuch'. La smal ta stojol Muc'ul Dios. Ja' smoton ic'ot yu'un, jech laj yal: 19“Ac'o scoltaun li Diose; mu'yuc ta xcuch' li vo'e. Yu'un me chcuch'e, xco'laj xchi'uc ja' chcuch'be xch'ich'alic li viniquetique, yu'un sq'uelanoj sbec'talic o ta yich'el tal li vo'e”, xi. Jech muc xuch' o.
Le'e ja' la spasic li oxib viniquetic ti lec tsots yo'ntonique.
20Li Abisai yits'in Joabe ja' banquilal yu'unic li lajuneb xcha'vinic (30) tsots yo'ntonique. Oy jun velta bat smil ta slanza vo'lajunvinic (300) viniquetic, pero ivu' yu'un. Jech lec ich'bil ta muc' ic'ot yu'un li lajuneb xcha'vinique (30). 21Ja' lec ich'bil ta muc', jech icom ta banquilal. Pero muc ono'ox xco'laj xchi'uc li oxibic ta ba'yuque.
22Li Benaía xnich'on Joiada liquem ta lum Cabseele lec tsots yo'nton noxtoc; ep c'usitic ivu' yu'un la spas. La smilbe chib xnich'on Ariel te ta Moab, xchi'uc iyal batel ta yut ch'en ti c'alal ja'o chac' ep tayoe. Te la smil jcot león. 23Jech noxtoc la smil jun natil egipto vinic. Jutuc mu sta o'lol yoxibal metro snatil, yich'oj lec slanza, muc' balbal jech chac c'u cha'al sjalubil poc' li yoc slanzae. Ta te' no'ox la scoltabe loq'uel ta sc'ob li slanzae, jech la smil o comel ta slanza stuc. 24C'alal jech la spas li Benaía xnich'on Joiadae, lec ich'bil ta muc' ic'ot xchi'uc li oxib lec tsots yo'ntonique. 25Ja' no'ox stuc lec ich'bil ta muc' ic'ot yu'un li lajuneb xcha'vinique (30), pero muc ono'ox xco'laj lec xchi'uc li yan oxibic ta ba'yuque. Jech li Davide ja' la stic' ta jpasmantal yu'un li jtsob jchabivanejetic yu'un stuque.
26Li boch'otic tsots yo'ntonique ja': Asael yits'in Joab; Elhanán xnich'on Dodo liquem ta Belén; 27Samot liquem ta Harod; Heles paltita vinic; 28Ira xnich'on Iques liquem ta Tecoa; Abiezer liquem ta Anatot; 29Sibecai liquem ta Husat; Ilai ahohíta vinic; 30Maharai liquem ta Netofa; Heled xnich'on Baana liquem ta Netofa noxtoc; 31xchi'uc Itai xnich'on Ribai liquem ta Gabaa ta yosilal Benjamín; Benaía liquem ta Piratón; 32Hurai liquem ta uc'um Gaas; Abiel arba vinic; 33Azmavet liquem ta Bahurim; Eliaba liquem ta Saalbón; 34xchi'uc xnich'nab Hasem liquem ta Gizon; xchi'uc Jonatán xnich'on Sage, ararita vinic; 35Ahíam xnich'on Sacar, ararita vinic noxtoc; Elifal xnich'on Ur; 36Hefer mequerat vinic; Ahías pelonita vinic; 37Hezrai liquem ta Carmel; Naarai xnich'on Ezbai; 38Joel ja' li xchi'il ta voq'uel Natán; Mibhar xnich'on Hagrai; 39Selec liquem ta Amón; Naharai liquem ta Beerot, ja' li jcuch-abtejebal yu'un Joab yol Sarviae; 40Ira xchi'uc Gareb liquemic ta Jatir; 41Urías heteo vinic; Zabad xnich'on Ahlai; 42Adina xnich'on Siza liquem ta Rubén, ja' li banquilal yu'un rubenetique, xchi'uc lajuneb xcha'vinic (30) viniquetic xchi'inoj; 43te oy noxtoc Hanán xnich'on Maaca; Josafat mitnita vinic; 44Uzías liquem ta Astarot; Sama xchi'uc Jehiel, xnich'nab Jotam liquem ta Aroer; 45Jediael xnich'on Simri, xchi'uc yits'in Joha tizita vinic; 46Eliel liquem ta mahanaim; Jerebai xchi'uc Josavía, xnich'nab Elnaam; Itma liquem ta Moab; 47Eliel, Obed, xchi'uc Jaasiel liquemic ta Soba.
Currently Selected:
1 Crónicas 11: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
