Matius 28

Yesus ebe elaluk aga wene

(Markus 16:1-10; Lukas 24:1-12; Yohanes 20:1-10)

1Asogo tigisarik agauwa sabit aʼge pam Allah paget weat welegesarik en, hubet oʼgwe hari Minggu pam, mo ʼgerat pou wagokhwe, at hwe Maria owi Magdala aʼge ano emin, hwe Maria agaikhen ano emin, Yesus werak pegesema enil ʼgwelakhouwogoluk wegesa. 2Wagaihwe erianoat, mouk lok aʼge erlang-perlang hasukhwe malaikat Allah ʼbogorl pam en yoʼgo ʼbelagonobou ago aʼge mesik ʼbu agarik, ʼgoduk helep aʼge dopnosogo larigisa aʼge ano erlebilogo poluk e, ebam huraga. 3At malaikat ano orogole re, obinal ʼgelaʼge tagalat e, osum ʼbuktak aʼge orogole ʼgut modok amulit yebekhesi. 4Asogo tegeimu, is ap ʼgagalak welegesa aʼge ebano onogorlok en onuak lup ʼbo pogulat e, aphwami werak aʼge ʼgelaʼge enanni modok erlak agalat, takpegesa. 5Ye, at malaikat ano en e, is hwami ebano moʼgulentasulat e,

“Honogorlok hagup o. His e, Yesus e pam edikpoluk werigisa aʼge ano henil houwogoluk heratogu legep ai, an naluk o. 6Aʼge re, ebe yema erlak o. At en moʼgulhentesi ʼgelaʼge, Allah en elalugap pesimu oruak o. At welagama ebale nak yema henil ʼgwelakhau manis o. 7ʼGwelakholuk e,

Yesus ano waragama Allah en elalugaptegeimu o, oluk, at osi iak wogu legesa aʼge ebano perleneat moʼgulentai lu o. Ye, his o Galilea owan lo erlak oruakhwe, at naduk louwarik oruakma henil hai lagup ani o. Holuk e, niak moʼgulhentegis ai eberak welemis o,” oluk moʼgulentesimu, 8is hwami ebano owikmu eba en lagalat onogorlok aʼbik hegesa aʼgeat de, pobuk onogola enagai aʼbik hil hilat, at osi iak wogu legesa aʼge ebano eneʼbek pungtagat moʼgulentai legesa. 9Moʼgulontouwogoluk lagaimu ebela pam ebano at Yesus emin sarlok tigisarik e, disogo moʼgulentesi,

“Norokhwi o!” oluk moʼgulentesimu, is hwami ebano horok-horok legesarik e, oyuk eneʼgik tenak pogulat e, hau wusogo ondogorlu pam huregesarik erliktigisa. 10Erliktigisema, at Yesus en e,

“Honogorlok hagup o. An nosi ebano o Galilea ligemagoluk, moʼgulentai lu o. Eba ligemarik enil niouwa o,” oluk moʼgulentesi.

Eniak eseiyat, “Yesus werak hisatluk libegesema oluk moʼgulontomup o,” oluk moʼgulentigisa wene

11Asogo moʼgulentesimu, is hwami eriano owan lagaihwe, is ap ʼgagalak welegesa aʼge ebano pema o kotama ʼgwigisarik e, wene ʼberlegat aga aʼge ebano,

“Disogo aga o,” oluk, is ap Allah eiye aʼge onuelak ʼgaindek ebano en modok ʼbeling-ʼbelangsogo moʼgulentigisa. 12Asogo moʼgulentigisema re, is emin, is ap enarluedek ebano emin, enemin enebe odoktak poluk wene ʼbil-ʼbal e, is ap tentara aʼge ebano uang perak aʼge aʼbigat wogontugulat e, 13disogo moʼgulentigisa,

“His en e,

Hubaʼgo nis nogogukhwe, at Yesus iak wogu legesa aʼge ebano wegesarik Yesus werak hisatluk libegesema o, oluk moʼgulontogu lomup o. 14Wene aga aʼge ai paget e, at gubernur esaʼgo holua holuk e, his wene henebam emano oluk, nis en e, at ogola ʼgagaluok o,” oluk egesema re, 15is ap tentara aʼge uang ebano hwerlegesarik e, is ap ebano en egesa hegitsogoat tigisa. Wene asogo sagarak pegesema re, is aphwami Yahudi aʼge en e, yogodak hwerli ogo ogwiat oruak o.

At Yesus en e, “Op wene moʼgulentil laga lomup o,” oluk moʼgulentesi wene

(Markus 16:14-18; Lukas 24:36-49; Yohanes 20:19-23; Peragenebesi 1:6-8)

16At Yesus en osi iak wogu legesa aʼge enebe 11 ebano moʼgulentasulat e,

“O Galilea laguptik dom ai pam ligoroguptik wolomup o,” oluk, wene weragenebesi hegitsogoat legesarik ligegesa. 17Ligegesarik oruakma at Yesus ebe enil hegesarik e, hau wusogo ondogorlu pam hweriogo welat erliktugukhweat de, is pema akhit nak e,

“At ebeat a? Ye, at e, puk a,” oluk epegesa. 18Asogo opogukhwe, at Yesus ebe eneragam wagarik e, disogo moʼgulentesi,

“Allah en ʼbogorl pam aʼge emin, ʼgwiangma aʼge emin, ʼberlegat e, an eiye taknebesimu o. 19-20Holuk e, di aphwami yu aphwami enaʼgul onuk loʼbok ʼberlegat an nosi emagoluk, naik Allah onuk pam, omlogo an nonuk pam, Arogun onuk pam, nononuk ʼbalogo ik olomu ʼbelabonobogulat, an en wene henesaʼgo weregis aʼge ai ʼberlegat is aphwami en hegitsogo togu lemagoluk moʼgulontogulat, til laga lomup o. Yethemit! His asogo tagenebil lagaimu re, an nebe henemin modok oruakma en, hwerli o ologun pam en nak ema o,” oluk moʼgulentesi.

Currently Selected:

Matius 28: WUL

Highlight

Copy