Markus 8
8
At Yesus en aphwami esan ap nak enebe 4.000 soʼboru eseik-ʼbeseiksogo wogentesi wene
(Matius 15:32-39)
1Asogo tigisema agauwa wei nak welegesarik en, aphwami esanat pobuk at Yesus eʼbek odoktu egesa. Asogo wegesarik soʼboru modok erlak agama re, noʼgwe no ʼgelaʼge aga. Asogo agama re, at Yesus en osi iak wogu legesa aʼge ebano worlentesimu wegesema re, disogo moʼgulentesi,
2“Nosi yu logwe. Is aphwami esan yema nenemin agauwa henagan pam nogogerikmu re, onsoʼboru modok erlak agama, noʼgwe no ʼgelaʼge agama oruak ai en, nede en nede heselegei o.
3Is soʼboru weat onowi pam peragonoboma, is pema onowi walek en wegesarikmu re, ebelema lagaimu dawat hwerlil yawat hwerlil louwano yo,” oluk moʼgulentesi. 4Asogo moʼgulentesimu at osi iak wogu legesa aʼge ebano en e, disogo moʼgulegisa,
“O leimu aphwami onowi werik modok erlakma yema re, is enebe aʼbigatma soʼboru roti aʼge onogumsogo nouwagoluk, ebe ʼgeba aʼge wokho wogonto yo. Mia o,” oluk moʼgulegisema re, 5at en e,
“His soʼboru roti aʼge meren pekharok welegep,” oluk hin wesimu re, is en e,
“Erlak o. We, ebe sabiren nak pekharok welege o,” oluk moʼgulegisa. 6Asogo moʼgulegisema, at en e, aphwami aʼbik odoktak welegesa aʼge ebano ʼgwiangma huremagoluk moʼgulentesi. Moʼgulentesirik soʼboru roti aʼge sabiren aʼge eriano eʼgigem wesirik e, Allah hau wusogo re, eʼgik en soʼboru roti aʼge eriano ʼgusogo aphwami esan ebano soʼburontouwagoluk, osi iak wogu legesa aʼge ebano eneʼgigem pesimu soʼburentigisa. 7Soʼburentigisarik e, hiane wei aʼge we, wei nak oruakma re, Yesus wogegisema, Allah hau wusogo asogoat soʼburontouwagoluk moʼgulentesi. 8-9Asogo moʼgulentesimu re, is en soʼburentigisema onogumsogoat neʼgesa. Aphwami enebe esan aʼbigat eneʼgik wenakho re, 4.000 ʼgelaʼge neʼgesarik, ado dedilogo pegesema re, Yesus osi en mul egeik aʼge sabiren yagasogo pegesa. Asogo pegesema at Yesus en aphwami ebano onowi loʼgwe peragenebesi. 10Peragonoboluk erianoat, at Yesus osi iak wogu legesa aʼge ebano eneminat ik so pam ʼgoluk ʼgwigisarik so wusogo o Dalmanuta liplau wegesa.
Ap Farisi aʼge en e, “Nis pobi hobul en, hat en elalin aʼge mesik tin o,” oluk Yesus moʼgulegisa wene
(Matius 16:1-4)
11At Yesus lak o Dalmanuta liplau wegesema re, ap Farisi aʼge logon Yesus emin weneane ogulat ebabut ʼbaluogoluk, eʼbek wegesarik e, disogo moʼgulegisa,
“Hat hebe Allah en perakhobou wagama wegen holuk e, nis en pobi hobul en, hat elalin aʼge mesik tin da,” oluk moʼgulegisa. 12Moʼgulegisema re, at ede pisogo ʼgelaʼge iak opmane eselat e, disogo moʼgulentesi,
“His aphwami o yogodak welegep aʼge yema en ogulat e,
Nis en pobi hobul en hat en elalin aʼge mesik tin da, oluk moʼgulnogu legep yema nopaget. An niak demat moʼgulhentaik o,
Pobi nobogup en an en elalin aʼge mesik tik modok erlak o,” oluk moʼgulentesi. 13Asogo moʼgulontoluk e, is aphwami ebano o eba ukpoluk ik so pam ʼgwigisarik e, ik so wusogo pobuk ik iak etle akhit libegesa.
“Ap Farisi aʼge emin, Herodes emin, onowene re, eʼgen soʼboru roti aʼge poruagoluk ogola ʼgwelabogwi aʼge ai ʼgelaʼge o,” oluk moʼgulentesi wene
(Matius 16:5-12)
14Ik omugwe ano etle akhit libomogoluk e, Yesus osi ebano soʼboru roti aʼge memerak poluk mesik nak e, ik so ogola woluk libegesa. 15Libegesarik e, Yesus en enesaʼgo weriselat e, disogo moʼgulentesi,
“Is ap Farisi aʼge emin, at Herodes emin, eʼgen soʼboru roti aʼge poruagoluk ogola ʼbelabogwi aʼge ano ʼgelaʼge oruak ai pam wiagaphonobuano oluk, henepe heberlogo welemis o,” oluk enesaʼgo weregei. 16Asogo enesaʼgo weregeimu re, is-is nak ogulat e, disogo egesa,
“Nis soʼboru roti aʼge erlak ai en egei hegi,” oluk ogu legesema re, 17at Yesus en enak aʼge pobi enebegeitik e, disogo moʼgulentesi.
“His-his nak ogulat e,
Nis soʼboru roti aʼge mesik erlak ai en egei, oluk wene ogu legep ai nopaget. His owan henaluk om erlak pobirak erlagat welarat de, henede ʼgagalak erlak ebesik welegep yema re! 18-19His e, henil oruak aʼgeat de, hogwi erlagat, henesaʼgo oruak aʼgeat de, hologwi erlagat, welat ogu legep yema re! An en soʼboru roti aʼge huaben aʼge ʼgusogo aphwami esan 5.000 wogentegis ano meme egeptik a? Is en neʼgesarik dedilogo pegesema mul egeik aʼge meren emde loropsogo pegep no,” oluk moʼgulentesimu, is en e,
“Dua belas yagasogo pege ebano re,” oluk moʼgulegisema, 20at en e, mesik disogo moʼgulentesi,
“Ye, an en soʼboru roti aʼge ebe sabiren en ʼgusogo aphwami esanat 4.000 wogentegismu neʼgesarik dedilogo pegesa aʼge mul egeik aʼge meren emde lorophegeik yagasogo pegep no,” oluk moʼgulentesimu, is en e,
“Tujuh en yagasogo pege ebano re,” oluk moʼgulegisema, 21at en e,
“Aʼge re, his wene owan pobi tu erlak welegep yema re!” oluk moʼgulentesi.
Yesus en ap il hopnik aʼge o Betsaida aʼge obaptegei wene
22Yesus osi enemin wene asogo il il e, o Batsaida libegesa. Libegesema re, is aphwami o eba aʼge en e, ap mesik il hopnik aʼge Yesus en eʼgik tenhouwagoluk eʼbek woluk wegesarik e, eniak enerlagaik ʼgusogo moʼgulegisa. 23Moʼgulegisema re, at en ap ai eʼgik tenakho woluk o selimu en leget oʼborloma libaga. Woluk libagarik e, was il pam pesirik e, eʼgik tenak pasulat e, disogo moʼgulesi,
“Yogodak hil di aʼge yu aʼge mesik yethasu legen a? Erlak a,” oluk hin ebam wesimu re, 24at il yethesirik e, disogo moʼgulesi,
“Aphwami lagaimu yerentegis aʼgeat de, e hwi a, epegi o,” oluk moʼgulesimu re, 25at Yesus en pobuk eʼgik il pam tenak pesimu re, il dek otluk op agarik e, di aʼge yu aʼge il pobisogo yethesi. 26Il pobisogo yethesimu re, at Yesus en e, disogo moʼgulesi,
“O kota eba pobuk ʼgu erlakma en ʼbekhirat lu o,” oluk owi pam perakpesi.
Petrus en, “Hat hebe Kristus at o,” oluk ʼbaksogo Yesus moʼgulesi wene
(Matius 16:13-20; Lukas 9:18-21)
27Asogo toluk, at Yesus osi iak wogu legesa aʼge ebano en, o eba en o kota Kaisarea Filipi eba eragam oʼgwe o seli wei aʼge pema ebe loʼbok da ʼgwil ya ʼgwil louwogoluk orlu egesa. Orlu agalat e, osi ebano enebam hin wasulat e, disogo moʼgulentesi,
“Is aphwami yema en, an nebe nebaget ogulat e, sa oluk ogwi no,” oluk moʼgulentesimu re, 28is en e, disogo moʼgulegisa,
“Aphwami ado en e,
At ebe re, Yohanes ik olomu ʼbelabenebise laga aʼge ano, ogulat, is ado en e,
At ebe re, Elia o, ogulat, is ado en e,
At ebe re, ap Allah iak moʼgulontogu legesa aʼge ebano mesik ogulat, ogwi o,” oluk moʼgulegisa. 29Asogo moʼgulegisema at en e,
“Is en asogo ogwi aʼgeat de, his nak e, an nebe nebaget, sa oluk opogu legep no,” oluk moʼgulentesimu, at Petrus ano en e,
“Hat hebe re, Kristus nis delnonobuagoluk Allah en perakpou weigoluk obok moʼgulnentesi aʼge anoat o,” oluk egeimu re, 30at en osi ʼberlegat moʼgulentasulat,
“An nebe nebaget egei ai re, his en aphwami ado pema modok moʼgulentagup o,” oluk enesaʼgo weregei.
At Yesus en e, “Di wene yu wene nebam poluk watnobua ani o,” oluk naduk moʼgulentesi wene
(Matius 16:21-28; Lukas 9:22-27)
31At Yesus en asogo enesaʼgo weregeirik e, wene pobuk mesik disogo moʼgulentesi,
“An abat daklau wegi ano re, is ap enarlue aʼge emin, Allah eiye aʼge onuelak ʼgaindek emin, Allah iak pelal wogo eiye aʼge emin, enemin en an nebe enebirapnoboluk di obotut yu obotut aʼbigat taknoboluk, nebe watnobua o. Watnobuema re, nebe agauwa ʼbiren werak weleiktik e, henaganak aʼge en nelaluk eik o,” oluk 32osi ebano ʼbaksogo moʼgulentesimu re, at Petrus en e, Yesus ebe ematekma woluk lagarik e, disogo moʼgulesi,
“A! Hat egen ai asogo ogun o!” oluk esaʼgo weregeimu re, 33at Yesus en osi iak wogu legesa aʼge ebano epe edenogo il yerentesirik e, Petrus disogo oluk wene yagesi,
“Hat Iblis hegi. Allah ogola epasu aʼge hegitsogo eberise legen erlak, we, aphwami en eberogwi ʼgelaʼge eberise legen yu re! Hat hebe nologotma yema enat ʼbok lak o,” oluk wene yagesi. 34Wene yagesirik e, aphwami aʼbik ebano emin, osi iak wogu legesa aʼge ebano emin, worlentesimu wegesema re, disogo moʼgulentesi,
“Ap sa en an neʼberlik denaga leigoluk holuk e, ebabut uʼgwarek paget tago aʼge ai,
Nebit o, oluk ukpoluk e, e pam edikpoluk waronobogwi aʼge ai agan aʼgeat woluk e, an neʼberlik denaga leigoluk wemak o. 35Ye, ap sa en,
An nebe nelaluk wolom nagai o, oluk ebe erlele horlouwa holuk e, waremarik nal ema o. Aʼgeat de, ap sa en, an nebe nebaget emin, op wene yu paget emin, warema holuk e, ebe delhorlouwa o. 36Asogo aʼgeat de, ap sa en, di aʼge yu aʼge ʼgwiangma aʼge ʼberlegat eiye ema aʼgeat de, ebe nal ema holuk e, at en e,
An agaikhen elirat sabusogo pagathwerlegi o, oluk u no? Modok erlak o. 37Ebe nal ema ai ebalema re, noʼgwe aʼge eʼbirek oʼgo dip tu no. Mia o. 38Aphwami yema enebabut wiak welat Allah ebe emin opsogo wolom erlakma en, di wiak yu wiak togwi aʼge ai heneminat welat, is enil pam ap sa en,
An Yesus orat o, eselat, an niak ai moʼgulontogulat, u ebele re, emde eʼgerli ema holuk e, an abat daklau wegi ano pobuk naik erliktogwi modok welagai ʼgelaʼge takpoluk, is malaikat Allah uʼgwarek paget yoʼgo ʼbelagonobou wago aʼge ebano nenemin womultik e,
At yu an norat o, oluk niak ʼbaksogo u re, niak eʼgerliat ema o,” oluk moʼgulentesi.
Currently Selected:
Markus 8: WUL
Highlight
Share
Copy
Want to have your highlights saved across all your devices? Sign up or sign in
Free Reading Plans and Devotionals related to Markus 8
The Gospel of Mark
BibleProject | The Crucified King
Start Here | First Steps With Jesus