Matius 4
4
Iblis en Yesus ede ʼgagaligoluk eʼbek waga laga wene
(Markus 1:12-13; Lukas 4:1-13)
1Ik olomu ʼbelabegeimu re, Yesus ano Iblis en ede ʼgagaluagoluk Allah Arogun en woluk o leimu aphwami erlakma ebano laga. 2Eba pei lagama welat e, o hup agalat, dakha eselat, tagokhwe agauwa 40 pam soʼboru hwenik welat e, soʼboru nele aʼbik aga. 3Soʼboru nele aʼbik agama re, at Iblis enede ʼgagalil denago aʼge ano en eʼbek wagarik e,
“Hat Allah omlogo demat holuk e, helep yema soʼboru roti aʼge ʼgelaʼge emagoluk moʼgulemin o,” oluk moʼgulesimu re, 4at Yesus en eselat e,
“Allah en e,
Aphwami soʼboru nak noʼgwi holuk e, enelaluk modok welagai erlak o. An Allah en niak oso aʼge ai ʼberlegat wogwi holuk, enelaluk modogat welema o, (Ulangan 8:3)
oluk egeimu re, pelal wokho pegesema oruak o,” oluk moʼgulesi. 5Asogo moʼgulesimu re, pobuk at Iblis en Yesus woluk, o kota Allah uʼgwarek owi seli lokma ano lagarik e, o Allah owi dum yat werik aʼge ano pam pei ligagarik e, 6disogo moʼgulesi,
“At Allah en,
Hat hoyuk helep pam dungsogo wathwerlagunno oluk, an nosi malaikat ʼbogorl pam en yoʼgo peragonobou waga legi aʼge ebano eneʼgik delakma wokhobuagoluk moʼgulentaik o, (Mazmur 91:11-12)
oluk egeimu pelal wogo oruak aʼge ai, hat demat Allah omlogo holuk e, ʼgolokho orogobu ʼbin o,” oluk moʼgulesi.
7Asogo moʼgulesimu, at Yesus en e,
“Allah en eselat e,
His en e, an henaik Allah Nonuk Logo aʼge nanni oruak a? Erlak a, oluk nebabut ʼbalogup no yo, (Ulangan 6:16)
oluk egeimu pelal wokho pegesema oruak o,” oluk moʼgulesi.
8Asogo moʼgulesimu re, pobuk at Iblis en Yesus woluk dom lok yat aʼge mesik aʼgul pam ligagarik e, o ʼgwiangma di owi yu owi ap ʼgain ononuk logo aʼge en tenentarok welagai oʼgwe loʼbok ʼberlegat, di aʼge yu aʼge aʼbik oruakma selakma poluk il yethouwagoluk moʼguleselat e,
9“Yesus. Hat hodogorlu pam welat neragam ʼgu oroguntik erliknobogun holuk, hil yethegen aʼge eba ʼberlegat perlengsogo hat wokheik,” oluk moʼgulesimu re,
10at Yesus en e,
“Hat Iblis yu lak o. Allah en eselat e,
His en e, henaik Allah ʼgain Nonuk Logo aʼge anatma re, hondogorlu pam neragam ʼgu oroguptik erliknobugulat e, an nebaget nak togu lomup o, (Ulangan 6:13)
egeimu pelal wokho pegesema oruak o,” oluk moʼgulesi.
11Asogo moʼgulesimu re, Iblis ano Yesus ukpoluk ʼbok lagama re, malaikat ʼbogorl pam en Yesus eʼbek ʼbu agarik e, ʼgwelakharok welegesa.
At Yesus o Galilea orlu agarik taga laga wene
(Markus 1:14-15; Lukas 4:14-15)
12“At Yohanes ano eʼgik herle werigisa o,” oluk egesema, at Yesus esaʼgo hwelegeitik e, o Galilea doʼgo orlu aga. 13Orlu agarik, o seli Nazaret ano ukpoluk e, o kota Kapernaum ik Galilea yeʼgelak esaʼgoma, is ap enaʼgul onuk Zebulon aʼge emin, Naftali aʼge emin, onowi pam eba weleigoluk orlu aga. 14Orlu agama re, at Yesaya Allah iak moʼgulentasu laga aʼge ano en pelal wasulat,
15“His ap henaʼgul onuk Zebulon aʼge emin, Naftali aʼge emin, honowi ik Yordan etle akhit werik aʼge emin, ik laut lok yeʼgelakma ʼbi lagai oʼgwe werik aʼge ebano emin, honowi o Galilea doʼgo eba re, is ap oʼborlma aʼge en sebelak oruak yema logwe!
16o hiktakma welegep aʼge ai, o dakharak honobouwa aʼge lok aʼge mesik hegep o. His o eba waromogoluk henebam hiktak oruakma, dakharak honobouwa aʼge mesik waga ai o,” (Yesaya 9:1-2)
egei ano hegitsogoat emagoluk Yesus eba orlu aga ai o.
17Orlu agarik welat, hwerli ai hwerli en, aphwami eba moʼgulentasulat e,
“ʼGain ʼbogorl pam aʼge en eragam honobouwa ano yogodak arat eragam honobouwa o. Holuk e, his di wiak yu wiak togu legep aʼge ukpoluk henebabut heberlemis o,” oluk moʼgulentil denaga laga.
Yesus en e, osi naduk yoʼgo enebesi wene
(Markus 1:16-20; Lukas 5:1-11)
18At Yesus ano ik Galilea yeʼgelak esaʼgoʼgwe lasulat e, ap enebe ʼbiren, Simon onuk mesik Petrus ogu lege aʼge ano ot Andreas eʼbirek nin hwedik nan hwedik hianeat wogumu no oluk e, ai erlige hiane wouwogoluk, sum hiane sum ik olomu ʼbelabugukhwe il yerentasi. 19Yerontoluk e,
“Hiane wogu legep ai ʼgelaʼge, aphwami asogoat wogenebil denaga lorogup en, moʼgulhentaik en an neʼberlik manis o,” oluk moʼgulentesimu re, 20erianoat onosum hiane sum egeik aʼge ano ukpoluk at eʼberlik legesa. 21Legesema, at Yesus il yerentesi ʼgal e, ap enebe ʼbiren Zebedeus eiyagai Yakobus ot Yohanes eʼbirek enaik emin, so ogola welat, sum hiane wogwi aʼge terleben tugumu yerentesirik e, worlentesi. 22Worlentesimu re, so ano emin, enaik Zebedeus ano emin, erianoat onoboluk e, is Yesus eʼberligat legesa.
At Yesus en wene moʼgulentasulat, ou wiak aʼge helingenebiselat, taga laga wene
(Lukas 6:17-19)
23Legesema re, at Yesus o Galilea doʼgo o loʼbok eba denagalat e, aphwami Yahudi aʼge seʼban il ʼgwi lagaimu ebano ʼgwi lasulat e, wene op wene pobuk nenaik ʼgain Onuk Logo aʼge eragam nonobouwa ano wene moʼgulentasulat, di ou yu ou obabenebiselat, tagenebil denaga laga. 24Asogo tagenebil nosoma, obok o Siria eba modok saga egeimu re, di ou yu ou, di hwarl yu hwarl, enebam oruak aʼge emin, muʼgat wiak aʼge onogola ʼgwi lasulat enebabut lugwi-lugwi ʼbalogwi aʼge emin, waragalat enelaluk agalat togwi aʼge emin, eneʼgik onoyuk ut werak aʼge emin, eʼbek wogonoboluk wagaiam enebe ʼberlek helingenebise laga. 25Asogo helingenebisokhwe re, aphwami ʼberlek o Galilea en, o kota 10 eba en, Yerusalem en, Yudea en, ik Yordan etle akhit aʼge eba en, modok aʼbik wagalat e, Yesus eʼberlik noʼgu legesa.
Currently Selected:
Matius 4: WUL
Highlight
Share
Copy
Want to have your highlights saved across all your devices? Sign up or sign in
