Matius 5

Onogola enagai ho wene

(Lukas 6:20-23)

1Aphwami aʼbik wagaimu, Yesus il yerentesirik e, dom pam ligagarik hweriogo oruakma, is at iak wogu legesa aʼge ebano eʼbek ligegesa. 2Ligegesema re, wene is enemin moʼgulentasulat e,

3“Aphwami onogola en,

An e, Allah il pam, ebe aʼge paget an nerlagaik welegi o, oluk opogwi aʼge ai, Allah eragam enebasumu eba eiye isat ema ai en e,

onogola enagaiat opogulom o.

4Ye, aphwami onogola wik-wiaksogo welagai aʼge ai, Allah en enede sebelua ai paget en e,

onogola enagaiat opogulom o.

5Aphwami enebabut enago aʼge ai re, Allah en o obok moʼgulnentesi aʼge ai re, isat eiye ema ai en e,

onogola enagaiat opogulom o.

6Ye, aphwami soʼboru emin, ik emin, nele ago ʼgelaʼge, Allah ogola epasu aʼge logo poluk tugulom enagai opogwi aʼge ai, soʼboru onogum ningsogo noʼgwi ʼgelaʼge, pobuk Allah en onogola opsogo ebe aʼge wogontouwa ai en e,

onogola enagaiat opogulom o.

7Aphwami enebe enedesogo welagai aʼge ai, nenaik Allah en is edeabonobua ai en e,

onogola enagaiat opogulom o.

8Aphwami enede mesigat degelak welagai aʼge ai, pobuk Allah ebe enil houwa ai en e,

onogola enagaiat opogulom o.

9Aphwami enemin il ʼbelak oruakma, is logon en laʼbolik onobogwi aʼge ai, at Allah en,

Yu an neiyagai o, oluk moʼgulontouwa ai en e,

onogola enagaiat opogulom o.

10Ye, aphwami en Allah ogola epasu aʼge logo pogwi aʼge paget is pema en wiagabonobogwiam, Allah eragam enebasumu eba eiye isat ema ai en e,

onogola enagaiat opogulomat o.

11-12His owan oruakhwe, pageat is ap Allah iak moʼgulontogu legesa aʼge wiagabonobogu legesa ʼgelaʼge, his an nebe paget, is aphwami pema en wene yakhontogulat, wiagaphonobogulat, eniak eseiyat honobok ogulat, di wiak yu wiak henebam pogulat, togwi holuk e, honogola henagaiat opogulom o.

Pobuk nenaik ʼbogorl pam aʼge en lok aʼge woknontouwa oluk, honogola henagai opogulat, hau worugulat, loksogo togu lemis o,” oluk moʼgulentesi.

Mayu paget emin, o dakharak paget emin, moʼgulentesi wene

(Markus 9:50; Lukas 14:34-35)

13Asogo moʼgulentesirik e,

“Aphwami yema ʼberlegat paget, mayu ʼgelaʼge hisat welegep o. Aʼge re, mayu ai orlouk erlak ago holuk e, no pam orlougap po epegep. Erlak o. Orlougap po aʼge modok erlak en e, ʼgelilogo hwikholuk aphwami onoyuk en ʼbesilogo hwikhogwi o.

14Ye, aphwami ʼgwiangma dakharak onobogwi aʼge, hisat welegep o. O kota duk ebe pam werik aʼge hisaru re, mia o. 15Esaga ʼgwialogo sogoluak lekho pogwi re, erlak o. E delak pam pogwiam aphwami olema welagai aʼge enebe ʼberlegat o dakharak enebasu. 16Ai ʼgelaʼge, his op tugumu, is pema en,

Is op togwi o, oluk, henaik ʼbogorl pam aʼge ano erliktuagoluk, his aphwami enilem ai ʼgelaʼgeat dakhasogo welemis o” oluk moʼgulentesi.

Allah en wene enesaʼgo weregei aʼge ano paget moʼgulentesi wene

17Asogo moʼgulentesirik e, mesik disogo moʼgulentesi,

“An wegi ai re, Allah iak nenesaʼgo weregei wene ano emin, is ap Allah iak moʼgulontogu legesa aʼge eniak ai emin, eniak sagaligoluk wegi erlak o. Demat emagoluk wegi o. 18An niak demat moʼgulhentaik. ʼBogorl emin, ʼgwiang emin, owan om erlak oruakhwe ya re, wene Allah en nenesaʼgo weregei aʼge ai, pelal weiyat, sobon al ʼgelaʼge emin, enasuʼgen mesigat ʼgelaʼge emin, erlak om erlakma en, modok ʼberleksogoat demat ema o. 19Holuk e, ap sa en Allah en egei wene wei aʼge mesigat holuk sebelogo poluk, is pema en asogo togu lemagoluk moʼgulentasu lema holuk e, Allah eragam enebasumu eba, at ai onuk malik wei aʼge ʼgelaʼge onogola miayat opogu lema o. Aʼge re, ap sa en Allah iak ai hegitsogo tagalat, is aphwami pema en asogoat togu lemagoluk moʼgulontogu lema holuk e, Allah eragam enebasumu eba, at ai onuk oruak ʼgelaʼgeat oruakhwe onuk logo pogu lema o. 20Allah ogola epasu aʼge hegitsogo tuogoluk, is aphwami en Allah iak pelal wogo eiye aʼge ebano emin, ap Farisi aʼge emin, enebabut togwi ai ʼgelaʼgeat togu lema holuk e, Allah eragam enebasumu eba ʼgua erlak o. Demat Allah ogola epasu aʼge ʼbekhitsogo togu lorogup holuk nak e, ʼgwi lagup o,” oluk moʼgulentesi.

Onolot het ago ai paget moʼgulentesi wene

(Lukas 12:57-59)

21Asogo moʼgulentesirik e, mesik disogo moʼgulentesi,

“Wene Allah en nis nenaʼbu neneʼbalak moʼgulentasulat e,

Aphwami waronobogup o, (Keluaran 20:13)

oluk egei aʼge ai,

Waronobogup holuk e, wene henebam pouwa aʼge oruak o, oluk egesa ano henesaʼgo holugu legebat o. 22Aʼgeat de, an en wene mesik yu moʼgulhentaik. Hat mesik en hare paget holot het ago holuk e, wene mesik hebam pouwa aʼge oruak o. Hat mesik en hare mesik moʼguleselat,

Hat hebe uo aʼge yu re! Oluk oso holuk e, is ap wene edip ʼbeloʼgogumu eba wokhoboluk loluk, wene hebam pouwayat o. Hat mesik en,

Hat hebe hede modok erlak yu re! Oluk oso holuk e, wene hebam poluk odouk orlouk aʼbikmu perakhobouwa o. 23Holuk e, hat mesik en haʼge op aʼge woluk Allah akhit pei lasulat, hogola en e,

Nare ano en e,

At wiak tegeimu, oluk wene nebam pasu, oluk huʼgwarek en hede ebetlau wago holuk e, 24woluk lagun aʼge ai Allah paget pogumu eba weat poluk, pobuk togolik hare ano eʼbek woroguntik, wene ano ʼbeliʼgogo erlagap po yo. Wene ano arat ʼbeleʼgik poluk e, pobuk laguntik Allah akhit po yo. 25Ye, ap mesik heʼbirek il ʼbelak aʼge en hat wokhoboluk ap wene edip ʼbeloʼgogumu lagaimu re, is ap eba en pobuk wokhoboluk polisi eneʼbek lagaiam e, is polisilak en pobuk wokhoboluk, eneʼgik herle wusogo onobogumu louwano oluk, heʼbirek il ʼbelak aʼge ai re, ebela owan lagalat eriayat wene ʼbeliʼgogo erlagap po yo. 26Asogo erlagap po erlak holuk e, heʼgik herle wusogo hoboma, ap ai eʼbelak hat hebam oruak aʼge ano oʼgo daksogo owan wogoum erlak oruakhwe,

liplauma modok erlak o, oluk demat moʼgulhentegis o,” oluk moʼgulentesi.

“ʼBabi yogunat togup,” oluk moʼgulentesi wene

27Asogo moʼgulentesirik, mesik eʼberlik disogo moʼgulentesi,

“At Allah en eselat e,

Hwami ʼbabi tenentagup o, (Keluaran 20:14; Ulangan 5:18)

oluk egei ai, henesaʼgo hweligebat o. 28Aʼgeat de, an en wene yu moʼgulhentaik. Ap sa en, hwe mesik il yetholuk, ogola en e,

Eige. An hwe ai ʼbabi teli e, oluk epasu holuk, ogola en ʼbabi demat arat tisoat o. 29Holuk e, hil ʼbekhit akhit en wiagaphebiso holuk e, hwelilogo hwikhomup o. Hebe ebesik odouk orloukmu hwikhia louwano oluk hwelilogo hwikholuk pema nak oruakma re, op o. 30Ye, heʼgik ʼbekhit akhit en wiagaphobu ʼgelaʼge ago holuk e, heʼgik ʼbekhit akhit ai daksogo hwikhomup o. Hebe ebesik odouk orloukmu hwikhia louwano oluk, daksogo hwikholuk pema akhit nak oruakma op o,” oluk moʼgulentesi.

“Hwami lologo ugenebagup o,” oluk moʼgulentesi wene

(Matius 19:9; Markus 10:11-12; Lukas 16:18)

31Asogo moʼgulentesirik, eʼberlik mesik disogo moʼgulentesi,

“Wene mesik pageat moʼgulentasulat e,

Ap mesik ugwe lologo ukpaiyogoluk holuk e,

An hwe yu ukpaik o, oluk, suesiʼga ʼbalogo re, hwe ai wogomat o, (Ulangan 24:1-4)

oluk egeiyat. 32Asogo aʼgeat de, an en wene mesik yu moʼgulhentaik. Ap mesik ugwe wogo aʼge, is ap pema en ʼbabi tu erlakmayat de, lologo ukpasu holuk, hwe ai ʼbabi tuagoluk ukpesi o. Ye, at ap mesik en, hwe lologo pouwa age ano wasu holuk, ʼbabiat wouwa o,” oluk moʼgulentesi.

“Hoʼbuk ʼbalu puk o,” oluk moʼgulentesi wene

33Asogo moʼgulentesirik, mesik disogo moʼgulentesi,

“Wene mesik yu, Allah en nenaʼbu neneʼbalak ebano moʼgulentasulat e,

His heniak eseiyat an henaik Allah nonuk hoʼbuk ʼbalogup o.

An disogo tik o, oluk an nonuk hoʼbuk ʼbalogup holuk e, henaik ʼgain Nonuk Logo aʼge nilem egep ʼgelaʼgeat tip o. (Imamat 19:12)

oluk wene egei aʼge henesaʼgo hologu legebat o. 34Aʼgeat de, an en mesik yu moʼgulhentaik o. His en e, at ap mesik moʼgulogulat,

Di aʼge yu aʼge onuk hoʼbuk ʼbalogo moʼgulhegis o, oluk, moʼgulom e, mia o. Allah ebe ʼbogorl ai pam heʼberik welat wene hegirap pasu. Holuk e, ʼbogorl ai onuk hoʼbuk ʼbalu re, modok mia o. 35Nenaik Allah oyuk ʼgwiang yu pam heʼberik welago. Holuk e, ʼgwiang yu onuk hoʼbuk ʼbalogo moʼgulonto modok mia o. O kota Yerusalem ai an henaik ʼgain Nonuk Logo aʼge eba welegi o. Holuk e, o ai onuk hoʼbuk ʼbalu erlagat o. 36Yogodak e, nasu holobu om o, eselat, yogodak e, nasu sing om o, eselat, osoma heniak hologo holobu agalat, sing agalat, tago modok erlak o. Holuk e, henaʼgul ai onuk ʼbalogo hoʼbuk ʼbalu mia o. 37His en,

I o, uogoluk holuk e,

I oat u o. Ye,

Erlak o, uogoluk holuk e,

Erlagat u o. Wene muat aʼge mesik mangno ti lagup holuk e, Iblis ebabut wiak aʼge ano en honogola ʼgagalisokhwe ogup ani o,” oluk moʼgulentesi.

“His wiagaphonobogwi holuk oʼgo pagupno yo,” oluk moʼgulentesi wene

(Lukas 6:29-30)

38Asogo moʼgulentesirik, wene mesik disogo moʼgulentesi,

“Pageat wene mesik disogo egesa,

Henil hwelilogwi holuk e, oʼgo enilat hwelelu o. Ye, heniak moluktogwi holuk e, oʼgo eniagat moluktu o, (Keluaran 21:24)

oluk egesa aʼge ai henesaʼgo hologu legebat o. 39Asogo aʼgeat de, an en wene mesik yu moʼgulhentaik o. Wiagaphonobogwi holuk oʼgo pagup o. Honorogole ʼbekhit akhit laʼbuksogo wathonobogwi holuk e, hware oʼgwe eminat wathobuagoluk wogomup o. 40Is aphwami pema en, is ap wene edip ʼbeloʼgogwi aʼge ebano eneʼbek wokhonoboluk louwarik,

Hosum ogola ʼbuktak aʼge woknemin, oluk oso holuk e, ai emin, hosum sogwei sum oʼborl oʼgwe ʼbuktak aʼge ano eminat, loʼboksogo wogoum o. 41Ap mesik en iak ningsogoat eselat e,

Sum aʼge yu horok eria pei lak o, oso holuk e, his en dagansogoat enebei lu o. 42Ye, at ap mesik en,

Haʼge ai an woknemin, oluk ʼgonu oso holuk e, henebit opo erlakma en e, wogomubat o. At ap mesik en,

Hat en aʼge ai pobuk wokheik en e, lodu mesik woknemin, oluk oso holuk e,

Nebit, u erlakma en wogoumat o,” oluk moʼgulentesi.

“Aphwami enemin il ʼbelak aʼge ai henedesogo wolom o,” oluk moʼgulentesi wene

(Lukas 6:27-28, 32-36)

43Asogo moʼgulentesirik e, mesik disogo moʼgulentesi,

“Pageat is pema en e, wene disogo moʼgulentigisa,

His en aphwami henemin welegep aʼge henede hwedik welat e, (Imamat 19:18)

is pema enemin il ʼbelak aʼge holuk e, henebirabat onobo yo, oluk egesa aʼge ai henesaʼgo hologu legebat ai o. 44-45Asogo aʼgeat de, an en wene mesik yu moʼgulhentaik ai o. At nenaik Allah ʼbogorl pam aʼge mo eiye welat ʼgwiangma dakhasogo aphwami enebabut wiak aʼge emin, op aʼge emin, ʼberlegat enebaget yogo pasu o. Ye, moru ʼbelakpobu ago ai re, is ʼbekhitsogo togwi aʼge et, dagansogo togwi aʼge et, ʼberlegat enebaget ʼbelakpou wagalat, tiso ai ʼgelaʼge, his henaik Allah ʼbogorl pam aʼge eiyagai emagoluk, aphwami enemin il ʼbelak aʼge ai henedeabonobogulat e, is wiagaphonobogwi aʼge ai, Allah en obabonobuagoluk, is enebaget seʼban ogu lomup o. 46Ye, is aphwami pema en, his enedeaphonobogwi aʼge ai nak his en henedeabonobogu lorogup holuk e, Allah en oʼgo wokhontouwa no? Erlak o. Ai ʼgelaʼge re, is ap pemerintah aʼge paget uang ʼgonu oluk odoktogwi aʼge ai re, enebabut asogoat togwi o. 47Henarilak honorokhwi holuk nak e, hau waronobogu legep holuk, his nak henebabut ai ʼgelaʼge togu legep puk o. Is aphwami oʼborlma aʼge enebabut asogoat togwi erlak no? Asogoat togwi o. 48Holuk e, nenaik Allah ʼbogorl pam aʼge ebabut op modok ʼgaroktak welat edeabenebiso ʼgelaʼge, his asogoat henedeabonobogu lomup o,” oluk moʼgulentesi.

Currently Selected:

Matius 5: WUL

Highlight

Copy