Marc 9
9
Boyenchibe ba Jésus. Jésus abelize moto a bokono ba ba mituku. Achakole bayekoli tonga na bowe na bowumwele ba wango. Ateye bango tonga na mbèchi.
1Wango alobaki na bango dyòkò bwe: ”Nga lobe na beni nènè: O phanyak’a bakoncha bango badi chu owoni ba, bango tite na bowe kokoko ncho bango tayènè bokonchi ba Nzambe boya na nguli a bwango.”
2O machu machamano malekanaki, Jésus akwaki Pierre na Jacques na Jean, akièki na bango o bokoli bochanda; ebèki ondo ko bango phencha. N’èdyalele a wango eyenchibaki o michò ma bango.
3Bilamba ba wango bilangaki, bilekaki ephumbele, moto nyò mò o che owoni oyicha bophumbize bilamba twana byango ka.
4Elie na Moise badikizaki manchoto ma bango na bango, na bango badyokanaki na Jésus.
5Pierre ayambolaki na lobaki na Jésus bwe: ”Mokuba, edi enyòngò na banga enongo idyala owoni, tika banga botonge mandako machato, yena a kò, yena a Moïse, yena a Elie.”
6Wango aboyeba iwò iloba ka, tonga bango balekaki etilele.
7N’èphephelo eyakaki n’èdiphaki bango, n’ikingo ichònòki o ch’èphephelo, dyango ilobaki bwe: ”Yena edi Mwan’a bole a nga akonde, bowokaka iwò a wango.
8O bango batokoloki makièkèkè ma bango dyolo, bango baboyènè moto akbwi o phannyak’a bango ka, ko Jésus phencha.
9O bango babachunde o bokoli, Jésus achimbaki bango bwe, tochakolake moto nyò mò iwò di, kokoko ncho Mwan’a bole a moto tawumwa o bowe.
10Bango babombaki mawò mango o cha mye ma bango, bayanganaki bwe: Bowumwe o bowe edi bwe?
11Bango bayangaki wango, balobaki bwe: Bato ba bokièngu ba mikanda balobe bwe, edi kokomo Elie taya nò dyò.
12Jésus ayambolaki bango bwe: ”Nènè, Elie taya bocho na wango tanyèza beka bichò. Eyiche bokòtibe tonga na Mwan’a bole a moto wango tachèbè makama na tadyanchwiba bwe?
13Ko nga lobe na beni bwe, Elie abiya dyòkò, na bango bakielaki na wango ko bango badingaki bona, ko ekòtibaki tonga na wango bona.”
14O bango bapholaki o ma bana bayekoli, bango bayènèki bato bakama bakokanaki ma bango, na bana baphele ba bokièngu ba mikanda bayikaki mibambi na bango.
15O bato bachò bayènèki Jésus dyolo, bango bachemwaki bangunchwaki, bakièki bodyokize wango.
16Wango ayangaki bango bwe: ”Beni boyikane mibambi, mbekende?”
17Moto mò o phanyak’a bango ayambolaki wango bwe: ”Mokuba, nga bèkèki mwan’a bole a nga o ma kò, wango adi n’èyaye ènguma.
18O binongo bichò byango yango ekande wango, yango ekbokize wango, na wango alukize mawulu, n’achulinye minò, na wango achekwe ko moto mowaki bona. Nga yongaki bayekoli ba kò bwe, batubize yango, ko bango baboyicha ka.”
19Wango ayambolaki alobaki na bango bwe: ”Beni elòngò a bobiko bu bodi n’èchingane twa, nga tabika na beni bobiko bokama kwe? Nga tadyala chabo na beni bobiko bokama kwe? Bobèkè wango o ma nga.”
20Na bango babèkèki wango o ma Jésus. O wango ayènèki Jésus, eyaye ekbokizaki mwana dyolo, na wango akwaki o che, abinganaki, n’alukizaki mawulu.
21Jésus ayangaki chango a wango bwe: ”Ibika na wango kobona bobiko bokama?” Wango ayambolaki bwe: Ebichònò na wango o bolèngè.
22N’èyaye ebwaki wango o meya n’o may kobona mabwaka makama, tonga n’iboma wango. Ko mo k’òyiche bokiele eyeka, owana dikiza banga elumba, okieliza banga.
23Komoyango Jésus alobaki na wango bwe: ”K’òlobe bwe, mo nga yiche? Koncha wango echingane tayicha bokiele beka bichò.”
24Chango a mwana angamwaki dyolo, alobaki bwe: ”Nga chingane, kieliza nga o ch’iphomunya a nga.”
25O Jésus ayènèki bato bakama baya na mbangu ondo, wango achimbaki eyaye a mbindo, alobaki bwe: ”Kò eyaye ènguma a muna, n’ènguma a matwe, nga yanche kò bwe: Tuba o cha wango, tokolake o cha wango dyòkò.”
26Na yango engamwaki, n’èkbokizaki wango nikichi n’ètubaki, na mwana abèki ko mowaki bona, bato buko balobaki bwe, wango awa.
27Ko Jésus aphilaki ebòkò a wango, atèmizaki wango chu, na wango atèmèki chu.
28Chima o Jésus akolaki o ndako, bayekoli ba wango bayangaki wango o bango babèki bango phencha bwe: ”Ne banga boboyicha botubize yango ka, mbekende?”
29Wango ayambolaki bwe: ”Eyeka elenge yena oyicha botube bwabona ka, kokomo n’iyonga na bochabole bekidya phencha.”
30Bango balangwaki ondo, balekanaki o Galilée ko wango abodinga moto nyò mò ayebe iwò dyango ka.
31Tonga wango adikizaki bayekoli ba wango, alobaki bwe: ”Mwan’a bole a moto tayiliba o mabòkò ma bato na bango taboma wango, ko o bango babomaki wango, o machu machato talekana wango tawumwa dyòkò.”
32Ko bango baboyeba mawò mango ka, batilaki enongo iyanga wango.
33Na bango bapholaki o Capernaüm. O bango bakolaki o ndako, Jésus ayangaki bango bwe: ”Mawò mango beni bolobanaki echiki, kombo nda?”
34Ko bango babèki myo, tonga bango badyokanaki echiki tonga n’iyeba koncha wango elekaki bonè.
35Wango adyaki bwa, abwangaki dyomu na babale ma wango, alobaki na bango bwe: ”Koncha wango edinge bodyale mwe bocho, tadyala mwe chima a bato bachò, na mochali a bato bachò.”
36Na wango akwaki mwana mò, atikaki wango o phanyak’a bango, chima wango alèlèki wango o cha mabòkò ma wango, alobaki bwe:
37Koncha wango eyambe mwana ko wango wo bona o kombo a nga, wango ayambe nga, na koncha wango eyambe nga, wango oyamba nga phencha ka, ayambe nà koncha wango etindaki nga.”
38Jean alobaki na wango bwe: ”Mokuba, banga boyènèki moto atubizaki biyaye bibe o kombo a kò, wango adi olòndò banga ka, na banga bochimbaki wango, tonga wango adi olòndò banga ka.”
39Ko Jésus alobaki bwe: ”Tòchimbake wango, tonga moto nyò mò wango akiele botoma bochimube ba nguli o kombo a nga, wango adi oyicha bolobe iwò ibe na nga dyolo ka.
40Tonga koncha wango edi oyina banga ka, wango adinge banga.
41Koncha wango ephè beni buku ba may m’inywa o kombo a nga, tonga beni bodi bè Christ, nga lobe na beni nènè, iwuta a wango tichumbani.
42Koncha wango echukwize mwana moki mò n’ichena o phanyak’a bana bango bachingane nga, eleki bonyòngò na wango, mo bango batinge iboko inyuka beka o kingo a wango tonga n’ibwaka wango o ediba enè.
43Mo ebòkò a kò echukwize kò n’ichena kièna yango, Mòchi enyòngò k’òkole o bomwè ko ebongo bona o mata m’idyala na mabòkò mabale na k’òphole o Géhenne, o enongo yango meya myango tidimwi.
44Echoko yango nyoke tiwe na meya tidimwi.
45Mo ekolo a kò echukwize kò n’ichena, kièna yango. Mòchi enyòngò k’òkole o bomwe ko moto ichèku bona o mata m’idyala makolo mabale na k’òbwakibe o Géhenne.
46Echoko yango nyoke tiwe na meya tidimwi.
47Mo dichò akò echukwize kò n’ichena, phongolo dyango, Mòchi enyòngò k’òkole o bokonchi ba Nzambe na dichò dyò phencha o mata m’idyala na michò mibale na k’òbwakibe o Géhenne.
48Echoko yango nyoke tiwe na meya tidimwi.
49Moto ikika tachingiba na meya ko bachinge beka monguta bona.
50Monguta modi eyeka enyòngò, ko mo monguta mochalwa beni tòwotiza mwango na nde? Bodyalaka na monguta o cha mye ma beni na phi elenge ko yango.”
Currently Selected:
Marc 9: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
